ਪੰਜਾਬ 'ਚ ਫ਼ਸਲੀ ਵਿਭਿੰਨਤਾ ਲਈ ਨਵੀਂ ਪਹਿਲ : ਰਾਣਾ ਗੁਰਜੀਤ ਨੇ ਕਿਸਾਨਾਂ ਨੂੰ 'ਕਸਾਵਾ' ਦੀ ਖੇਤੀ ਅਪਣਾਉਣ ਲਈ ਪ੍ਰੇਰਿਆ

ਕਸਾਵਾ ਦੀ ਖੇਤੀ ਬਾਰੇ ਤਕਨੀਕੀ ਜਾਣਕਾਰੀ ਸਾਂਝੀ ਕਰਦਿਆਂ ਉਨ੍ਹਾਂ ਦੱਸਿਆ ਕਿ ਇਹ ਇਕ ਗਲੂਟਨ-ਮੁਕਤ ਅਤੇ ਕੀਟ-ਰਹਿਤ ਫ਼ਸਲ ਹੈ, ਜਿਸ ਨੂੰ ਬਹੁਤ ਘੱਟ ਦੇਖਭਾਲ ਦੀ ਲੋੜ ਹੁੰਦੀ ਹੈ। ਇਸ ਨੂੰ 2 ਇੰਚ ਡੂੰਘਾਈ ਅਤੇ 36 ਇੰਚ ਦੇ ਫਾਸਲੇ ’ਤੇ ਬੀਜਿਆ ਜਾਂਦਾ ਹੈ। ਪ੍ਰਤੀ ਏਕੜ ਲਗਪਗ 5,000 ਪੌਦੇ ਲੱਗਦੇ ਹਨ ਅਤੇ ਹਰ ਪੌਦਾ 5 ਕਿੱਲੋ ਤੱਕ ਝਾੜ ਦਿੰਦਾ ਹੈ, ਜਿਸ ਨਾਲ ਪ੍ਰਤੀ ਏਕੜ ਕਰੀਬ 250 ਕੁਇੰਟਲ ਪੈਦਾਵਾਰ ਮਿਲਦੀ ਹੈ। ਇਹ ਫ਼ਸਲ 7 ਤੋਂ 9 ਮਹੀਨਿਆਂ ਵਿੱਚ ਤਿਆਰ ਹੋ ਜਾਂਦੀ ਹੈ ਅਤੇ ਪਹਿਲੇ ਤਿੰਨ ਮਹੀਨਿਆਂ ਵਿੱਚ ਸਿਰਫ਼ ਇੱਕ ਵਾਰ ਨਦੀਨਨਾਸ਼ਕ ਛਿੜਕਾਅ ਦੀ ਲੋੜ ਪੈਂਦੀ ਹੈ। ਦੋਆਬੇ ਦੀ ਦੋਮਟ ਤੇ ਰੇਤਲੀ ਮਿੱਟੀ ਇਸ ਲਈ ਬਹੁਤ ਢੁੱਕਵੀਂ ਹੈ। ਉਨ੍ਹਾਂ ਉਮੀਦ ਜਤਾਈ ਕਿ ਜਿਵੇਂ ਦੋਆਬੇ ਦੇ ਕਿਸਾਨਾਂ ਨੇ ਮੱਕੀ ਤੇ ਚੁਕੰਦਰ ਨੂੰ ਕਾਮਯਾਬ ਕੀਤਾ ਹੈ, ਉਵੇਂ ਹੀ ਕਸਾਵਾ ਨੂੰ ਵੀ ਸਫ਼ਲ ਬਣਾਉਣਗੇ।