ਗ੍ਰਾਮ ਪੰਚਾਇਤ ਵਿਕਾਸ ਯੋਜਨਾ ਤੇ ਟੀਬੀ ਮੁਕਤ ਪੰਚਾਇਤ ਤਹਿਤ ਟ੍ਰੇਨਿੰਗ ਕੈਂਪ

ਮਨਪ੍ਰੀਤ ਸਿੰਘ ਮੱਲੇਆਣਾ, ਪੰਜਾਬੀ ਜਾਗਰਣ, ਮੋਗਾ : ਗ੍ਰਾਮ ਪੰਚਾਇਤ ਵਿਕਾਸ ਯੋਜਨਾ ਅਤੇ ਟੀਬੀ ਮੁਕਤ ਪੰਚਾਇਤ ਟ੍ਰੇਨਿੰਗ ਤਹਿਤ ਇਕ ਦਿਨਾ ਟ੍ਰੇਨਿੰਗ ਕੈਂਪ ਮੀਟਿੰਗ ਹਾਲ ਡਿਪਟੀ ਕਮਿਸ਼ਨਰ ਦਫ਼ਤਰ ਮੋਗਾ ਵਿਖੇ ਆਯੋਜਿਤ ਕੀਤਾ ਗਿਆ। ਇਹ ਟ੍ਰੇਨਿੰਗ ਕੈਂਪ ਡਾ. ਗੌਰਵਪ੍ਰੀਤ ਸਿੰਘ ਸੋਢੀ ਜ਼ਿਲ੍ਹਾ ਟੀਬੀ ਅਫ਼ਸਰ ਮੋਗਾ ਦੀ ਰਹਿਨੁਮਾਈ ਹੇਠ ਕਰਵਾਇਆ ਗਿਆ ਜਿਸ ਦਾ ਮੁੱਖ ਮਕਸਦ ਟੀਬੀ ਖ਼ਾਤਮੇ ਲਈ ਪੰਚਾਇਤਾਂ ਦੀ ਭੂਮਿਕਾ ਨੂੰ ਹੋਰ ਮਜ਼ਬੂਤ ਕਰਨਾ ਸੀ। ਟ੍ਰੇਨਿੰਗ ਦੌਰਾਨ ਪਿੰਡ ਪੱਧਰ ’ਤੇ ਟੀਬੀ ਸੰਬੰਧੀ ਗਤੀਵਿਧੀਆਂ ਦੀ ਯੋਜਨਾ ਬਣਾਉਣ ਲਾਗੂ ਕਰਨ ਅਤੇ ਨਿਗਰਾਨੀ ਬਾਰੇ ਸਥਾਨਕ ਹਿੱਸੇਦਾਰਾਂ ਨੂੰ ਜਾਣੂੰ ਕਰਵਾਇਆ ਗਿਆ। ਟੀਬੀ ਮੁਕਤ ਪੰਚਾਇਤ ਸੈਸ਼ਨ ਸੁਧੀਰ ਸਿੰਘ, ਡਿਸਟ੍ਰਿਕਟ ਲੀਡ ਮੋਗਾ, ਇੰਪੈਕਟ ਇੰਡੀਆ ਪ੍ਰੋਜੈਕਟ ਵੱਲੋਂ ਕਰਵਾਇਆ ਗਿਆ, ਜਿਨ੍ਹਾਂ ਨੇ ਟੀਬੀ ਮੁਕਤ ਪੰਚਾਇਤ ਪਹਿਲਕਦਮੀ ਦੇ ਉਦੇਸ਼ਾਂ ਅਤੇ ਮੁੱਖ ਮਾਪਦੰਡਾਂ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਦਿੱਤੀ। ਇਸ ਮੌਕੇ ਡੀਪੀਡੀਪੀ ਡਿਸਟ੍ਰਿਕਟ ਪੰਚਾਇਤ ਵਿਕਾਸ ਯੋਜਨਾ ਬਜਟ ਦੀ ਪ੍ਰਭਾਵਸ਼ਾਲੀ ਵਰਤੋਂ ’ਤੇ ਵਿਸ਼ੇਸ਼ ਜ਼ੋਰ ਦਿੱਤਾ ਗਿਆ ਜਿਸ ਵਿਚ ਟੀਬੀ ਜਾਗਰੂਕਤਾ ਮੁਹਿੰਮਾਂ, ਸਮੁਦਾਇਕ ਮੀਟਿੰਗਾਂ, ਮਰੀਜ਼ ਸਹਾਇਤਾ ਗਤੀਵਿਧੀਆਂ, ਸਮਾਜਿਕ ਦਾਗ਼ ਘਟਾਉਣ, ਪੋਸ਼ਣ ਸੰਬੰਧੀ ਜਾਗਰੂਕਤਾ ਅਤੇ ਐਕਟਿਵ ਕੇਸ ਫਾਈਂਡਿੰਗ ਨੂੰ ਮਜ਼ਬੂਤ ਕਰਨ ਵਰਗੀਆਂ ਗਤੀਵਿਧੀਆਂ ਸ਼ਾਮਿਲ ਹਨ। ਪੰਚਾਇਤਾਂ ਅਤੇ ਸਿਹਤ ਪ੍ਰਣਾਲੀ ਵਿਚਕਾਰ ਤਾਲਮੇਲ ਦੀ ਮਹੱਤਤਾ ਉਭਾਰਦੇ ਹੋਏ ਕਿਹਾ ਗਿਆ ਕਿ ਇਸ ਨਾਲ ਟੀਬੀ ਦੀ ਸਮੇਂ-ਸਿਰ ਪਛਾਣ, ਇਲਾਜ ਦੀ ਪਾਲਣਾ ਅਤੇ ਇਲਾਜ ਪੂਰਾ ਕਰਵਾਉਣਾ ਯਕੀਨੀ ਬਣਾਇਆ ਜਾ ਸਕਦਾ ਹੈ। ਟ੍ਰੇਨਿੰਗ ਕੈਂਪ ਦੇ ਉਦੇਸ਼ਾਂ ਬਾਰੇ ਵੀ ਵਿਸਥਾਰ ਨਾਲ ਚਰਚਾ ਕੀਤੀ ਗਈ। ਮਾਸਟਰ ਟ੍ਰੇਨਰ ਹਰਜੀਤ ਕੌਰ, ਸੁਧੀਰ ਸਿੰਘ, ਸੰਜੀਵ ਮਿਸ਼ਰਾ, ਸੁਖ ਸਿੰਘ, ਜਸਦੀਪ ਸਿੰਘ, ਰਮਨਦੀਪ ਕੌਰ, ਕਰਮਜੀਤ ਕੌਰ, ਅਮ੍ਰਿਤ ਸਿੰਘ, ਕੁਲਵਿੰਦਰ ਸਿੰਘ ਅਤੇ ਪ੍ਰਭ ਜੋਤੀ ਨੇ ਪੰਚਾਇਤੀ ਰਾਜ ਅਤੇ ਟੀਬੀ ਖ਼ਤਮੇ ਨਾਲ ਸਬੰਧਤ ਵੱਖਵੱਖ ਵਿਸ਼ਿਆਂ ’ਤੇ ਕੀਮਤੀ ਜਾਣਕਾਰੀ ਸਾਂਝੀ ਕੀਤੀ। ਇਸ ਟ੍ਰੇਨਿੰਗ ਵਿਚ ਸਰਪੰਚਾਂ, ਪੰਚਾਂ, ਆਸ਼ਾ ਵਰਕਰਾਂ, ਆੰਗਣਵਾੜੀ ਵਰਕਰਾਂ ਅਤੇ ਗ੍ਰਾਂਮ ਰੁਜ਼ਗਾਰ ਸੇਵਕਾਂ ਨੇ ਸਰਗਰਮ ਭਾਗੀਦਾਰੀ ਕੀਤੀ। ਉਨ੍ਹਾਂ ਨੇ ਮੈਦਾਨੀ ਤਜ਼ਰਬੇ ਸਾਂਝੇ ਕਰਦਿਆਂ ਪਿੰਡ ਵਿਕਾਸ ਯੋਜਨਾਵਾਂ ਵਿਚ ਟੀਬੀ ਸਬੰਧੀ ਕਾਰਵਾਈਆਂ ਸ਼ਾਮਿਲ ਕਰਨ ਲਈ ਆਪਣੀ ਵਚਨਬੱਧਤਾ ਜ਼ਾਹਿਰ ਕੀਤੀ। ਕਾਰਜਕ੍ਰਮ ਦਾ ਸਮਾਪਨ ਟੀਬੀ ਮੁਕਤ ਪੰਚਾਇਤ ਦਾ ਦਰਜਾ ਹਾਸਿਲ ਕਰਨ ਅਤੇ ਟੀਬੀ ਮੁਕਤ ਭਾਰਤ ਦੇ ਲਕਸ਼ ਨੂੰ ਪ੍ਰਾਪਤ ਕਰਨ ਦੇ ਸਾਂਝੇ ਸੰਕਲਪ ਨਾਲ ਕੀਤਾ ਗਿਆ।