ਬੱਸ ਸਟੈਂਡ ਨੇੜੇ ਪੁਲਿਸ ਗਸ਼ਤ ਵਧਾਉਣ ਦੀ ਮੰਗ

ਰਾਕੇਸ਼ ਗਾਂਧੀ, ਪੰਜਾਬੀ ਜਾਗਰਣ, ਜਲੰਧਰ : ਬੱਸ ਸਟੈਂਡ ਨੇੜੇ ਨਰਿੰਦਰ ਸਿਨੇਮਾ ਲੇਨ ’ਚ ਦੇਰ ਰਾਤ ਗ਼ਲਤ ਸਰਗਰਮੀਆਂ ਨੂੰ ਲੈ ਕੇ ਸਥਾਨਕ ਨਿਵਾਸੀ ਪਰੇਸ਼ਾਨ ਹਨ। ਕੁਝ ਨਿਵਾਸੀਆਂ ਦਾ ਦੋਸ਼ ਹੈ ਕਿ ਰਾਤ ਨੂੰ ਇੱਥੇ ਗ਼ਲਤ ਸਰਗਰਮੀਆਂ ਹੁੰਦੀਆਂ ਹਨ। ਰਾਤ 12 ਵਜੇ ਦੇ ਕਰੀਬ ਇਕ ਆਟੋ ਡਰਾਈਵਰ ਤੇ ਤਰਨਾ ਦਲ ਨਾਲ ਜੁੜੇ ਬਾਬਾ ਬਖਸ਼ੀਸ਼ ਸਿੰਘ ਬਾਜਰਾ ਨੇ ਲੇਨ ’ਚ ਖੜ੍ਹੀਆਂ ਦੋ ਨੌਜਵਾਨ ਔਰਤਾਂ ਤੋਂ ਪੁੱਛਗਿੱਛ ਕੀਤੀ। ਇਕ ਔਰਤ ਜਿਸ ਨੇ ਨਵੀਂ ਵਿਆਹੀ ਹੋਣ ਦਾ ਦਾਅਵਾ ਕੀਤਾ, ਨੇ ਕਿਹਾ ਕਿ ਉਹ ਆਪਣੀ ਭੈਣ ਨਾਲ ਬੱਸ ਸਟੈਂਡ ਆ ਰਹੀ ਸੀ। ਜਦੋਂ ਉਸਨੂੰ ਆਪਣੀ ਭੈਣ ਨੂੰ ਬੁਲਾਉਣ ਲਈ ਕਿਹਾ ਗਿਆ ਤਾਂ ਦੋਵੇਂ ਔਰਤਾਂ ਮੌਕੇ ਤੋਂ ਚਲੀਆਂ ਗਈਆਂ। ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਨੌਜਵਾਨ ਮੁੰਡੇ ਤੇ ਔਰਤਾਂ ਅਕਸਰ ਦੇਰ ਰਾਤ ਇਸ ਇਲਾਕੇ ’ਚ ਖੜ੍ਹੇ ਦਿਖਾਈ ਦਿੰਦੇ ਹਨ। ਕੁਝ ਲੋਕ ਇਹ ਵੀ ਦਾਅਵਾ ਕਰਦੇ ਹਨ ਕਿ ਪੁਲਿਸ ਦੀਆਂ ਗੱਡੀਆਂ ਇਲਾਕੇ ’ਚ ਗਸ਼ਤ ਕਰਦੀਆਂ ਹਨ ਪਰ ਸਾਇਰਨ ਸੁਣ ਕੇ ਲੋਕ ਇਧਰ-ਉੱਧਰ ਹੋ ਜਾਂਦੇ ਹਨ। ਜਦੋਂ ਪੁਲਿਸ ਚਲੀ ਜਾਂਦੀ ਹੈ ਤਾਂ ਮੁੜ ਉਹ ਹੀ ਹਾਲਾਤ ਹੋ ਜਾਂਦੇ ਹਨ। ਬਾਬਾ ਬਖਸ਼ੀਸ਼ ਸਿੰਘ ਬਾਜਰਾ ਨੇ ਕਿਹਾ ਕਿ ਉਹ ਰਾਤ ਨੂੰ ਆਟੋ-ਰਿਕਸ਼ਾ ਚਲਾਉਂਦੇ ਹਨ ਤੇ ਅਕਸਰ ਸ਼ਹਿਰ ਦੀਆਂ ਵੱਖ-ਵੱਖ ਗਲੀਆਂ ’ਚੋਂ ਲੰਘਦੇ ਹਨ। ਨਰਿੰਦਰ ਸਿਨੇਮਾ ਗਲੀ ’ਚ ਅਕਸਰ ਦੇਰ ਰਾਤ ਗ਼ਲਤ ਸਰਗਰਮੀਆਂ ਕਾਰਨ ਲੋਕਾਂ ’ਚ ਅਸੁਰੱਖਿਆ ਦੀ ਭਾਵਨਾ ਵਧ ਰਹੀ ਹੈ। ਸਥਾਨਕ ਨਿਵਾਸੀਆਂ ਨੇ ਮੰਗ ਕੀਤੀ ਹੈ ਕਿ ਪ੍ਰਸ਼ਾਸਨ ਬੱਸ ਸਟੈਂਡ ਦੇ ਆਲੇ-ਦੁਆਲੇ ਦੇ ਇਲਾਕਿਆਂ ’ਚ ਰਾਤ ਵੇਲੇ ਪੁਲਿਸ ਗਸ਼ਤ ਵਧਾਏ ਤੇ ਕਿਸੇ ਵੀ ਗ਼ਲਤ ਸਰਗਰਮੀਆਂ ਦੀ ਜਾਂਚ ਕਰੇ।