ਮੁਲਾਜ਼ਮਾਂ ਦੀ ਘਾਟ ਕਾਰਨ ਨਗਰ ਪੰਚਾਇਤ ਬਰੀਵਾਲਾ ਆਪਣੀ ਬਦਹਾਲੀ ਵਹਾਅ ਰਿਹਾ ਹੰਝੂ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਮੰਡੀ ਬਰੀਵਾਲਾ : ਲੱਗਭਗੱ ਤਿੰਨ ਦਹਾਕੇ ਪਹਿਲਾਂ ਹੋਂਦ ’ਚ ਆਈ ਨਗਰ ਪੰਚਾਇਤ ਬਰੀਵਾਲਾ ਅੱਜ-ਕੱਲ੍ਹ ਖੁਦ ਆਪਣੀ ਬਦਹਾਲੀ ’ਤੇ ਹੰਝੂ ਵਹਾਅ ਰਹੀ ਹੈ। ਕੁਝ ਸਮੇਂ ਨੂੰ ਜੇਕਰ ਛੱਡ ਦਿੱਤਾ ਜਾਵੇ ਤਾਂ ਇੱਥੇ ਕਦੇ ਵੀ ਸਥਾਈ ਕਾਰਜਸਾਧਕ ਅਫ਼ਸਰ (ਈਓ) ਦੀ ਨਿਯੁਕਤੀ ਨਹੀਂ ਹੋ ਸਕੀ। ਦਫ਼ਤਰ ਦੇ ਹਾਲਾਤ ਇਹ ਹਨ ਕਿ ਅਕਾਊਂਟੈਂਟ (ਲੇਖਾਕਾਰ), ਸੈਨੇਟਰੀ ਇੰਸਪੈਕਟਰ ਅਤੇ ਜੇਈ ਵਰਗੇ ਸਾਰੇ ਅਹਿਮ ਅਹੁਦੇ ਵਾਧੂ ਚਾਰਜ (ਅਡੀਸ਼ਨਲ ਚਾਰਜ) ਦੇ ਭਰੋਸੇ ਹੀ ਚੱਲ ਰਹੇ ਹਨ। ----------------- ਇਕੋ ਇੱਕ ਆਰਜ਼ੀ ਕਲਰਕ ਦੇ ਸਿਰ ’ਤੇ ਪੂਰਾ ਦਫ਼ਤਰ ਪਿਛਲੇ ਦੋ ਸਾਲਾਂ ਤੋਂ ਨਗਰ ਪੰਚਾਇਤ ’ਚ ਸਟਾਫ਼ ਦੀ ਕਿੱਲਤ ਹੋਰ ਵੀ ਗੰਭੀਰ ਹੋ ਗਈ ਹੈ। ਦਫ਼ਤਰ ਦੇ ਪੁਰਾਣੇ ਕਲਰਕ ਸੇਵਾ-ਮੁਕਤ (ਰਿਟਾਇਰ) ਹੋ ਚੁੱਕੇ ਹਨ, ਪਰ ਉਨ੍ਹਾਂ ਦੀ ਜਗ੍ਹਾ ਕਿਸੇ ਵੀ ਨਵੇਂ ਪੱਕੇ ਕਲਰਕ ਦੀ ਤਾਇਨਾਤੀ ਨਹੀਂ ਕੀਤੀ ਗਈ। ਇਸ ਵੇਲੇ ਮਹਿਜ਼ ਇੱਕੋ-ਇੱਕ ਆਰਜ਼ੀ (ਅਸਥਾਈ) ਕਲਰਕ ਪੂਰੇ ਦਫ਼ਤਰ ਦਾ ਕੰਮਕਾਜ ਚਲਾਉਣ ਲਈ ਮਜਬੂਰ ਹੈ। ਸਟਾਫ਼ ਦੀ ਇਸ ਭਾਰੀ ਕਮੀ ਕਾਰਨ ਸਥਾਨਕ ਨਿਵਾਸੀਆਂ ਨੂੰ ਆਪਣੇ ਸਧਾਰਨ ਕੰਮਾਂ-ਕਾਰਾਂ ਲਈ ਵੀ ਹਫ਼ਤਿਆਂ ਅਤੇ ਪੰਦਰਾਂ-ਪੰਦਰਾਂ ਦਿਨਾਂ ਤੱਕ ਦਫ਼ਤਰ ਦੇ ਗੇੜੇ ਮਾਰਨੇ ਪੈਂਦੇ ਹਨ। -------------- ਸਰਕਾਰਾਂ ਬਦਲੀਆਂ, ਪਰ ਬਰੀਵਾਲਾ ਦੀ ਕਿਸਮਤ ਨਹੀਂ ਬਦਲੀ ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਜਦੋਂ ਤੋਂ ਨਗਰ ਪੰਚਾਇਤ ਬਰੀਵਾਲਾ ਹੋਂਦ ’ਚ ਆਈ ਹੈ, ਉਦੋਂ ਤੋਂ ਲੈ ਕੇ ਹੁਣ ਤੱਕ ਸੂਬੇ ’ਚ ਵੱਖ-ਵੱਖ ਸਿਆਸੀ ਦਲਾਂ ਦੀਆਂ ਸਰਕਾਰਾਂ ਆਈਆਂ ਅਤੇ ਚਲੀਆਂ ਗਈਆਂ, ਪਰ ਕਿਸੇ ਵੀ ਸਰਕਾਰ ਨੇ ਬਰੀਵਾਲਾ ਦੀ ਇਸ ਮੁੱਖ ਸਮੱਸਿਆ ਵੱਲ ਕੋਈ ਧਿਆਨ ਨਹੀਂ ਦਿੱਤਾ। ਇਹੀ ਕਾਰਨ ਹੈ ਕਿ ਬਰੀਵਾਲਾ ਇਲਾਕਾ ਵਿਕਾਸ ਦੇ ਮਾਮਲੇ ’ਚ ਦੂਜੇ ਸ਼ਹਿਰਾਂ ਨਾਲੋਂ ਕਾਫੀ ਪਿੱਛੇ ਰਹਿ ਗਿਆ ਹੈ। --------------- ਸਫ਼ਾਈ ਵਿਵਸਥਾ ’ਤੇ ਮੰਡਰਾਉਣ ਲੱਗਾ ਸੰਕਟ ਦਫ਼ਤਰੀ ਸਟਾਫ਼ ਤੋਂ ਇਲਾਵਾ ਸ਼ਹਿਰ ਦੀ ਸਫ਼ਾਈ ਵਿਵਸਥਾ ਵੀ ਆਉਣ ਵਾਲੇ ਦਿਨਾਂ ’ਚ ਚਰਮਰਾ ਸਕਦੀ ਹੈ। ਨਗਰ ਪੰਚਾਇਤ ’ਚ ਇਸ ਵੇਲੇ ਸਿਰਫ਼ 5 ਪੱਕੇ (ਸਥਾਈ) ਅਤੇ 8 ਕੱਚੇ (ਅਸਥਾਈ) ਸਫ਼ਾਈ ਸੇਵਕ ਕੰਮ ਕਰ ਰਹੇ ਹਨ। ਚਿੰਤਾ ਦੀ ਗੱਲ ਇਹ ਹੈ ਕਿ ਇਨ੍ਹਾਂ ਪੱਕੇ ਸਫ਼ਾਈ ਸੇਵਕਾਂ ’ਚੋਂ ਵੀ 2-3 ਕਰਮਚਾਰੀ ਆਉਣ ਵਾਲੇ ਕੁਝ ਹੀ ਦਿਨਾਂ ’ਚ ਸੇਵਾ-ਮੁਕਤ ਹੋ ਰਹੇ ਹਨ, ਜਿਸ ਨਾਲ ਸ਼ਹਿਰ ਦੀ ਸਫ਼ਾਈ ਪ੍ਰਣਾਲੀ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਣ ਦਾ ਖ਼ਦਸ਼ਾ ਹੈ। ਬਰੀਵਾਲਾ ਦੇ ਸਮੂਹ ਨਗਰ ਨਿਵਾਸੀਆਂ ਨੇ ਸਰਕਾਰ ਅਤੇ ਉੱਚ ਅਧਿਕਾਰੀਆਂ ਤੋਂ ਪੁਰਜ਼ੋਰ ਮੰਗ ਕੀਤੀ ਹੈ ਕਿ ਨਗਰ ਪੰਚਾਇਤ ਦਫ਼ਤਰ ’ਚ ਤੁਰੰਤ ਸਥਾਈ ਕਾਰਜਸਾਧਕ ਅਫ਼ਸਰ (ਈਓ) ਨਿਯੁਕਤ ਕੀਤਾ ਜਾਵੇ। ਖਾਲੀ ਪਏ ਕਲਰਕਾਂ, ਜੇਈ ਅਤੇ ਹੋਰ ਤਕਨੀਕੀ ਅਹੁਦਿਆਂ ’ਤੇ ਪੱਕਾ ਸਟਾਫ਼ ਤਾਇਨਾਤ ਕੀਤਾ ਜਾਵੇ। ਨਗਰ ਦੀ ਸਫ਼ਾਈ ਨੂੰ ਸੁਚਾਰੂ ਰੱਖਣ ਲਈ ਨਵੇਂ ਸਫ਼ਾਈ ਕਰਮਚਾਰੀਆਂ ਦੀ ਭਰਤੀ ਕੀਤੀ ਜਾਵੇ, ਤਾਂ ਜੋ ਲੋਕਾਂ ਦੇ ਕੰਮ ਸਮੇਂ ਸਿਰ ਹੋ ਸਕਣ।