ਸੀ.ਟੀ. ਗਰੁੱਪ ਸ਼ਾਹਪੁਰ ਵਿਖੇ ‘ਬੰਦੇ ਬਣੋ ਬੰਦੇ’ ਦਾ ਪ੍ਰਭਾਵਸ਼ਾਲੀ ਮੰਚਨ

- ਰਾਣਾ ਰਣਬੀਰ ਦੀ ਪੇਸ਼ਕਾਰੀ ਨੇ ਵਿਦਿਆਰਥੀਆਂ ਨੂੰ ਆਤਮ-ਚਿੰਤਨ ਵੱਲ ਕੀਤਾ ਪ੍ਰੇਰਿਤ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਸੀ.ਟੀ. ਗਰੁੱਪ ਆਫ ਇੰਸਟੀਚਿਊਸ਼ਨਜ਼ ਦੇ ਸ਼ਾਹਪੁਰ ਕੈਂਪਸ ਸਥਿਤ ਮਨਜੀਤ ਕੌਰ ਆਡੀਟੋਰੀਅਮ ’ਚ ਪ੍ਰਸਿੱਧ ਨਾਟਕ ‘ਬੰਦੇ ਬਣੋ ਬੰਦੇ’ ਦਾ ਪ੍ਰਭਾਵਸ਼ਾਲੀ ਮੰਚਨ ਕੀਤਾ ਗਿਆ। ਪ੍ਰਸਿੱਧ ਰੰਗਕਰਮੀ ਰਾਣਾ ਰਣਬੀਰ ਵੱਲੋਂ ਲਿਖਿਆ ਤੇ ਨਿਰਦੇਸ਼ਿਤ ਇਹ ਨਾਟਕ ਦਰਸ਼ਕਾਂ ਲਈ ਇਕ ਸੋਚਣਯੋਗ ਤੇ ਸਿੱਖਿਆਤਮਕ ਅਨੁਭਵ ਬਣਿਆ। ਨਾਟਕ ’ਚ ਰਾਣਾ ਰਣਬੀਰ ਨੇ ਰਾਜਵੀਰ ਬੋਪਰਾਏ ਨਾਲ ਮਿਲ ਕੇ ਅਭਿਨੈ ਵੀ ਕੀਤਾ। ਨਾਟਕ ‘ਬੰਦੇ ਬਣੋ ਬੰਦੇ’ ’ਚ ਪਛਤਾਵੇ, ਨਿੱਜੀ ਜ਼ਿੰਮੇਵਾਰੀ ਤੇ ਪਛਤਾਵੇ ਵਰਗੇ ਗੰਭੀਰ ਵਿਸ਼ਿਆਂ ਨੂੰ ਬੜੀ ਸੰਵੇਦਨਸ਼ੀਲਤਾ ਨਾਲ ਉਜਾਗਰ ਕਰਦਾ ਹੈ। ਕਹਾਣੀ ਦਾ ਕੇਂਦਰੀ ਪਾਤਰ ਆਪਣੇ ਸੁਆਰਥੀ ਅਤੀਤ ਦੇ ਨਤੀਜਿਆਂ ਨਾਲ ਟਕਰਾਉਂਦਾ ਹੈ, ਜੋ ਦਰਸ਼ਕਾਂ ਨੂੰ ਆਪਣੇ ਅੰਦਰ ਝਾਕਣ ਲਈ ਮਜਬੂਰ ਕਰਦਾ ਹੈ। ਯਥਾਰਥਕ ਸੰਵਾਦਾਂ ਤੇ ਸੁਭਾਵਿਕ ਹਾਸੇ ਰਾਹੀਂ ਨਾਟਕ ਨੇ ਗੰਭੀਰ ਸੰਦੇਸ਼ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਪੇਸ਼ ਕੀਤਾ।

ਇਸ ਮੌਕੇ ਅਕਾਦਮਿਕ ਮਾਹੌਲ ’ਚ ਰੰਗਮੰਚ ਦੀ ਅਹਿਮੀਅਤ ਵੀ ਉਭਰ ਕੇ ਸਾਹਮਣੇ ਆਈ। ਅਦਾਕਾਰੀ ਪੱਖੋਂ ਨਾਟਕ ਬੇਹੱਦ ਪ੍ਰਭਾਵਸ਼ਾਲੀ ਰਿਹਾ। ਰਾਣਾ ਰਣਬੀਰ ਅਤੇ ਰਾਜਵੀਰ ਬੋਪਰਾਏ ਦੀ ਮਜ਼ਬੂਤ ਮੰਚ ਮੌਜੂਦਗੀ ਨੇ ਦਰਸ਼ਕਾਂ ਨੂੰ ਅੰਤ ਤੱਕ ਜੋੜ ਕੇ ਰੱਖਿਆ। ਰਾਣਾ ਰਣਬੀਰ ਦੀ ਲਿਖਤ ਵਿੱਚ ਹਾਸੇ ਅਤੇ ਭਾਵਨਾਤਮਕ ਗੰਭੀਰਤਾ ਦਾ ਸੰਤੁਲਨ ਦਰਸ਼ਕਾਂ ਨੂੰ ਖਾਸ ਤੌਰ ’ਤੇ ਪ੍ਰਭਾਵਿਤ ਕਰਦਾ ਨਜ਼ਰ ਆਇਆ। ਸੀ.ਟੀ. ਗਰੁੱਪ ਦੇ ਚੇਅਰਮੈਨ ਚਰਨਜੀਤ ਸਿੰਘ ਚੰਨੀ ਨੇ ਆਪਣੇ ਸੰਬੋਧਨ ’ਚ ਕਿਹਾ ਕਿ ਰੰਗਮੰਚ ਜੀਵਨ ਦੇ ਮੁੱਲ ਸਿਖਾਉਣ ਦਾ ਇਕ ਸਸ਼ਕਤ ਮਾਧਿਅਮ ਹੈ। ਉਨ੍ਹਾਂ ਕਿਹਾ ਕਿ ‘ਬੰਦੇ ਬਣੋ ਬੰਦੇ’ ਵਰਗੇ ਨਾਟਕ ਵਿਦਿਆਰਥੀਆਂ ਨੂੰ ਜ਼ਿੰਮੇਵਾਰੀ, ਆਤਮ-ਚਿੰਤਨ ਤੇ ਸਮਾਜਿਕ ਫਰਜ਼ਾਂ ਦੀ ਸੂਝ ਬਖ਼ਸ਼ਦੇ ਹਨ। ਸਮਾਗਮ ਦੌਰਾਨ ਮੈਨੇਜਿੰਗ ਡਾਇਰੈਕਟਰ ਡਾ. ਮਨਬੀਰ ਸਿੰਘ, ਡਾਇਰੈਕਟਰ ਕੈਂਪਸ ਡਾ. ਸ਼ਿਵ ਕੁਮਾਰ ਅਤੇ ਡੀਨ, ਸਟੂਡੈਂਟ ਵੈਲਫੇਅਰ ਡਾ. ਅਰਜਨ ਸਿੰਘ ਮੌਜੂਦ ਰਹੇ।