ਲਾਅ ਯੂਨੀਵਰਸਿਟੀ ਵਿਖੇ ਆਈਪੀ ਲਾਅ ਮੂਟ ਕੋਰਟ ਮੁਕਾਬਲਾ ਕਰਵਾਇਆ

ਪੱਤਰ ਪ੍ਰੇਰਕ•, ਪੰਜਾਬੀ ਜਾਗਰਣ, •ਪਟਿਆਲਾ : ਨੈਸ਼ਨਲ ਇੰਟੈਲੈਕਚੁਅਲ ਪ੍ਰਾਪਰਟੀ ਲਾਅ (ਬੌਧਿਕ ਸੰਪਤੀ ਕਾਨੂੰਨ) ਮੂਟ ਕੋਰਟ ਦੀ ਦੂਜੀ ਪ੍ਰਤੀਯੋਗਤਾ 2026 ਦੀ ਸਫਲਤਾ ਰਾਜੀਵ ਗਾਂਧੀ ਨੈਸ਼ਨਲ ਯੂਨੀਵਰਸਿਟੀ ਆਫ਼ ਲਾਅ ਪਟਿਆਲਾ ਵਿਖੇ ਸੈਂਟਰ ਫਾਰ ਇਨੋਵੇਸ਼ਨ ਐਂਡ ਇੰਟੈਲੈਕਚੁਅਲ ਪ੍ਰਾਪਰਟੀ ਰਾਈਟਸ ਦੇ ਸਹਿਯੋਗ ਨਾਲ 9 ਤੋਂ 10 ਮਾਰਚ ਤੱਕ ਕੀਤਾ ਗਿਆ। ਸਮਾਗਮ ਦੀ ਸ਼ੁਰੂਆਤ 9 ਮਾਰਚ ਨੂੰ ਉਦਘਾਟਨੀ ਸੈਸ਼ਨ ਅਤੇ ਸ਼ੁਰੂਆਤੀ ਦੌਰ ਲਈ ਡਰਾਅ ਆਫ ਲਾਟਸ ਨਾਲ ਹੋਈ। ਮੁਕਾਬਲੇ ’ਚ ਉੱਘੇ ਮਹਿਮਾਨ ਮੁਲਾਂਕਣਕਰਤਾਵਾਂ ਨੇ ਸ਼ਿਰਕਤ ਕੀਤੀ, ਜਿਨ੍ਹਾਂ ਵਿਚ ਨਿਹਿਤ ਨਾਗਪਾਲ (ਐਸੋਸੀਏਟ ਪਾਰਟਨਰ, ਐਸ.ਐਸ ਰਾਣਾ ਐਂਡ ਕੰਪਨੀ), ਮੁਕੇਸ਼ ਚੌਧਰੀ (ਐਗਜ਼ਾਮੀਨਰ ਆਫ ਟ੍ਰੇਡਮਾਰਕਸ, ਜੀ.ਆਈ. ਅਤੇ ਕਾਪੀਰਾਈਟ) ਅਤੇ ਕੇ. ਐੱਸ. ਕਰਦਮ (ਸਾਬਕਾ ਸੀਨੀਅਰ ਜੁਆਇੰਟ ਕੰਟਰੋਲਰ ਆਫ ਪੇਟੈਂਟ ਐਂਡ ਡਿਜ਼ਾਈਨ, ਭਾਰਤੀ ਪੇਟੈਂਟ ਦਫਤਰ) ਸ਼ਾਮਲ ਸਨ। ਸੈਮੀਫਾਈਨਲ ਦੌਰ ਦਾ ਮੁਲਾਂਕਣ ਰਿਸ਼ਭ ਰਾਓ, ਅਨੁਰੀਤ ਬੁਡਵਾਲ, ਕ੍ਰਿਤੀ ਪ੍ਰਿਯਦਰਸ਼ਨੀ ਲਿਟੋਰੀਆ ਅਤੇ ਚਰਨਪ੍ਰੀਤ ਸਿੰਘ ਦੇ ਨਾਲ-ਨਾਲ ਕਈ ਹੋਰ ਸਤਿਕਾਰਤ ਵਿਦਵਾਨਾਂ ਅਤੇ ਮਾਹਿਰਾਂ ਵੱਲੋਂ ਕੀਤਾ ਗਿਆ। ਮੁਕਾਬਲੇ ’ਚ ਭਾਰਤ ਭਰ ਦੇ ਵੱਕਾਰੀ ਲਾਅ ਸਕੂਲਾਂ ਦੀ ਨੁਮਾਇੰਦਗੀ ਕਰਨ ਵਾਲੇ ਵਿਦਿਆਰਥੀਆਂ ਨੇ ਬਹੁਤ ਉਤਸ਼ਾਹ ਨਾਲ ਹਿੱਸਾ ਲਿਆ, ਜਿਸ ’ਚ 50 ਤੋਂ ਵੱਧ ਟੀਮਾਂ ਨੇ ਇਸ ਸਮਾਗਮ ਲਈ ਰਜਿਸਟ੍ਰੇਸ਼ਨ ਕਰਵਾਈ। ਮੈਮੋਰੀਅਲ ਮੁਲਾਂਕਣ ਦੌਰ ਤੋਂ ਬਾਅਦ ਚੋਟੀ ਦੀਆਂ 16 ਟੀਮਾਂ ਨੂੰ ਸ਼ੁਰੂਆਤੀ ਦੌਰ (ਪ੍ਰੀਲਿਮਨਰੀ ਰਾਊਂਡ) ਲਈ ਚੁਣਿਆ ਗਿਆ, ਜੋ ਕਿ 9 ਮਾਰਚ 2026 ਨੂੰ ਕਰਵਾਏ ਗਏ ਸਨ। ਇਸ ਤੋਂ ਬਾਅਦ ਚੋਟੀ ਦੀਆਂ ਚਾਰ ਟੀਮਾਂ ਨੇ 10 ਮਾਰਚ 2026 ਨੂੰ ਹੋਏ ਸੈਮੀਫਾਈਨਲ ਅਤੇ ਫਾਈਨਲ ਰਾਊਂਡ ’ਚ ਜਗ੍ਹਾ ਬਣਾਈ। ਮੌਖਿਕ ਦੌਰ (ਓਰਲ ਰਾਊਂਡ) ਦੌਰਾਨ ਪ੍ਰਤੀਯੋਗੀਆਂ ਨੇ ਬੌਧਿਕ ਸੰਪੱਤੀ ਕਾਨੂੰਨ ਦੇ ਗੁੰਝਲਦਾਰ ਮੁੱਦਿਆਂ ਤੇ ਚਰਚਾ ਕਰਦੇ ਹੋਏ ਅਸਾਧਾਰਣ ਵਕਾਲਤ, ਖੋਜ ਅਤੇ ਵਿਸ਼ਲੇਸ਼ਣਾਤਮਕ ਹੁਨਰ ਦਾ ਪ੍ਰਦਰਸ਼ਨ ਕਰਦਿਆਂ ਜ਼ੋਰਦਾਰ ਦਲੀਲਾਂ ਪੇਸ਼ ਕੀਤੀਆਂ। ਬੈਸਟ ਸਪੀਕਰ ਅਵਾਰਡ, ਸਕੂਲ ਆਫ਼ ਲਾਅ, ਯੂ.ਪੀ.ਈ.ਐੱਸ ਦੇਹਰਾਦੂਨ ਦੀ ਵਿਦਿਆਰਥਣ ਆਕਾਂਕਸ਼ਾ ਜੈਕੀ ਨੂੰ ਦਿੱਤਾ ਗਿਆ, ਜਦੋਂ ਕਿ ਬੈਸਟ ਮੈਮੋਰੀਅਲ ਅਵਾਰਡ ਓ.ਪੀ. ਜਿੰਦਲ ਗਲੋਬਲ ਯੂਨੀਵਰਸਿਟੀ ਦੀ ਟੀਮ ਨੂੰ ਦਿੱਤਾ ਗਿਆ। ਮੁਕਾਬਲੇ ਦੀ ਜੇਤੂ ਟੀਮ ਨੈਸ਼ਨਲ ਲਾਅ ਯੂਨੀਵਰਸਿਟੀ, ਓਡੀਸ਼ਾ ਰਹੀ, ਜਦਕਿ ਰਨਰ-ਅੱਪ ਨਰਸੀ ਮੋਂਜੀ ਇੰਸਟੀਚਿਊਟ ਆਫ਼ ਮੈਨੇਜਮੈਂਟ ਸਟੱਡੀਜ਼, ਮੁੰਬਈ ਰਹੀ। ਸਮਾਗਮ ਦੀ ਸਮਾਪਤੀ ਇਨਾਮ ਵੰਡ ਸਮਾਰੋਹ ਨਾਲ ਹੋਈ, ਜਿਸ ਦੌਰਾਨ ਜੇਤੂਆਂ ਨੂੰ ਇੱਕ ਟਰਾਫੀ, 12,000 ਰੁਪਏ ਦਾ ਨਕਦ ਇਨਾਮ ਅਤੇ ਐਸਐਸ ਰਾਣਾ ਐਂਡ ਕੰਪਨੀ ਨਾਲ ਇੰਟਰਨਸ਼ਿਪ ਦਾ ਮੌਕਾ ਪ੍ਰਦਾਨ ਕੀਤਾ ਗਿਆ। ਉਪ-ਜੇਤੂਆਂ ਨੂੰ ਇੱਕ ਟਰਾਫੀ, 8,000 ਰੁਪਏ ਦਾ ਨਕਦ ਇਨਾਮ ਅਤੇ ਸਪਾਇਸੀ ਆਈਪੀ ਨਾਲ ਇੰਟਰਨਸ਼ਿਪ ਦਾ ਮੌਕਾ ਮਿਲਿਆ, ਜਦਕਿ ਬੈਸਟ ਸਪੀਕਰ ਅਤੇ ਬੈਸਟ ਮੈਮੋਰੀਅਲ ਐਵਾਰਡਾਂ ਦੇ ਨਾਲ ਹਰੇਕ ਨੂੰ 5,000 ਰੁਪਏ ਦਾ ਨਕਦ ਇਨਾਮ ਦਿੱਤਾ ਗਿਆ।