ਮਾਂ ਬਗਲਾਮੁਖੀ ਧਾਮ ’ਚ ਹਵਨ-ਯੱਗ ਦੀ ਲੜੀ ਜਾਰੀ

ਆਸ਼ੀਸ਼ ਸ਼ਰਮਾ ਪੰਜਾਬੀ ਜਾਗਰਣ ਫਗਵਾੜਾ : ਸ਼ਿਵ ਸ਼ਕਤੀ ਮਾਂ ਬਗਲਾਮੁਖੀ ਧਾਮ ਵਿਖੇ ਪੰਡਿਤ ਵਿਜੇ ਸ਼ਾਸਤਰੀ ਦੀ ਅਗਵਾਈ ਹੇਠ ਲੜੀਵਾਰ ਹਵਨ-ਯੱਗ ਕਰਵਾਇਆ ਗਿਆ, ਜਿਸ ਵਿਚ ਸ਼ਰਧਾਲੂ ਸੰਗਤ ਨੇ ਵੱਡੀ ਗਿਣਤੀ ’ਚ ਹਾਜ਼ਰ ਹੋ ਕੇ ਆਹੂਤੀ ਪਾਈ। ਪੰਡਿਤ ਵਿਜੇ ਸ਼ਾਸਤਰੀ ਨੇ ਯੱਗ ਦੌਰਾਨ ਮੌਨ ਦੀ ਮਹੱਤਤਾ ’ਤੇ ਚਾਨਣਾ ਪਾਇਆ ਤੇ ਦੱਸਿਆ ਕਿ ਧਰਮ ਗ੍ਰੰਥਾਂ ਵਿਚ ਤਿੰਨ ਅਜਿਹੇ ਕਰਮਾਂ ਦਾ ਜ਼ਿਕਰ ਹੈ, ਜਿਨ੍ਹਾਂ ਦੌਰਾਨ ਮੌਨ ਰਹਿਣਾ ਚਾਹੀਦਾ ਹੈ। ‘ਸਨਾਤਸ਼ਾਚਾ ਵਰੁਣਸਤੇਜੋ, ਵ੍ਰਿਧਮਾਨੁ’ ਗ੍ਰੰਥ ਦਾ ਹਵਾਲਾ ਦਿੰਦੇ ਹੋਏ ਉਨ੍ਹਾਂ ਦੱਸਿਆ ਕਿ ਭਗਵਾਨ ਵਰੁਣ ਨਹਾਉਣ ਵੇਲੇ ਬੋਲਣ ਵਾਲਿਆਂ ਦੀ ਚਮਕ ਖੋਹ ਲੈਂਦੇ ਹਨ, ਅਗਨੀਦੇਵ ਹਵਨ-ਯੱਗ ਦੌਰਾਨ ਬੋਲਣ ਵਾਲਿਆਂ ਦੀ ਦੌਲਤ ਖੋਹ ਲੈਂਦੇ ਹਨ ਤੇ ਯਮਰਾਜ ਖਾਣਾ ਖਾਂਦੇ ਸਮੇਂ ਬੋਲਣ ਵਾਲਿਆਂ ਦੀ ਉਮਰ ਖੋਹ ਲੈਂਦੇ ਹਨ ਅਰਥਾਤ ਘੱਟ ਕਰ ਦਿੰਦੇ ਹਨ। ਇਸ ਲਈ ਇਨ੍ਹਾਂ ਤਿੰਨ ਰਸਮਾਂ ਦੌਰਾਨ ਮੌਨ ਰੱਖਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਸਤਯਮ ਵਰੁਯਾਤ, ਪ੍ਰਿਯਮ ਵਰੁਯਾਤ ਭਾਵ ਮਨੁੱਖ ਨੂੰ ਹਮੇਸ਼ਾ ਸੱਚ ਅਤੇ ਸੁਹਾਵਣੇ ਸ਼ਬਦ ਬੋਲਣੇ ਚਾਹੀਦੇ ਹਨ, ਕਦੇ ਵੀ ਝੂਠ ਜਾਂ ਕਠੋਰ ਸ਼ਬਦ ਨਹੀਂ ਬੋਲਣੇ ਚਾਹੀਦੇ। ਪੰਡਿਤ ਸ਼ਾਸਤਰੀ ਨੇ ਇਹ ਵੀ ਕਿਹਾ ਕਿ ਜ਼ਿਆਦਾ ਬੋਲਣਾ ਵੀ ਨੁਕਸਾਨਦੇਹ ਹੈ। ਅਜੋਕੇ ਸਮੇਂ ਵਿਚ ਘੱਟ ਬੋਲਣਾ ਸਿਹਤ ਲਈ ਵਿਸ਼ੇਸ਼ ਤੌਰ ’ਤੇ ਲਾਭਦਾਇਕ ਹੈ, ਇਸੇ ਲਈ ਰਿਸ਼ੀਆਂ, ਮੁਨੀਆਂ ਨੇ ਚੁੱਪ ਰਹਿਣ ਦੀ ਪਰੰਪਰਾ ਨੂੰ ਮਹੱਤਵ ਦਿੱਤਾ ਹੈ। ਹਵਨ-ਪੂਜਾ ਦੌਰਾਨ ਪੰਡਿਤ ਭੋਲਾ ਸ਼ਾਸਤਰੀ ਨੇ ਗੌਰੀ, ਗਣੇਸ਼ ਤੇ ਨਵਗ੍ਰਹਿ ਦੀ ਰਸਮੀ ਪੂਜਾ ਕਰਵਾਈ। ਕਸ਼ਮੀਰ ਸਿੰਘ ਨੇ ਧਾਮ ਵਿਚ ਆਈਆਂ ਸਮੂਹ ਸੰਗਤਾਂ ਦਾ ਧੰਨਵਾਦ ਕਰਦਿਆਂ ਉਨ੍ਹਾਂ ਨੂੰ ਆਉਣ ਵਾਲੇ ਸ਼੍ਰੀਮਦ ਭਾਗਵਤ ਕਥਾ ਸਮਾਗਮ ਤੇ ਮੂਰਤੀ ਪ੍ਰਾਣ-ਪ੍ਰਤੀਸ਼ਠਾ ਮਹਾਉਤਸਵ ਵਿਚ ਸ਼ਾਮਲ ਹੋਣ ਦਾ ਸੱਦਾ ਦਿੱਤਾ। ਇਸ ਮੌਕੇ ਅਮਰਜੀਤ ਖਾਂਬੜਾ, ਕਰਵਲ ਸੈਂਭੀ, ਵਿਸ਼ਵਾ ਗੋਗਨਾ, ਦਰਸ਼ਨ ਭੱਲਾ, ਪੰਡਿਤ ਮਯੰਕ ਵਿਆਸ, ਸ਼੍ਰੀ ਰਾਧਾ ਰੀਅਲ ਅਸਟੇਟ, ਰਾਜ ਉਪਾਧਿਆਏ, ਸ਼ਿਵ ਉਪਾਧਿਆਏ, ਸੁਨੀਲ ਗੁਪਤਾ, ਤਰੁਣ ਮਿੱਤਲ, ਹਰਮਿੰਦਰ ਸਿੰਘ ਬਿੱਟਾ, ਵਿਸ਼ਵਾ ਗੋਗਨਾ, ਆਸ਼ੂ ਮਲਹੋਤਰਾ, ਜੋਤਸ਼ੀ ਅਰਚਿਤ ਸ਼ਰਮਾ, ਰਜੀਵ ਕੁਮਾਰ, ਅਭਿਜਯ ਸ਼ਰਮਾ, ਕਾਵਿਆ, ਦਿਵਿਆ, ਡਾ. ਨਿਮੀਸ਼, ਮਾਨਵੀ, ਰੇਖਾ ਰਾਣੀ, ਆਰਤੀ, ਰੂਬੀ ਤੋਂ ਇਲਾਵਾ ਗੁਰਦੀਪ ਸੈਣੀ, ਰੁਪੇਸ਼ ਧੀਰ, ਪ੍ਰੋ. ਅਸ਼ੋਕ ਜਸਵਾਲ ਸਮੇਤ ਵੱਡੀ ਗਿਣਤੀ ਵਿਚ ਸੰਗਤਾਂ ਹਾਜ਼ਰ ਸਨ।