ਢਾਈ ਸਾਲਾਂ ਤੋਂ 19.38 ਕਰੋੜ ਪ੍ਰਾਜੈਕਟ ਰਾਹ ਹੋਇਆ ਪੱਧਰਾ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਮੰਡੀ ਬਰੀਵਾਲਾ : ਬਰੀਵਾਲਾ ਨਗਰ ਪੰਚਾਇਤ ਅਧੀਨ ਆਉਂਦੇ ਸਾਰੇ 11 ਵਾਰਡਾਂ ’ਚ ਸੀਵਰੇਜ ਲਾਈਨਾਂ ਵਿਛਾਉਣ ਅਤੇ ਐਸਟੀਪੀ (ਸੀਵਰੇਜ ਟ੍ਰੀਟਮੈਂਟ ਪਲਾਂਟ) ਲਗਾਉਣ ਲਈ 19.38 ਕਰੋੜ ਰੁਪਏ ਦੇ ਪ੍ਰੋਜੈਕਟ ਨੂੰ ਸ਼ੁਰੂ ਕਰਨ ਦਾ ਰਸਤਾ ਹੁਣ ਸਾਫ਼ ਹੋ ਗਿਆ ਹੈ। ਜ਼ਮੀਨ ਦੀ ਕੀਮਤ ਨੂੰ ਲੈ ਕੇ ਦੋ ਵਿਭਾਗਾਂ ਵਿਚਕਾਰ ਖਿੱਚਾਤਾਣੀ ਚੱਲ ਰਹੀ ਸੀ। ਲਗਭਗ ਢਾਈ ਸਾਲਾਂ ਤੋਂ ਇਹ ਪ੍ਰੋਜੈਕਟ ਕਿਸੇ ਨਾ ਕਿਸੇ ਕਾਰਨ ਕਰਕੇ ਰੁਕਿਆ ਹੋਇਆ ਸੀ। ਪਰ ਬੁੱਧਵਾਰ ਨੂੰ, ਮਾਰਕੀਟ ਕਮੇਟੀ ਨੇ ਆਪਣੀ ਜ਼ਮੀਨ ਨਗਰ ਪੰਚਾਇਤ ਦੇ ਨਾਮ ਤੇ ਰਜਿਸਟਰ ਕਰਵਾ ਦਿੱਤੀ। ਇਲਾਕੇ ਵਿੱਚ ਖੁਸ਼ੀ ਦੀ ਲਹਿਰ ਦੌੜ ਗਈ ਅਤੇ ਨਗਰ ਪੰਚਾਇਤ ਪ੍ਰਧਾਨ ਕੇਵਲ ਕ੍ਰਿਸ਼ਨ ਗੋਇਲ ਨੇ ਲੱਡੂ ਵੰਡ ਕੇ ਲੋਕਾਂ ਦਾ ਮੂੰਹ ਮਿੱਠਾ ਕਰਵਾਇਆ। ਇਹ ਗੱਲ ਧਿਆਨ ਦੇਣ ਯੋਗ ਹੈ ਕਿ 12 ਮਰਲੇ ਜ਼ਮੀਨ ਜਿੱਥੇ ਐਸਟੀਪੀ ਲਗਾਇਆ ਜਾਣਾ ਹੈ, ਉਹ ਮਾਰਕੀਟ ਕਮੇਟੀ ਬਰੀਵਾਲਾ ਦੀ ਹੈ। 2024-25 ਦੇ ਕੁਲੈਕਟਰ ਰੇਟ ਦੇ ਤਹਿਤ ਜ਼ਮੀਨ ਦੀ ਕੁੱਲ ਕੀਮਤ 2.41 ਕਰੋੜ 56 ਹਜ਼ਾਰ ਰੁਪਏ ਬਣਦੀ ਸੀ। ਮੰਡੀ ਬੋਰਡ ਨੇ ਇਸ ਦਰ ਤੇ ਸੀਵਰੇਜ ਬੋਰਡ ਨੂੰ ਜ਼ਮੀਨ ਦੇਣ ਲਈ ਸਹਿਮਤੀ ਦਿੱਤੀ ਸੀ। ਸੀਵਰੇਜ ਬੋਰਡ ਨੇ ਇਹ ਰਕਮ ਨਗਰ ਪੰਚਾਇਤ, ਬਰੀਵਾਲਾ ਦੇ ਖਾਤੇ ਵਿੱਚ ਜਮ੍ਹਾ ਕਰਵਾ ਦਿੱਤੀ, ਜਿਸਨੂੰ ਨਗਰ ਪੰਚਾਇਤ ਫਿਰ ਮਾਰਕੀਟ ਕਮੇਟੀ ਬਰੀਵਾਲਾ ਦੇ ਖਾਤੇ ਵਿੱਚ ਜਮ੍ਹਾ ਕਰਵਾਉਣਾ ਸੀ। ਪਰ ਚਾਰ ਮਹੀਨੇ ਪਹਿਲਾਂ ਮਾਰਕੀਟ ਕਮੇਟੀ ਦੇ ਅਧਿਕਾਰੀ ਕੁਲੈਕਟਰ ਰੇਟ ’ਚ ਵਾਧੇ ਦਾ ਦਾਅਵਾ ਕਰਦੇ ਹੋਏ 2025-26 ਲਈ ਨਿਰਧਾਰਤ ਕੁਲੈਕਟਰ ਰੇਟ ਦੇ ਮੁਤਾਬਕ ਕੁਲ ਰਾਸ਼ੀ ਦੋ ਕਰੋੜ 78 ਲੱਖ 16 ਹਜ਼ਾਰ ਬਣਦੀ ਹੈ। ਇਸਦੇ ਚਲਦਿਆਂ ਮਾਰਕਿਟ ਕਮੇਟੀ ਬਰੀਵਾਲਾ ਉਕਤ ਜਗ੍ਹਾ ਲੱਗਭਗ 36 ਲੱਖ ਰੁਪਏ ਵੱਧ ਦੀ ਮੰਗ ਕਰ ਰਹੀ ਹੈ। ਇਸ ਖਿੱਚਾਤਾਣੀ ’ਚ ਸੀਵਰੇਜ ਟ੍ਰੀਟਮੈਂਟ ਪਲਾਂਟ ਲਗਾਉਣ ਦਾ ਕੰਮ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਰੁਕ ਗਿਆ। ਪਹਿਲਾਂ ਐਸਟੀਪੀ ਲਗਾਉਣਾ ਪਵੇਗਾ ਅਤੇ ਫਿਰ ਪਾਈਪਲਾਈਨ ਵਿਛਾਉਣ ਦਾ ਕੰਮ ਸ਼ੁਰੂ ਕਰਨਾ ਪਵੇਗਾ। ਤੁਹਾਨੂੰ ਦੱਸ ਦੇਈਏ ਕਿ ਨਗਰ ਪੰਚਾਇਤ ਅਧੀਨ ਬਰੀਵਾਲਾ ਦੇ 11 ਵਾਰਡਾਂ ’ਚ ਸੀਵਰੇਜ ਪਾਇਪ ਨਹੀਂ ਪਾਈ ਗਈ। ਜਿਸ ਕਾਰਨ ਲੋਕ ਪ੍ਰੇਸ਼ਨ ਸਨ। ਹੁਣ ਬੁੱਧਵਾਰ ਨੂੰ ਦੋਵਾਂ ਵਿਭਾਗਾਂ ਵਿਚਕਾਰ ਸਮਝੌਤਾ ਹੋਇਆ ਅਤੇ ਮਾਰਕੀਟ ਕਮੇਟੀ ਨੇ 3 ਕਰੋੜ 5 ਲੱਖ ਰੁਪਏ ਵਿੱਚ ਜ਼ਮੀਨ ਨਗਰ ਪੰਚਾਇਤ ਬਰੀਵਾਲਾ ਦੇ ਨਾਮ ਰਜਿਸਟਰ ਕਰਵਾ ਦਿੱਤੀ ਹੈ। ਜਿਸ ਕਾਰਨ ਹੁਣ ਐਸ.ਟੀ.ਪੀ. ਅਤੇ ਪਾਈਪਲਾਈਨ ਵਿਛਾਉਣ ਦਾ ਰਸਤਾ ਸਾਫ਼ ਹੋ ਗਿਆ ਹੈ। ਇਹ ਗੱਲ ਧਿਆਨ ਦੇਣ ਯੋਗ ਹੈ ਕਿ ਬਰੀਵਾਲਾ ਦੇ ਨਗਰ ਪੰਚਾਇਤ ਅਧੀਨ 11 ਵਾਰਡ ਹਨ। ਇਸ ਇਲਾਕੇ ਵਿੱਚ ਲਗਭਗ 12,000 ਲੋਕ ਰਹਿੰਦੇ ਹਨ। ਦਹਾਕਿਆਂ ਤੋਂ, ਬਰੀਵਾਲਾ ਦੇ ਲੋਕ ਪਾਣੀ ਦੀ ਨਿਕਾਸੀ ਦੀ ਸਮੱਸਿਆ ਨਾਲ ਜੂਝਦੇ ਆ ਰਹੇ ਹਨ, ਅਤੇ ਪਿਛਲੀਆਂ ਕਈ ਸਰਕਾਰਾਂ ਨੇ ਬਰੀਵਾਲਾ ਵਿੱਚ ਸੀਵਰੇਜ ਦੇ ਮੁੱਦੇ ਤੇ ਚੋਣਾਂ ਲੜੀਆਂ ਸਨ, ਪਰ ਇਹ ਸਿਰਫ਼ ਚੋਣ ਵਾਅਦੇ ਹੀ ਰਹੇ। ਸੱਤਾ ਵਿੱਚ ਰਹਿੰਦਿਆਂ, ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਬਰੀਵਾਲਾ ਵਿੱਚ ਨੀਂਹ ਪੱਥਰ ਵੀ ਰੱਖਿਆ ਸੀ, ਪਰ ਕੰਮ ਕਦੇ ਸ਼ੁਰੂ ਨਹੀਂ ਹੋਇਆ। ਹੁਣ, ਲਗਭਗ ਦੋ ਸਾਲ ਪਹਿਲਾਂ, ਮੁਕਤਸਰ ਦੇ ਵਿਧਾਇਕ ਜਗਦੀਪ ਸਿੰਘ ਕਾਕਾ ਬਰਾੜ ਨੇ ਆਪ ਸਰਕਾਰ ਦੌਰਾਨ, ਬਰੀਵਾਲਾ ਵਿੱਚ 19.38 ਕਰੋੜ ਰੁਪਏ ਦੀ ਲਾਗਤ ਨਾਲ ਸੀਵਰੇਜ ਪ੍ਰੋਜੈਕਟ ਦਾ ਐਲਾਨ ਕੀਤਾ ਸੀ, ਅਤੇ ਹੁਣ ਕੰਮ ਸ਼ੁਰੂ ਹੋਣ ਲਈ ਹਰੀ ਝੰਡੀ ਦੇ ਦਿੱਤੀ ਗਈ ਹੈ। ਇਸ ਦੌਰਾਨ ਨਗਰ ਪੰਚਾਇਤ ਦੇ ਪ੍ਰਧਾਨ, ਸਾਰੇ ਕੌਂਸਲਰਾਂ ਅਤੇ ਨਗਰ ਦੇ ਲੋਕਾਂ ਨੇ ਹਲਕਾ ਵਿਧਾਇਕ ਜਗਦੀਪ ਸਿੰਘ ਕਾਕਾ ਬਰਾੜ ਦਾ ਧੰਨਵਾਦ ਕੀਤਾ। ਇਸ ਦੌਰਾਨ ਕੱਚਾ ਆੜ੍ਹਤੀਆ ਐਸੋਸੀਏਸ਼ਨ ਮੁਕਤਸਰ ਦੇ ਜ਼ਿਲ੍ਹਾ ਪ੍ਰਧਾਨ ਜਗਸੀਰ ਕੁਮਾਰ ਚਰਨਾ, ਕੱਚਾ ਆੜ੍ਹਤੀਆ ਬਰੀਵਾਲਾ ਦੇ ਪ੍ਰਧਾਨ ਅਜੈ ਗਰਗ, ਵਪਾਰ ਵਿੰਗ ਦੇ ਪ੍ਰਧਾਨ ਰਜਨੀਸ਼ ਗੋਇਲ, ਕੌਂਸਲਰ ਬਲਵਿੰਦਰ ਸਿੰਘ, ਕੌਂਸਲਰ ਡਾਕਟਰ ਅਜੀਤ, ਅਸ਼ੋਕ ਕੁਮਾਰ ਤੇ ਰਾਜ ਕੁਮਾਰ, ਕ੍ਰਿਸ਼ਨ ਚੰਦ ਕ੍ਰਾਂਤੀ, ਮਨਜੀਤ ਰਾਮ ਕਾਲਾ, ਬੀਰਬਲ ਦਾਸ, ਕੁਲਵੰਤ ਸਿੰਘ ਸੰਧੂ, ਮਾਸਟਰ ਨਾਇਬ ਸਿੰਘ, ਰਾਜੂ ਮੱਕੜ, ਹੈਪੀ ਡੇਅਰੀ ਵਾਲਾ ਤੋਂ ਇਲਾਵਾ ਹੋਰ ਵੀ ਸਖ਼ਸੀਅਤਾਂ ਹਾਜ਼ਰ ਸਨ। ਕੰਮ ਜਲਦੀ ਸ਼ੁਰੂ ਹੋਵੇਗਾ : ਐੱਸਡੀਓ ਜਦੋਂ ਸੀਵਰੇਜ ਬੋਰਡ ਦੇ ਐਸਡੀਓ ਵਿਸ਼ਵਜੀਤ ਸਿੰਘ ਸਿੱਧੂ ਨਾਲ ਸੰਪਰਕ ਕੀਤਾ ਗਿਆ ਤਾਂ ਉਨ੍ਹਾਂ ਕਿਹਾ ਕਿ ਰਜਿਸਟਰੀ ਹੋ ਗਈ ਹੈ। ਮਾਰਕੀਟ ਕਮੇਟੀ ਦੀ ਜਗ੍ਹਾ ਨਗਰ ਪੰਚਾਇਤ ਦੇ ਨਾਮ ਹੋ ਗਈ ਹੈ। ਇਸ ਵਿਵਾਦ ਕਾਰਨ ਟੈਂਡਰ ਪ੍ਰਕਿਰਿਆ ਨੂੰ ਅਸਥਾਈ ਤੌਰ ਤੇ ਰੋਕ ਦਿੱਤਾ ਸੀ, ਪਰ ਹੁਣ ਕੰਮ ਜਲਦੀ ਹੀ ਦੁਬਾਰਾ ਸ਼ੁਰੂ ਕੀਤਾ ਜਾਵੇਗਾ ਅਤੇ ਠੇਕਾ ਇੱਕ ਕੰਪਨੀ ਨੂੰ ਦਿੱਤਾ ਜਾਵੇਗਾ।