ਐਨਸੀਸੀ ਗਰੁੱਪ ਨੇ ਕੈਡਿਟਾਂ ਲਈ ਡਰੋਨ ਸਿਖਲਾਈ ਦਾ ਕੀਤਾ ਪ੍ਰਬੰਧ

ਰਵੀ, ਪੰਜਾਬੀ ਜਾਗਰਣ, ਲੁਧਿਆਣਾ : ਬ੍ਰਿਗੇਡੀਅਰ ਪੀਐੱਸ ਚੀਮਾ ਗਰੁੱਪ ਕਮਾਂਡਰ ਐੱਨਸੀਸੀ ਗਰੁੱਪ ਲੁਧਿਆਣਾ ਨੇ ਡਰੋਨ ਸਿਖਲਾਈ ਕੈਂਪ ਦਾ ਦੌਰਾ ਕੀਤਾ ਤੇ ਯੋਗ ਡਰੋਨ ਇੰਸਟ੍ਰਕਟਰਾਂ ਵੱਲੋਂ ਕੀਤੀਆਂ ਜਾ ਰਹੀਆਂ ਵੱਖ-ਵੱਖ ਸਿਖਲਾਈ ਗਤੀਵਿਧੀਆਂ ਦਾ ਜਾਇਜ਼ਾ ਲਿਆ। ਹੋਰ ਜਾਣਕਾਰੀ ਦਿੰਦੇ ਹੋਏ ਏਐੱਨਓ ਪਰਮਬੀਰ ਸਿੰਘ ਨੇ ਕਿਹਾ ਕਿ ਇਹ ਕੈਂਪ 4 ਪੰਜਾਬ ਏਅਰ ਸਕੁਾਡਰਨ ਲੁਧਿਆਣਾ ਵੱਲੋਂ ਐੱਨਸੀਸੀ ਡੀਟੀਈ, ਪੰਜਾਬ, ਹਰਿਆਣਾ ਐੱਚਪੀ ਤੇ ਚੰਡੀਗੜ੍ਹ ਦੇ ਅਧੀਨ ਸਾਰੇ 8 ਸਮੂਹਾਂ ਦੇ 170 ਕੈਡਿਟਾਂ ਲਈ ਕਰਵਾਇਆ ਜਾ ਰਿਹਾ ਹੈ। ਗਰੁੱਪ ਕਮਾਂਡਰ ਨੇ ਕੈਡਿਟਾਂ ਨਾਲ ਗੱਲਬਾਤ ਕੀਤੀ ਤੇ ਡਰੋਨ ਅਸੈਂਬਲੀ ਤੇ ਸੰਚਾਲਨ ਬਾਰੇ ਉਨ੍ਹਾਂ ਦੀ ਸਮਝ ਦਾ ਮੁਲਾਂਕਣ ਕੀਤਾ। ਉਨ੍ਹਾਂ ਕੈਡਿਟਾਂ ਨੂੰ ਐੱਨਸੀਸੀ ਵੱਲੋਂ ਪ੍ਰਦਾਨ ਕੀਤੇ ਗਏ ਮੌਕੇ ਦੀ ਲਾਭਕਾਰੀ ਵਰਤੋਂ ਕਰਨ ਲਈ ਲੋੜੀਂਦੇ ਯਤਨ ਕਰਨ ਲਈ ਉਤਸ਼ਾਹਿਤ ਕੀਤਾ। ਗਰੁੱਪ ਕਮਾਂਡਰ ਨੇ ਕੈਡਿਟਾਂ ਨੂੰ ਡਰੋਨ ਸਿਖਲਾਈ ਨਾਲ ਸਬੰਧਤ ਵੱਖ-ਵੱਖ ਗਤੀਵਿਧੀਆਂ ’ਚ ਲੱਗੇ ਦੇਖਿਆ, ਜਿਸ ’ਚ ਸਿਮੂਲੇਟਰ ਸਿਖਲਾਈ, ਡਰੋਨ ਦੀ ਅਸੈਂਬਲੀ ਤੇ ਕੈਲੀਬ੍ਰੇਸ਼ਨ ਤੇ ਇਸ ਨੂੰ ਜੀਪੀਐੱਸ ਤੇ ਕੰਪਾਸ ਨਾਲ ਜੋੜਨਾ ਤੇ ਫਿਰ ਡਰੋਨਾਂ ਦੀ ਸੰਚਾਲਨ ਵਰਤੋਂ ਲਈ ਕੈਮਰੇ ਵਰਗੇ ਪੇਲੋਡ ਜੋੜਨਾ ਸ਼ਾਮਲ ਹੈ। ਉਨ੍ਹਾਂ ਕਮਾਂਡਿੰਗ ਅਫ਼ਸਰ, ਸਟਾਫ਼ ਤੇ ਕੈਡਿਟਾਂ ਦੀ ਬਹੁਤ ਹੀ ਫਲਦਾਇਕ ਸ਼ਮੂਲੀਅਤ ਲਈ ਸ਼ਲਾਘਾ ਕੀਤੀ ਤੇ ਕੈਡਿਟਾਂ ਤੇ ਇੰਸਟ੍ਰਕਟਰਾਂ ਨੂੰ ਆਉਣ ਵਾਲੇ ਆਲ ਇੰਡੀਆ ਧਰਤੀ, ਹਵਾ ਤੇ ਨੌ ਸੈਨਿਕ ਕੈਂਪਾਂ ਲਈ ਟੀਮਾਂ ਤਿਆਰ ਕਰਨ ਦੀ ਅਪੀਲ ਕੀਤੀ। ਉਨ੍ਹਾਂ ਕੈਡਿਟਾਂ ਨੂੰ ਡਰੋਨ ਦੇ ਖੇਤਰ ’ਚ ਉੱਭਰ ਰਹੀਆਂ ਨਵੀਆਂ ਤਕਨੀਕੀ ਤਰੱਕੀਆਂ ਤੋਂ ਜਾਣੂ ਕਰਵਾਉਣ ਤੇ ਇਸ ਨੂੰ ਨਵੇਂ ਖੇਤਰਾਂ ’ਚ ਡਰੋਨ ਦੇ ਰੁਜ਼ਗਾਰ ਨੂੰ ਸਮਝਣ ਦੇ ਮੌਕੇ ਵਜੋਂ ਲੈਣ ਲਈ ਉਤਸ਼ਾਹਿਤ ਕੀਤਾ।