ਐੱਮਐੱਸਐੱਮਈ ਦੇ ਭੁਗਤਾਨ ਦੇ ਮਾਮਲਿਆਂ ’ਚ ਦੇਰੀ, ਉਦਯੋਗਪਤੀ ਪਰੇਸ਼ਾਨ

ਪਲਾਸਟਿਕ ਮੈਨੂਫੈਕਚਰਰਜ਼ ਐਂਡ ਟ੍ਰੇਡਰਜ਼ ਐਸੋਸੀਏਸ਼ਨ ਨੇ ਡੀਸੀ ਨੂੰ ਚਿੱਠੀ ਲਿਖੀ ਸਟਾਫ ਪ੍ਰਤੀਨਿਧ, ਪੰਜਾਬੀ ਜਾਗਰਣ, ਲੁਧਿਆਣਾ : ਪਲਾਸਟਿਕ ਮੈਨੂਫੈਕਚਰਰਜ਼ ਐਂਡ ਟ੍ਰੇਡਰਜ਼ ਐਸੋਸੀਏਸ਼ਨ (ਪੀਐੱਮਟੀਏ) ਪੰਜਾਬ ਨੇ ਡਿਪਟੀ ਕਮਿਸ਼ਨਰ ਲੁਧਿਆਣਾ ਹਿਮਾਂਸ਼ੂ ਜੈਨ ਨੂੰ ਚਿੱਠੀ ਲਿਖੀ ਹੈ, ਜਿਸ ’ਚ ਐਸੋਸੀਏਸ਼ਨ ਨੇ ਐੱਮਐੱਸਐੱਮਈ ਦੇ ਭੁਗਤਾਨ ’ਚ ਦੇਰੀ ਦੇ ਮਾਮਲਿਆ ’ਚ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ ਤੇ ਇਸ ਦੇਰੀ ਨੂੰ ਉਦਯੋਗਪਤੀਆਂ ਨੂੰ ਪਰੇਸ਼ਾਨ ਕਰਨ ਵਾਲਾ ਦੱਸਿਆ ਹੈ। ਪ੍ਰਧਾਨ ਡਾ. ਮਾਨਕਰ ਗਰਗ ਨੇ ਕਿਹਾ ਕਿ ਜ਼ਿਲ੍ਹਾ ਉਦਯੋਗ ਕੇਂਦਰ ਤੇ ਜ਼ਿਲ੍ਹਾ ਪ੍ਰਸ਼ਾਸਨ ਨੂੰ ਐੱਮਐੱਸਐੱਮਈ ਲਈ ਦੇਰੀ ਨਾਲ ਭੁਗਤਾਨ ਕਰਨ ਦੇ ਮਾਮਲਿਆਂ ’ਤੇ ਇੱਕ ਜਾਗਰੂਕਤਾ ਕੈਂਪ/ਵਰਕਸ਼ਾਪ ਦਾ ਪ੍ਰਬੰਧ ਕਰਨਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਛੋਟੇ ਤੇ ਦਰਮਿਆਨੇ ਉੱਦਮਾਂ ਨੂੰ ਉੱਚ ਕਾਨੂੰਨੀ ਲਾਗਤਾਂ ਕਾਰਨ ਦੇਰੀ ਨਾਲ ਭੁਗਤਾਨ ਦੇ ਮਾਮਲਿਆਂ ਦੀ ਪੈਰਵੀ ਕਰਨ ’ਚ ਗੰਭੀਰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਵਕੀਲ ਆਮ ਤੌਰ ’ਤੇ 30,000 ਤੋਂ ਸ਼ੁਰੂ ਹੋਣ ਵਾਲੀਆਂ ਫੀਸਾਂ ਲੈਂਦੇ ਹਨ ਤੇ ਆਰਬੀਟ੍ਰੇਸ਼ਨ ਫੀਸ 25,000 ਤੋਂ ਸ਼ੁਰੂ ਹੁੰਦੀ ਹੈ। ਇਸ ਤੋਂ ਇਲਾਵਾ ਆਰਬੀਟ੍ਰੇਟਰ ਆਮ ਤੌਰ ’ਤੇ ਆਪਣੇ ਚੈਂਬਰਾਂ ’ਚ ਕਾਰਵਾਈ ਕਰਨਾ ਪਸੰਦ ਕਰਦੇ ਹਨ ਤੇ ਜ਼ਿਲ੍ਹਾ ਉਦਯੋਗ ਕੇਂਦਰ ਦਫ਼ਤਰ ਜਾਣ ਤੋਂ ਝਿਜਕਦੇ ਹਨ, ਜਿਸ ਨਾਲ ਐੱਮਐੱਸਐੱਮਈ ਯੂਨਿਟਾਂ ’ਤੇ ਬੋਝ ਹੋਰ ਵਧ ਜਾਂਦਾ ਹੈ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਰੁਕਾਵਟਾਂ ਦੇ ਕਾਰਨ ਐੱਮਐੱਸਐੱਮਈ ਸਨਅਤਾਂ ਲਈ ਐੱਮਐੱਸਐੱਮਈ ਐਕਟ ਤਹਿਤ ਆਪਣੇ ਕੇਸਾਂ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਲੜਨਾ ਤੇ ਅੱਗੇ ਵਧਾਉਣਾ ਭਾਵੇਂ ਕਿ ਅਸਲ ਦਾਅਵਿਆਂ ਦੇ ਬਾਵਜੂਦ ਬਹੁਤ ਮੁਸ਼ਕਲ ਹੋ ਜਾਂਦਾ ਹੈ। ਡਾ. ਗਰਗ ਨੇ ਕਿਹਾ ਕਿ ਐੱਮਐੱਸਐੱਮਈ ਮਾਮਲਿਆਂ ਲਈ ਕਾਨੂੰਨੀ ਮਾਹਿਰਾਂ/ਵਕੀਲਾਂ ਦੀ ਉਪਲੱਬਧਤਾ, ਪ੍ਰਕਿਰਿਆਵਾਂ ਬਾਰੇ ਮਾਰਗਦਰਸ਼ਨ ਤੇ ਜ਼ਿਲ੍ਹਾ ਉਦਯੋਗ ਕੇਂਦਰ ਪੱਧਰ ’ਤੇ ਸੰਭਾਵਿਤ ਸਹੂਲਤ ਵਾਲਾ ਇੱਕ ਜਾਗਰੂਕਤਾ ਕੈਂਪ ਐੱਮਐੱਸਐੱਮਈ ਉੱਦਮੀਆਂ ਨੂੰ ਦੇਰੀ ਨਾਲ ਭੁਗਤਾਨ ਦੇ ਮੁੱਦਿਆਂ ਨੂੰ ਸਮਝਣ ਤੇ ਹੱਲ ਕਰਨ ’ਚ ਬਹੁਤ ਮਦਦ ਕਰੇਗਾ। ਉਨ੍ਹਾਂ ਕਿਹਾ ਕਿ ਅਸੀਂ ਐੱਮਐੱਸਐੱਮਈ ਖੇਤਰ ਦੇ ਫਾਇਦੇ ਲਈ ਇਸ ਮਾਮਲੇ ’ਚ ਤੁਹਾਡੇ ਸਹਿਯੋਗ ਦੀ ਦਿਲੋਂ ਬੇਨਤੀ ਕਰਦੇ ਹਾਂ।