ਸ਼ਹਿਰ ’ਚ ਨਿਯਮਾਂ ਦੀ ਉਲੰਘਣਾ ਕਰਕੇ ਸ਼ਰੇਆਮ ਘੁੰਮ ਰਹੇ ਟਿੱਪਰ

ਸੀਨੀਅਰ ਰਿਪੋਰਟਰ, ਪੰਜਾਬੀ ਜਾਗਰਣ, ਪਟਿਆਲਾ : ਸ਼ਹਿਰ ਦੀਆਂ ਸੜਕਾਂ ਤੇ ਅੱਜ-ਕੱਲ੍ਹ ਟਿੱਪਰ ਚਾਲਕ ਸ਼ਰੇਆਮ ਨਿਯਮਾਂ ਦੀ ਉਲੰਘਣਾ ਕਰ ਰਹੇ ਹਨ। ਓਵਰਲੋਡਿੰਗ ਤੋਂ ਲੈ ਕੇ ਬਿਨਾਂ ਨੰਬਰ ਪਲੇਟ ਅਤੇ ਤੇਜ਼ ਰਫਤਾਰ ਨਾਲ ਟਿੱਪਰ ਗੁਜ਼ਰ ਰਹੇ ਹਨ, ਜਿਨ੍ਹਾਂ ਨੂੰ ਰੋਕਣ ਲਈ ਟ੍ਰੈਫਿਕ ਪੁਲਿਸ ਵੀ ਕੁਝ ਨਹੀਂ ਕਰ ਪਾ ਰਹੀ। ਸਮਾਣਾ-ਪਟਿਆਲਾ ਰੋਡ ਤੇ ਟਿੱਪਰ ਦੀ ਟੱਕਰ ਨਾਲ ਸਕੂਲੀ ਬੱਚਿਆਂ ਦੀ ਮੌਤ ਤੋਂ ਬਾਅਦ ਤਤਕਾਲੀ ਡੀਸੀ ਪ੍ਰੀਤੀ ਯਾਦਵ ਨੇ ਦਿਨ ਵੇਲੇ ਟਿੱਪਰ ਚਲਾਉਣ ਤੇ ਰੋਕ ਲਗਾ ਦਿੱਤੀ ਸੀ, ਪਰ ਮਹੀਨਿਆਂ ਬਾਅਦ ਇਹ ਨਿਰਦੇਸ਼ ਵੀ ਫੇਲ੍ਹ ਹੋ ਗਏ ਹਨ। ਪੁਲਿਸ ਅਤੇ ਪ੍ਰਸ਼ਾਸਨ ਦੀ ਇਸ ਲਾਪਰਵਾਹੀ ਦਾ ਫਾਇਦਾ ਉਠਾਉਂਦੇ ਹੋਏ ਟਿੱਪਰ ਚਾਲਕ ਸੜਕਾਂ ਤੇ ਟ੍ਰੈਫਿਕ ਨਿਯਮ ਤੋੜ ਰਹੇ ਹਨ, ਜੋ ਕਿਸੇ ਵੀ ਸਮੇਂ ਵੱਡੇ ਹਾਦਸੇ ਦਾ ਕਾਰਨ ਬਣ ਸਕਦੇ ਹਨ। -ਨਵੇਂ ਬੱਸ ਸਟੈਂਡ ਇਲਾਕੇ ਦੇ ਹਾਲਾਤ ਉਂਝ ਤਾਂ ਸ਼ਹਿਰ ਦੇ ਸਾਰੇ ਇਲਾਕਿਆਂ ਵਿਚ ਟਿੱਪਰ ਚਾਲਕਾਂ ਦੀ ਲਾਪਰਵਾਹੀ ਦਿਖਾਈ ਦਿੰਦੀ ਹੈ, ਪਰ ਨਵੇਂ ਬੱਸ ਸਟੈਂਡ ਦੇ ਆਲੇ-ਦੁਆਲੇ ਮਾਮਲਾ ਜ਼ਿਆਦਾ ਗੰਭੀਰ ਹੈ। ਇੱਥੇ ਸਮਾਣਾ ਅਤੇ ਸੰਗਰੂਰ ਸਾਈਡ ਤੋਂ ਆਉਣ ਵਾਲੇ ਟਿੱਪਰਾਂ ਨੂੰ ਸਰਹਿੰਦ ਰੋਡ ਤੇ ਜਾਣ ਲਈ ਨਵੇਂ ਬੱਸ ਸਟੈਂਡ ਚੌਕ ਤੋਂ ਗੁਜ਼ਰਨਾ ਪੈਂਦਾ ਹੈ। ਇੱਥੇ ਚੌਕ ਤੇ ਪੁਲਿਸ ਤਾਇਨਾਤ ਤਾਂ ਹੁੰਦੀ ਹੈ ਪਰ ਇਨ੍ਹਾਂ ਟਿੱਪਰਾਂ ਨੂੰ ਰੋਕਣ ਦਾ ਜੋਖਮ ਨਹੀਂ ਉਠਾਇਆ ਜਾਂਦਾ। ਇੱਥੋਂ ਤੱਕ ਕਿ ਟਿੱਪਰ ਚਾਲਕ ਟ੍ਰੈਫਿਕ ਸਿਗਨਲ ਵੀ ਜੰਪ ਕਰਦੇ ਹਨ, ਜਿਸ ਦੇ ਬਾਵਜੂਦ ਉਨ੍ਹਾਂ ਨੂੰ ਰੋਕਣਾ ਮੁਨਾਸਬ ਨਹੀਂ ਸਮਝਿਆ ਜਾਂਦਾ। -ਲੱਕੜ ਮੰਡੀ ਦੇ ਹਾਲਾਤ ਰਾਜਪੁਰਾ ਰੋਡ ਤੇ ਲੱਕੜ ਮੰਡੀ ਇਲਾਕੇ ਵਿੱਚ ਟ੍ਰੈਫਿਕ ਪੁਲਿਸ ਦਾ ਨਾਕਾ ਲੱਗਿਆ ਰਹਿੰਦਾ ਹੈ। ਇੱਥੋਂ ਅਕਸਰ ਓਵਰਲੋਡਿਡ ਟਿੱਪਰ ਗੁਜ਼ਰਦੇ ਦਿਖਾਈ ਦਿੰਦੇ ਹਨ ਪਰ ਟ੍ਰੈਫਿਕ ਪੁਲਿਸ ਨੇ ਇਨ੍ਹਾਂ ਨੂੰ ਰੋਕਿਆ ਤੱਕ ਨਹੀਂ। ਕਈ ਟਿੱਪਰ ਚਾਲਕਾਂ ਨੇ ਅਗਲੀ ਨੰਬਰ ਪਲੇਟ ਤਾਂ ਲਗਾਈ ਹੋਈ ਹੈ ਪਰ ਪਿਛਲੀ ਨੰਬਰ ਪਲੇਟ ਗਾਇਬ ਹੈ। ਇਸ ਦਾ ਕਾਰਨ ਇਹ ਹੈ ਕਿ ਹਾਦਸੇ ਤੋਂ ਬਾਅਦ ਫਰਾਰ ਹੋਣ ਤੇ ਕੋਈ ਉਨ੍ਹਾਂ ਦਾ ਨੰਬਰ ਨੋਟ ਨਾ ਕਰ ਸਕੇ। -ਪੁਲਿਸ ਤੇ ਪਾਇਆ ਜਾਂਦਾ ਹੈ ਦਬਾਅ ਟ੍ਰੈਫਿਕ ਪੁਲਿਸ ਦੇ ਇੱਕ ਮੁਲਾਜ਼ਮ ਨੇ ਨਾਮ ਨਾ ਛਾਪਣ ਦੀ ਸ਼ਰਤ ਤੇ ਦੱਸਿਆ ਕਿ ਉਨ੍ਹਾਂ ਨੇ ਕਈ ਵਾਰ ਟਿੱਪਰ ਚਾਲਕ ਰੋਕੇ ਹਨ, ਪਰ ਜ਼ਿਆਦਾਤਰ ਟਿੱਪਰਾਂ ਤੇ ਸਿਰਫ ਡਰਾਈਵਰ ਹੀ ਹੁੰਦੇ ਹਨ। ਇਨ੍ਹਾਂ ਟਿੱਪਰਾਂ ਦੇ ਮਾਲਕਾਂ ਦੀ ਸਿਆਸੀ ਅਤੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਤੱਕ ਪਹੁੰਚ ਹੁੰਦੀ ਹੈ, ਜਿਸ ਕਾਰਨ ਸਿਫਾਰਸ਼ ਲਗਵਾ ਕੇ ਅਤੇ ਦਬਾਅ ਬਣਾ ਕੇ ਉਹ ਨਿਕਲ ਜਾਂਦੇ ਹਨ। -ਪੁਲਿਸ ਵੀ ਹੋ ਚੁੱਕੀ ਹੈ ਟਿੱਪਰਾਂ ਦਾ ਸ਼ਿਕਾਰ ਟਿੱਪਰ ਚਾਲਕਾਂ ਵੱਲੋਂ ਨਿਯਮਾਂ ਦੀ ਉਲੰਘਣਾ ਕਾਰਨ ਹੋਣ ਵਾਲੇ ਹਾਦਸਿਆਂ ਦੀ ਲਪੇਟ ਵਿੱਚ ਪਟਿਆਲਾ ਪੁਲਿਸ ਵੀ ਆ ਚੁੱਕੀ ਹੈ। ਦੋ ਹਫ਼ਤੇ ਪਹਿਲਾਂ ਪਸਿਆਣਾ ਇਲਾਕੇ ਵਿੱਚ ਇੱਕ ਟਿੱਪਰ ਨੇ ਪਾਇਲਟ ਜਿਪਸੀ ਨੂੰ ਟੱਕਰ ਮਾਰ ਦਿੱਤੀ ਸੀ, ਜਿਸ ਵਿੱਚ ਤਿੰਨ ਮੁਲਾਜ਼ਮ ਜ਼ਖ਼ਮੀ ਹੋ ਗਏ ਸਨ। ਉੱਥੇ ਹੀ ਦੀਪ ਨਗਰ ਇਲਾਕੇ ਵਿੱਚ ਟਿੱਪਰ ਦੀ ਟੱਕਰ ਨਾਲ ਇੱਕ ਨੌਜਵਾਨ ਗੰਭੀਰ ਜ਼ਖ਼ਮੀ ਹੋ ਗਿਆ ਸੀ। ਇਸ ਤੋਂ ਇਲਾਵਾ ਸਿਵਲ ਲਾਈਨ ਥਾਣਾ ਇਲਾਕੇ ਵਿੱਚ ਦਸ ਦਿਨ ਪਹਿਲਾਂ ਟਿੱਪਰ ਦੀ ਟੱਕਰ ਨਾਲ ਇੱਕ ਸਕੂਟੀ ਚਾਲਕ ਦੀ ਮੌਤ ਵੀ ਹੋ ਚੁੱਕੀ ਹੈ। ਇਨ੍ਹਾਂ ਹਾਦਸਿਆਂ ਦੇ ਬਾਵਜੂਦ ਟਿੱਪਰ ਚਾਲਕਾਂ ਵੱਲੋਂ ਨਿਯਮਾਂ ਦੀ ਉਲੰਘਣਾ ਜਾਰੀ ਹੈ ਅਤੇ ਕਾਰਵਾਈ ਨੂੰ ਲੈ ਕੇ ਪੁਲਿਸ ਤੇ ਪ੍ਰਸ਼ਾਸਨ ਗੰਭੀਰ ਨਹੀਂ ਹਨ। -ਟਿੱਪਰਾਂ ਲਈ ਸਪੈਸ਼ਲ ਐਕਸ਼ਨ ਪਲਾਨ ਬਣਾ ਰਹੇ ਹਾਂ: ਐਸ.ਪੀ. ਟ੍ਰੈਫਿਕ ਐਸ.ਪੀ. ਟ੍ਰੈਫਿਕ ਹਰਿੰਦਰ ਸਿੰਘ ਮਾਨ ਨੇ ਕਿਹਾ ਕਿ ਟਿੱਪਰ ਚਾਲਕਾਂ ਦੀ ਮਨਮਾਨੀ ਰੋਕਣ ਲਈ ਸਪੈਸ਼ਲ ਐਕਸ਼ਨ ਪਲਾਨ ਬਣਾਇਆ ਜਾ ਰਿਹਾ ਹੈ। ਡੀਸੀ ਦੇ ਅਧੀਨ ਬਣੀ ਕਮੇਟੀ ਦੇ ਸੁਝਾਵਾਂ ਨਾਲ ਕਈ ਨੋ ਐਂਟਰੀ ਜ਼ੋਨ ਬਣਾਏ ਜਾਣਗੇ। ਇਸ ਤੋਂ ਇਲਾਵਾ ਟ੍ਰੈਫਿਕ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲਿਆਂ ਤੇ ਕਾਰਵਾਈ ਲਈ ਆਰ.ਟੀ.ਓ. ਨਾਲ ਮਿਲ ਕੇ ਵਿਸ਼ੇਸ਼ ਨਾਕਾਬੰਦੀ ਕੀਤੀ ਜਾ ਰਹੀ ਹੈ।