ਜਵਾਇੰਟ ਫਰੰਟ ਵੱਲੋਂ ਡਾ.ਰੰਧਾਵਾ ਦੇ ਦੇਹਾਂਤ ’ਤੇ ਦੁੱਖ ਦਾ ਪ੍ਰਗਟਾਵਾ

ਜੁਆਇੰਟ ਫਰੰਟ ਵੱਲੋਂ ਡਾ. ਰੰਧਾਵਾ ਦੇ ਦੇਹਾਂਤ ’ਤੇ ਦੁੱਖ ਦਾ ਪ੍ਰਗਟਾਵਾ

ਪਲਵਿੰਦਰ ਸਿੰਘ ਢੁੱਡੀਕੇ, ਪੰਜਾਬੀ ਜਾਗਰਣ

ਲੁਧਿਆਣਾ : ਪੀਏਯੂ ਦੇ ਅਧਿਆਪਕਾਂ, ਕਰਮਚਾਰੀਆਂ ਤੇ ਪੈਨਸ਼ਨਰਾਂ ਦੇ ਸਾਂਝੇ ਮੋਰਚੇ (ਜੁਆਇੰਟ ਫਰੰਟ ਆਫ ਪੀਏਯੂ ਟੀਚਰਜ਼, ਇੰਪਲਾਈਜ਼ ਐਂਡ ਪੈਨਸ਼ਨਰਜ਼) ਵੱਲੋਂ ਪੰਜਾਬ ਸਟੇਟ ਵੇਅਰ ਹਾਊਸਿੰਗ ਕਾਰਪੋਰੇਸ਼ਨ ਦੇ ਜ਼ਿਲ੍ਹਾ ਮੈਨੇਜਰ ਤੇ ਪੀਏਯੂ ਦੇ ਹੋਣਹਾਰ ਸਾਬਕਾ ਵਿਦਿਆਰਥੀ ਡਾ. ਗਗਨਦੀਪ ਸਿੰਘ ਰੰਧਾਵਾ ਦੇ ਬੇਵਕਤੀ ਦੇਹਾਂਤ 'ਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕਰਦੇ ਹੋਏ ਇਨਸਾਫ਼ ਦੀ ਮੰਗ ਕੀਤੀ ਗਈ। ਸਾਂਝਾ ਮੋਰਚਾ ਵੱਲੋਂ ਪਾਸ ਕੀਤੇ ਗਏ ਇਕ ਮਤੇ ’ਚ ਪੀਏਯੂ ਅਧਿਆਪਕਾਂ, ਕਰਮਚਾਰੀਆਂ ਤੇ ਪੈਨਸ਼ਨਰਾਂ ਨੇ ਕਿਹਾ ਕਿ ਡਾ. ਰੰਧਾਵਾ ਦਾ ਵਿਛੋੜਾ ਸਮੁੱਚੇ ਪੀਏਯੂ ਭਾਈਚਾਰੇ ਲਈ ਇਕ ਵੱਡਾ ਘਾਟਾ ਤੇ ਪਰਿਵਾਰ ਲਈ ਕਦੇ ਨਾ ਪੂਰਾ ਹੋਣ ਵਾਲਾ ਦੁਖਾਂਤ ਹੈ। ਸਾਂਝਾ ਮੋਰਚਾ ਨੇ ਕਿਹਾ ਕਿ ਇਕ ਕਾਬਲ ਤੇ ਸਮਰਪਿਤ ਅਧਿਕਾਰੀ ਨੂੰ ਕਥਿਤ ਤੌਰ 'ਤੇ ਸਿਆਸੀ ਪ੍ਰਸ਼ਾਸਨ ਦੇ ਬੇਲੋੜੇ ਅਤੇ ਬਾਹਰੀ ਦਬਾਅ ਕਾਰਨ ਆਪਣੀ ਜੀਵਨ ਲੀਲਾ ਸਮਾਪਤ ਕਰਨ ਲਈ ਮਜਬੂਰ ਹੋਣਾ ਪਿਆ। ਡਾ. ਰੰਧਾਵਾ ਸਾਡੀ ਸੰਸਥਾ ਦੇ ਮਾਣਮੱਤੇ ਮੈਂਬਰ ਸਨ; ਉਨ੍ਹਾਂ ਦੀ ਬੇਵਕਤੀ ਮੌਤ ਦੀ ਖ਼ਬਰ ਨੇ ਪੀਏਯੂ. ਦੇ ਦੇਸ਼-ਵਿਦੇਸ਼ ਵਿੱਚ ਫੈਲੇ ਸਮੁੱਚੇ ਸਾਬਕਾ ਵਿਦਿਆਰਥੀਆਂ ਨੂੰ ਡੂੰਘੇ ਸਦਮੇ ਵਿੱਚ ਪਾ ਦਿੱਤਾ ਹੈ। ਅਸੀਂ ਇਸ ਉੱਚ-ਪੱਧਰੀ ਸਿਆਸੀ ਅਨਿਆਂ ਤੇ ਪ੍ਰਸ਼ਾਸਨਿਕ ਵਧੀਕੀ ਦੀ ਸਖ਼ਤ ਨਿੰਦਾ ਕਰਦੇ ਹਾਂ। ਜੁਆਇੰਟ ਫਰੰਟ ਇਨਸਾਫ਼ ਦੀ ਇਸ ਲੜਾਈ ’ਚ ਪਰਿਵਾਰ ਦੇ ਨਾਲ ਹੈ। ਰਸਮੀ ਤੌਰ 'ਤੇ ਫ਼ੈਸਲਾ ਲਿਆ ਗਿਆ ਕਿ ਦੁਖੀ ਪਰਿਵਾਰ ਨਾਲ ਡੂੰਘੀ ਹਮਦਰਦੀ ਪ੍ਰਗਟ ਕੀਤੀ ਜਾਵੇਗੀ ਤੇ ਇਸ ਔਖੀ ਘੜੀ ’ਚ ਉਨ੍ਹਾਂ ਨਾਲ ਚੱਟਾਨ ਵਾਂਗ ਖੜ੍ਹੇ ਰਹਾਂਗੇ। ਪਰਿਵਾਰ ਨੂੰ ਇਨਸਾਫ਼ ਦਿਵਾਉਣ ਲਈ ਸੰਘਰਸ਼ ਕਰ ਰਹੀਆਂ ਸਾਰੀਆਂ ਮੁਲਾਜ਼ਮ ਜਥੇਬੰਦੀਆਂ ਦਾ ਪੂਰਨ ਸਮਰਥਨ ਕੀਤਾ ਜਾਵੇਗਾ। ਡਾ. ਰੰਧਾਵਾ ਦੀ ਮੌਤ ਦੇ ਹਾਲਾਤਾਂ ਦੀ ਜਲਦ, ਤਰਕਪੂਰਨ ਅਤੇ ਪਾਰਦਰਸ਼ੀ ਜਾਂਚ ਦੀ ਮੰਗ ਕੀਤੀ ਜਾਂਦੀ ਹੈ। ਅਜਿਹਾ ਮਾਹੌਲ ਸਿਰਜਣ ਦੀ ਵਕਾਲਤ ਕੀਤੀ ਜਾਵੇਗੀ ਜਿੱਥੇ ਅਧਿਕਾਰੀਆਂ ਦੀ ਸ਼ਾਨ ਅਤੇ ਸਵੈ-ਮਾਣ ਸਿਆਸੀ ਦਖ਼ਲਅੰਦਾਜ਼ੀ ਤੋਂ ਸੁਰੱਖਿਅਤ ਰਹੇ। ਪੀਏਯੂ ਭਾਈਚਾਰਾ ਵਿਛੜੀ ਰੂਹ ਲਈ ਸਮੂਹਿਕ ਅਰਦਾਸ ਕਰਦਾ ਹੈ। ਦੁੱਖ ਦਾ ਪ੍ਰਗਟਾਵਾ ਕਰਨ ਵਾਲਿਆਂ ਵਿੱਚ ਡਾ.ਐੱਚਐੱਸ ਕਿੰਗਰਾ ਪ੍ਰਧਾਨ ਪੋਟਾ ਐਸੋਸੀਏਸ਼ਨ, ਬਲਦੇਵ ਸਿੰਘ ਵਾਲੀਆ ਪ੍ਰਧਾਨ ਪੀਏਯੂ ਇੰਪਲਾਈਜ਼ ਯੂਨੀਅਨ, ਡੀਪੀ ਮੋੜ ਪ੍ਰਧਾਨ ਪੀਏਯੂ ਪੈਨਸ਼ਨਰਜ਼, ਡਾ.ਚੇਤਨ ਸਿੰਗਲਾ ਸਕੱਤਰ ਪੋਟਾ ਐਸੋ, ਮਨਮੋਹਨ ਸਿੰਘ ਸਕੱਤਰ ਪੀਏਯੂ ਇੰਪਲਾਈਜ਼ ਯੂਨੀਅਨ ਅਤੇ ਜੇਐੱਲ ਨਾਰੰਗ ਸਕੱਤਰ ਪੀਏਯੂ ਪੈਨਸ਼ਨਰਜ਼ ਸ਼ਾਮਲ ਹਨ।