ਵਿਦਿਆਰਥੀਆਂ ਨੇ ਮਾਣਿਆ ਕੁਦਰਤ ਦਾ ਆਨੰਦ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਲਾਇਲਪੁਰ ਖਾਲਸਾ ਕਾਲਜ ਆਫ ਟੈਕਨੀਕਲ ਕੈਂਪਸ ਵੱਲੋਂ ਇੰਫਾਰਮੇਸ਼ਨ ਟੈਕਨਾਲੋਜੀ (ਆਈਟੀ) ਵਿਭਾਗ ਦੇ ਵਿਦਿਆਰਥੀਆਂ ਲਈ ਮੁਕਤੇਸ਼ਵਰ ਮੰਦਰ ਤੇ ਮਿਨੀ ਗੋਆ, ਪਠਾਨਕੋਟ ਦਾ ਸਿੱਖਿਆਤਮਕ ਤੇ ਵਿਰਾਸਤੀ ਦੌਰਾ ਕਰਵਾਇਆ। ਇਸ ਦੌਰੇ ਦਾ ਉਦੇਸ਼ ਵਿਦਿਆਰਥੀਆਂ ਨੂੰ ਕਲਾਸਰੂਮ ਤੋਂ ਬਾਹਰ ਸੱਭਿਆਚਾਰਕ ਜਾਣਕਾਰੀ ਤੇ ਮਨੋਰੰਜਕ ਸਿੱਖਣ ਦੇ ਅਨੁਭਵ ਪ੍ਰਦਾਨ ਕਰਨਾ ਸੀ। ਵਿਦਿਆਰਥੀਆਂ ਨੇ ਸਭ ਤੋਂ ਪਹਿਲਾਂ ਪਵਿੱਤਰ ਮੁਕਤੇਸ਼ਵਰ ਮੰਦਰ ’ਚ ਦਰਸ਼ਨ ਕੀਤੇ ਤੇ ਭਗਵਾਨ ਸ਼ਿਵ ਜੀ ਦੀ ਭਗਤੀ ਭਾਵਨਾ ਨਾਲ ਪੂਜਾ ਅਰਚਨਾ ਕੀਤੀ। ਮੰਦਰ ਦਾ ਸ਼ਾਂਤ ਤੇ ਅਧਿਆਤਮਿਕ ਮਾਹੌਲ ਵਿਦਿਆਰਥੀਆਂ ਲਈ ਖੇਤਰੀ ਸੱਭਿਆਚਾਰਕ ਤੇ ਧਾਰਮਿਕ ਵਿਰਾਸਤ ਨੂੰ ਸਮਝਣ ਦਾ ਸੁਨਹਿਰਾ ਮੌਕਾ ਸਾਬਤ ਹੋਇਆ। ਇਸ ਦੌਰੇ ਨੇ ਉਨ੍ਹਾਂ ਨੂੰ ਇਤਿਹਾਸਕ ਪਰੰਪਰਾਵਾਂ ਨਾਲ ਜੁੜਨ ਤੇ ਵਿਰਾਸਤੀ ਸਥਾਨਾਂ ਦੀ ਸੰਭਾਲ ਦੀ ਮਹੱਤਤਾ ਨੂੰ ਸਮਝਣ ’ਚ ਮਦਦ ਕੀਤੀ। ਮੰਦਰ ਦੇ ਦਰਸ਼ਨ ਤੋਂ ਬਾਅਦ ਵਿਦਿਆਰਥੀ ਮਿਨੀ ਗੋਆ ਗਏ, ਜੋ ਆਪਣੀ ਕੁਦਰਤੀ ਸੁੰਦਰਤਾ ਤੇ ਮਨਮੋਹਕ ਵਾਤਾਵਰਨ ਲਈ ਪ੍ਰਸਿੱਧ ਹੈ। ਵਿਦਿਆਰਥੀਆਂ ਨੇ ਖੁਸ਼ਗਵਾਰ ਮਾਹੌਲ ਦਾ ਆਨੰਦ ਮਾਣਿਆ ਤੇ ਕਈ ਮਨੋਰੰਜਕ ਗਤੀਵਿਧੀਆਂ ’ਚ ਹਿੱਸਾ ਲਿਆ। ਇਹ ਦੌਰਾ ਸਿੱਖਿਆ, ਮਨੋਰੰਜਨ ਤੇ ਟੀਮ ਭਾਵਨਾ ਦਾ ਸੁੰਦਰ ਮੇਲ ਸਾਬਤ ਹੋਇਆ। ਵਿਦਿਆਰਥੀਆਂ ਨੇ ਇਸ ਯਾਦਗਾਰ ਅਨੁਭਵ ਨੂੰ ਬੜੇ ਉਤਸ਼ਾਹ ਨਾਲ ਮਨਾਇਆ। ਡਾ. ਨਿਧੀ ਚੋਪੜਾ, ਹੈੱਡ ਆਫ ਡਿਪਾਰਟਮੈਂਟ (ਆਈਟੀ) ਤੇ ਡੀਨ ਸਟੂਡੈਂਟ ਵੈਲਫੇਅਰ ਨੇ ਕਿਹਾ, ‘ਇਸ ਤਰ੍ਹਾਂ ਦੇ ਵਿਰਾਸਤੀ ਦੌਰੇ ਵਿਦਿਆਰਥੀਆਂ ਦੇ ਸਮੁੱਚੇ ਵਿਕਾਸ ਲਈ ਬਹੁਤ ਜ਼ਰੂਰੀ ਹਨ। ਉਹ ਸਿਰਫ਼ ਅਕਾਦਮਿਕ ਗਿਆਨ ਹੀ ਨਹੀਂ, ਸਗੋਂ ਸੱਭਿਆਚਾਰ, ਮੁੱਲਾਂ ਤੇ ਟੀਮ ਵਰਕ ਦੀ ਵੀ ਸਿੱਖਿਆ ਪ੍ਰਾਪਤ ਕਰਦੇ ਹਨ।’ ਡਾ. ਆਰਐੱਸ ਡਿਓਲ (ਡਾਇਰੈਕਟਰ, ਐੱਲਕੇਸੀਟੀਸੀ, ਕੇਸੀਐੱਲ ਗਰੁੱਪ, ਜਲੰਧਰ) ਨੇ ਵੀ ਇਸ ਪਹਿਲ ਦੀ ਸ਼ਲਾਘਾ ਕਰਦੇ ਹੋਏ ਕਿਹਾ, ‘ਅਸੀਂ ਆਪਣੇ ਵਿਦਿਆਰਥੀਆਂ ਨੂੰ ਅਨੁਭਵੀ ਸਿੱਖਣ ਦੇ ਮੌਕੇ ਪ੍ਰਦਾਨ ਕਰਨ ’ਚ ਵਿਸ਼ਵਾਸ ਰੱਖਦੇ ਹਾਂ। ਇਸ ਤਰ੍ਹਾਂ ਦੇ ਸਿੱਖਿਆਤਮਕ ਦੌਰੇ ਵਿਦਿਆਰਥੀਆਂ ਦੇ ਨਿੱਜੀ ਵਿਕਾਸ ’ਚ ਸਹਾਇਕ ਹੁੰਦੇ ਹਨ ਤੇ ਕਲਾਸਰੂਮ ਤੋਂ ਬਾਹਰ ਵੀ ਯਾਦਗਾਰ ਪਲ ਬਣਾਉਂਦੇ ਹਨ।’