ਯੁਵਰਾਜ ਸਿੰਘ ਹਾਰਵਰਡ ਐੱਮਯੂਐੱਨ ਦੁਬਈ ’ਚ ਅਸਿਸਟੈਂਟ ਡਾਇਰੈਕਟਰ ਚੁਣੇ

-ਦੁਨੀਆ ਭਰ ਤੋਂ 20 ਤੇ ਭਾਰਤ ਦੇ ਸਿਰਫ਼ 4 ਅਸਿਸਟੈਂਟ ਡਾਇਰੈਕਟਰ -ਮਾਪਿਆਂ ਦਾ ਵਧਾਇਆ ਮਾਣ, ਪਿੰਡ ਦਾ ਨਾਂ ਕੀਤਾ ਰੋਸ਼ਨ ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਪਿੰਡ ਰੇਹਾਣਾ ਜੱਟਾਂ ਦੇ 19 ਸਾਲਾ ਵਿਦਿਆਰਥੀ ਯੁਵਰਾਜ ਸਿੰਘ ਦਿਓਲ ਦੇ ਹਾਰਵਰਡ ਐੱਮਯੂਐਨ ਦੁਬਈ ’ਚ ਸਹਾਇਕ ਡਾਇਰੈਕਟਰ ਵਜੋਂ ਚੁਣੇ ਜਾਣ ’ਤੇ ਪਰਿਵਾਰ ਤੇ ਪਿੰਡ ’ਚ ਖੁਸ਼ੀ ਦਾ ਮਾਹੌਲ ਪਾਇਆ ਜਾ ਰਿਹਾ ਹੈ। 8 ਤੋਂ 11 ਜਨਵਰੀ ਤੱਕ ਹੋਣ ਵਾਲੇ ਹਾਰਵਰਡ ਐੱਮਯੂਐਨ ਦੁਬਈ ਵਿਖੇ ਸਹਾਇਕ ਡਾਇਰੈਕਟਰ ਵਜੋਂ ਚੁਣੇ ਜਾਣ ਨਾਲ ਜਿੱਥੇ ਉਸ ਨੇ ਆਪਣੇ ਮਾਪਿਆਂ ਦਾ ਮਾਣ ਵਧਾਇਆ ਹੈ, ਉਥੇ ਪਿੰਡ ਦਾ ਨਾਂ ਵੀ ਰੌਸ਼ਨ ਕੀਤਾ ਹੈ। ਉਹ ਅੰਤਰਰਾਸ਼ਟਰੀ ਕਾਨਫਰੰਸ ’ਚ ਸੋਨੀ ਬੋਰਡ ਆਫ਼ ਡਾਇਰੈਕਟਰਜ਼ ਕਮੇਟੀ, ਵਿਸ਼ੇਸ਼ ਕਾਰਪੋਰੇਟ ਸਿਮੂਲੇਸ਼ਨ ਕਮੇਟੀ ’ਚ ਸੇਵਾ ਨਿਭਾਏਗਾ। ਫਗਵਾੜਾ ਸਬ-ਡਵੀਜ਼ਨ ਦੇ ਪਿੰਡ ਰੇਹਾਣਾ ਜੱਟਾਂ ਦਾ ਵਸਨੀਕ ਯੁਵਰਾਜ ਦਿਓਲ ਇਸ ਸਮੇਂ ਥਾਪਰ ਇੰਸਟੀਚਿਊਟ ਆਫ਼ ਇੰਜੀਨੀਅਰਿੰਗ ਐਂਡ ਟੈਕਨਾਲੋਜੀ ’ਚ ਦੂਜੇ ਸਾਲ ’ਚ ਇਲੈਕਟ੍ਰਾਨਿਕਸ ਤੇ ਕੰਪਿਊਟਰ ਇੰਜੀਨੀਅਰਿੰਗ ਕਰ ਰਿਹਾ ਹੈ। ਉਹ ਲਾਇਲਪੁਰ ਖਾਲਸਾ ਕਾਲਜ ਟੈਕਨੀਕਲ ਕੈਂਪਸ ਦੇ ਕੈਂਪਸ ਡਾਇਰੈਕਟਰ ਡਾ. ਰਮਨਦੀਪ ਸਿੰਘ ਦਿਓਲ ਦਾ ਪੁੱਤਰ ਹੈ। ਐੱਚਐੱਮਯੂਐੱਨ ਦੁਬਈ ਨੂੰ ਪ੍ਰਮੁੱਖ ਅੰਤਰਰਾਸ਼ਟਰੀ ਮਾਡਲ ਸੰਯੁਕਤ ਰਾਸ਼ਟਰ ਸੰਮੇਲਨਾਂ ’ਚੋਂ ਇਕ ਮੰਨਿਆ ਜਾਂਦਾ ਹੈ, ਜੋ ਏਸ਼ੀਆ, ਯੂਰਪ ਤੇ ਉੱਤਰੀ ਅਮਰੀਕਾ ਦੀਆਂ ਯੂਨੀਵਰਸਿਟੀਆਂ ਦੇ ਵਿਦਿਆਰਥੀਆਂ ਨੂੰ ਇਕੱਠਾ ਕਰਦਾ ਹੈ। ਸਹਾਇਕ ਨਿਰਦੇਸ਼ਕਾਂ ਦੀ ਚੋਣ ਪਿਛਲੇ ਕਾਨਫਰੰਸ ਅਨੁਭਵ, ਅਕਾਦਮਿਕ ਪਿਛੋਕੜ ਤੇ ਪ੍ਰਦਰਸ਼ਿਤ ਲੀਡਰਸ਼ਿਪ ਹੁਨਰਾਂ ਦੇ ਆਧਾਰ ਤੇ ਇਕ ਪ੍ਰਤੀਯੋਗੀ ਅੰਤਰਰਾਸ਼ਟਰੀ ਸਕ੍ਰੀਨਿੰਗ ਪ੍ਰਕਿਰਿਆ ਨਾਲ ਕੀਤੀ ਜਾਂਦੀ ਹੈ। ਇਸ ਸਾਲ, ਵਿਸ਼ਵ ਪੱਧਰ ਤੇ ਸਿਰਫ 20 ਸਹਾਇਕ ਨਿਰਦੇਸ਼ਕਾਂ ਦੀ ਚੋਣ ਕੀਤੀ ਗਈ ਹੈ। ਯੁਵਰਾਜ ਸਿੰਘ ਭਾਰਤ ਤੋਂ ਸਿਰਫ ਚਾਰ ’ਚੋਂ ਉੱਤਰੀ ਭਾਰਤ ਤੋਂ ਇਕਲੌਤਾ ਪ੍ਰਤੀਨਿਧੀ ਹੈ। ਐੱਚਐੱਮਯੂਐੱਨ ਦੁਬਈ ਵਿਖੇ ਸਹਾਇਕ ਨਿਰਦੇਸ਼ਕ ਵਜੋਂ ਯੁਵਰਾਜ ਦਾ ਲਗਾਤਾਰ ਦੂਜਾ ਕਾਰਜਕਾਲ ਹੈ, ਜੋ ਅੰਤਰਰਾਸ਼ਟਰੀ ਐੱਮਯੂਐੱਨ ਫੋਰਮਾਂ ’ਚ ਉਸਦੀ ਨਿਰੰਤਰ ਸ਼ਮੂਲੀਅਤ ਨੂੰ ਦਰਸਾਉਂਦਾ ਹੈ। ਉਹ ਕਾਨਫਰੰਸ ’ਚ ਥਾਪਰ ਇੰਸਟੀਚਿਊਟ ਆਫ਼ ਇੰਜੀਨੀਅਰਿੰਗ ਐਂਡ ਟੈਕਨਾਲੋਜੀ ਦੀ ਨੁਮਾਇੰਦਗੀ ਕਰੇਗਾ। ਇਸ ਸਬੰਧੀ ਗੱਲਬਾਤ ਕਰਦਿਆਂ ਯੁਵਰਾਜ ਦਿਓਲ ਨੇ ਕਿਹਾ ਕਿ ਐੱਚਐੱਮਯੂਐੱਨ ਦੁਬਈ ਪੇਸ਼ੇਵਰ ਮਾਹੌਲ ’ਚ ਲੀਡਰਸ਼ਿਪ ਤੇ ਫੈਸਲੇ ਲੈਣ ਦੇ ਵਿਸ਼ਵ ਦ੍ਰਿਸ਼ਟੀਕੋਣਾਂ ਨਾਲ ਜੁੜਨ ਲਈ ਅਹਿਮ ਪਲੇਟਫਾਰਮ ਪ੍ਰਦਾਨ ਕਰਦਾ ਹੈ। ਇਹ ਛੋਟੇ ਕਸਬਿਆਂ ਤੇ ਪਿੰਡਾਂ ਦੇ ਹੋਰ ਵਿਦਿਆਰਥੀਆਂ ਨੂੰ ਵੱਡੇ ਸੁਪਨੇ ਦੇਖਣ ਤੇ ਅਕਾਦਮਿਕ ਤੇ ਲੀਡਰਸ਼ਿਪ ’ਚ ਵਿਸ਼ਵਵਿਆਪੀ ਐਕਸਪੋਜ਼ਰ ਨੂੰ ਅੱਗੇ ਵਧਾਉਣ ਲਈ ਪ੍ਰੇਰਿਤ ਕਰੇਗਾ।