ਕੇਐੱਮਵੀ ਦੀਆਂ ਐੱਨਸੀਸੀ ਕੈਡੇਟ ਨੇ ਮਨਵਾਇਆ ਲੋਹਾ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਕੇਐੱਮਵੀ ਦੀਆਂ ਐੱਨਸੀਸੀ ਕੈਡੇਟਾਂ ਨੇ ਪੰਜਾਬ ਹੋਮ ਗਾਇਰਡਸ ਤੇ ਸਿਵਲ ਡਿਫੈਂਸ ਵੱਲੋਂ ਕਰਵਾਏ 10 ਦਿਨਾਂ ਦੇ ਸਿਵਲ ਡਿਫੈਂਸ ਸਮਰੱਥਾ ਵਿਕਾਸ ਸਿਖਲਾਈ ਪ੍ਰੋਗਰਾਮ ’ਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਇਸ ਦੌਰਾਨ ਕੈਡੇਟਾਂ ਨੇ ਜੀਵਨ ਰੱਖਿਆ ਤੇ ਆਫ਼ਤ ਪ੍ਰਬੰਧਨ ਨਾਲ ਸਬੰਧਤ ਮਹੱਤਵਪੂਰਨ ਹੁਨਰ ਹਾਸਲ ਕੀਤੇ। ਪਾਠਕ੍ਰਮ ’ਚ ਸਿਵਲ ਡਿਫੈਂਸ ਦੀ ਜਾਣ-ਪਛਾਣ, ਅੱਗ ਬੁਝਾਉ ਕੰਮ, ਮੁੱਢਲੀ ਸਹਾਇਤਾ, ਰੱਸੀ ਦੀਆਂ ਗੰਠਾਂ ਤੇ ਬੰਨ੍ਹਣ ਦੀਆਂ ਤਕਨੀਕਾਂ ਸ਼ਾਮਲ ਸਨ। ਇਸ ਤੋਂ ਇਲਾਵਾ ਦਿਲ ਤੇ ਸਾਹ ਦੀ ਪੁਨਰਜੀਵਨ ਪ੍ਰਕਿਰਿਆ (ਸੀਪੀਆਰ), ਸਾਹ ਨਲੀ ’ਚ ਵਿਦੇਸ਼ੀ ਵਸਤੂ ਫਸਣ ਦੀ ਸਥਿਤੀ ਦਾ ਪ੍ਰਬੰਧਨ, ਆਫਤ ਤੇ ਹੜ੍ਹ ਤੋਂ ਬਚਾਅ ਅਭਿਆਸ ਸਮੇਤ ਰੱਸੀ ਆਧਾਰਿਤ ਰੈਸਕਿਊ ਤਕਨੀਕਾਂ ਦੀ ਟ੍ਰੇਨਿੰਗ ਵੀ ਦਿੱਤੀ ਗਈ। ਕੈਡੇਟ ਤਮੰਨਾ ਚੌਧਰੀ ਨੇ ਸਿਖਲਾਈ ਦੌਰਾਨ ਪਹਿਲਾ ਇਨਾਮ ਜਿੱਤ ਕੇ ਸੰਸਥਾ ਦਾ ਨਾਮ ਰੋਸ਼ਨ ਕੀਤਾ। ਇਸ ਮੌਕੇ ਕੇਐੱਮਵੀ ਦੀ ਸਹਾਇਕ ਐੱਨਸੀਸੀ ਅਫਸਰ ਲੈਫਟੀਨੈਂਟ ਸੁਫਾਲਿਕਾ ਕਾਲੀਆ ਨੂੰ ਐੱਨਸੀਸੀ ਗਤੀਵਿਧੀਆਂ ’ਚ ਉਨ੍ਹਾਂ ਦੇ ਸਮਰਪਣ ਤੇ ਔਰਤਾਂ ਨੂੰ ਸਸ਼ਕਤ ਬਣਾਉਣ ’ਚ ਯੋਗਦਾਨ ਲਈ ਵਿਭਾਗ ਵੱਲੋਂ ਮੁੱਖ ਮਹਿਮਾਨ ਵਜੋਂ ਸਨਮਾਨਿਤ ਕੀਤਾ ਗਿਆ। ਕੇਐੱਮਵੀ ਦੀ ਨਿਰਦੇਸ਼ਕ ਪ੍ਰੋਫੈਸਰ ਡਾ. ਅਤਿਮਾ ਸ਼ਰਮਾ ਦਿਵੇਦੀ ਨੇ ਕਿਹਾ ਕਿ ਇਸ ਤਰ੍ਹਾਂ ਦੇ ਸਮਰੱਥਾ ਵਿਕਾਸ ਪ੍ਰੋਗਰਾਮ ਜ਼ਿੰਮੇਵਾਰੀ ਦੀ ਭਾਵਨਾ ਨੂੰ ਮਜ਼ਬੂਤ ਕਰਦੇ ਹਨ। ਭਾਈਵਾਲ ਕੈਡੇਟਾਂ ਨੇ ਵੀ ਸਿਖਲਾਈ ਪ੍ਰਤੀ ਸੰਤੁਸ਼ਟੀ ਪ੍ਰਗਟਾਉਂਦੇ ਹੋਏ ਕਿਹਾ ਕਿ ਇਸ ਨਾਲ ਉਨ੍ਹਾਂ ਦੇ ਹੁਨਰ ਤੇ ਫ਼ੈਸਲਾ ਲੈਣ ਦੀ ਸਮਰੱਥਾ ’ਚ ਵਾਧਾ ਹੋਇਆ ਹੈ। ਇਹ ਸਫਲਤਾ ਕੇਐੱਮਵੀ ਦੀ ਇਕ ਸੁਰੱਖਿਅਤ, ਤਿਆਰ ਤੇ ਮਜ਼ਬੂਤ ਸਮਾਜ ਦੇ ਨਿਰਮਾਣ ਪ੍ਰਤੀ ਦ੍ਰਿੜ ਵਚਨਬੱਧਤਾ ਨੂੰ ਦਰਸਾਉਂਦੀ ਹੈ।