ਪੀਟੀਯੂ ਦੇ ਉਪ ਕੁਲਪਤੀ ਨੇ ਦਾਖ਼ਲਾ ਸੈਸ਼ਨ ਲਈ ਲਾਂਚ ਕੀਤਾ ਐਡਮਿਸ਼ਨ ਪੋਰਟਲ

-ਕਿਹਾ, ਘੱਟ ਫੀਸ ਤੇ ਬਿਹਤਰ ਸੁਵਿਧਾਵਾਂ ਏਜੰਡੇ ਤਹਿਤ ਲਾਂਚ ਕੀਤਾ ਗਿਆ ਪੋਰਟਲ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਆਈਕੇ ਗੁਜਰਾਲ ਪੰਜਾਬ ਟੈਕਨੀਕਲ ਯੂਨੀਵਰਸਿਟੀ (ਆਈਕੇਜੀ ਪੀਟੀਯੂ) ਵੱਲੋਂ ਦਾਖਲਾ ਸਾਲ 2026-27 ਲਈ ਆਪਣੇ ਵੱਖ-ਵੱਖ ਕੈਂਪਸਾਂ ਲਈ ਦਾਖਲਾ ਰਜਿਸਟ੍ਰੇਸ਼ਨ ਕਮ ਦਾਖਲਾ ਪੋਰਟਲ ਸ਼ੁਰੂ ਕੀਤਾ ਹੈ। ਯੂਨੀਵਰਸਿਟੀ ਦੇ ਉਪ-ਕੁਲਪਤੀ (ਵਾਈਸ ਚਾਂਸਲਰ) ਪ੍ਰੋਫੈਸਰ ਡਾ. ਸੁਸ਼ੀਲ ਮਿੱਤਲ ਨੇ ਇਸ ਨੂੰ ਮੈਕਸੀਮਮ ਡਿਜੀਟਲ ਸਮਾਧਾਨ ਤੇ ਸਹੂਲਤ ਤੇ ਘੱਟ ਫੀਸ ਤੇ ਵੱਧ ਸੁਵਿਧਾਵਾਂ ਦੇ ਨਾਅਰੇ ਹੇਠ ਲਾਂਚ ਕੀਤਾ ਹੈ। ਯੂਨੀਵਰਸਿਟੀ ਹਰ ਸਾਲ ਡਿਜੀਟਲ ਮਾਧਿਅਮ ਰਾਹੀਂ ਹੀ ਆਪਣੇ ਦਾਖਲੇ ਕਰਦੀ ਹੈ ਤੇ ਵਿਦਿਆਰਥੀਆਂ ਤੇ ਉਨ੍ਹਾਂ ਦੇ ਮਾਪਿਆਂ ਦੇ ਫੀਡਬੈਕ ਰਾਹੀਂ ਹਰ ਵਾਰ ਆਪਣੇ ਡਿਜੀਟਲ ਦਾਖਲਾ ਪੋਰਟਲ ਨੂੰ ਅਪਡੇਟ ਕਰਦੀ ਹੈ! ਇਸ ਵਾਰ ਦਾਖਲਾ ਪੋਰਟਲ ਨੂੰ ਹੋਰ ਵੀ ਵਿਦਿਆਰਥੀ-ਅਨੁਕੂਲ ਬਣਾਇਆ ਗਿਆ ਹੈ। ਯੂਨੀਵਰਸਿਟੀ ਨੇ ਇਸ ਪੋਰਟਲ ਰਾਹੀਂ ਮੇਨ ਕੈਂਪਸ ਕਪੂਰਥਲਾ, ਸ੍ਰੀ ਅੰਮ੍ਰਿਤਸਰ ਸਾਹਿਬ ਕੈਂਪਸ, ਹੁਸ਼ਿਆਰਪੁਰ ਕੈਂਪਸ, ਮੋਹਾਲੀ ਕੈਂਪਸ (ਇਕ ਤੇ ਦੋ) ਅਤੇ ਬਟਾਲਾ ਕੈਂਪਸ ’ਚ ਦਾਖਲੇ ਖੋਲ੍ਹ ਦਿੱਤੇ ਹਨ।

ਉਪ-ਕੁਲਪਤੀ ਪ੍ਰੋਫੈਸਰ ਡਾ. ਸੁਸ਼ੀਲ ਮਿੱਤਲ ਨੇ ਕਿਹਾ ਕਿ ਇਹ ਪੰਜਾਬ ਸਰਕਾਰ ਦੇ ਚੰਗੇ ਕੰਮ ਦਾ ਨਤੀਜਾ ਹੈ ਕਿ ਸਰਕਾਰੀ ਯੂਨੀਵਰਸਿਟੀਆਂ ਤੇ ਵਿਦਿਅਕ ਸੰਸਥਾਵਾਂ ’ਚ ਵਿਦਿਆਰਥੀਆਂ ਦਾ ਵਿਸ਼ਵਾਸ ਵਧਿਆ ਹੈ। ਉਨ੍ਹਾਂ ਨੇ ਕਿਹਾ ਕਿ ਡਿਜੀਟਲ ਦਾਖਲੇ ਵਿਦਿਆਰਥੀਆਂ ਨੂੰ ਇਕ ਪਹੁੰਚਯੋਗ ਢੰਗ ਪ੍ਰਦਾਨ ਕਰ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਯੂਨੀਵਰਸਿਟੀ ਦੇ ਸਾਰੇ ਕੈਂਪਸਾਂ ’ਚ ਪੰਜਾਬ ਸਮੇਤ ਹੋਰ ਰਾਜਾਂ ਤੋਂ ਵਿਦਿਆਰਥੀ ਦਾਖਲੇ ਲਈ ਆਉਣਾ ਜਾਰੀ ਹੈ। ਯੂਨੀਵਰਸਿਟੀ ਦੇ ਅਤਿ-ਆਧੁਨਿਕ ਬੁਨਿਆਦੀ ਢਾਂਚੇ ਤੇ ਸਭ ਤੋਂ ਵਧੀਆ ਫੈਕਲਟੀ ਦਾ ਹਵਾਲਾ ਦਿੰਦੇ ਹੋਏ, ਉਨ੍ਹਾਂ ਮਾਪਿਆਂ ਤੇ ਵਿਦਿਆਰਥੀਆਂ ਨੂੰ ਡਿਜੀਟਲ ਮਾਧਿਅਮ ਰਾਹੀਂ ਘਰ ਬੈਠੇ ਹੀ ਵਿਦਿਅਕ ਸੰਸਥਾਵਾਂ ਦੀ ਸਮਰੱਥਾ ਦੀ ਜਾਂਚ ਕਰਨ ਦੀ ਅਪੀਲ ਕੀਤੀ। ਉਪਕੁਲਪਤੀ ਪ੍ਰੋ. ਡਾ. ਸੁਸ਼ੀਲ ਮਿੱਤਲ ਦੇ ਨਾਲ ਇਸ ਮੌਕੇ ਰਜਿਸਟਰਾਰ ਡਾ. ਨਵਦੀਪਕ ਸੰਧੂ , ਡੀਨ ਅਕਾਦਮਿਕ ਤੇ ਮੁੱਖ ਕੋਆਰਡੀਨੇਟਰ ਦਾਖਲੇ ਪ੍ਰੋ. ਡਾ. ਯਾਦਵਿੰਦਰ ਸਿੰਘ ਬਰਾੜ, ਡੀਨ ਪ੍ਰੋ. ਡਾ. ਪਰਵੀਨ ਬਾਂਸਲ, ਡੀਨ ਡਾ ਗੌਰਵ ਭਾਰਗਵ, ਵਿੱਤ ਅਧਿਕਾਰੀ ਡਾ ਸੁਖਬੀਰ ਸਿੰਘ ਵਾਲੀਆ, ਕੰਟਰੋਲਰ ਪ੍ਰੀਖਿਆਵਾਂ ਡਾ. ਪਰਮਜੀਤ ਸਿੰਘ, ਡਿਪਟੀ ਡੀਨ ਅਕਾਦਮਿਕ ਪ੍ਰੋ. ਡਾ. ਰਾਜੀਵ ਬੇਦੀ, ਡਿਪਟੀ ਰਜਿਸਟਰਾਰ ਅਕਾਦਮਿਕ ਤੇ ਦਾਖਲੇ ਡਾ. ਪਵਨ ਗਰਗ ਤੇ ਵੱਖੋ ਵੱਖ ਅਕਾਦਮਿਕ ਵਿਭਾਗਾਂ ਦੇ ਹੈੱਡ ਮੌਜੂਦ ਸਨ।