ਵੇਨੇਜ਼ੁਏਲਾ ’ਤੇ ਅਮਰੀਕੀ ਸਾਮਰਾਜਵਾਦੀ ਜੰਗ ਦੀ ਕੀਤੀ ਨਿੰਦਾ

--ਵੇਨੇਜ਼ੁਏਲਾ ਦੇ ਲੋਕਾਂ ਦੀ ਸੰਪ੍ਰਭੂਤਾ ਦੀ ਰੱਖਿਆ ’ਚ ਉਨ੍ਹਾਂ ਦੇ ਨਾਲ ਖੜ੍ਹੋ : ਰਸ਼ਪਾਲ ਸਿੰਘ ਲਖਵੀਰ ਸਿੰਘ ਲੱਖੀ, ਪੰਜਾਬੀ ਜਾਗਰਣ ਸੁਲਤਾਨਪੁਰ ਲੋਧੀ : ਪ੍ਰੈੱਸ ਨੂੰ ਜਾਰੀ ਬਿਆਨ ਵਿਚ ਕਿਰਤੀ ਕਿਸਾਨ ਯੂਨੀਅਨ ਪੰਜਾਬ ਦੇ ਜਨਰਲ ਸਕੱਤਰ ਰਸ਼ਪਾਲ ਸਿੰਘ ਨੇ ਕਿਹਾ ਕਿ ਵੇਨੇਜ਼ੁਏਲਾ ਦੇ ਲੋਕ ਹਮਲੇ ਹੇਠ ਹਨ। ਉਨ੍ਹਾਂ ਕਿਹਾ ਕਿ 3 ਜਨਵਰੀ ਦੀ ਸਵੇਰ ਦੇ ਸ਼ੁਰੂਆਤੀ ਘੰਟਿਆਂ ਵਿਚ ਟਰੰਪ ਪ੍ਰਸ਼ਾਸਨ ਨੇ ਵੇਨੇਜ਼ੁਏਲਾ ਦੇ ਲੋਕਾਂ ਵਿਰੁੱਧ ਇਕ ਅਪਰਾਧਿਕ ਜੰਗ ਛੇੜ ਦਿੱਤੀ। ਰਿਪੋਰਟਾਂ ਅਨੁਸਾਰ, ਰਾਜਧਾਨੀ ਕਾਰਾਕਾਸ ਨੂੰ ਨਿਸ਼ਾਨਾ ਬਣਾਉਂਦੇ ਹੋਏ ਭਿਆਨਕ ਬੰਬਾਰੀ ਅਤੇ ਸੈਨਿਕ ਹਮਲੇ ਕੀਤੇ ਗਏ। ਡੋਨਾਲਡ ਟਰੰਪ ਵੱਲੋਂ ਕੀਤੀ ਇਕ ਸੋਸ਼ਲ ਮੀਡੀਆ ਪੋਸਟ ਵਿਚ ਇਹ ਵੀ ਦਾਅਵਾ ਕੀਤਾ ਗਿਆ ਕਿ ਰਾਸ਼ਟਰਪਤੀ ਮਦੂਰੋ ਅਤੇ ਉਨ੍ਹਾਂ ਦੀ ਪਤਨੀ ਨੂੰ ਕੈਦ ਕਰਕੇ ਵੇਨੇਜ਼ੁਏਲਾ ਤੋਂ ਬਾਹਰ ਭੇਜ ਦਿੱਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਇਹ ਜੰਗ ਸਿਰਫ਼ ਵੇਨੇਜ਼ੁਏਲਾ ਦੇ ਖ਼ਿਲਾਫ਼ ਨਹੀਂ ਹੈ, ਸਗੋਂ ਖੇਤਰ ਦੇ ਅਤੇ ਦੁਨੀਆ ਭਰ ਦੇ ਉਨ੍ਹਾਂ ਲੋਕਾਂ ਲਈ ਖੁੱਲ੍ਹਾ ਖ਼ਤਰਾ ਹੈ ਜੋ ਸਾਮਰਾਜਵਾਦੀ ਹੁਕਮਾਂ ਤੋਂ ਆਜ਼ਾਦ ਹੋ ਕੇ ਆਪਣਾ ਭਵਿੱਖ ਆਪ ਤੈਅ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ। ਟਰੰਪ ਦੀ ਵੇਨੇਜ਼ੁਏਲਾ ਦੇ ਲੋਕਾਂ ਖ਼ਿਲਾਫ਼ ਜੰਗ ਦਾ ਮਕਸਦ ਅਮਰੀਕਾ-ਸਹਾਇਕ ਉਪਨਿਵੇਸ਼ੀ ਪ੍ਰਬੰਧ ਲਾਗੂ ਕਰਨਾ ਹੈ। ਇਸ ਦਾ ਉਦੇਸ਼ ਬੋਲੀਵੀਆਈ ਕ੍ਰਾਂਤੀ ਨੂੰ ਕੁਚਲਣਾ ਹੈ, ਜਿਸ ਨੇ ਅਮਰੀਕਾ-ਪੱਖੀ ਓਲੀਗਾਰਕੀ ਨੂੰ ਉਲਟ ਦਿੱਤਾ ਅਤੇ ਦੇਸ਼ ਦੀ ਤੇਲ ਦੌਲਤ ਲੋਕਾਂ ਨੂੰ ਵਾਪਸ ਦਿੱਤੀ। ਇਹ ਜੰਗ ਅਮਰੀਕੀ ਬਹੁ-ਰਾਸ਼ਟਰੀ ਕੰਪਨੀਆਂ ਲਈ ਇਕ ਵਾਰ ਫਿਰ ਵੇਨੇਜ਼ੁਏਲਾ ਦੇ ਤੇਲ ’ਤੇ ਕਬਜ਼ਾ ਕਰਨ ਅਤੇ ਸਾਮਰਾਜਵਾਦੀ ਹਿਤਾਂ ਦੀ ਸੇਵਾ ਕਰਨ ਵਾਲੀ ਸਰਕਾਰ ਕਾਇਮ ਕਰਨ ਲਈ ਹੈ। ਰਸ਼ਪਾਲ ਸਿੰਘ ਨੇ ਕਿਹਾ ਕਿ ਗੁਆਟੇਮਾਲਾ ਤੋਂ ਚਿੱਲੀ ਤੱਕ, ਗ੍ਰੇਨੇਡਾ ਤੋਂ ਪਨਾਮਾ ਤੱਕ, ਅਮਰੀਕੀ ਮੋਨਰੋ ਸਿਧਾਂਤ-ਜੋ ਲਾਤੀਨੀ ਅਮਰੀਕਾ ਨੂੰ ਆਪਣਾ “ਨਿੱਜੀ ਵਿਹੜਾ” ਸਮਝਦਾ ਹੈ ਤੇ ਜਿਸਨੂੰ ਟਰੰਪ ਮਜ਼ਬੂਤ ਕਰਨਾ ਚਾਹੁੰਦਾ ਹੈ-ਹਮੇਸ਼ਾ ਹੀ ਅਧੀਨਤਾ, ਸ਼ੋਸ਼ਣ ਅਤੇ ਦਬਾਅ ਦਾ ਪ੍ਰਤੀਕ ਰਿਹਾ ਹੈ, ਜੋ ਇਲਾਕੇ ਦੇ ਲੋਕਾਂ ਤੋਂ ਸੰਪ੍ਰਭੂਤਾ ਅਤੇ ਸਵੈ-ਨਿਰਣੇ ਦੇ ਅਧਿਕਾਰ ਖੋਹ ਲੈਂਦਾ ਹੈ। ਉਨ੍ਹਾਂ ਕਿਹਾ ਕਿ ਅਸੀਂ ਦੁਨੀਆ ਭਰ ਦੀਆਂ ਸਾਰੀਆਂ ਲੋਕਤੰਤਰੀ ਅਤੇ ਸ਼ਾਂਤੀਪ੍ਰਿਯ ਤਾਕਤਾਂ ਨੂੰ ਅਪੀਲ ਕਰਦੇ ਹਾਂ ਕਿ ਉਹ ਇਸ ਸਾਮਰਾਜਵਾਦੀ ਹਮਲੇ ਅਤੇ ਟਰੰਪ ਰਾਜ ਹੇਠ ਨਵੀਂ ਉਪਨਿਵੇਸ਼ੀ ਅਧੀਨਤਾ ਦੀ ਪ੍ਰਣਾਲੀ ਥੋਪਣ ਦੀਆਂ ਕੋਸ਼ਿਸ਼ਾਂ ਦੇ ਖ਼ਿਲਾਫ਼ ਖੜ੍ਹਨ, ਜਿਸ ਕਰਕੇ ਕਿਰਤੀ ਕਿਸਾਨ ਯੂਨੀਅਨ ਪੰਜਾਬ ਲੋਕਾਂ ਨੂੰ ਚੇਤਨ ਅਤੇ ਵਿਰੋਧ ਕਰਨ ਲਈ ਆਉਂਦੇ ਦਿਨਾਂ ਵਿਚ ਪਰੋਗਰਾਮ ਉਲੀਕੇਗੀ।