ਬਮ ਬਮ ਭੋਲੇ ਨਾਥ ਦੇ ਜੈਕਾਰਿਆਂ ਨਾਲ ਗੂੰਜਿਆ ਸ਼ਾਹੀ ਸ਼ਹਿਰ

ਫੋਟੋ 15ਪੀਟੀਐਲ: 18, 19, ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਪਟਿਆਲਾ : ਮਹਾਸ਼ਿਵਰਾਤਰੀ ਦੇ ਪਾਵਨ ਤਿਉਹਾਰ ਮੌਕੇ ਐਤਵਾਰ ਨੂੰ ਸ਼ਹਿਰ ਦੇ ਪ੍ਰਮੁੱਖ ਸ਼ਿਵ ਮੰਦਰਾਂ ਵਿਚ ਸਵੇਰ ਤੋਂ ਹੀ ਸ਼ਰਧਾਲੂਆਂ ਦੀ ਭਾਰੀ ਭੀੜ ਉਮੜ ਪਈ। ਭਗਤ ਪ੍ਰਾਤਕਾਲ ਤੋਂ ਹੀ ਦਰਸ਼ਨ ਅਤੇ ਜਲਾਭਿਸ਼ੇਕ ਲਈ ਮੰਦਰਾਂ ਵਿਚ ਪਹੁੰਚਣ ਲੱਗ ਪਏ। ਦਿਨ ਭਰ ਸ਼ਰਧਾਲੂਆਂ ਦਾ ਆਉਣਾ-ਜਾਣਾ ਜਾਰੀ ਰਿਹਾ ਅਤੇ ਦੇਰ ਰਾਤ ਤੱਕ ਪੂਜਾ-ਅਰਚਨਾ ਦਾ ਸਿਲਸਿਲਾ ਚਲਦਾ ਰਿਹਾ। ਤਿਉਹਾਰ ਨੂੰ ਲੈ ਕੇ ਮਹਿਲਾਵਾਂ, ਬੱਚਿਆਂ ਅਤੇ ਨੌਜਵਾਨਾਂ ਵਿਚ ਖਾਸ ਉਤਸ਼ਾਹ ਦੇਖਣ ਨੂੰ ਮਿਲਿਆ। ਮੰਦਰਾਂ ਵਿਚ ਭਗਤਾਂ ਨੇ ਓਮ ਨਮਹ ਸ਼ਿਵਾਏ ਤੇ ਹਰ-ਹਰ ਮਹਾਦੇਵ ਦੇ ਜੈਕਾਰਿਆਂ ਨਾਲ ਭਗਵਾਨ ਸ਼ਿਵ ਦੀ ਆਰਾਧਨਾ ਕੀਤੀ। ਸਵੇਰੇ ਤੜਕੇ ਸ਼ਰਧਾਲੂਆਂ ਨੇ ਬਿਲਪੱਤਰ, ਧਤੂਰਾ, ਭਾਂਗ, ਫਲ-ਫੂਲ ਅਤੇ ਹੋਰ ਪੂਜਾ ਸਮੱਗਰੀ ਅਰਪਿਤ ਕਰਕੇ ਪੂਜਾ ਅਦਾ ਕੀਤੀ। ਕਈ ਥਾਵਾਂ ’ਤੇ ਦੁੱਧ, ਦਹੀਂ ਅਤੇ ਗੰਗਾਜਲ ਨਾਲ ਸ਼ਿਵਲਿੰਗ ਦਾ ਅਭਿਸ਼ੇਕ ਵੀ ਕੀਤਾ ਗਿਆ। ਸ਼ਹਿਰ ਦੇ ਵੱਖ-ਵੱਖ ਮੰਦਰਾਂ ਦੇ ਆਸ-ਪਾਸ ਸ਼ਰਧਾਲੂਆਂ ਅਤੇ ਸਮਾਜਿਕ ਸੰਸਥਾਵਾਂ ਵੱਲੋਂ ਲੰਗਰ ਦੀ ਵਿਵਸਥਾ ਕੀਤੀ ਗਈ, ਜਿੱਥੇ ਵੱਡੀ ਗਿਣਤੀ ਵਿੱਚ ਲੋਕਾਂ ਨੇ ਪ੍ਰਸਾਦ ਗ੍ਰਹਿਣ ਕੀਤਾ। ਪੂਰੇ ਦਿਨ ਸ਼ਿਵਾਲਿਆਂ ਵਿਚ ਭਗਤੀਮਈ ਮਾਹੌਲ ਬਣਿਆ ਰਿਹਾ ਅਤੇ ਭਗਤ ਸ਼ਿਵ ਭਗਤੀ ਦੇ ਰੰਗ ਵਿਚ ਰੰਗੇ ਨਜ਼ਰ ਆਏ। -ਸ਼ਿਵ ਬਾਰਾਤ ਵਿਚ ਝੂਮੇ ਭਗਤ ਹਿੰਦੂ ਸੁਰੱਖਿਆ ਸੰਮਤੀ ਅਤੇ ਸ਼੍ਰੀ ਹਿੰਦੂ ਤਖ਼ਤ ਵੱਲੋਂ ਕੱਢੀ ਸ਼ੋਭਾ ਯਾਤਰਾ ’ਚ ਸ਼ਿਵ ਭਗਤਾਂ ਦਾ ਉਤਸ਼ਾਹ ਚਰਮ ’ਤੇ ਰਿਹਾ। ਸ਼ਿਵ ਸ਼ੰਕਰ ਦੀ ਬਾਰਾਤ ਦੇ ਰੂਪ ਵਿਚ ਸਜਾਈ ਗਈ। ਇਸ ਯਾਤਰਾ ਵਿਚ ਭਗਤ ਢੋਲ-ਨਗਾੜਿਆਂ ਅਤੇ ਭਜਨਾਂ ਦੀ ਧੁਨ ’ਤੇ ਝੂਮਦੇ ਨਜ਼ਰ ਆਏ। ਸ਼ੋਭਾ ਯਾਤਰਾ ਦਾ ਆਕਰਸ਼ਣ ਦਾ ਕੇਂਦਰ ਸਵਾ ਫੁੱਟ ਲੰਬਾ ਹੀਰਿਆਂ ਨਾਲ ਜੜਿਆ ਸ਼ਿਵਲਿੰਗ, ਸੋਨੇ ਦੇ ਨੰਦੀਗਣ ਤੇ ਸੋਨੇ ਦੀ ਪਾਲਕੀ ਰਹੇ। ਜਾਣਕਾਰੀ ਅਨੁਸਾਰ ਯਾਤਰਾ ਵਿਚ ਝਾਂਕੀਆਂ, ਕੀਰਤਨ ਮੰਡਲੀਆਂ, ਊਠ, ਨੰਦੀ, ਹਾਥੀ, ਘੋੜੇ, ਬੈਂਡ ਪਾਰਟੀਆਂ, ਭੂਤ-ਪ੍ਰੇਤਾਂ ਦੀਆਂ ਟੋਲੀਆਂ ਤੇ ਗਿੱਧਾ ਪਾਰਟੀਆਂ ਨੇ ਹਿੱਸਾ ਲਿਆ। ਸ਼ੋਭਾ ਯਾਤਰਾ ਨੂੰ ਭਵਿਆ ਬਣਾਉਣ ਲਈ ਵੱਖ-ਵੱਖ ਧਾਰਮਿਕ ਸੰਗਠਨਾਂ, ਸਮਾਜਿਕ ਸੰਸਥਾਵਾਂ ਅਤੇ ਰਾਜਨੀਤਿਕ ਦਲਾਂ ਦੇ ਕਾਰਕੁਨਾਂ ਨੇ ਵੱਧ-ਚੜ੍ਹ ਕੇ ਸਹਿਯੋਗ ਦਿੱਤਾ। ਰਸਤੇ ਭਰ ਸ਼ਰਧਾਲੂਆਂ ਨੇ ਫੁੱਲਾਂ ਦੀ ਵਰਖਾ ਕਰਕੇ ਯਾਤਰਾ ਦਾ ਸਵਾਗਤ ਕੀਤਾ ਅਤੇ ਭਗਵਾਨ ਸ਼ਿਵ ਦੇ ਜੈਕਾਰਿਆਂ ਨਾਲ ਮਾਹੌਲ ਭਗਤੀਮਈ ਬਣਿਆ ਰਿਹਾ। --ਸ਼ੋਭਾ ਯਾਤਰਾ ਦਾ ਇਹ ਰਿਹਾ ਰੂਟ ਪਲਾਨ ਮਹਾਸ਼ਿਵਰਾਤਰੀ ਮੌਕੇ ਕੱਢੀ ਗਈ ਸ਼ੋਭਾ ਯਾਤਰਾ ਆਰਿਆ ਸਮਾਜ ਚੌਕ ਤੋਂ ਸ਼ੁਰੂ ਹੋ ਕੇ ਤ੍ਰਿਵੇਣੀ ਚੌਕ, ਸਫਾਬਾਦੀ ਗੇਟ, ਸਰਹੰਦੀ ਬਾਜ਼ਾਰ, ਸਨੌਰੀ ਅੱਡਾ, ਦਾਲ ਦਲੀਆ ਚੌਕ, ਗੁੜ ਮੰਡੀ, ਕਿਲਾ ਚੌਂਕ, ਏ-ਟੈਂਕ, ਅਦਾਲਤ ਬਾਜ਼ਾਰ, ਏਸੀ ਮਾਰਕੀਟ, ਅਨਾਰਦਾਨਾ ਚੌਕ, ਧਰਮਪੁਰਾ ਬਾਜ਼ਾਰ, ਸ਼ੇਰਾ ਵਾਲਾ ਗੇਟ, ਸ਼ੇਰੇ-ਪੰਜਾਬ ਮਾਰਕੀਟ ਅਤੇ ਲਾਹੌਰੀ ਗੇਟ ਤੋਂ ਹੁੰਦੀ ਹੋਈ ਮੁੜ ਆਰਿਆ ਸਮਾਜ ਚੌਕ ਪਹੁੰਚ ਕੇ ਸੰਪੰਨ ਹੋਈ। ਸਮਾਪਨ ਸਥਾਨ ‘ਤੇ ਪਾਲਕੀ ਵਿੱਚ ਵਿਹੜੇ ਭਗਵਾਨ ਭੋਲੇਨਾਥ ਦੀ ਆਰਤੀ ਕੀਤੀ ਗਈ, ਜਿਸ ਵਿਚ ਵੱਡੀ ਗਿਣਤੀ ਵਿੱਚ ਸ਼ਰਧਾਲੂਆਂ ਨੇ ਭਾਗ ਲਿਆ ਅਤੇ ਸੁੱਖ-ਸਮ੍ਰਿੱਧੀ ਦੀ ਕਾਮਨਾ ਕੀਤੀ।