ਸਵਾਮੀ ਵਿਗਿਆਨਾਨੰਦ ਨੇ ਭਗਤਾਂ ਨੂੰ ਸੁਣਾਏ ਪ੍ਰਵਚਨ

ਸਟਾਫ ਰਿਪੋਰਟਰ, ਪੰਜਾਬੀ ਜਾਗਰਣ, ਮੋਗਾ: ਦਿਵਯ ਜਯੋਤੀ ਜਾਗ੍ਰਤੀ ਸੰਸਥਾਨ ਵੱਲੋਂ ਵਿਸ਼ਵ ਸ਼ਾਂਤੀ ਦੀ ਮੰਗਲ ਕਾਮਨਾ ਦੇ ਉਦੇਸ਼ ਨਾਲ ਆਪਣੇ ਸਥਾਨਕ ਆਸ਼ਰਮ ਵਿਖੇ ਵਿਲੱਖਣਯੋਗ ਅਤੇ ਧਿਆਨ ਸ਼ਿਵਿਰ ਦੇ ਅੱਜ ਅੰਤਿਮ ਦਿਨ ਸੰਸਥਾਨ ਵੱਲੋਂ ਸਵਾਮੀ ਵਿਗਿਆਨਾਨੰਦ ਨੇ ਦੱਸਿਆ ਕਿ ਜੀਵਨ ਝੂਠ ਤੋਂ ਸੱਚ, ਹਨ੍ਹੇਰੇ ਤੋਂ ਰੋਸ਼ਨੀ, ਮੌਤ ਤੋਂ ਅਮਰਤਾ, ਅਗਿਆਨਤਾ ਤੋਂ ਗਿਆਨ ਤੱਕ ਦਾ ਸਫ਼ਰ ਹੈ ਅੱਗੇ ਵਧਣ ਦੀ ਆਵਾਜ਼ ਹੈ। ਉਨ੍ਹਾਂ ਕਿਹਾ ਪਰ ਦੁੱਖ ਦੀ ਗੱਲ ਹੈ ਕਿ ਇਸ ਦੇ ਉਲਟ ਅੱਜ ਵਿਕਾਸ ਦੀ ਅੰਨ੍ਹੀ ਦੌੜ ਵਿਚ ਮਨੁੱਖ ਇਸ ਸਫ਼ਰ ਨੂੰ ਭੁੱਲ ਕੇ ਸ਼ਾਂਤੀ ਦੀ ਭਾਲ ਵਿਚ ਇਧਰ-ਉਧਰ ਭਟਕ ਰਿਹਾ ਹੈ ਪਰ ਸ਼ਾਂਤੀ ਪ੍ਰਾਪਤ ਨਾ ਹੋਣ ਕਾਰਨ ਉਹ ਪਹਿਲਾਂ ਨਾਲੋਂ ਜ਼ਿਆਦਾ ਪੈਸੇ ਦਾ ਲਾਲਚੀ ਹੁੰਦਾ ਜਾ ਰਿਹਾ ਹੈ। ਨਤੀਜੇ ਵਜੋਂ ਅਸ਼ਾਂਤੀ, ਉਦਾਸੀ, ਅਗਿਆਨਤਾ, ਬੇਇਨਸਾਫ਼ੀ, ਸ਼ੋਸ਼ਣ ਅਤੇ ਅਨੈਤਿਕ ਮਾਨਵੀ ਕਦਰਾਂ-ਕੀਮਤਾਂ ਨਾਲ ਜੂਝ ਰਿਹਾ ਮਨੁੱਖੀ ਸਮਾਜ ਪਤਨ ਦੀ ਖੱਡ ਵਿਚ ਧੱਸਦਾ ਜਾ ਰਿਹਾ ਹੈ। ਸਵਾਮੀ ਨੇ ਦੱਸਿਆ ਕਿ ਅਗਿਆਨਤਾ, ਅਸਤ ਅਤੇ ਅਨਿਆਂ ਮਨੁੱਖੀ ਮਨ ਦਾ ਸੁਭਾਅ ਹੈ। ਜੋ ਮਨੁੱਖ ਨੂੰ ਹਨ੍ਹੇਰੇ ਵੱਲ ਲੈ ਜਾਂਦੇ ਹਨ। ਮਨੁੱਖ ਕਦੇ ਵੀ ਹਨ੍ਹੇਰੇ ਦੇ ਰਾਜ ਵਿਚ ਹੱਲ ਨਹੀਂ ਲੱਭ ਸਕਦਾ। ਜ਼ਮੀਰ ਦੇ ਹਨੇਰੇ ਦੇ ਰਾਜ ਵਿਚ ਅਤੇ ਗਿਆਨ ਦੇ ਪ੍ਰਕਾਸ਼ ਦੀ ਅਣਹੋਂਦ ਵਿਚ, ਮਨੁੱਖ ਬੇਚੈਨੀ ਨਾਲ ਭਰਿਆ ਹੋਇਆ ਹੈ। ਲੋੜ ਹੈ ਕਿ ਸਾਡੇ ਸੰਤਾਂ ਮਹਾਂਪੁਰਖਾਂ ਦੇ ਕਥਨ ਅਨੁਸਾਰ ਪੂਰੇ ਸਤਿਗੁਰੂ ਦੀ ਕਿਰਪਾ ਨਾਲ ਬ੍ਰਹਮ ਗਿਆਨ ਪ੍ਰਾਪਤ ਕਰਕੇ ਆਤਮਿਕ ਅਤੇ ਮਾਨਸਿਕ ਸ਼ਾਂਤੀ ਪ੍ਰਾਪਤ ਕੀਤੀ ਜਾਵੇ। ਬ੍ਰਹਮਗਿਆਨ ਦੇ ਪ੍ਰਕਾਸ਼ ਵਿਚ ਜਦੋਂ ਕੋਈ ਸਾਧਕ ਆਪਣੇ ਸਤਿਗੁਰੂ ਦੀ ਆਗਿਆ ਦੀ ਪਾਲਣਾ ਕਰਦੇ ਹੋਏ, ਸਾਧਨਾ ਦੇ ਮਾਰਗ ’ਤੇ ਅੱਗੇ ਵਧਦਾ ਹੈ ਤਾਂ ਉਸਦੀ ਸਾਧਨਾ ਆਤਮ-ਕਲਿਆਣ ਤੋਂ ਵਿਸ਼ਵ ਸ਼ਾਂਤੀ ਵੱਲ ਉੜਾਨ ਹੈ। ਇਹ ਸਾਧਨਾ ਦਾ ਮੂਲ ਅਤੇ ਜੀਵਨ ਦੀ ਜਾਗ੍ਰਿਤੀ ਹੈ। ਪ੍ਰੋਗਰਾਮ ਵਿਚ ਸਾਧਵੀ ਗਿਆਨ ਪ੍ਰਭਾ ਭਾਰਤੀ, ਏਕਤਾ ਭਾਰਤੀ ਅਤੇ ਸ਼ਿਲਪਾ ਭਾਰਤੀ ਨੇ ਵੈਦਿਕ ਮੰਤਰਾਂ ਦਾ ਜਾਪ ਕੀਤਾ ਅਤੇ ਸਰਬਤ ਦੇ ਭਲੇ ਦੀ ਪ੍ਰਾਰਥਨਾ ਕੀਤੀ। ਪ੍ਰੋਗਰਾਮ ਵਿਚ ਸਾਰੇ ਸਾਧਕਾਂ ਨੇ ਵਿਸ਼ਵ ਸ਼ਾਂਤੀ ਲਈ ਸਾਧਨਾ ਕਰਕੇ ਆਤਮਿਕ ਸ਼ਾਂਤੀ ਅਤੇ ਅਲੌਕਿਕ ਅਨੁਭਵਾਂ ਦੀ ਪ੍ਰਾਪਤੀ ਕੀਤੀ।