ਆਬਜ਼ਰਵੇਸ਼ਨ ਹੋਮ ਲੁਧਿਆਣਾ ਵਿਖੇ ਹੁਨਰ ਵਿਕਾਸ ਪ੍ਰੋਗਰਾਮ ਜਾਰੀ

-ਬੱਚਿਆਂ ਨੂੰ ਕੰਪਿਊਟਰ ਕੋਰਸ, ਖਾਣਾ ਬਣਾਉਣ ਤੇ ਹੋਰ ਸਿਖ਼ਲਾਈ ਦੇ ਕੇ ਬਣਾਇਆ ਜਾ ਰਿਹਾ ਹੁਨਰਮੰਦ ਪੁਨੀਤ ਬਾਵਾ, ਪੰਜਾਬੀ ਜਾਗਰਣ, ਲੁਧਿਆਣਾ : ਬੱਚਿਆਂ ਨੂੰ ਬਿਹਤਰ ਭਵਿੱਖ ਲਈ ਵਿਹਾਰਕ ਤੇ ਰੁਜ਼ਗਾਰ ਯੋਗ ਹੁਨਰਾਂ ਨਾਲ ਲੈਸ ਕਰਨ ਲਈ ਆਬਜ਼ਰਵੇਸ਼ਨ ਹੋਮ ਵਿਖੇ ਫਿਲੈਂਥਰੋਪੀ ਕਲੱਬ ਵੱਲੋਂ ਆਬਜ਼ਰਵੇਸ਼ਨ ਹੋਮ ਲੁਧਿਆਣਾ ਵਿਖੇ ਇੱਕ ਹੁਨਰ ਵਿਕਾਸ ਪ੍ਰੋਗਰਾਮ ਚਲਾਇਆ ਜਾ ਰਿਹਾ ਹੈ। ਇਸ ਪਹਿਲਕਦਮੀ ਵਿੱਚ ਇੱਕ ਪ੍ਰਮਾਣਿਤ ਕੰਪਿਊਟਰ ਕੋਰਸ (ਪੱਧਰ-1 ਤੇ ਪੱਧਰ-2) ਦੇ ਨਾਲ-ਨਾਲ ਖਾਣਾ ਪਕਾਉਣ ਦੀਆਂ ਕਲਾਸਾਂ ਸ਼ਾਮਲ ਹਨ, ਜਿੱਥੇ ਬੱਚੇ ਕੌਫੀ, ਟੋਸਟੀਆਂ, ਮੱਕੀ ਦੀਆਂ ਕਿਸਮਾਂ ਅਤੇ ਸੈਂਡਵਿਚ ਤਿਆਰ ਕਰਨਾ ਸਿੱਖ ਰਹੇ ਹਨ। ਉਨ੍ਹਾਂ ਨੂੰ ਬਾਗਬਾਨੀ, ਸਰਦੀਆਂ ਤੇ ਗਰਮੀਆਂ ਦੀਆਂ ਸਬਜ਼ੀਆਂ ਉਗਾਉਣ ਦੀ ਸਿਖਲਾਈ ਵੀ ਦਿੱਤੀ ਜਾ ਰਹੀ ਹੈ। ਕਿੱਤਾਮੁਖੀ ਹੁਨਰਾਂ ਨੂੰ ਹੋਰ ਵਧਾਉਣ ਲਈ ਇਲੈਕਟ੍ਰੀਕਲ ਤੇ ਪਲੰਬਿੰਗ ਕਲਾਸਾਂ ਜਲਦੀ ਹੀ ਸ਼ੁਰੂ ਕੀਤੀਆਂ ਜਾਣਗੀਆਂ। ਇੱਕ ਆਉਣ ਵਾਲੀ ਪਹਿਲ ‘ਕੈਫੇ ਰਾਈਜ਼’ - ਪੁਨਰਵਾਸ, ਸਮਾਵੇਸ਼, ਹੁਨਰ ਤੇ ਸਸ਼ਕਤੀਕਰਨ ਤੇ ਕੇਂਦ੍ਰਿਤ ਜਲਦੀ ਹੀ ਸ਼ੁਰੂ ਕੀਤੀ ਜਾਵੇਗੀ, ਜੋ ਸਿਖਲਾਈ ਪ੍ਰਾਪਤ ਨੌਜਵਾਨਾਂ ਨੂੰ ਆਪਣੇ ਹੁਨਰਾਂ ਨੂੰ ਲਾਗੂ ਕਰਨ ਲਈ ਇੱਕ ਪਲੇਟਫਾਰਮ ਪ੍ਰਦਾਨ ਕਰੇਗੀ। ਇਹ ਪ੍ਰੋਗਰਾਮ ਡਿਪਟੀ ਕਮਿਸ਼ਨਰ ਲੁਧਿਆਣਾ ਹਿਮਾਂਸ਼ੂ ਜੈਨ, ਗਵਰਨੈਂਸ ਸੈੱਲ ਦੇ ਮੁਖੀ ਅੰਬਰ ਬੰਦੋਪਾਧਿਆਏ ਦੀ ਅਗਵਾਈ ਹੇਠ ਅਤੇ ਡੀਸੀਪੀਓ ਰਸ਼ਮੀ ਦੇ ਸਹਿਯੋਗ ਨਾਲ ਫਿਲੈਂਥਰੋਪੀ ਕਲੱਬ ਦੇ ਆਗੂ ਲਖਮਿੰਦਰ ਕੌਰ ਡਿੱਕੀ ਛਾਬੜਾ ਅਤੇ ਵਿੰਮੀ ਬਜਾਜ ਦੀ ਅਗਵਾਈ ਹੇਠ ਫਿਲੈਂਥਰੋਪੀ ਕਲੱਬ ਦੁਆਰਾ ਚਲਾਇਆ ਜਾ ਰਿਹਾ ਹੈ। ਛਾਬੜਾ ਤੇ ਬਜਾਜ ਨੇ ਕਿਹਾ ਕਿ ਉਨ੍ਹਾਂ ਦੀ ਸੰਸਥਾ ਦਾ ਮਕਸਦ ਨੌਜਵਾਨਾਂ ਤੇ ਬੱਚਿਆਂ ਨੂੰ ਹੁਨਰਮੰਦ ਬਣਾ ਕੇ ਆਪਣੇ ਪੈਰਾਂ ’ਤੇ ਖੜ੍ਹਾ ਕਰਨਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਭਵਿੱਖ ਵਿੱਚ ਵੀ ਰੁਝਾਨ ਜਾਰੀ ਰਹੇਗਾ।