ਲੰਗਰ ਦੌਰਾਨ ਦੋ ਧਿਰਾਂ ਭਿੜੀਆਂ, 3 ਜ਼ਖ਼ਮੀ

ਸੰਵਾਦ ਸੂਤਰ, ਜਾਗਰਣ

ਫਗਵਾੜਾ : ਫਗਵਾੜਾ ਦੇ ਮੁਹੱਲਾ ਪ੍ਰੇਮਪੁਰਾ ’ਚ ਲੰਗਰ ਦੌਰਾਨ ਦੋ ਧਿਰਾਂ ’ਚ ਹੋਏ ਝਗੜੇ ’ਚ 3 ਨੌਜਵਾਨ ਜ਼ਖ਼ਮੀ ਹੋ ਗਏ। ਜ਼ਖ਼ਮੀਆਂ ’ਚ ਚੰਦਨ ਘਈ, ਦੀਪਕ ਘਈ ਤੇ ਅਖਿਲ ਵਾਸੀ ਮੁਹੱਲਾ ਪ੍ਰੇਮਪੁਰਾ ਸ਼ਾਮਲ ਹਨ। ਸਿਵਲ ਹਸਪਤਾਲ ’ਚ ਦਾਖਲ ਅਖਿਲ ਨੇ ਦੱਸਿਆ ਕਿ ਉਹ ਮੁਹੱਲਾ ਪ੍ਰੇਮਪੁਰਾ ’ਚ ਲੰਗਰ ’ਚ ਸੇਵਾ ਕਰ ਰਹੇ ਸਨ ਤਾਂ ਚੰਦਨ ਨੇ ਉਸ ਨੂੰ ਆਪਣੇ ਕੋਲ ਸੱਦਿਆ, ਜਦ ਉਹ ਨਹੀਂ ਗਿਆ ਤਾਂ ਚੰਦਨ ਤੇ ਦੀਪਕ ਨੇ ਆਪਣੇ ਸਾਥੀਆਂ ਨੂੰ ਸੱਦ ਕੇ ਉਸ ਨਾਲ ਕੁੱਟਮਾਰ ਕੀਤੀ ਤੇ ਉਸ ਦੇ ਘਰ ਦੇ ਦਰਵਾਜ਼ੇ ਦੀ ਵੀ ਭੰਨਤੋੜ ਕੀਤੀ। ਦੂਜੇ ਪਾਸੇ ਜ਼ਖ਼ਮੀ ਚੰਦਨ ਨੇ ਕਿਹਾ ਕਿ ਜਦ ਉਹ ਲੰਗਰ ਖਾਣ ਲਈ ਗਏ ਤਾਂ ਕੁਝ ਨੌਜਵਾਨਾਂ ਨੇ ਉਨ੍ਹਾਂ ’ਤੇ ਹਮਲਾ ਕਰ ਦਿੱਤਾ, ਜਿਸ ’ਚ ਉਹ ਤੇ ਉਸ ਦਾ ਭਰਾ ਦੀਪਕ ਜ਼ਖ਼ਮੀ ਹੋ ਗਏ। ਸਿਵਲ ਹਸਪਤਾਲ ਦੇ ਡਿਊਟੀ ਡਾਕਟਰ ਨੇ ਦੱਸਿਆ ਕਿ ਤਿੰਨੋਂ ਨੌਜਵਾਨ ਲੜਾਈ-ਝਗੜੇ ਦੇ ਮਾਮਲੇ ’ਚ ਸਿਵਲ ਹਸਪਤਾਲ ਪਹੁੰਚੇ ਹਨ, ਜਿਨ੍ਹਾਂ ਦਾ ਇਲਾਜ ਕਰਕੇ ਪੁਲਿਸ ਨੂੰ ਸੂਚਨਾ ਦੇ ਦਿੱਤੀ ਗਈ ਹੈ। ਦੋਵੇਂ ਧਿਰਾਂ ਇਕ-ਦੂਜੇ ’ਤੇ ਇਲਜ਼ਾਮ ਲਗਾ ਰਹੀਆਂ ਹਨ। ਮੌਕੇ ’ਤੇ ਪਹੁੰਚੀ ਪੁਲਿਸ ਜਾਂਚ ਕਰ ਰਹੀ ਹੈ।

------

ਸਿਵਲ ਹਸਪਤਾਲ ’ਚ ਇਲਾਜ ਅਧੀਨ ਜ਼ਖ਼ਮੀ ਨੌਜਵਾਨ।