ਫੈਕਟਰੀ ਹਾਦਸੇ ਦੇ ਪੰਜ ਮਾਮਲੇ ਈਐੱਸਆਈਸੀ ਨੇ 10 ਦਿਨਾਂ ’ਚ ਕੀਤੇ ਮਨਜ਼ੂਰ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਧੋਗੜੀ ਰੋਡ ਸਥਿਤ ਮੈਕਸ ਚੋਇਸ ਫੈਕਟਰੀ ’ਚ ਪਿਛਲੇ ਮਹੀਨੇ ਵਾਪਰੇ ਭਿਆਨਕ ਉਦਯੋਗਿਕ ਹਾਦਸੇ ’ਚ ਤਿੰਨ ਬੀਮਾਧਾਰਕ ਔਰਤਾਂ ਮਜ਼ਦੂਰਾਂ ਸਿੰਮੀ, ਚੰਚਲ ਦੇਵੀ ਤੇ ਅਨੀਤਾ ਦੇਵੀ ਦੀ ਮੌਤ ਹੋ ਗਈ ਸੀ, ਜਦਕਿ ਤਿੰਨ ਹੋਰ ਬੀਮਾਧਾਰਕ ਸੁਸ਼ਮਾ, ਮਮਤਾ ਦੇਵੀ ਤੇ ਉਪਮਾ ਰਾਣੀ ਗੰਭੀਰ ਤੌਰ ’ਤੇ ਜ਼ਖ਼ਮੀ ਹੋ ਗਈਆਂ ਸਨ। ਇਸ ਮੁਸ਼ਕਲ ਸਮੇਂ ਦੌਰਾਨ ਕਰਮਚਾਰੀ ਰਾਜ ਬੀਮਾ ਨਿਗਮ (ਈਐੱਸਆਈਸੀ) ਨੇ ਸਿਰਫ 10 ਦਿਨਾਂ ਦੇ ਅੰਦਰ ਪੰਜ ਹਾਦਸਾ ਮਾਮਲਿਆਂ ਨੂੰ ਰੁਜ਼ਗਾਰ ਸੱਟ ਦੇ ਰੂਪ ’ਚ ਮਨਜ਼ੂਰ ਕਰ ਲਿਆ। ਸਬ-ਰੀਜਨਲ ਦਫ਼ਤਰ ਦੇ ਇੰਚਾਰਜ ਸੁਨੀਲ ਕੁਮਾਰ ਯਾਦਵ ਨੇ ਦੱਸਿਆ ਕਿ ਨਿਗਮ ਵੱਲੋਂ ਗੰਭੀਰ ਤੌਰ ’ਤੇ ਜ਼ਖ਼ਮੀ ਔਰਤਾਂ ਨੂੰ ਉਨ੍ਹਾਂ ਦੀ ਔਸਤ ਤਨਖ਼ਾਹ ਦਾ 90 ਫੀਸਦੀ ਆਰਜ਼ੀ ਅਪੰਗਤਾ ਹਿੱਤ ਲਾਭ ਦੇ ਤੌਰ ’ਤੇ ਦਿੱਤਾ ਜਾਵੇਗਾ, ਜੋ ਉਨ੍ਹਾਂ ਦੇ ਪੂਰੀ ਤਰ੍ਹਾਂ ਸਿਹਤਮੰਦ ਹੋਣ ਤੱਕ ਜਾਰੀ ਰਹੇਗਾ। ਇਸ ਤੋਂ ਇਲਾਵਾ ਜੇ ਭਵਿੱਖ ’ਚ ਕਿਸੇ ਜ਼ਖ਼ਮੀ ਔਰਤ ਨੂੰ ਸਥਾਈ ਅਪੰਗਤਾ ਹੋ ਜਾਂਦੀ ਹੈ ਤਾਂ ਨਿਯਮਾਂ ਅਨੁਸਾਰ ਉਸ ਨੂੰ ਪੂਰੀ ਉਮਰ ਸਥਾਈ ਅਪੰਗਤਾ ਪੈਨਸ਼ਨ ਦੇਣ ਦੀ ਵਿਵਸਥਾ ਵੀ ਯਕੀਨੀ ਬਣਾਈ ਗਈ ਹੈ। ਉੱਥੇ ਹੀ, ਇਸ ਹਾਦਸੇ ’ਚ ਮੌਤ ਦਾ ਸ਼ਿਕਾਰ ਹੋਈਆਂ ਤਿੰਨ ਬੀਮਾਧਾਰਕ ਔਰਤਾਂ ਦੇ ਆਸ਼ਰਿਤਾਂ ਨੂੰ ਆਸ਼ਰਿਤਾਂ ਤੱਕ ਹਿੱਤ ਲਾਭ ਪੈਨਸ਼ਨ ਦਿੱਤੀ ਜਾਵੇਗੀ ਤਾਂ ਜੋ ਪਰਿਵਾਰਾਂ ਦੀ ਰੋਜ਼ੀ-ਰੋਟੀ ’ਤੇ ਅਚਾਨਕ ਆਏ ਸੰਕਟ ਨੂੰ ਕੁਝ ਹੱਦ ਤੱਕ ਘਟਾਇਆ ਜਾ ਸਕੇ। ਕਰਮਚਾਰੀ ਰਾਜ ਬੀਮਾ ਨਿਗਮ ਆਪਣੇ ਬੀਮਾਧਾਰਕ ਮੁਲਾਜ਼ਮਾਂ ਦੇ ਹਿੱਤਾਂ ਦੀ ਰੱਖਿਆ ਲਈ ਸਦਾ ਤਤਪਰ ਤੇ ਵਚਨਬੱਧ ਹੈ।