ਏਂਜਲ ਸਾਗਰ ਨੇ ਵਧਾਇਆ ਪੁਲਿਸ ਡੀਏਵੀ ਸਕੂਲ ਦਾ ਮਾਣ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਪੁਲਿਸ ਡੀਏਵੀ ਪਬਲਿਕ ਸਕੂਲ (ਪੀਏਪੀ ਕੈਂਪਸ) ਦੀ 10ਵੀਂ ਜਮਾਤ ਦੀ ਪ੍ਰਤਿਭਾਸ਼ਾਲੀ ਵਿਦਿਆਰਥਣ ਏਂਜਲ ਸਾਗਰ ਨੇ ਆਪਣੀ ਸਖ਼ਤ ਮਿਹਨਤ ਤੇ ਬੇਦਾਗ਼ ਉਦੇਸ਼ ਨਾਲ ਖੇਡ ਜਗਤ ’ਚ ਆਪਣੇ ਸਕੂਲ ਤੇ ਰਾਜ ਦਾ ਨਾਮ ਰੋਸ਼ਨ ਕੀਤਾ ਹੈ। ਨਵੀਂ ਦਿੱਲੀ ’ਚ ਹੋਈ 68ਵੀਂ ਰਾਸ਼ਟਰੀ ਸ਼ੂਟਿੰਗ ਚੈਂਪੀਅਨਸ਼ਿਪ (2025) ’ਚ ਆਪਣੇ ਸ਼ਾਨਦਾਰ ਪ੍ਰਦਰਸ਼ਨ ਨਾਲ, ਏਂਜਲ ਸਾਗਰ ਨੇ ਭਾਰਤੀ ਟੀਮ ਟਰਾਇਲਾਂ ਲਈ ਕੁਆਲੀਫਾਈ ਕੀਤਾ ਹੈ। 2025-26 ਦਾ ਸੀਜ਼ਨ ਏਂਜਲ ਸਾਗਰ ਲਈ ਮੈਡਲਾਂ ਤੇ ਰਿਕਾਰਡਾਂ ਨਾਲ ਭਰਿਆ ਰਿਹਾ ਹੈ। ਉਸ ਦੀਆਂ ਮੁੱਖ ਪ੍ਰਾਪਤੀਆਂ ’ਚ ਸ਼ਾਮਲ ਹਨ। ਪੰਜਾਬ ਸਕੂਲ ਸਿੱਖਿਆ ਬੋਰਡ ਪੱਧਰ ਤੇ ਜ਼ਿਲ੍ਹਾ ਪੱਧਰ ਤੇ ਸੋਨ ਤਗਮਾ ਤੇ ਰਾਜ ਪੱਧਰ ਤੇ ਕਾਂਸੀ ਦਾ ਮੈਡਲ ਜਿੱਤਿਆ। ਡੀਏਵੀ ਪੱਧਰ ਤੇ ਜ਼ਿਲ੍ਹਾ ਤੇ ਰਾਜ ਪੱਧਰ ਦੋਵਾਂ ਤੇ ਸੋਨੇ ਦਾ ਮੈਡਲ ਜਿੱਤ ਕੇ ਆਪਣੀ ਉੱਤਮਤਾ ਸਾਬਤ ਕੀਤੀ। ਓਪਨ ਜ਼ਿਲ੍ਹਾ ਪੱਧਰ ਟੂਰਨਾਮੈਂਟ ’ਚ ਦੋ ਸੋਨੇ ਦੇ ਮੈਡਲ ਜਿੱਤੇ ਤੇ ਉਪ-ਯੁਵਾ ਤੇ ਯੁਵਾ ਸ਼੍ਰੇਣੀਆਂ ’ਚ ਓਪਨ ਰਾਜ ਪੱਧਰ ਤੇ ਦੋ ਸੋਨੇ ਦੇ ਮੈਡਲ ਜਿੱਤੇ। ਰਾਸ਼ਟਰੀ ਪੱਧਰ ਤੇ ਕੁਆਲੀਫਾਈ ਕਰਕੇ, ਉਸਨੇ ਹੁਣ ਭਾਰਤੀ ਟੀਮ ’ਚ ਜਗ੍ਹਾ ਪੱਕੀ ਕਰਨ ਵੱਲ ਇਕ ਕਦਮ ਵਧਾਇਆ ਹੈ। ਸਕੂਲ ਪ੍ਰਿੰਸੀਪਲ ਡਾ. ਰਸ਼ਮੀ ਵਿੱਜ ਨੇ ਏਂਜਲ ਸਾਗਰ ਦੀ ਸਫਲਤਾ ਤੇ ਖੁਸ਼ੀ ਪ੍ਰਗਟ ਕੀਤੀ ਤੇ ਏਂਜਲ ਸਾਗਰ ਤੇ ਉਸਦੇ ਕੋਚ ਵਿਵੇਕ ਨੂੰ ਇਸ ਸਫਲਤਾ ਤੇ ਵਧਾਈ ਦਿੱਤੀ।