ਐੱਮਟੈੱਕ ਦੀ ਵਿਦਿਆਰਥਣ ਨੇ ਬਣਾਈ ਸਿਹਤ ਨਿਗਰਾਨ ਪ੍ਰਣਾਲੀ

-ਕੋਰੋਨਾ ਦੌਰਾਨ ਲੋਕ ਹਸਪਤਾਲ ਜਾਣੋਂ ਡਰ ਰਹੇ ਸਨ, ਉਦੋਂ ਸੋਚਿਆ ਕਿ ਅਜਿਹਾ ਪ੍ਰਬੰਧ ਬਣਾਏਗੀ -ਹੁਣ ਬਣਾਕੇ ਦਿਖਾ ਦਿੱਤਾ, ਸਾਲ ਦਾ ਸਮਾਂ ਲੱਗਾ, ਪ੍ਰਿੰਸੀਪਲ ਤੇ ਅਧਿਆਪਕਾ ਨੇ ਦਿੱਤਾ ਸਹਿਯੋਗ ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਨਿੱਜੀ ਇੰਜੀਨੀਅਰਿੰਗ ਕਾਲਜ ਦੀ ਐੱਮ-ਟੈਕ (ਕੰਪਿਊਟਰ ਵਿਗਿਆਨ) ਦੀ ਵਿਦਿਆਰਥਣ ਮਨਬੀਰ ਕੌਰ ਨੇ ਇੱਕ ਅਜਿਹੀ ਸਿਹਤ ਨਿਗਰਾਨ ਪ੍ਰਣਾਲੀ ਤਿਆਰ ਕੀਤੀ ਹੈ, ਜੋ ਆਪਣੇ ਪਰਿਵਾਰਕ ਮੈਂਬਰਾਂ ਦੀ ਸਿਹਤ ਸਬੰਧੀ ਜਾਂਚ ਦੀ ਜਾਣਕਾਰੀ ਪਲ-ਪਲ ਮੁਹੱਈਆ ਕਰਵਾਉਂਦੀ ਹੈ। ਹੁਣ ਹਰ ਰੋਜ਼ ਬਲੱਡ ਪ੍ਰੈੱਸ਼ਰ, ਦਿਲ ਦੀ ਧੜਕਣ ਅਤੇ ਨਬਜ਼ ਦੀ ਜਾਂਚ ਲਈ ਕਲੀਨਿਕ ਜਾਂ ਹਸਪਤਾਲ ਜਾਣ ਦੀ ਲੋੜ ਨਹੀਂ ਰਹੀ। ਇਹ ਪ੍ਰਬੰਧ ਮਰੀਜ਼ ਦੀ ਮਹੀਨਾਵਾਰ ਰਿਪੋਰਟ ਦਾ ਰਿਕਾਰਡ ਵੀ ਸੰਭਾਲ ਕੇ ਰੱਖਦਾ ਹੈ, ਜੋ ਇਲਾਜ ਦੌਰਾਨ ਡਾਕਟਰਾਂ ਲਈ ਵੀ ਕਾਫ਼ੀ ਮਦਦਗਾਰ ਸਾਬਤ ਹੋਵੇਗਾ। ਇਸ ਲਈ ਘਰ ਵਿੱਚ ਇੰਟਰਨੈੱਟ ਅਤੇ ਵਾਈ-ਫਾਈ ਦੀ ਸੁਵਿਧਾ ਹੋਣੀ ਜ਼ਰੂਰੀ ਹੈ। ਕਪੂਰਥਲਾ ਜ਼ਿਲ੍ਹੇ ਦੇ ਪਿੰਡ ਲਖਨਕੇ ਪੱਡੇ ਦੀ ਰਹਿਣ ਵਾਲੀ ਮਨਬੀਰ ਕੌਰ ਦੱਸਦੀ ਹੈ ਕਿ ਕੋਰੋਨਾ ਕਾਲ ਦੌਰਾਨ ਥੋੜ੍ਹੀ ਜਿਹੀ ਵੀ ਸਿਹਤ ਸਬੰਧੀ ਸਮੱਸਿਆ ਆਉਣ ‘ਤੇ ਮਰੀਜ਼ ਨੂੰ ਹਸਪਤਾਲ ਵਿਚ ਦਾਖ਼ਲ ਕਰ ਲਿਆ ਜਾਂਦਾ ਸੀ। ਬਿਮਾਰੀ ਦੇ ਡਰ ਨੇ ਲੋਕਾਂ ਵਿਚ ਇੰਨਾ ਡਰ ਪੈਦਾ ਕਰ ਦਿੱਤਾ ਸੀ ਕਿ ਹਰ ਕੋਈ ਆਪਣੀ ਸਿਹਤ ਨੂੰ ਲੈ ਕੇ ਚਿੰਤਤ ਰਹਿੰਦਾ ਸੀ। ਹਾਲਾਤ ਇਹ ਬਣ ਗਏ ਸਨ ਕਿ ਲੋਕ ਹਸਪਤਾਲ ਜਾਣ ਤੋਂ ਵੀ ਡਰਣ ਲੱਗ ਪਏ ਸਨ। ਪਿੰਡ ਵਿਚ ਰਹਿਣ ਵਾਲੇ ਲੋਕਾਂ ਨੂੰ ਇਹ ਸਮੱਸਿਆ ਹੋਰ ਵੀ ਵੱਧ ਝੱਲਣੀ ਪਈ। ਇਸੇ ਦੌਰਾਨ ਮਨ ਵਿਚ ਵਿਚਾਰ ਆਇਆ ਕਿ ਕੋਈ ਅਜਿਹਾ ਪ੍ਰਬੰਧ ਹੋਣਾ ਚਾਹੀਦਾ ਹੈ, ਜਿਸ ਨਾਲ ਦਿਲ ਦੀ ਧੜਕਣ, ਨਬਜ਼ ਆਦਿ ਦੀ ਜਾਂਚ ਲਈ ਹਸਪਤਾਲ ਜਾਂ ਕਲੀਨਿਕ ਨਾ ਜਾਣਾ ਪਵੇ ਅਤੇ ਘਰ ਬੈਠਿਆਂ ਹੀ ਸਿਹਤ ਦੀ ਜਾਂਚ ਹੋ ਸਕੇ। ਹਾਲਾਂਕਿ ਅੱਜਕੱਲ੍ਹ ਬਾਜ਼ਾਰ ਵਿਚ ਘੜੀਆਂ ਤੇ ਕੁਝ ਯੰਤਰ ਮਿਲ ਜਾਂਦੇ ਹਨ, ਜੋ ਤੁਰੰਤ ਦਿਲ ਦੀ ਧੜਕਣ ਅਤੇ ਨਬਜ਼ ਬਾਰੇ ਦੱਸ ਦਿੰਦੇ ਹਨ ਪਰ ਕੋਈ ਵੀ ਅਜਿਹਾ ਉਪਕਰਨ ਨਹੀਂ ਸੀ ਜੋ ਰੋਜ਼ਾਨਾ ਦੇ ਅਧਾਰ ’ਤੇ ਪੂਰੀ ਰਿਪੋਰਟ ਤਿਆਰ ਕਰ ਸਕੇ। --- ਵਿਦੇਸ਼ ’ਚ ਰਹਿੰਦੇ ਲੋਕ ਵੀ ਆਪਣੇ ਪਰਿਵਾਰਕ ਮੈਂਬਰਾਂ ਦੀ ਸਿਹਤ ਦੀ ਜਾਣਕਾਰੀ ਲੈ ਸਕਣਗੇ ਮਨਬੀਰ ਕੌਰ ਨੇ ਮੈਕਸ 30100 ਸੈਂਸਰ ਦੀ ਵਰਤੋਂ ਕਰਕੇ ਇਕ ਨਵਾਂ ਤਕਨੀਕੀ (ਆਈਓਟੀ) ਅਧਾਰਿਤ ਸਿਹਤ ਨਿਗਰਾਨੀ ਪ੍ਰਬੰਧ ਤਿਆਰ ਕੀਤਾ ਹੈ। ਇਹ ਆਧੁਨਿਕ ਪ੍ਰਬੰਧ ਦਿਲ ਦੀ ਧੜਕਣ ਅਤੇ ਖੂਨ ਵਿੱਚ ਆਕਸੀਜਨ ਦੀ ਮਾਤਰਾ ਨੂੰ ਲਗਾਤਾਰ ਮਾਪਦਾ ਹੈ ਅਤੇ ਵਾਈ-ਫਾਈ ਰਾਹੀਂ ਥਿੰਕਸਪੀਕ ਅਤੇ ਫਾਇਰਬੇਸ ਵਰਗੇ ਕਲਾਉਡ ਮੰਚਾਂ ‘ਤੇ ਜਾਣਕਾਰੀ ਭੇਜਦਾ ਹੈ। ਇਹ ਪ੍ਰਬੰਧ ਵੱਡੀ ਉਮਰ ਦੇ ਲੋਕਾਂ ਦੀ ਦੇਖਭਾਲ, ਲੰਬੇ ਸਮੇਂ ਦੀਆਂ ਬਿਮਾਰੀਆਂ ਦੇ ਪ੍ਰਬੰਧਨ ਅਤੇ ਸਮਰੱਥ ਸਿਹਤ ਸੇਵਾਵਾਂ ਲਈ ਬਹੁਤ ਲਾਭਦਾਇਕ ਸਾਬਤ ਹੋਵੇਗਾ। ਜੇ ਕੋਈ ਵਿਅਕਤੀ ਰੁਜ਼ਗਾਰ ਦੇ ਸਿਲਸਿਲੇ ਵਿਚ ਵਿਦੇਸ਼ ਵਿਚ ਰਹਿੰਦਾ ਹੈ ਤੇ ਉਸਦੇ ਮਾਤਾ-ਪਿਤਾ ਭਾਰਤ ਵਿਚ ਹਨ, ਤਾਂ ਉਹ ਇਸ ਪ੍ਰਬੰਧ ਰਾਹੀਂ ਆਪਣੇ ਮਾਤਾ-ਪਿਤਾ ਦੀ ਸਿਹਤ ਸਬੰਧੀ ਰਿਪੋਰਟ ਵੇਖ ਸਕਦਾ ਹੈ। ਇਹ ਪ੍ਰਬੰਧ ਭਰੋਸੇਯੋਗ, ਕਿਫ਼ਾਇਤੀ ਅਤੇ ਪ੍ਰਭਾਵਸ਼ਾਲੀ ਮਰੀਜ਼ ਨਿਗਰਾਨੀ ਨੂੰ ਯਕੀਨੀ ਬਣਾਉਂਦਾ ਹੈ। ਆਧੁਨਿਕ ਤਕਨੀਕ ਨਾਲ ਜੋੜਿਆ ਹੋਇਆ ਇਹ ਪ੍ਰਬੰਧ ਸਿਹਤ ਸੰਬੰਧੀ ਤੁਰੰਤ ਫ਼ੈਸਲੇ ਲੈਣ ਵਿੱਚ ਵੀ ਮਦਦਗਾਰ ਹੈ, ਕਿਉਂਕਿ ਜੇ ਮਰੀਜ਼ ਦੀ ਸਿਹਤ ਵਿੱਚ ਗਿਰਾਵਟ ਆਉਣ ਲੱਗੇ, ਤਾਂ ਉਸਨੂੰ ਸਮੇਂ ਸਿਰ ਹਸਪਤਾਲ ਲਿਜਾਇਆ ਜਾ ਸਕਦਾ ਹੈ। ਇਸ ਨਾਲ ਡਾਕਟਰਾਂ ਲਈ ਮਰੀਜ਼ ਦੀ ਜਾਣਕਾਰੀ ਦਾ ਪ੍ਰਬੰਧਨ ਅਤੇ ਉਸਦੀ ਵਿਸ਼ਲੇਸ਼ਣਾ ਹੋਰ ਵੀ ਆਸਾਨ ਹੋ ਜਾਂਦੀ ਹੈ। --- ਇਕ ਸਾਲ ਦੀ ਮਿਹਨਤ ਤੇ ਅਧਿਆਪਕਾਂ ਦੀ ਰਹਿਨੁਮਾਈ ਨਾਲ ਤਿਆਰ ਹੋਇਆ ਉਪਕਰਨ ਮਨਬੀਰ ਕੌਰ ਨੇ ਦੱਸਿਆ ਕਿ ਇਕ ਸਾਲ ਪਹਿਲਾਂ ਉਸ ਨੇ ਆਧੁਨਿਕ ਏਆਈ ਅਧਾਰਿਤ ਉਪਕਰਨ ਬਣਾਉਣ ਬਾਰੇ ਸੋਚਿਆ ਸੀ। ਇਸ ਲਈ ਵੱਖ-ਵੱਖ ਸੰਵੇਦਕਾਂ ਤੇ ਪ੍ਰੋਗਰਾਮਿੰਗ ਦੀ ਵਰਤੋਂ ਕੀਤੀ ਗਈ। ਇਕ ਸਾਲ ਤੱਕ ਲਗਾਤਾਰ ਮਿਹਨਤ ਕੀਤੀ ਗਈ, ਇਸ ਦੌਰਾਨ ਕਈ ਤਕਨੀਕੀ ਖਾਮੀਆਂ ਅਤੇ ਦੋਸ਼ ਵੀ ਸਾਹਮਣੇ ਆਏ, ਜਿਨ੍ਹਾਂ ਨੂੰ ਦੂਰ ਕਰਨ ਵਿਚ ਕਾਫ਼ੀ ਮੁਸ਼ਕਲਾਂ ਆਈਆਂ ਪਰ ਕਾਲਜ ਦੇ ਪ੍ਰਿੰਸੀਪਲ ਡਾ. ਗੁਰਪ੍ਰੀਤ ਸਿੰਘ ਅਤੇ ਅਧਿਆਪਕਾ ਕਰੁਣਾ ਨੇ ਹਰ ਪੜਾਅ ‘ਤੇ ਪੂਰਾ ਸਹਿਯੋਗ ਅਤੇ ਮਾਰਗਦਰਸ਼ਨ ਦਿੱਤਾ। ਉਨ੍ਹਾਂ ਦੀ ਰਹਿਨੁਮਾਈ ਅਤੇ ਸਹਿਯੋਗ ਨਾਲ ਹੀ ਇਹ ਪ੍ਰੋਜੈਕਟ ਸਫਲਤਾ ਨਾਲ ਤਿਆਰ ਹੋ ਸਕਿਆ ਹੈ।