ਲੇਖਕ ਭਾਰਤੀ ਨੇ ਏਆਈ ਸਬੰਧਈ ਪੀਐੱਮ ਨੂੰ ਪੰਜ-ਨੁਕਾਤੀ ਕਾਰਜ ਯੋਜਨਾ ਭੇਜੀ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਪਟਿਆਲਾ : ਪ੍ਰਸਿੱਧ ਅੰਤਰਰਾਸ਼ਟਰੀ ਲੇਖਕ ਤੇ ਸਿੱਖਿਆ ਸ਼ਾਸਤਰੀ ਅਨਿਲ ਕੁਮਾਰ ਭਾਰਤੀ ਨੇ ਪ੍ਰਧਾਨ ਮੰਤਰੀ, ਨਰਿੰਦਰ ਮੋਦੀ ਨੂੰ ਇਕ ਪੱਤਰ ਲਿਖਿਆ ਹੈ, ਜਿਸ ਵਿਚ ਏਆਈ ਦੀ ਵਿਸ਼ਵਵਿਆਪੀ ਵਰਤੋਂ ਤੇ ਵਿਸਥਾਰ ਵਿਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਵਾਲੀ ਭਾਰਤ ਸਰਕਾਰ ਦੀ ਭੂਮਿਕਾ ਦੀ ਪ੍ਰਸ਼ੰਸਾ ਕੀਤੀ ਗਈ ਹੈ। ਉਨ੍ਹਾਂ ਨੇ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (ਏਆਈ) ਦੀ ਸੁਰੱਖਿਅਤ ਤੇ ਨੈਤਿਕ ਵਰਤੋਂ ਨੂੰ ਯਕੀਨੀ ਬਣਾਉਣ ਲਈ ਤੁਰੰਤ ਵਿਸ਼ਵਵਿਆਪੀ ਯਤਨਾਂ ਦੀ ਮੰਗ ਵੀ ਕੀਤੀ ਹੈ। ਆਪਣੇ ਪੱਤਰ ਵਿਚ ਭਾਰਤੀ ਨੇ ਏਆਈ ਲਈ ਇਕ ਹੋਰ ਡੂੰਘਾ ਤੇ ਸਕਾਰਾਤਮਕ ਨਾਮ ਸੁਝਾਉਂਦੇ ਹੋਏ ਕਿਹਾ ਕਿ ਤਕਨਾਲੋਜੀ ਨੂੰ ਮਨੁੱਖੀ ਸਮਝ ਤੇ ਸ਼ੁੱਧਤਾ ਨਾਲ ਬਿਹਤਰ ਢੰਗ ਨਾਲ ਜੋੜਨ ਲਈ ਇਸ ਦੇ ਨਾਮ ਨੂੰ ਆਰਟੀਫਿਸ਼ਲ ਇੰਟੈਲੀਜੈਂਸ ਦੀ ਥਾਂ ਤੇ ਐਕਿਊਮਨ ਇੰਟੈਲੀਜੈਂਸ ਵਿਚ ਬਦਲਿਆ ਜਾਣਾ ਚਾਹੀਦਾ ਹੈ। ਆਰਟੀਫੀਸ਼ੀਅਲ ਦੀ ਬਜਾਏ ਐਕਿਊਮਨ: ਸਿੱਖਿਆ ਮਾਹਿਰ ਭਾਰਤੀ ਦਾ ਤਰਕ ਹੈ ਕਿ ਆਰਟੀਫੀਸ਼ੀਅਲ ਸ਼ਬਦ ਨਕਲੀ ਜਾਂ ਮਕੈਨੀਕਲ ਵਿਰਤੀ ਨੂੰ ਦਰਸਾਉਂਦਾ ਹੈ। ਇਸਦੇ ਉਲਟ, ਐਕਿਊਮਨ ਇੰਟੈਲੀਜੈਂਸ, ਗਤੀ, ਸਕਾਰਾਤਮਕਤਾ ਅਤੇ ਇੱਕ ਮਨੁੱਖ-ਪੱਖੀ ਪਹੁੰਚ ਨੂੰ ਦਰਸਾਉਂਦਾ ਹੈ। ਅੰਤਰਰਾਸ਼ਟਰੀ ਸੁਰੱਖਿਆ ਲਈ ਪੰਜ-ਨੁਕਾਤੀ ਕਾਰਜ ਯੋਜਨਾ ਦੇ ਤਹਿਤ ਗਲੋਬਲ ਫਤਵੇ ਤੇ ਜ਼ੋਰ ਦਿੰਦੇ ਹੋਏ, ਉਨ੍ਹਾਂ ਕਿਹਾ ਕਿ ਇੱਕ ਗਲੋਬਲ ਏਆਈ ਰੈਗੂਲੇਟਰੀ ਅਥਾਰਟੀ ਦੀ ਸਥਾਪਨਾ ਜ਼ਰੂਰੀ ਹੈ। ਲੇਖਕ ਭਾਰਤੀ ਨੇ ਦ੍ਰਿੜ੍ਹ ਵਿਸ਼ਵਾਸ ਪ੍ਰਗਟ ਕੀਤਾ ਕਿ ਪ੍ਰਧਾਨ ਮੰਤਰੀ ਮੋਦੀ ਦੀ ਦੂਰਦਰਸ਼ੀ ਅਗਵਾਈ ਹੇਠ ਭਾਰਤ ਏਆਈ ਨੂੰ ਇਕ ਸੰਭਾਵੀ ਖ਼ਤਰੇ ਤੋਂ ਇਕ ਵਿਸ਼ਵਵਿਆਪੀ ਵਰਦਾਨ ਵਿਚ ਬਦਲਣ ਵਿਚ ਦੁਨੀਆ ਦੀ ਅਗਵਾਈ ਕਰ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਭਾਵੇਂ ਤਕਨਾਲੋਜੀ ਕਿੰਨੀ ਵੀ ਅੱਗੇ ਵਧ ਜਾਵੇ, ਇਹ ਮਨੁੱਖੀ ਭਾਵਨਾਵਾਂ ਤੇ ਜ਼ਮੀਰ ਦੀ ਡੂੰਘਾਈ ਦਾ ਕਦੇ ਵੀ ਨਹੀਂ ਬਦਲ ਨਹੀਂ ਹੋ ਸਕਦੀ। ਉਨ੍ਹਾਂ ਨੇ ਆਪਣੇ ਪੱਤਰ ਨੂੰ ਇਸ ਉਮੀਦ ਨਾਲ ਸਮਾਪਤ ਕੀਤਾ ਕਿ ਸਰਕਾਰ ਇਨ੍ਹਾਂ ਸੁਝਾਵਾਂ ਤੇ ਸਕਾਰਾਤਮਕ ਵਿਚਾਰ ਕਰੇਗੀ ਅਤੇ ਉਨ੍ਹਾਂ ਨੂੰ ਵਿਸ਼ਵਵਿਆਪੀ ਨੀਤੀਗਤ ਢਾਂਚੇ ਵਿਚ ਸ਼ਾਮਲ ਕਰੇਗੀ।