ਨਿੱਜੀ ਪ੍ਰਚਾਰ ਲਈ ਪੁਲਿਸ ਦੀ ਵਰਤੋਂ ਲੋਕਤੰਤਰ ’ਤੇ ਹਮਲਾ : ਕੈਂਥ

-ਭਗਵੰਤ ਮਾਨ ਸਰਕਾਰ ਹੇਠ ਪੁਲਿਸ ਦਾ ਰਾਜਨੀਤੀਕਰਨ ਚਿੰਤਾਜਨਕ: ਕੈਂਥ -ਪੁਲਿਸ ਦੀ ਨਿਰਪੱਖਤਾ ਨਾਲ ਸਮਝੌਤਾ ਕਰਨ ਵਾਲਿਆਂ ਨੂੰ ਜਵਾਬਦੇਹ ਬਣਾਇਆ ਜਾਵੇ: ਕੈਂਥ ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਭਾਰਤੀ ਜਨਤਾ ਪਾਰਟੀ ਦੇ ਅਨੁਸੂਚਿਤ ਜਾਤੀ ਮੋਰਚਾ ਪੰਜਾਬ ਦੇ ਉਪ ਪ੍ਰਧਾਨ ਪਰਮਜੀਤ ਸਿੰਘ ਕੈਂਥ ਨੇ ਪੰਜਾਬ ’ਚ ਆਮ ਆਦਮੀ ਪਾਰਟੀ ਦੇ ਇਕ ਨੇਤਾ ਵੱਲੋਂ ਕਥਿਤ ਤੌਰ ’ਤੇ “ਪ੍ਰੀ-ਵੇਡਿੰਗ ਸ਼ੂਟ” ਲਈ ਪੁਲਿਸ ਬਲ ਦੀ ਵਰਤੋਂ ਨੂੰ ਲੋਕਤੰਤਰ ’ਤੇ ਸਿੱਧਾ ਹਮਲਾ ਕਰਾਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਸੱਤਾ ਧਾਰੀ ਪਾਰਟੀ ਨਾਲ ਜੁੜੇ ਕਿਸੇ ਵਿਅਕਤੀ ਦੀ ਨਿੱਜਾ ਅਕਸ ਚਮਕਾਉਣ ਲਈ ਰਾਜ ਦੀ ਪੁਲਿਸ ਨੂੰ ਵਰਤਿਆ ਗਿਆ ਹੈ ਤਾਂ ਇਹ ਸਿਰਫ਼ ਅਧਿਕਾਰਾਂ ਦਾ ਦੁਰੁਪਯੋਗ ਨਹੀਂ, ਸਗੋਂ ਸੰਸਥਾਵਾਂ ਦੀ ਖੁੱਲ੍ਹੀ ਰਾਜਨੀਤੀਕਰਨ ਦੀ ਮਿਸਾਲ ਹੈ। ਇਹ ਸਵਾਲ ਖੜ੍ਹਦਾ ਹੈ ਕਿ ਕੀ ਪੰਜਾਬ ਪੁਲਿਸ ਹੁਣ ਕਾਨੂੰਨ-ਵਿਵਸਥਾ ਲਈ ਹੈ ਜਾਂ ਰਾਜਨੀਤਿਕ ਪ੍ਰਚਾਰ ਲਈ? ਕੈਂਥ ਨੇ ਸਪੱਸ਼ਟ ਕਿਹਾ ਕਿ ਪੁਲਿਸ ਵਿਭਾਗ ਕਿਸੇ ਪਾਰਟੀ ਦਾ ਨਿੱਜੀ ਸਾਧਨ ਨਹੀਂ। ਇਹ ਲੋਕਾਂ ਦੀ ਸੁਰੱਖਿਆ ਲਈ ਬਣੀ ਸੰਵਿਧਾਨਕ ਸੰਸਥਾ ਹੈ। ਜੇ ਭਗਵੰਤ ਮਾਨ ਦੀ ਅਗਵਾਈ ਹੇਠ ਪੁਲਿਸ ਨੂੰ ਰਾਜਨੀਤਿਕ ਪ੍ਰਯੋਗਸ਼ਾਲਾ ਬਣਾਇਆ ਜਾ ਰਿਹਾ ਹੈ, ਤਾਂ ਇਹ ਪੰਜਾਬ ਦੀ ਪ੍ਰਸ਼ਾਸਨਿਕ ਨਿਰਪੱਖਤਾ ਲਈ ਖ਼ਤਰਨਾਕ ਸੰਕੇਤ ਹੈ। ਉਨ੍ਹਾਂ ਮੰਗ ਕੀਤੀ ਕਿ ਇਸ ਮਾਮਲੇ ’ਚ ਤੁਰੰਤ ਤੇ ਨਿਰਪੱਖ ਜਾਂਚ ਹੋਵੇ ਤੇ ਜਿਹੜੇ ਅਧਿਕਾਰੀ ਜਾਂ ਰਾਜਨੀਤਿਕ ਤੱਤ ਜ਼ਿੰਮੇਵਾਰ ਪਾਏ ਜਾਣ, ਉਨ੍ਹਾਂ ਖ਼ਿਲਾਫ਼ ਕਾਨੂੰਨ ਅਨੁਸਾਰ ਕੜੀ ਕਾਰਵਾਈ ਕੀਤੀ ਜਾਵੇ। ਕੇਵਲ ਬਿਆਨਬਾਜ਼ੀ ਨਹੀਂ, ਸੰਸਥਾਗਤ ਜਵਾਬਦੇਹੀ ਲਾਜ਼ਮੀ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਪਹਿਲਾਂ ਹੀ ਗੰਭੀਰ ਸੁਰੱਖਿਆ ਚੁਣੌਤੀਆਂ ਦਾ ਸਾਹਮਣਾ ਕਰ ਰਿਹਾ ਹੈ। ਸਰਹੱਦੀ ਇਲਾਕਿਆਂ ’ਚ ਨਸ਼ਿਆਂ ਦਾ ਜਾਲ ਤੇ ਸੁਰੱਖਿਆ ਖ਼ਤਰੇ ਵਧ ਰਹੇ ਹਨ। ਇਸ ਪਿਛੋਕੜ ’ਚ ਗੁਰਦਾਸਪੁਰ ਜ਼ਿਲ੍ਹੇ ’ਚ ਅੰਤਰਰਾਸ਼ਟਰੀ ਸਰਹੱਦ ਨੇੜੇ ਦੋ ਪੁਲਿਸ ਕਰਮਚਾਰੀਆਂ ਦੀ ਹਤਿਆ ਦੀ ਘਟਨਾ ਨੇ ਹਾਲਾਤ ਹੋਰ ਗੰਭੀਰ ਕਰ ਦਿੱਤੇ ਹਨ। ਜਦੋਂ ਸਥਿਤੀ ਸੰਵੇਦਨਸ਼ੀਲ ਹੋਵੇ, ਉਸ ਵੇਲੇ ਪੁਲਿਸ ਦਾ ਧਿਆਨ ਨਿੱਜੀ ਪ੍ਰਚਾਰਕ ਕਾਰਜਾਂ ਵੱਲ ਮੋੜਨਾ ਅਸਵੀਕਾਰਯੋਗ ਹੈ। ਕੈਂਥ ਨੇ ਕਿਹਾ ਕਿ ਜੋ ਪੁਲਿਸ ਜਵਾਨ ਆਪਣੀ ਜਾਨ ਦੀ ਬਾਜ਼ੀ ਲਗਾ ਕੇ ਕਾਨੂੰਨ-ਵਿਵਸਥਾ ਕਾਇਮ ਰੱਖਦੇ ਹਨ, ਉਨਾਂ ਦੀ ਮਿਹਨਤ ਤੇ ਬਲਿਦਾਨ ਨਾਲ ਖੇਡਣ ਦੀ ਇਜਾਜ਼ਤ ਕਿਸੇ ਨੂੰ ਨਹੀਂ ਦਿੱਤੀ ਜਾ ਸਕਦੀ। ਨਿੱਜੀ ਜਾਂ ਰਾਜਨੀਤਿਕ ਲਾਭ ਲਈ ਪੁਲਿਸ ਦੀ ਨਿਰਪੱਖਤਾ ਨਾਲ ਸਮਝੌਤਾ ਕਰਨ ਵਾਲਿਆਂ ਨੂੰ ਕਾਨੂੰਨ ਦੇ ਕਟਘਰੇ ’ਚ ਲਿਆਂਦਾ ਜਾਣਾ ਹੀ ਲੋਕਤੰਤਰ ਦੀ ਮੰਗ ਹੈ।