ਇਲਾਕੇ 'ਚ ਦਹਿਸ਼ਤ : ਖਾਲੀ ਪਲਾਟ 'ਚੋਂ ਮਿਲਿਆ ਕੱਟਿਆ ਹੋਇਆ ਸਿਰ, ਲੋਕਾਂ ਦੇ ਉੱਡੇ ਹੋਸ਼,ਭਾਰੀ ਪੁਲਿਸ ਫੋਰਸ ਮੌਕੇ 'ਤੇ ਤਾਇਨਾਤ

ਰਾਕੇਸ਼ ਗਾਂਧੀ, ਪੰਜਾਬੀ ਜਾਗਰਣ, ਜਲੰਧਰ। ਥਾਣਾ ਰਾਮਾ ਮੰਡੀ ਦੀ ਹੱਦ ਵਿਚ ਪੈਂਦੇ ਸੂਰਿਆ ਐਨਕਲੇਵ ਇਲਾਕੇ ਵਿਚ ਉਸ ਸਮੇਂ ਦਹਿਸ਼ਤ ਫੈਲ ਗਈ ਜਦੋਂ ਇਕ ਖਾਲੀ ਪਲਾਟ ਵਿੱਚੋਂ ਕਿਸੇ ਸ਼ੱਕੀ ਜੀਵ ਦਾ ਕੱਟਿਆ ਹੋਇਆ ਸਿਰ ਮਿਲਿਆ। ਸਥਾਨਕ ਨਿਵਾਸੀਆਂ ਨੇ ਇਕ ਕੁੱਤੇ ਨੂੰ ਸ਼ੱਕੀ ਢੰਗ ਨਾਲ ਘੁੰਮਦੇ ਹੋਏ, ਮੂੰਹ ਵਿਚ ਕੁਝ ਫੜ ਕੇ ਘੁੰਮਣ ਬਾਰੇ ਜਾਣਕਾਰੀ ਦਿੱਤੀ।

ਸੂਚਨਾ ਮਿਲਣ 'ਤੇ ਸਾਬਕਾ ਕੌਂਸਲਰ ਸ਼ੈਲੀ ਖੰਨਾ ਮੌਕੇ 'ਤੇ ਪਹੁੰਚੀ। ਉਸ ਨੇ ਕਿਹਾ ਕਿ ਅਸ਼ੋਕ ਨਾਂ ਦੇ ਇਕ ਨਿਵਾਸੀ ਨੇ ਫ਼ੋਨ ਕਰ ਕੇ ਕੁੱਤੇ ਵੱਲੋਂ ਇਹ ਸਿਰ ਲੈ ਜਾਣ ਦੀ ਰਿਪੋਰਟ ਦਿੱਤੀ ਸੀ। ਇਸ ’ਤੇ ਰਾਮਾ ਮੰਡੀ ਥਾਣੇ ਦੀ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ। ਇਕ ਚਸ਼ਮਦੀਦ ਗਵਾਹ ਨੇ ਦਾਅਵਾ ਕੀਤਾ ਕਿ ਉਸ ਨੇ ਕੁੱਤੇ ਦੇ ਮੂੰਹ ਵਿਚ ਬੱਚੇ ਦਾ ਸਿਰ ਦੇਖਿਆ ਸੀ, ਜਿਸ ਦੇ ਅੰਦਰੂਨੀ ਅੰਗ ਨਜ਼ਰ ਆ ਰਹੇ ਸਨ। ਆਦਮੀ ਪਹਿਲਾਂ ਡਰ ਦੇ ਮਾਰੇ ਘਟਨਾ ਸਥਾਨ ਤੋਂ ਚਲਾ ਗਿਆ ਪਰ ਬਾਅਦ ’ਚ ਘਟਨਾ ਦੀ ਰਿਪੋਰਟ ਕਰਨ ਲਈ ਵਾਪਸ ਆਇਆ। ਪੁਲਿਸ ਮੌਕੇ 'ਤੇ ਪਹੁੰਚੀ, ਇਲਾਕੇ ਨੂੰ ਘੇਰ ਲਿਆ ਤੇ ਜਾਂਚ ਸ਼ੁਰੂ ਕਰ ਦਿੱਤੀ।

ਏਐੱਸਆਈ ਸਤਨਾਮ ਸਿੰਘ ਨੇ ਦੱਸਿਆ ਕਿ ਹਾਲੇ ਇਹ ਸਪੱਸ਼ਟ ਨਹੀਂ ਹੈ ਕਿ ਬਰਾਮਦ ਕੀਤਾ ਇਹ ਸਿਰ, ਇਨਸਾਨ ਦੇ ਬੱਚੇ ਦਾ ਹੈ ਜਾਂ ਕਿਸੇ ਜਾਨਵਰ ਦਾ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਇਕ ਫੋਰੈਂਸਿਕ ਟੀਮ ਬੁਲਾਈ ਗਈ ਹੈ ਤੇ ਜਾਂਚ ਰਿਪੋਰਟ ਆਉਣ ਤੋਂ ਬਾਅਦ ਸਥਿਤੀ ਸਪੱਸ਼ਟ ਹੋਵੇਗੀ। ਪੁਲਿਸ ਇਸ ਸਮੇਂ ਹਰ ਪਹਿਲੂ ਤੋਂ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।