ਐੱਲਕੇਸੀਟੀਸੀ ਨੇ ਪੂਰਵ ਵਿਦਿਆਰਥੀ ਸੰਵਾਦ ਤੇ ਕਰੀਅਰ ਮਾਰਗਦਰਸ਼ਨ ਸੈਸ਼ਨ ਕਰਵਾਇਆ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਐੱਲਕੇਸੀਟੀਸੀ ਵੱਲੋਂ ਵੱਖ-ਵੱਖ ਵਿਭਾਗਾਂ ’ਚ ਪੂਰਵ ਵਿਦਿਆਰਥੀ ਸੰਵਾਦ ਤੇ ਕਰੀਅਰ ਮਾਰਗਦਰਸ਼ਨ ਸੈਸ਼ਨਾਂ ਦੀ ਲੜੀ ਸਫਲਤਾਪੂਰਵਕ ਕਰਵਾਈ। ਇਸ ਉਪਰਾਲੇ ਦਾ ਮੁੱਖ ਉਦੇਸ਼ ਅਕਾਦਮਿਕ ਸਿੱਖਿਆ ਤੇ ਅਸਲ ਪੇਸ਼ਾਵਰ ਅਭਿਆਸ ਦਰਮਿਆਨ ਦੀ ਖਾਈ ਨੂੰ ਪੂਰਾ ਕਰਨਾ ਸੀ। ਐਲਾਇਡ ਤੇ ਹੈਲਥ ਕੇਅਰ ਸਾਇੰਸਜ਼ ਸਕੂਲ ਵੱਲੋਂ ਕਰਵਾਏ ਸੈਸ਼ਨ ਦੌਰਾਨ ਪ੍ਰਸਿੱਧ ਪੂਰਵ ਵਿਦਿਆਰਥੀ ਆਦਿਲ ਨਜ਼ੀਰ ਥੋਕਰ ਤੇ ਅਲੀਸ਼ਾ ਖਾਨ ਨੇ ਸਿਹਤ ਸੇਵਾਵਾਂ ਨਾਲ ਜੁੜੇ ਬਦਲਦੇ ਰੁਝਾਨਾਂ, ਕਲੀਨਿਕਲ ਸੋਚ ਤੇ ਪੇਸ਼ਾਵਰ ਤਿਆਰੀ ਸਬੰਧੀ ਆਪਣੇ ਅਨੁਭਵ ਸਾਂਝੇ ਕਰਦਿਆਂ ਵਿਦਿਆਰਥੀਆਂ ਨੂੰ ਆਤਮ-ਵਿਸ਼ਵਾਸ ਨਾਲ ਅੱਗੇ ਵਧਣ ਲਈ ਪ੍ਰੇਰਿਤ ਕੀਤਾ। ਕੰਪਿਊਟਰ ਸਾਇੰਸ ਤੇ ਇੰਜੀਨੀਅਰਿੰਗ ਵਿਭਾਗ ਵੱਲੋਂ ਕਰਵਾਏ ਸੈਸ਼ਨ ਨੂੰ ਪੂਰਵ ਵਿਦਿਆਰਥਣ ਤੇ ਸਹਾਇਕ ਪ੍ਰੋਫੈਸਰ ਇੰਜੀ. ਤਰਨਪ੍ਰੀਤ ਨੇ ਸੰਚਾਲਿਤ ਕੀਤਾ। ਉਨ੍ਹਾਂ ਨੇ ਕਰੀਅਰ ਯੋਜਨਾ, ਪਲੇਸਮੈਂਟ ਤਿਆਰੀ, ਉੱਚ ਅਧਿਐਨ, ਹੁਨਰ ਵਿਕਾਸ ਤੇ ਜੀਵਨ-ਵ੍ਰਿੱਤ ਤਿਆਰ ਕਰਨ ਬਾਰੇ ਵਿਹਾਰਕ ਜਾਣਕਾਰੀ ਦਿੱਤੀ। ਇਲੈਕਟ੍ਰਾਨਿਕਸ ਤੇ ਕਮਿਊਨੀਕੇਸ਼ਨ ਇੰਜੀਨੀਅਰਿੰਗ ਵਿਭਾਗ ਦੇ ਸੈਸ਼ਨ ਦੌਰਾਨ ਪੂਰਵ ਵਿਦਿਆਰਥੀ ਤੇ ਉਭਰਦੇ ਉਦਯੋਗਪਤੀ ਇੰਜੀ. ਫਿਰੋਜ਼ ਨੇ ਕੈਂਪਸ ਜੀਵਨ ਤੋਂ ਕਾਰੋਬਾਰ ਸ਼ੁਰੂ ਕਰਨ ਤੱਕ ਦੀ ਆਪਣੀ ਯਾਤਰਾ ਸਾਂਝੀ ਕਰਦਿਆਂ ਲਗਾਤਾਰ ਸਿੱਖਣ ਤੇ ਨੈੱਟਵਰਕਿੰਗ ਦੀ ਮਹੱਤਤਾ ’ਤੇ ਜ਼ੋਰ ਦਿੱਤਾ। ਇਸੇ ਤਰ੍ਹਾਂ ਮਕੈਨੀਕਲ ਇੰਜੀਨੀਅਰਿੰਗ ਵਿਭਾਗ ਦੇ ਸੈਸ਼ਨ ’ਚ ਪੂਰਵ ਵਿਦਿਆਰਥੀ ਇੰਜੀ. ਜਸਪ੍ਰੀਤ ਸਿੰਘ ਕਾਲੇਰ ਨੇ ਕਰੀਅਰ ਯੋਜਨਾ, ਹੁਨਰ ਵਿਕਾਸ ਤੇ ਆਜੀਵਨ ਸਿੱਖਣ ਦੀ ਲੋੜ ਬਾਰੇ ਵਿਦਿਆਰਥੀਆਂ ਨੂੰ ਮਾਰਗਦਰਸ਼ਨ ਦਿੱਤਾ। ਇਸ ਮੌਕੇ ਸੁਖਬੀਰ ਸਿੰਘ ਚੱਠਾ (ਡਾਇਰੈਕਟਰ, ਅਕਾਦਮਿਕ ਅਫੇਅਰਜ਼, ਕੇਸੀਐੱਲ ਗਰੁੱਪ) ਨੇ ਸਾਰੇ ਵਿਭਾਗਾਂ ਦੇ ਯਤਨਾਂ ਦੀ ਸ਼ਲਾਘਾ ਕੀਤੀ, ਜਦਕਿ ਡਾ. ਆਰਐੱਸ ਦੇਓਲ (ਡਾਇਰੈਕਟਰ, ਐੱਲਕੇਸੀਟੀਸੀ) ਨੇ ਕਿਹਾ ਕਿ ਪੂਰਵ ਵਿਦਿਆਰਥੀਆਂ ਦੀ ਭਾਗੀਦਾਰੀ ਵਿਦਿਆਰਥੀਆਂ ਨੂੰ ਉਦਯੋਗਕ ਤੌਰ ’ਤੇ ਤਿਆਰ ਕਰਨ ’ਚ ਅਹਿਮ ਭੂਮਿਕਾ ਨਿਭਾਉਂਦੀ ਹੈ।