ਸਾਹਿਤ ਜਗਤ ਦਾ ਧਰੂ ਤਾਰਾ ਗਿਆਨ ਰੰਜਨ ਸਦਾ ਜ਼ਿੰਦਾ ਰਹੇਗਾ: ਪਲਸ ਮੰਚ

ਮਹਿੰਦਰ ਰਾਮ ਫੁੱਗਲਾਣਾ, ਪੰਜਾਬੀ ਜਾਗਰਣ, ਜਲੰਧਰ : ਹਿੰਦੀ ਸਾਹਿਤ ਜਗਤ ਦੇ ਧਰੂ ਤਾਰੇ, ਨਾਮਵਾਰ ਕਹਾਣੀਕਾਰ ਤੇ ਹਿੰਦੀ ਦੀ ਮਕਬੂਲ ਪੱਤ੍ਰਿਕਾ ਪਹਿਲ ਦੇ 35 ਵਰ੍ਹੇ ਸੰਪਾਦਕ ਵਜੋਂ ਸੇਵਾਵਾਂ ਦੇਣ ਵਾਲੇ ਤੇ ਪ੍ਰਗਤੀਸ਼ੀਲ ਲੇਖਕ ਸੰਘ ਦੇ ਮਾਣਮੱਤੇ ਸਿਰਨਾਵੇਂ ਗਿਆਨ ਰੰਜਨ ਦੇ ਸਦੀਵੀ ਵਿਛੋੜੇ ਤੇ ਪੰਜਾਬ ਲੋਕ ਸੱਭਿਆਚਾਰਕ ਮੰਚ (ਪਲਸ ਮੰਚ) ਨੇ ਉਨ੍ਹਾਂ ਦੇ ਪਰਿਵਾਰ, ਸਾਕ ਸਬੰਧੀਆਂ ਤੇ ਸੰਗੀ ਸਾਥੀਆਂ ਨਾਲ਼ ਗਹਿਰੇ ਦੁੱਖ਼ ਦਾ ਇਜ਼ਹਾਰ ਕਰਦਿਆਂ ਅੱਜ ਉਨ੍ਹਾਂ ਨੂੰ ਭਾਵ ਭਿੰਨੀ ਸ਼ਰਧਾਂਜਲੀ ਦਿੱਤੀ ਗਈ। ਪਲਸ ਮੰਚ ਦੇ ਪ੍ਰਧਾਨ ਅਮੋਲਕ ਸਿੰਘ ਕਾਰਜਕਾਰੀ ਸਕੱਤਰ ਹਰਕੇਸ਼ ਚੌਧਰੀ ਨੇ ਪ੍ਰੈੱਸ ਨਾਲ਼ ਜਾਣਕਾਰੀ ਸਾਂਝੀ ਕਰਦਿਆਂ ਦੱਸਿਆ ਕਿ ਜਨਵਰੀ ਮਹੀਨੇ ਪਲਸ ਮੰਚ ਦੀਆਂ ਨਾਟ ਤੇ ਗੀਤ ਸੰਗੀਤ ਮੰਡਲੀਆਂ ਦੀਆਂ ਸਭਨਾਂ ਥਾਵਾਂ ’ਤੇ ਹੋ ਰਹੀਆਂ ਸਰਗਰਮੀਆਂ ਮੌਕੇ ਗਿਆਨ ਰੰਜਨ ਜੀ ਦੀ ਘਾਲਣਾ ਨੂੰ ਸਿਜਦਾ ਕੀਤਾ ਜਾਏਗਾ। 21 ਨਵੰਬਰ 1936 ਨੂੰ ਅਕੋਲਾ (ਮਹਾਂਰਾਸ਼ਟਰ) ’ਚ ਜਨਮੇ ਗਿਆਨ ਰੰਜਨ ਦੇ ਮਾਪੇ ਬਹੁਤ ਹੀ ਸੰਵੇਦਨਸ਼ੀਲ ਤੇ ਲੋਕ ਸਰੋਕਾਰਾਂ ਨਾਲ਼ ਜੁੜੇ ਰਹੇ। ਉਨ੍ਹਾਂ ਦੇ ਪਿਤਾ ਵੀ ਲੇਖਕ, ਆਲੋਚਕ ਤੇ ਕਵੀ ਸਨ। ਹਰੀ ਸ਼ੰਕਰ ਪਰਸਾਈ ਵਰਗੇ ਕੱਦਾਵਰ ਲੇਖਕਾਂ ਨਾਲ਼ ਮਿਲਕੇ ਗਿਆਨ ਰੰਜਨ ਵੱਲੋਂ ਸਾਹਿਤਕ ਸਿਰਜਣਾ ਤੇ ਲੋਕ ਪੱਖੀ ਸਾਹਿਤਕ ਲਹਿਰ ਦੀ ਧਾਰਾ ਵਗਦੀ ਰੱਖਣ ਲਈ ਬੇਨਜ਼ੀਰ ਕੰਮ ਕੀਤਾ। ਕਬਾੜਖਾਨਾ, ਯਾਤਰਾ, ਸਪਨਾ ਨਹੀਂ, ਘੰਟਾ ਵਰਗੀਆਂ ਰਚਨਾਵਾਂ, ਕਹਾਣੀ ਸੰਗ੍ਰਹਿ ਤੇ ਪਹਿਲ ਪੱਤ੍ਰਿਕਾ ਰਾਹੀਂ ਸਾਹਿਤ ਦੀਆਂ ਵੰਨ ਸੁਵੰਨੀਆਂ ਵਿਧਾਵਾਂ ਨੂੰ ਲੋਕਾਂ ’ਚ ਹਰਮਨ ਪਿਆਰਾ ਕਰਨ ਤੇ ਸਮਾਜਿਕ ਪ੍ਰੀਵਰਤਨ ਦੀ ਲਹਿਰ ਅੰਦਰ ਤਾਜ਼ਾ ਰੂਹ ਭਰਨ ਲਈ ਉਨ੍ਹਾਂ ਦੀ ਅਥਾਹ ਦੇਣ ਨੂੰ ਸਦਾ ਯਾਦ ਰੱਖਿਆ ਜਾਵੇਗਾ। ਪਲਸ ਮੰਚ ਨੇ ਇਕ ਲਿਖਤੀ ਸ਼ੋਕ ਸੁਨੇਹੇ ਰਾਹੀਂ ਪ੍ਰਗਤੀਸ਼ੀਲ ਲੇਖਕ ਸੰਘ ਦੇ ਆਗੂ ਡਾ. ਸੁਖਦੇਵ ਸਿਰਸਾ ਤੇ ਉਨ੍ਹਾਂ ਦੀ ਸੰਸਥਾ ਨਾਲ਼ ਵੀ ਦੁੱਖ਼ ਸਾਂਝਾ ਕੀਤਾ। ਪਲਸ ਮੰਚ ਆਗੂਆਂ ਨੇ ਕਿਹਾ ਹੈ ਕਿ ਉਹ ਸਦਾ ਸਾਡੀਆਂ ਸਰਗਰਮੀਆਂ ’ਚ ਜੀਵਤ ਰਹਿਣਗੇ।