ਤਰਨਤਰਨ ਦੇ ਜੰਡਿਆਲਾ ਰੋਡ ਦਾ ਰੇਲਵੇ ਫਾਟਕ ਬਣਿਆ ਰਾਹਗੀਰਾਂ ਲਈ ਵੱਡੀ ਮੁਸੀਬਤ

ਗੁਰਪ੍ਰੀਤ ਸਿੰਘ ਕੱਦਗਿੱਲ•,ਪੰਜਾਬੀ ਜਾਗਰਣ, ਤਰਨਤਾਰਨ : ਸ਼ਹਿਰ ਦੇ ਮੁੱਖ ਮਾਰਗ ਵਜੋਂ ਜਾਣੇ ਜਾਂਦੇ ਜੰਡਿਆਲਾ ਰੋਡ ’ਤੇ ਸਥਿਤ ਬਣਿਆ ਰੇਲਵੇ ਫਾਟਕ ਇਥੋਂ ਲੰਘਣ ਵਾਲੇ ਲੋਕਾਂ ਦੀ ਵੱਡੀ ਸਿਰਦਰਦੀ ਬਣਿਆ ਹੋਇਆ ਹੈ। ਵੱਖ ਵੱਖ ਸਰਕਾਰਾਂ ਸਮੇਂ ਇਥੇ ਫਲਾਈ ਓਵਰ ਬਣਾਉਣ ਦੇ ਵਾਅਦੇ ਵੀ ਲੋਕਾਂ ਨਾਲ ਹੁੰਦੇ ਰਹੇ, ਪਰ ਅਜੇ ਤੱਕ ਲੋਕਾਂ ਨੂੰ ਅਜਿਹੀ ਕੋਈ ਰਾਹਤ ਨਸੀਬ ਨਾ ਹੋ ਸਕੀ। ਜਿਸਦੇ ਚੱਲਦਿਆਂ ਅੰਮ੍ਰਿਤਸਰ-ਖੇਮਕਰਨ ਰੇਲਵੇ ਮਾਰਗ ’ਤੇ ਬਣੇ ਇਸ ਲਾਂਘੇ ’ਤੇ ਦਿਨ ਵਿਚ ਕਈ ਵਾਰ ਫਾਟ ਬੰਦ ਹੋਣ ਕਾਰਨ ਵੱਡੇ ਜਾਮ ਲੱਗ ਜਾਂਦੇ ਹਨ ਅਤੇ ਰਾਹਗੀਰ ਜਾਨ ਜੋਖਮ ਵਿਚ ਪਾ ਕੇ ਫਾਟਕ ਦੇ ਹੇਠਾਂ ਦੀ ਆਪਣੇ ਦੋ ਪਹੀਆ ਵਾਹਨ ਲੰਘਾਉਂਦੇ ਹਨ। ਜਦੋਂਕਿ ਪੁਰਾਣੇ ਬਾਈਪਾਸ ਉੱਪਰ ਪੁਲ ਦੇ ਨਿਰਮਾਣ ਕਾਰਨ ਰਸਤਾ ਬੰਦ ਹੋਣ ਕਾਰਨ ਇਸ ਮਾਰਗ ਦੀ ਵਰਤੋਂ ਵਿਚ ਭਾਰੀ ਵਾਧਾ ਹੋਇਆ ਹੈ। ਜਿਸਦੇ ਚੱਲਦਿਆਂ ਫਾਟਕ ਬੰਦ ਹੋਣ ਦੌਰਾਨ ਲੰਮੇ ਲੰਮੇ ਜਾਮ ਲੱਗ ਜਾਂਦੇ ਹਨ।

ਤਰਨਤਾਰਨ ਦੇ ਬੋਹੜੀ ਵਾਲਾ ਚੌਂਕ ਤੋਂ ਜੰਡਿਆਲਾ ਰੋਡ ਮਾਰਗ ਸ਼ਹਿਰ ਦਾ ਸਭ ਤੋਂ ਵਿਅਸਤ ਰਹਿਣ ਵਾਲਾ ਲਾਂਘਾ ਹੈ। ਜਿਥੋਂ ਹਰ ਰੋਜ ਹਜਾਰਾਂ ਵਾਹਨ ਨਿਕਲਦੇ ਹਨ। ਸ਼ਹਿਰ ਦੇ ਬੱਸ ਅੱਡੇ ਤੇ ਅਨਾਜ ਮੰਡੀ ਤੋਂ ਇਲਾਵਾ ਮਾਰਕੀਟ ਕਮੇਟੀ ਦਫਤਰ, ਆਰਟੀਏ ਦਫਤਰ, ਪੰਜਾਬ ਰੋਡਵੇਜ ਵਰਕਸ਼ਾਪ ਸਮੇਤ ਫੋਕਲ ਪਵਾਇੰਟ ਆਦਿ ਵਰਗੇ ਮਹੱਤਵਪੂਰਨ ਅਦਾਰਿਆਂ ਦੇ ਨਾਲ ਨਾਲ ਇਸ ਮਾਰਗ ਉੱਪਰ ਸੀਕੇਡੀ ਦਾ ਵੱਡਾ ਸਕੂਲ, ਕਾਲਜ, ਬੈਂਕਾਂ ਅਤੇ ਕਈ ਹਸਪਤਾਲ ਵੀ ਮੌਜੂਦ ਹਨ। ਇੰਨਾ ਹੀ ਨਹੀਂ ਫਾਟਕ ਦੇ ਪਾਰ ਨਵੀਆਂ ਵੱਸੀਆਂ ਕਾਲੋਨੀਆਂ ਵਿਚ ਹਜ਼ਾਰਾਂ ਦੀ ਅਬਾਦੀ ਵੀ ਹੈ, ਜਿਨ੍ਹਾਂ ਨੂੰ ਸ਼ਹਿਰ ’ਚ ਖਰੀਦਦਾਰੀ ਜਾਂ ਹੋਰ ਜਰੂਰੀ ਕੰਮਾਂ ਲਈ ਆਉਣਾ ਪੈਂਦਾ ਹੈ। ਜਾਂ ਫਿਰ ਉਨ੍ਹਾਂ ਦੇ ਬੱਚੇ ਇਸ ਫਾਟਕ ਨੂੰ ਪਾਰ ਕਰਕੇ ਸ਼ਹਿਰ ਵਿਚਲੇ ਸਕੂਲਾਂ ਵਿਚ ਪੜ੍ਹਨ ਆਉਂਦੇ ਹਨ। ਕਈਆਂ ਸਰਕਾਰੀ ਕੰਮਾਂ, ਪ੍ਰਾਈਵੇਟ ਕਾਰੋਬਾਰਾਂ ’ਤੇ ਵੀ ਇਸੇ ਰੇਲਵੇ ਫਾਟਕ ਨੂੰ ਪਾਰ ਕਰਕੇ ਆਉਣਾ ਪੈਂਦਾ ਹੈ। ਇਸੇ ਤਰ੍ਹਾਂ ਹੀ ਸ਼ਹਿਰ ਤੋਂ ਬੱਸ ਅੱਡੇ ਦੇ ਨਾਲ ਨਾਲ ਜਲੰਧਰ ਆਦਿ ਸਮੇਤ ਕਈ ਸ਼ਹਿਰਾਂ ਤੱਕ ਪਹੁੰਚ ਕਰਨ ਲਈ ਇਸੇ ਰਾਹ ਨੂੰ ਪਾਰ ਕਰਨਾ ਪੈਂਦਾ ਹੈ, ਜੋ ਕਿਸੇ ਵੱਡੇ ਪਹਾੜ ਤੋਂ ਲੰਘਣ ਦੇ ਘੱਟ ਸਾਬਤ ਨਹੀਂ ਹੁੰਦਾ। ਅਕਾਲੀ ਦਲ ਦੇ ਸਰਕਾਰ ਸਮੇਂ ਜਿਥੇ ਰੇਲਵੇ ਫਾਟਕ ’ਤੇ ਓਵਰ ਬ੍ਰਿੱਜ ਬਣਾਉਣ ਦੀ ਮੰਗ ਉੱਠਦੀ ਰਹੀ ਹੈ। ਉਥੇ ਹੀ ਕਾਂਗਰਸ ਸਰਕਾਰ ਵੇਲੇ ਤਾਂ ਬਜਟ ਵਿਚ ਮਨਜੂਰੀ ਮਿਲਣ ਦੀ ਗੱਲ ਵੀ ਉਸ ਵੇਲੇ ਦੇ ਆਗੂਆਂ ਵੱਲੋਂ ਕਹਿ ਕੇ ਵਾਹ ਵਾਹ ਖੱਟੀ ਗਈ। ਪਰ ਅਖੀਰ ਲੋਕਾਂ ਦੇ ਪੱਲੇ ਨਿਰਾਸ਼ਾ ਹੀ ਪਈ। ਸ਼ਹਿਰ ਨੂੰ ਬਾਈਪਾਸ ਨਾਲ ਜੋੜਨ ਵਾਲੀ ਇਸ ਸੜਕ ਦੇ ਇਸ ਰੇਲਵੇ ਫਾਟਕ ਤੋਂ ਅੱਠ ਵਾਰ ਰੇਲ ਗੱਡੀ ਅੰਮ੍ਰਿਤਸਰ ਤੋਂ ਖੇਮਕਰਨ ਆਉਂਦੀ ਜਾਂਦੀ ਹੈ। ਜਿਸ ਕਾਰਨ ਇਹ ਫਾਟਕ ਦਿਨ ’ਚ ਅੱਠ ਵਾਰ ਤਾਂ ਬੰਦ ਹੁੰਦਾ ਹੀ ਹੈ, ਨਾਲ ਹੀ ਸਪੈਸ਼ਲ ਗੱਡੀਆਂ ਲੱਗਣ ਦੌਰਾਨ ਅਨੇਕਾਂ ਵਾਰ ਕਈ ਕਈ ਚਿਰ ਬੰਦ ਰਹਿੰਦਾ ਹੈ। ਜਿਸਦੇ ਚੱਲਦਿਆਂ ਫਾਟਕ ਦੇ ਦੋਵੇਂ ਪਾਸੇ ਕਈ ਕਈ ਸੌ ਮੀਟਰ ਜਾਮ ਲੱਗ ਜਾਂਦੇ ਹਨ। ਜੋ ਫਾਟਕ ਖੁੱਲ੍ਹਣ ਦੇ ਬਾਵਜੂਦ ਲੰਮਾ ਸਮਾਂ ਨਹੀਂ ਖੁੱਲਦੇ। ਰਾਹਗੀਰ ਅਰਵਿੰਦਰ ਸਿੰਘ ਰਵੀ, ਰੁਪਿੰਦਰ ਸਿੰਘ, ਰਣਬੀਰ ਸਿੰਘ, ਤੇਜਿੰਦਰ ਸਿੰਘ ਨੇ ਕਿਹਾ ਕਿ ਜਰੂਰੀ ਕੰਮ ’ਤੇ ਜਾਣ ਦੌਰਾਨ ਜੇਕਰ ਫਾਟਕ ਬੰਦ ਹੋ ਜਾਵੇ ਤਾਂ ਭਾਰੀ ਸਮਾਂ ਬਰਬਾਦ ਹੋ ਜਾਂਦਾ ਹੈ। ਬੱਸ ਅੱਡੇ ਤੋਂ ਆਪਣੀ ਮੰਜਿਲ ਲਈ ਜਾਣ ਵਾਲੀਆਂ ਸਵਾਰੀਆਂ ਨੂੰ ਵੀ ਕਈ ਵਾਰ ਦੇਰੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।

===

ਪੁਰਾਣਾ ਬਾਈਪਾਸ ਬੰਦ ਹੋਣ ਕਾਰਨ ਹਲਾਤ ਹੋਰ ਵੀ ਗੰਭੀਰ ਬਣੇ

ਪਹਿਲਾਂ ਹੀ ਸ਼ਹਿਰੀ ਟਰੈਫਿਕ ਦੀ ਮਾਰ ਝੱਲ ਰਹੇ ਇਸ ਜੰਡਿਆਲਾ ਰੋਡ ’ਤੇ ਇਸ ਵੇਲੇ ਟਰੈਫਿਕ ਦਾ ਭਾਰੀ ਦਬਾਅ ਇਸ ਕਰਕੇ ਵੀ ਵਧ ਗਿਆ ਹੈ। ਕਿਉਂਕਿ ਪੁਰਾਣੇ ਬਾਈਪਾਸ ’ਤੇ ਰੇਲਵੇ ਫਾਟਕ ਉੱਪਰ ਓਵਰ ਬ੍ਰਿੱਜ ਦੀ ਉਸਾਰੀ ਚੱਲਣ ਕਰਕੇ ਉਹ ਰਸਤਾ ਬੰਦ ਹੈ। ਕਈ ਸ਼ਹਿਰਾਂ ਤੋਂ ਆਉਣ ਵਾਲੇ ਵੱਡੀ ਗਿਣਤੀ ਵਾਹਨਾਂ ਨੂੰ ਇਸ ਮਾਰਗ ਤੋਂ ਲੰਘਣਾ ਪੈਂਦਾ ਹੈ। ਕਈ ਅਜਿਹੇ ਰੂਟ ਵੀ ਹਨ, ਜਿਨ੍ਹਾਂ ’ਤੇ ਚੱਲਣ ਵਾਲੀਆਂ ਬੱਸਾਂ ਨੂੰ ਵੀ ਪੁਰਾਣੀ ਸੜਕ ਬੰਦ ਹੋਣ ਕਾਰਨ ਇਥੋਂ ਲੰਘਣਾ ਪੈ ਰਿਹਾ ਹੈ। ਇਸ ਤੋਂ ਇਲਾਵਾ ਲੋਡ ਟਰੱਕ ਹੋਣ ਜਾਂ ਹੋਰ ਭਾਰੇ ਵਾਹਨ, ਸਾਰਿਆਂ ਦੀ ਆਮਦ ਸ਼ਹਿਰ ਵਿਚਦੀ ਹੋਣ ਕਰਕੇ ਜੰਡਿਆਲਾ ਰੋਡ ’ਤੇ ਸਾਰਾ ਦਿਨ ਲੱਗਣ ਵਾਲੇ ਜਾਮ ਲਗਾਤਾਰ ਲੰਮੇ ਹੋ ਰਹੇ ਹਨ।