ਟਾਟਾ ਸਟੀਲ ਦੇ ਗ੍ਰੀਨ ਪਲਾਂਟ ਤੋਂ ਰੀਬਾਰਾਂ ਦੀ ਪਹਿਲੀ ਖੇਪ ਰਵਾਨਾ

ਵਾਈਸ-ਪ੍ਰੈਜ਼ੀਡੈਂਟ ਆਸ਼ੀਸ਼ ਅਨੁਪਮ ਨੇ ਹਰੀ ਝੰਡੀ ਦਿਖਾ ਕੇ ਖੇਪ ਨੂੰ ਕੀਤਾ ਰਵਾਨਾ ਲੌਜਿਸਟਿਕ ਫਰਮ ਨਿਊ ਕੁਲਦੀਪ ਗੁੱਡਜ਼ ਕੈਰੀਅਰਜ਼ ਰਾਹੀਂ ਭੇਜੀ ਗਈ ਪਹਿਲੀ ਖੇਪ ਸਟਾਫ ਪ੍ਰਤੀਨਿਧ, ਪੰਜਾਬੀ ਜਾਗਰਣ, ਲੁਧਿਆਣਾ ਟਾਟਾ ਸਟੀਲ ਲਿਮਟਿਡ (ਟੀਐੱਸਐੱਲ) ਦੇ ਨਵੇਂ ਉਦਘਾਟਨ ਕੀਤੇ ਗਏ ਗ੍ਰੀਨ ਸਟੀਲ ਪਲਾਂਟ ਧਨਾਨਸੂ ਲੁਧਿਆਣਾ ਤੋਂ ਰੀਬਾਰਾਂ ਦੇ ਪਹਿਲੇ ਡਿਸਪੈਚ ਨੂੰ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕੀਤਾ ਗਿਆ। ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਵੱਲੋਂ ਕੀਤੇ ਗਏ ਹਾਈ-ਪ੍ਰੋਫਾਈਲ ਉਦਘਾਟਨ ਤੋਂ ਤੁਰੰਤ ਬਾਅਦ ਇਹ ਸਮਾਗਮ ਪਲਾਂਟ ਦੇ ਅਧਿਕਾਰਤ ਸੰਚਾਲਨ ਦੀ ਸ਼ੁਰੂਆਤ ਦਾ ਪ੍ਰਤੀਕ ਹੈ। ਪਹਿਲੀ ਖੇਪ ਨੂੰ ਟਾਟਾ ਸਟੀਲ ਦੇ ਵਾਈਸ-ਪ੍ਰੈਜ਼ੀਡੈਂਟ ਆਸ਼ੀਸ਼ ਅਨੁਪਮ ਨੇ ਹਰੀ ਝੰਡੀ ਦਿਖਾਈ। ਸਥਾਨਕ ਉਦਯੋਗ ਨੂੰ ਗਲੋਬਲ ਸਪਲਾਈ ਚੇਨ ਨਾਲ ਜੋੜਨ ਦੀ ਦਿਸ਼ਾ ਵਿੱਚ ਇਹ ਲੋਡ ਲੁਧਿਆਣਾ ਦੀ ਨਾਮਵਰ ਲੌਜਿਸਟਿਕ ਫਰਮ ਨਿਊ ਕੁਲਦੀਪ ਗੁੱਡਜ਼ ਕੈਰੀਅਰਜ਼ ਦੇ ਇੱਕ ਟ੍ਰੇਲਰ ਰਾਹੀਂ ਭੇਜਿਆ ਗਿਆ, ਜੋ ਪਹਿਲਾਂ ਹੀ ਦੇਸ਼ ਦੀਆਂ ਵੱਡੀਆਂ ਸਟੀਲ ਕੰਪਨੀਆਂ ਨਾਲ ਜੁੜੀ ਹੋਈ ਹੈ। ਨਿਊ ਕੁਲਦੀਪ ਗੁੱਡਜ਼ ਕੈਰੀਅਰਜ਼ ਦੇ ਸੀਈਓ ਸਰਬਜੀਤ ਸਿੰਘ ਨੇ ਪਹਿਲੀ ਖੇਪ ਲਈ ਚੁਣੇ ਜਾਣ ਤੇ ਮਾਣ ਮਹਿਸੂਸ ਕਰਦਿਆਂ ਕਿਹਾ ਕਿ ਟਾਟਾ ਸਟੀਲ ਦਾ ਇਹ ਉੱਦਮ ਲੁਧਿਆਣਾ ਲਈ ਇੱਕ ਗੇਮ-ਚੇਂਜਰ ਸਾਬਤ ਹੋਵੇਗਾ। ਇਹ ਨਾ ਸਿਰਫ਼ ਆਰਥਿਕ ਗਤੀਵਿਧੀਆਂ ਨੂੰ ਤੇਜ਼ ਕਰੇਗਾ, ਸਗੋਂ ਸਥਾਨਕ ਨੌਜਵਾਨਾਂ ਲਈ ਰੁਜ਼ਗਾਰ ਦੇ ਵੱਡੇ ਮੌਕੇ ਵੀ ਪੈਦਾ ਕਰੇਗਾ। ਨਿਊ ਕੁਲਦੀਪ ਗੁੱਡਜ਼ ਕੈਰੀਅਰਜ਼ ਦੇ ਮਾਲਕ ਮੇਜਰਜੀਤ ਸਿੰਘ ਨੇ ਇਸ ਗ੍ਰੀਨ ਪ੍ਰੋਜੈਕਟ ਦੇ ਰਿਕਾਰਡ ਸਮੇਂ ਵਿੱਚ ਮੁਕੰਮਲ ਹੋਣ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਨੇ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਅਗਵਾਈ ਵਾਲੀ ਪੰਜਾਬ ਸਰਕਾਰ ਦੇ ਸਹਿਯੋਗ ਦੀ ਤਾਰੀਫ਼ ਕਰਦਿਆਂ ਕਿਹਾ ਕਿ ਇਸ ਨਾਲ ਪੰਜਾਬ ਦਾ ਅਕਸ ‘ਨਿਵੇਸ਼ ਪੱਖੀ ਸੂਬੇ’ ਵਜੋਂ ਹੋਰ ਮਜ਼ਬੂਤ ਹੋਇਆ ਹੈ। ਉਨ੍ਹਾਂ ਉਦਯੋਗ, ਸਥਾਨਕ ਸਰਕਾਰਾਂ ਅਤੇ ਬਿਜਲੀ ਮੰਤਰੀ ਸੰਜੀਵ ਅਰੋੜਾ ਦਾ ਵੀ ਵਿਸ਼ੇਸ਼ ਧੰਨਵਾਦ ਕੀਤਾ, ਜਿਨ੍ਹਾਂ ਨੇ ਸਰਕਾਰੀ ਰਸਮਾਂ ਨੂੰ ਸਮੇਂ ਸਿਰ ਪੂਰਾ ਕਰਵਾਉਣ ਅਤੇ ਲੋੜੀਂਦਾ ਸਹਿਯੋਗ ਦੇਣ ਵਿੱਚ ਅਹਿਮ ਭੂਮਿਕਾ ਨਿਭਾਈ।