- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਕ੍ਰਿਕਟ ਦਾ ਜਨੂੰਨ: ਤਪਦੀ ਗਰਮੀ ਵੀ ਕ੍ਰਿਕਟ ਦੇ ਜਜ਼ਬੇ ਅੱਗੇ ਪਈ ਫਿੱਕੀ, ਦੂਜੇ ਦਿਨ ਲਗਪਗ 10 ਹਜ਼ਾਰ ਦਰਸ਼ਕਾਂ ਨੇ ਭਰੀ ਹਾਜ਼ਰੀ
ਪੰਜਾਬ ਵਿਚ ਪੈ ਰਹੀ ਤਪਦੀ ਗਰਮੀ ਵੀ ਐਤਵਾਰ ਨੂੰ ਕ੍ਰਿਕਟ ਪ੍ਰੇਮੀਆਂ ਦੇ ਜਜ਼ਬੇ ਨੂੰ ਨਹੀਂ ਰੋਕ ਸਕੀ। ਭਾਰਤ ਅਤੇ ਅਫ਼ਗਾਨਿਸਤਾਨ ਵਿਚਾਲੇ ਖੇਡੇ ਜਾ ਰਹੇ ਇਕਲੌਤੇ ਟੈਸਟ ਮੈਚ ਦੇ ਦੂਜੇ ਦਿਨ ਨਿਊ ਚੰਡੀਗੜ੍ਹ ਸਥਿਤ ਪੰਜਾਬ ਕ੍ਰਿਕਟ ਐਸੋਸੀਏਸ਼ਨ ਸਟੇਡੀਅਮ ਵਿਚ ਲਗਪਗ 10 ਹਜ਼ਾਰ ਦਰਸ਼ਕਾਂ ਨੇ ਹਾਜ਼ਰੀ ਲਗਾ ਕੇ ਕ੍ਰਿਕਟ ਪ੍ਰਤੀ ਆਪਣੇ ਪਿਆਰ ਦਾ ਪ੍ਰਗਟਾਵਾ ਕੀਤਾ।
Posted By Anuradha Bains
Publish Date: Mon, 08 Jun 2026 12:41 PM (IST)
Updated Date: Mon, 08 Jun 2026 12:49 PM (IST)
ਰਣਜੀਤ ਸਿੰਘ ਰਾਣਾ, ਪੰਜਾਬੀ ਜਾਗਰਣ, ਮੁਹਾਲੀ। ਪੰਜਾਬ ਵਿਚ ਪੈ ਰਹੀ ਤਪਦੀ ਗਰਮੀ ਵੀ ਐਤਵਾਰ ਨੂੰ ਕ੍ਰਿਕਟ ਪ੍ਰੇਮੀਆਂ ਦੇ ਜਜ਼ਬੇ ਨੂੰ ਨਹੀਂ ਰੋਕ ਸਕੀ। ਭਾਰਤ ਅਤੇ ਅਫ਼ਗਾਨਿਸਤਾਨ ਵਿਚਾਲੇ ਖੇਡੇ ਜਾ ਰਹੇ ਇਕਲੌਤੇ ਟੈਸਟ ਮੈਚ ਦੇ ਦੂਜੇ ਦਿਨ ਨਿਊ ਚੰਡੀਗੜ੍ਹ ਸਥਿਤ ਪੰਜਾਬ ਕ੍ਰਿਕਟ ਐਸੋਸੀਏਸ਼ਨ ਸਟੇਡੀਅਮ ਵਿਚ ਲਗਪਗ 10 ਹਜ਼ਾਰ ਦਰਸ਼ਕਾਂ ਨੇ ਹਾਜ਼ਰੀ ਲਗਾ ਕੇ ਕ੍ਰਿਕਟ ਪ੍ਰਤੀ ਆਪਣੇ ਪਿਆਰ ਦਾ ਪ੍ਰਗਟਾਵਾ ਕੀਤਾ।
ਇਹ ਹਾਜ਼ਰੀ ਇਸ ਗੱਲ ਦਾ ਸਬੂਤ ਹੈ ਕਿ ਭਾਰਤ ਦੇ 31ਵੇਂ ਟੈਸਟ ਮੇਜ਼ਬਾਨ ਵਜੋਂ ਨਿਊ ਚੰਡੀਗੜ੍ਹ ਦੀ ਸ਼ੁਰੂਆਤ ਨੂੰ ਕ੍ਰਿਕਟ ਪ੍ਰੇਮੀਆਂ ਵੱਲੋਂ ਭਰਪੂਰ ਸਮਰਥਨ ਮਿਲ ਰਿਹਾ ਹੈ। ਸਟੈਂਡਾਂ ਵਿਚ ਗੂੰਜਦੇ ਨਾਅਰੇ ਅਤੇ ਤਾਲੀਆਂ ਦੌਰਾਨ ਦਰਸ਼ਕਾਂ ਨੇ ਤਪਦੀ ਧੁੱਪ ਦੇ ਬਾਵਜੂਦ ਉੱਚ ਪੱਧਰੀ ਟੈਸਟ ਕ੍ਰਿਕਟ ਦਾ ਆਨੰਦ ਮਾਣਿਆ।
ਮੈਚ ਦੇ ਦੂਜੇ ਦਿਨ ਦੀ ਸ਼ੁਰੂਆਤ ਮੌਕੇ ਪੀ.ਸੀ.ਏ. ਦੇ ਆਨਰੇਰੀ ਸਕੱਤਰ ਗੁਰਮੀਤ ਸਿੰਘ ਮੀਤ ਹੇਅਰ ਨੇ ਰਵਾਇਤੀ ਘੰਟੀ ਵਜ੍ਹਾ ਕੇ ਖੇਡ ਦਾ ਆਗਾਜ਼ ਕੀਤਾ। ਮੈਦਾਨ ਤੋਂ ਬਾਹਰ ਵੀ ਇਕ ਦਿਲ ਛੂਹਣ ਵਾਲਾ ਪਲ ਵੇਖਣ ਨੂੰ ਮਿਲਿਆ, ਜਦੋਂ ਮੀਤ ਹੇਅਰ ਨੇ ਅਫ਼ਗਾਨਿਸਤਾਨ ਤੋਂ ਆਪਣੀ ਟੀਮ ਦਾ ਹੌਸਲਾ ਵਧਾਉਣ ਲਈ ਵਿਸ਼ੇਸ਼ ਤੌਰ ’ਤੇ ਆਏ ਕ੍ਰਿਕਟ ਪ੍ਰੇਮੀ ਖਿਆਲ ਮੁਹੰਮਦ ਦਾ ਪੀ.ਸੀ.ਏ. ਦਫ਼ਤਰ ਵਿਚ ਸਨਮਾਨ ਕੀਤਾ।
ਮੀਤ ਹੇਅਰ ਨੇ ਕਿਹਾ ਕਿ ਅਜਿਹਾ ਜਜ਼ਬਾ ਹੀ ਕ੍ਰਿਕਟ ਨੂੰ ਸਰਹੱਦਾਂ ਤੋਂ ਉੱਪਰ ਉਠਾ ਕੇ ਲੋਕਾਂ ਨੂੰ ਜੋੜਨ ਵਾਲੀ ਖੇਡ ਬਣਾਉਂਦਾ ਹੈ। ਇਤਿਹਾਸਕ ਪਲਾਂ ਤੋਂ ਲੈ ਕੇ ਮਨੁੱਖੀ ਭਾਵਨਾਵਾਂ ਨਾਲ ਭਰੀਆਂ ਕਹਾਣੀਆਂ ਤੱਕ, ਨਿਊ ਚੰਡੀਗੜ੍ਹ ਵਿਚ ਟੈਸਟ ਮੈਚ ਦੇ ਦੂਜੇ ਦਿਨ ਨੇ ਇਕ ਵਾਰ ਫਿਰ ਸਾਬਤ ਕਰ ਦਿੱਤਾ ਕਿ ਟੈਸਟ ਕ੍ਰਿਕਟ ਅੱਜ ਵੀ ਦਰਸ਼ਕਾਂ ਦੀ ਪਸੰਦ ਹੈ ਅਤੇ ਲੋਕਾਂ ਦੇ ਦਿਲਾਂ ਵਿਚ ਵੱਸਦੀ ਹੈ।