ਪੇਵਿਲਿਅਨ ਮਾਲ ਅੰਦਰੋਂ ਆਈਫੋਨ ਲੁੱਟ ਕੇ ਫਰਾਰ ਹੋਇਆ ਲੁਟੇਰਾ

- ਅੱਧੇ ਘੰਟੇ ’ਚ ਖਾਤੇ ’ਚੋਂ 20 ਹਜ਼ਾਰ ਰੁਪਏ ਵੀ ਕਰ ਲਏ ਟਰਾਂਸਫਰ ਸੁਸ਼ੀਲ ਕੁਮਾਰ ਸ਼ਸ਼ੀ, ਪੰਜਾਬੀ ਜਾਗਰਣ ਲੁਧਿਆਣਾ : ਫੁਹਾਰਾ ਚੌਕ ਕੋਲ ਪੈਂਦੇ ਪੇਵਿਲਿਅਨ ਮਾਲ ਵਿੱਚੋਂ ਇੱਕ ਹੈਰਾਨ ਕਰਨ ਵਾਲੀ ਲੁੱਟ ਦੀ ਘਟਨਾ ਸਾਹਮਣੇ ਆਈ ਹੈ। ਮਾਲ ਦੇ ਚੌਥੇ ਮੰਜ਼ਿਲ ’ਤੇ ਘੁੰਮ ਰਹੇ ਇੱਕ ਵਿਅਕਤੀ ਕੋਲੋਂ ਲੁਟੇਰੇ ਨੇ ਆਈਫੋਨ ਖੋਹ ਲਿਆ ਅਤੇ ਬੜੀ ਆਸਾਨੀ ਨਾਲ ਮਾਲ ਵਿੱਚੋਂ ਫ਼ਰਾਰ ਹੋ ਗਿਆ। ਘਟਨਾ ਤੋਂ ਬਾਅਦ ਮਾਲ ਦੀ ਸੁਰੱਖਿਆ ਪ੍ਰਬੰਧਾਂ ’ਤੇ ਵੀ ਸਵਾਲ ਖੜ੍ਹੇ ਹੋ ਰਹੇ ਹਨ। ਸੇਖੇਵਾਲ ਰੋਡ ਵਾਸੀ ਸੌਰਵ ਨੇ ਦੱਸਿਆ ਕਿ ਉਹ ਸ਼ਾਮ ਲਗਭਗ 5:40 ਵਜੇ ਪੇਵਿਲਿਅਨ ਮਾਲ ਦੀ ਚੌਥੀ ਮੰਜ਼ਿਲ ’ਤੇ ਘੁੰਮ ਰਿਹਾ ਸੀ। ਇਸ ਦੌਰਾਨ ਇੱਕ ਅਣਪਛਾਤਾ ਵਿਅਕਤੀ ਉਸ ਦੇ ਕੋਲ ਆਇਆ ਅਤੇ ਅਚਾਨਕ ਉਸ ਦਾ ਆਈਫੋਨ ਖੋਹ ਕੇ ਪੌੜੀਆਂ ਰਾਹੀਂ ਭੱਜ ਗਿਆ। ਵਾਰਦਾਤ ਨੂੰ ਅੰਜਾਮ ਇੰਨੀ ਤੇਜ਼ੀ ਨਾਲ ਦਿੱਤਾ ਗਿਆ ਕਿ ਉਹ ਕੁਝ ਸਮਝ ਹੀ ਨਹੀਂ ਸਕਿਆ। ਪੀੜਤ ਅਨੁਸਾਰ ਲੁਟੇਰਾ ਬਿਨਾਂ ਮਾਸਕ ਦੇ ਸੀ ਅਤੇ ਉਸ ਦੇ ਚਿਹਰੇ ਦੀਆਂ ਤਸਵੀਰਾਂ ਮਾਲ ਦੇ ਸੀਸੀਟੀਵੀ ਕੈਮਰਿਆਂ ਵਿੱਚ ਕੈਦ ਹੋ ਗਈਆਂ। ਘਟਨਾ ਤੋਂ ਤੁਰੰਤ ਬਾਅਦ ਉਸ ਨੇ ਡਵੀਜ਼ਨ ਨੰਬਰ-8 ਥਾਣੇ ਵਿੱਚ ਸ਼ਿਕਾਇਤ ਦਰਜ ਕਰਵਾਈ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਘਟਨਾ ਤੋਂ ਕਰੀਬ ਅੱਧੇ ਘੰਟੇ ਅੰਦਰ ਹੀ ਲੁਟੇਰੇ ਨੇ ਆਈਫੋਨ ਦਾ ਪਾਸਵਰਡ ਤੋੜ ਕੇ ਪੀੜਤ ਦੇ ਖਾਤੇ ਵਿੱਚੋਂ 20 ਹਜ਼ਾਰ ਰੁਪਏ ਆਨਲਾਈਨ ਟਰਾਂਸਫਰ ਕਰ ਦਿੱਤੇ। ਇਹ ਰਕਮ ਪ੍ਰਦੀਪ ਨਾਮਕ ਵਿਅਕਤੀ ਦੇ ਖਾਤੇ ਵਿੱਚ ਭੇਜੀ ਗਈ। ਪੀੜਤ ਨੇ ਕਿਹਾ ਕਿ ਉਸ ਨੂੰ ਸਮਝ ਨਹੀਂ ਆ ਰਹੀ ਕਿ ਲੁਟੇਰੇ ਨੇ ਇੰਨੀ ਜਲਦੀ ਫੋਨ ਅਤੇ ਫਾਇਨੈਂਸ਼ਲ ਐਪ ਦਾ ਪਾਸਵਰਡ ਕਿਵੇਂ ਤੋੜ ਲਿਆ। ਸ਼ਿਕਾਇਤਕਰਤਾ ਨੇ ਦੱਸਿਆ ਕਿ ਮਾਲ ਦੇ ਸੀਸੀਟੀਵੀ ਵਿੱਚ ਮੁਲਜ਼ਮ ਦੀ ਤਸਵੀਰ ਕੈਦ ਹੈ, ਪਰ ਪਹਿਲਾਂ ਮਾਲ ਪ੍ਰਬੰਧਨ ਨੇ ਉਸ ਨਾਲ ਫੁਟੇਜ ਸਾਂਝੀ ਕਰਨ ਤੋਂ ਇਨਕਾਰ ਕਰ ਦਿੱਤਾ ਸੀ। ਬਾਅਦ ਵਿੱਚ ਇਹ ਫੁਟੇਜ ਪੁਲਿਸ ਨੂੰ ਮੁਹੱਈਆ ਕਰਵਾ ਦਿੱਤੀ ਗਈ। ਪੁਲਿਸ ਨੇ ਮਾਮਲਾ ਦਰਜ ਕਰ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਜਾਂਚ ਦੌਰਾਨ ਪੁਲਿਸ ਨੇ ਮੁਲਜ਼ਮ ਦੀ ਲੋਕੇਸ਼ਨ ਰਾਏਕੋਟ ਤੱਕ ਟਰੇਸ ਕੀਤੀ ਹੈ। ਸੀਸੀਟੀਵੀ ਫੁਟੇਜ ਅਤੇ ਟਰਾਂਸਫਰ ਕੀਤੀ ਗਈ ਰਕਮ ਦੇ ਆਧਾਰ ’ਤੇ ਪੁਲਿਸ ਮੁਲਜ਼ਮ ਦੀ ਪਛਾਣ ਕਰਨ ਵਿੱਚ ਜੁਟੀ ਹੋਈ ਹੈ।