ਈਪੀਐਫਓ ਦੀ ‘ਕਰਮਚਾਰੀ ਭਰਤੀ ਮੁਹਿੰਮ-2025’ ਸ਼ੁਰੂ, 30 ਅਪ੍ਰੈਲ 2026 ਤੱਕ ਮਿਲੇਗੀ ਵਿਸ਼ੇਸ਼ ਰਾਹਤ

ਪ੍ਰਿੰਸ ਸ਼ਰਮਾ, ਪੰਜਾਬੀ ਜਾਗਰਣ ਲੁਧਿਆਣਾ ਭਾਰਤ ਸਰਕਾਰ ਦੇ ਕਿਰਤ ਤੇ ਰੁਜ਼ਗਾਰ ਮੰਤਰਾਲਾ ਵੱਲੋਂ ਕਰਮਚਾਰੀ ਭਵਿੱਖ ਨਿਧੀ ਸਬੰਧੀ “ਕਰਮਚਾਰੀ ਭਰਤੀ ਮੁਹਿੰਮ-2025” ਸ਼ੁਰੂ ਕੀਤੀ ਗਈ ਹੈ। ਇਸ ਵਿਸ਼ੇਸ਼ ਮੁਹਿੰਮ ਦਾ ਮੁੱਖ ਉਦੇਸ਼ ਉਨਾਂ ਯੋਗ ਕਰਮਚਾਰੀਆਂ ਨੂੰ ਈਪੀਐਫ ਦੇ ਘੇਰੇ ਵਿੱਚ ਲਿਆਉਣਾ ਹੈ, ਜੋ 1 ਜੁਲਾਈ 2017 ਤੋਂ 31 ਅਕਤੂਬਰ 2025 ਤੱਕ ਕਵਰੇਜ ਤੋਂ ਬਾਹਰ ਰਹਿ ਗਏ ਸਨ। ਯੋਜਨਾ ਤਹਿਤ ਮਾਲਕਾਂ ਨੂੰ ਸਵੈ-ਇੱਛਾ ਨਾਲ ਅਜਿਹੇ ਕਰਮਚਾਰੀਆਂ ਦੀ ਘੋਸ਼ਣਾ ਕਰ ਕੇ ਪਿਛਲੀ ਪਾਲਣਾ ਨਿਯਮਤ ਕਰਨ ਲਈ ਇਕ ਵਿਸ਼ੇਸ਼ ਵਿੰਡੋ ਪ੍ਰਦਾਨ ਕੀਤੀ ਗਈ ਹੈ। ਯੋਜਨਾ ਸਾਰੀਆਂ ਸੰਸਥਾਵਾਂ ‘ਤੇ ਲਾਗੂ ਹੈ, ਭਾਵੇਂ ਉਹ ਪਹਿਲਾਂ ਈਪੀਐਫ ਅਧੀਨ ਕਵਰ ਸਨ ਜਾਂ ਨਹੀਂ। ਜੇਕਰ ਕੋਈ ਸੰਸਥਾ ਪਹਿਲਾਂ ਕਵਰ ਨਹੀਂ ਸੀ, ਤਾਂ ਉਹ ਈਪੀਐਫ ਕਵਰੇਜ ਲਈ ਅਰਜ਼ੀ ਦੇ ਕੇ ਸੰਬੰਧਿਤ ਮਿਆਦ ਦੌਰਾਨ ਭਰਤੀ ਕਰਮਚਾਰੀਆਂ ਦਾ ਐਲਾਨ ਅਤੇ ਨਾਮਜ਼ਦਗੀ ਕਰ ਸਕਦੀ ਹੈ। ਲਾਗੂ ਕਰਨ ਦੀ ਪ੍ਰਕਿਰਿਆ ਅਨੁਸਾਰ ਹਰ ਘੋਸ਼ਿਤ ਕਰਮਚਾਰੀ ਲਈ ਉਮੰਗ ਐਪ ਰਾਹੀਂ ਫੇਸ ਪ੍ਰਮਾਣੀਕਰਨ ਅਧਾਰਤ ਯੂਏਐੱਨ ਤਿਆਰ ਕਰਨਾ ਲਾਜ਼ਮੀ ਹੋਵੇਗਾ ਅਤੇ ਇਲੈਕਟ੍ਰਾਨਿਕ ਚਲਾਨ-ਕਮ-ਰਿਟਰਨ (ਈਸੀਆਰ) ਰਾਹੀਂ ਯੋਗਦਾਨ ਜਮ੍ਹਾ ਕਰਵਾਉਣਾ ਪਵੇਗਾ। ਘੋਸ਼ਣਾ ਸਿਰਫ਼ ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ ਦੇ ਪੋਰਟਲ ਰਾਹੀਂ ਆਨਲਾਈਨ ਦਾਇਰ ਕੀਤੀ ਜਾ ਸਕਦੀ ਹੈ, ਜਿਸ ਨਾਲ ਅਸਥਾਈ ਰਿਟਰਨ ਰੈਫਰੈਂਸ ਨੰਬਰ (ਟੀਆਰ ਆਰਐਨ) ਜੁੜਿਆ ਹੋਵੇਗਾ। ਸਕੀਮ ਤਹਿਤ ਹਰ ਡਿਫਾਲਟ ਸਥਾਪਨਾ ਲਈ ਕੇਵਲ 100 ਰੁਪਏ ਦਾ ਇੱਕਮੁਸ਼ਤ ਨੁਕਸਾਨ ਪਾਲਣਾ ਵਜੋਂ ਮੰਨਿਆ ਜਾਵੇਗਾ। ਕਰਮਚਾਰੀ ਹਿੱਸੇਦਾਰੀ ਘੋਸ਼ਿਤ ਮਿਆਦ ਲਈ ਮੁਆਫ਼ ਰਹੇਗੀ, ਜੇਕਰ ਪਹਿਲਾਂ ਕਟੌਤੀ ਨਾ ਕੀਤੀ ਗਈ ਹੋਵੇ। ਮਾਲਕ ਨੂੰ ਆਪਣੇ ਹਿੱਸੇ, ਲਾਗੂ ਵਿਆਜ ਅਤੇ ਪ੍ਰਬੰਧਕੀ ਖਰਚਿਆਂ ਦੇ ਨਾਲ 100 ਰੁਪਏ ਦਾ ਜੁਰਮਾਨਾ ਜਮ੍ਹਾ ਕਰਵਾਉਣਾ ਹੋਵੇਗਾ। ਸਪਸ਼ਟ ਕੀਤਾ ਗਿਆ ਹੈ ਕਿ ਘੋਸ਼ਣਾ ਸਿਰਫ਼ ਉਹਨਾਂ ਕਰਮਚਾਰੀਆਂ ਲਈ ਕੀਤੀ ਜਾ ਸਕਦੀ ਹੈ ਜੋ ਘੋਸ਼ਣਾ ਦੀ ਮਿਤੀ ‘ਤੇ ਜੀਵਿਤ ਹਨ ਅਤੇ ਸੰਬੰਧਿਤ ਸੰਸਥਾ ਨਾਲ ਕਾਰਰਤ ਹਨ। ਤੱਥਾਂ ਦੀ ਗਲਤ ਪੇਸ਼ਕਾਰੀ ਜਾਂ ਜਾਣਕਾਰੀ ਦਬਾਉਣ ਦੀ ਸਥਿਤੀ ਵਿੱਚ ਐਲਾਨ ਰੱਦ ਮੰਨਿਆ ਜਾਵੇਗਾ ਅਤੇ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।