ਹਰਿਆਣਾ ਪੁਲਿਸ ’ਚ ਐੱਸਆਈ ਦੀ ਵਰਦੀ ਤੇ ਫ਼ਰਜ਼ੀ ਜੁਆਇਨਿੰਗ ਦੇ ਕੇ ਮਾਰੀ ਠੱਗੀ

- ਰਿਸ਼ਤੇਦਾਰਾਂ ਨੇ ਹੀ ਬੁਣਿਆ ਧੋਖਾਧੜੀ ਦਾ ਜਾਲ, 9 ਲੱਖ 20 ਹਜ਼ਾਰ ਰੁਪਏ ਠੱਗੇ ਸੀਨੀਅਰ ਰਿਪੋਰਟਰ, ਪੰਜਾਬੀ ਜਾਗਰਣ, ਪਟਿਆਲਾ : ਹਰਿਆਣਾ ਪੁਲਿਸ ਵਿੱਚ ਸਬ-ਇੰਸਪੈਕਟਰ ਭਰਤੀ ਹੋਣ ਦੀ ਖੁਸ਼ਖਬਰੀ ਮਿਲੀ, ਜਿਸ ਤੋਂ ਬਾਅਦ ਜੁਆਇਨਿੰਗ ਲੈਟਰ ਹੱਥ ਵਿੱਚ ਫੜਾ ਦਿੱਤਾ ਗਿਆ। ਪੁੱਤਰ ਭਰਤੀ ਹੋ ਗਿਆ ਹੈ, ਇਸ ਖੁਸ਼ੀ ਵਿੱਚ ਪੂਰੇ ਪਿੰਡ ਵਿੱਚ ਚਰਚਾ ਹੋਈ ਅਤੇ ਸਭ ਨੇ ਵਧਾਈਆਂ ਦਿੱਤੀਆਂ। ਜੁਆਇਨਿੰਗ ਲੈਟਰ ਦੇ ਕੁਝ ਦਿਨਾਂ ਬਾਅਦ ਸਬ ਇੰਸਪੈਕਟਰ ਦੀ ਵਰਦੀ, ਬੈਲਟ ਅਤੇ ਜੁੱਤੀਆਂ ਵੀ ਦੇ ਦਿੱਤੀਆਂ ਗਈਆਂ। ਭਰਤੀ ਦੀ ਗੱਲ ਪੱਕੀ ਮੰਨ ਕੇ ਨੌਜਵਾਨ ਨੂੰ ਤਿੰਨ ਮਹੀਨਿਆਂ ਦੀ ਟ੍ਰੇਨਿੰਗ ਦੇ ਨਾਂ ’ਤੇ ਜੈਪੁਰ ਭੇਜ ਦਿੱਤਾ ਗਿਆ। ਤਿੰਨ ਮਹੀਨਿਆਂ ਤਕ ਨੌਜਵਾਨ ਜੈਪੁਰ ਦੇ ਇੱਕ ਕੋਚਿੰਗ ਸੈਂਟਰ ਵਿੱਚ ਪੁਲਿਸ ਭਰਤੀ ਦੀ ਪੜ੍ਹਾਈ ਕਰਦਾ ਰਿਹਾ, ਪਰ ਹੌਲੀ-ਹੌਲੀ ਉਸ ਨੂੰ ਅਹਿਸਾਸ ਹੋਇਆ ਕਿ ਇਹ ਤਾਂ ਸਿਰਫ਼ ਪੜ੍ਹਾਈ ਹੈ। ਕੋਈ ਸਰਕਾਰੀ ਟ੍ਰੇਨਿੰਗ ਨਹੀਂ ਹੋ ਰਹੀ ਸੀ। ਕਬੱਡੀ ਦੇ ਇਸ ਖਿਡਾਰੀ ਨੂੰ ਮਾਮਲਾ ਸ਼ੱਕੀ ਲੱਗਿਆ ਤਾਂ ਉਸ ਨੇ ਆਪਣੇ ਪਿਤਾ ਨਾਲ ਗੱਲ ਕੀਤੀ। ਜਦੋਂ ਪਿਤਾ ਨੇ ਸਾਰੇ ਪੱਤਰਾਂ ਦੀ ਸੱਚਾਈ ਜਾਣਨ ਲਈ ਪੜਤਾਲ ਕੀਤੀ ਤਾਂ ਉਹ ਹੈਰਾਨ ਰਹਿ ਗਏ, ਕਿਉਂਕਿ ਇਹ ਸਾਰੀ ਠੱਗੀ ਉਨ੍ਹਾਂ ਦੇ ਆਪਣੇ ਰਿਸ਼ਤੇਦਾਰਾਂ ਨੇ ਕੀਤੀ ਸੀ। ਠੱਗੀ ਦੇ ਸ਼ਿਕਾਰ ਰਾਜਪਾਲ ਰਾਣਾ ਵਾਸੀ ਪਿੰਡ ਰਸੌਲੀ ਨੇ ਤੁਰੰਤ ਪੁਲਿਸ ਨੂੰ ਸ਼ਿਕਾਇਤ ਕੀਤੀ। ਜਾਂਚ ਤੋਂ ਬਾਅਦ ਪੁਲਿਸ ਨੇ ਰਾਜਪਾਲ ਦੀ ਭੈਣ ਦੇ ਸਹੁਰੇ ਬਾਰੂ ਰਾਮ ਅਤੇ ਬਾਰੂ ਰਾਮ ਦੇ ਪੋਤੇ ਦੀ ਪਤਨੀ ਪੂਨਮ ਰਾਣੀ ਵਾਸੀ ਪਿੰਡ ਗਾਰਦੀ ਨਗਰ, ਰਾਜਪੁਰਾ ਖ਼ਿਲਾਫ਼ ਐੱਫਆਈਆਰ ਦਰਜ ਕਰ ਲਈ ਹੈ। ਇਹ ਮਾਮਲਾ 2 ਜਨਵਰੀ ਨੂੰ ਪਾਤੜਾਂ ਥਾਣੇ ਵਿੱਚ ਦਰਜ ਕੀਤਾ ਗਿਆ ਹੈ, ਪਰ ਹਾਲੇ ਤਕ ਗ੍ਰਿਫ਼ਤਾਰੀ ਨਹੀਂ ਹੋਈ। ਇਸ ਤਰ੍ਹਾਂ ਬੁਣਿਆ ਗਿਆ ਠੱਗੀ ਦਾ ਜਾਲ : ਰਾਜਪਾਲ ਰਾਣਾ ਨੇ ਦੱਸਿਆ ਕਿ ਉਨ੍ਹਾਂ ਦੀ ਛੋਟੀ ਭੈਣ ਦਾ ਵਿਆਹ ਮੁਲਜ਼ਮ ਬਾਰੂ ਰਾਮ ਦੇ ਬੇਟੇ ਨਾਲ ਹੋਇਆ ਸੀ। ਬਾਰੂ ਰਾਮ ਦੇ ਵੱਡੇ ਬੇਟੇ ਦੀ ਨੂੰਹ ਪੂਨਮ ਰਾਣੀ ਦੇ ਹਰਿਆਣਾ ਵਿੱਚ ਕਾਂਸਟੇਬਲ ਭਰਤੀ ਹੋਣ ਦੀ ਗੱਲ ਕਹਿ ਕੇ ਰਾਜਪਾਲ ਨੂੰ ਲਾਲਚ ਦਿੱਤਾ ਗਿਆ ਕਿ ਹਰਿਆਣਾ ਵਿੱਚ 5 ਤੋਂ 7 ਕਾਂਸਟੇਬਲਾਂ ਦੀ ਸਿੱਧੀ ਭਰਤੀ ਹੋਣੀ ਹੈ। ਅਜਿਹੇ ਵਿੱਚ ਰਾਜਪਾਲ ਆਪਣੇ ਪੁੱਤਰ ਸ਼ੁਭਮ ਨੂੰ ਕਾਂਸਟੇਬਲ ਭਰਤੀ ਕਰਵਾ ਸਕਦਾ ਹੈ। ਸ਼ੁਭਮ ਮਸਤੂਆਣਾ ਸਾਹਿਬ ਵਿੱਚ ਬੀਏ ਦੀ ਪੜ੍ਹਾਈ ਕਰ ਰਿਹਾ ਸੀ ਅਤੇ ਕਬੱਡੀ ਖੇਡਦਾ ਸੀ। ਕਾਂਸਟੇਬਲ ਭਰਤੀ ਕਰਵਾਉਣ ਦਾ ਦਬਾਅ ਬਣਾ ਕੇ ਸਾਲ 2023 ਵਿੱਚ ਪੈਸੇ ਲੈ ਲਏ ਗਏ। ਪਹਿਲਾਂ ਕਾਂਸਟੇਬਲ ਭਰਤੀ ਲਈ 4 ਲੱਖ ਰੁਪਏ ਮੰਗੇ ਗਏ ਸਨ। ਬਾਅਦ ਵਿੱਚ ਮੁਲਜ਼ਮ ਬਾਰੂ ਰਾਮ ਨੇ ਕਿਹਾ ਕਿ ਉਹ ਸਪੋਰਟਸ ਕੋਟੇ ਵਿੱਚ ਸਿੱਧਾ ਸਬ ਇੰਸਪੈਕਟਰ ਭਰਤੀ ਕਰਵਾ ਸਕਦਾ ਹੈ, ਜਿਸ ਲਈ ਕੁਝ ਜ਼ਿਆਦਾ ਪੈਸੇ ਖਰਚਣੇ ਪੈਣਗੇ। ਇਸ ਤੋਂ ਬਾਅਦ ਸ਼ੁਭਮ ਨੂੰ ਜੀਂਦ ਲਿਜਾ ਕੇ ਉੱਥੇ ਫ਼ਰਜ਼ੀ ਮੈਡੀਕਲ ਸਰਟੀਫਿਕੇਟ ਤਿਆਰ ਕਰਵਾਇਆ ਅਤੇ ਫਿਰ ਜੈਪੁਰ ਵਿੱਚ ਟ੍ਰੇਨਿੰਗ ਦੇ ਨਾਂ ’ਤੇ ਸਮਾਂ ਖਰਾਬ ਕੀਤਾ। ਇਸ ਦੌਰਾਨ ਮੁਲਜ਼ਮਾਂ ਨੇ ਵੱਖ-ਵੱਖ ਦਿਨਾਂ ਵਿੱਚ ਕੁੱਲ 9 ਲੱਖ 20 ਹਜ਼ਾਰ ਰੁਪਏ ਠੱਗ ਲਏ। ਰਾਜਪਾਲ ਰਾਣਾ ਨੇ ਦੱਸਿਆ ਕਿ ਮੁਲਜ਼ਮਾਂ ਨੇ ਜੁਆਇਨਿੰਗ ਲੈਟਰ ਅਤੇ ਵਰਦੀ ਦੇਣ ਤੋਂ ਬਾਅਦ ਟ੍ਰੇਨਿੰਗ ਦੇ ਨਾਂ ’ਤੇ ਤੁਰੰਤ ਪੈਸਿਆਂ ਦੀ ਮੰਗ ਕੀਤੀ ਸੀ। ਉਸ ਸਮੇਂ ਕੋਲ ਪੈਸੇ ਨਾ ਹੋਣ ਕਾਰਨ ਉਨ੍ਹਾਂ ਨੂੰ ਆਪਣੀ ਜ਼ਮੀਨ ਗਹਿਣੇ ਰੱਖ ਕੇ ਇਹ ਰਕਮ ਅਦਾ ਕਰਨੀ ਪਈ।