ਜਲੰਧਰ ’ਚ ‘ਮਿੰਨੀ ਨਿਊਯਾਰਕ’ ਦੀ ਇਕ ਝਲਕ

- ਐੱਨਆਰਆਈ ਦੇ ਘਰ ਦੀ ਛੱਤ ’ਤੇ ਸਟੈਚੂ ਆਫ਼ ਲਿਬਰਟੀ ਸਥਾਪਤ ਰਾਕੇਸ਼ ਗਾਂਧੀ, ਪੰਜਾਬੀ ਜਾਗਰਣ ਜਲੰਧਰ : ਕਿਸ਼ਨਪੁਰਾ ਇਲਾਕੇ ’ਚ ਇਕ ਵਿਲੱਖਣ ਆਕਰਸ਼ਣ ਇਸ ਸਮੇਂ ਲੋਕਾਂ ਦਾ ਧਿਆਨ ਖਿੱਚ ਰਿਹਾ ਹੈ। ਇਕ ਸਥਾਨਕ ਐੱਨਆਰਆਈ ਗੁਰਜੀਤ ਸਿੰਘ ਮਠਾਰੂ ਨੇ ਆਪਣੇ ਘਰ ਦੀ ਚੌਥੀ ਮੰਜ਼ਿਲ ’ਤੇ ਸਟੈਚੂ ਆਫ਼ ਲਿਬਰਟੀ ਦੀ ਇਕ ਪ੍ਰਤੀਕ੍ਰਿਤੀ ਸਥਾਪਤ ਕੀਤੀ ਹੈ। ਲੋਕ ਇਸ ਨੂੰ ਦੇਖਣ ਲਈ ਇਕੱਠੇ ਹੋ ਰਹੇ ਹਨ। ਨਾ ਸਿਰਫ਼ ਨੇੜਲੇ ਆਂਢ-ਗੁਆਂਢ ਤੋਂ, ਸਗੋਂ ਦੂਰ-ਦੁਰਾਡੇ ਦੇ ਇਲਾਕਿਆਂ ਤੋਂ ਵੀ ਲੋਕ ਇਸ ਨੂੰ ਦੇਖਣ ਲਈ ਆ ਰਹੇ ਹਨ। ਗੁਰਜੀਤ ਸਿੰਘ ਜੋ ਕਿ ਲਗਭਗ 26 ਸਾਲਾਂ ਤੋਂ ਨਿਊਯਾਰਕ ਸ਼ਹਿਰ ’ਚ ਰਹਿ ਰਿਹਾ ਹੈ ਹਰ ਸਾਲ ਭਾਰਤ ਆਉਂਦਾ ਹੈ। ਉਸ ਨੇ ਸਾਂਝਾ ਕੀਤਾ ਕਿ ਨਿਊਯਾਰਕ ’ਚ ਸਟੈਚੂ ਆਫ਼ ਲਿਬਰਟੀ ਦਾ ਨਿਰੀਖਣ ਕਰਦੇ ਸਮੇਂ, ਉਸ ਨੂੰ ਇਹ ਵਿਚਾਰ ਆਇਆ, ਕਿਉਂ ਨਾ ਆਪਣੇ ਘਰ ’ਚ ਇਸ ਦੀ ਇਕ ਝਲਕ ਦੁਬਾਰਾ ਬਣਾਈ ਜਾਵੇ। ਇਸ ਵਿਚਾਰ ਤੋਂ ਪ੍ਰੇਰਿਤ ਹੋ ਕੇ ਉਸ ਨੇ ਜਲੰਧਰ ’ਚ ਆਪਣੇ ਨਿਵਾਸ ਸਥਾਨ ਦੀ ਛੱਤ ’ਤੇ ਇਸ ਵਿਲੱਖਣ ਮੂਰਤੀ ਦੀ ਸਥਾਪਨਾ ਦਾ ਕੰਮ ਸੌਂਪਿਆ। ਗੁਰਜੀਤ ਅਨੁਸਾਰ ਇਸ ਪ੍ਰਤੀਕ੍ਰਿਤੀ ਨੂੰ ਬਣਾਉਣ ’ਚ ਲਗਭਗ 30 ਹਜ਼ਾਰ ਦੀ ਲਾਗਤ ਆਈ ਤੇ ਇਸ ਨੂੰ ਪੂਰਾ ਕਰਨ ’ਚ 20 ਤੋਂ 25 ਦਿਨ ਲੱਗੇ। ਇਸ ਨੂੰ ਕੁਝ ਦਿਨ ਪਹਿਲਾਂ ਹੀ ਛੱਤ ਤੇ ਲਗਾਇਆ ਗਿਆ ਸੀ, ਤੇ ਉਦੋਂ ਤੋਂ, ਇਹ ਪੂਰੇ ਇਲਾਕੇ ’ਚ ਚਰਚਾ ਦਾ ਇਕ ਮੁੱਖ ਵਿਸ਼ਾ ਬਣ ਗਿਆ ਹੈ। ਸੈਲਾਨੀ ਉੱਥੇ ਫੋਟੋਆਂ ਖਿੱਚਣ ਲਈ ਇਕੱਠੇ ਹੋ ਰਹੇ ਹਨ ਤੇ ਇਸ ਵਿਲੱਖਣ ਪਹਿਲਕਦਮੀ ਲਈ ਆਪਣੀ ਪ੍ਰਸ਼ੰਸਾ ਪ੍ਰਗਟ ਕਰ ਰਹੇ ਹਨ। ਇਸ ਤੋਂ ਇਲਾਵਾ ਗੁਰਜੀਤ ਸਿੱਧੂ ਮੂਸੇਵਾਲਾ ਦਾ ਬਹੁਤ ਵੱਡਾ ਪ੍ਰਸ਼ੰਸਕ ਹੈ ਤੇ ਉਸ ਨੇ ਆਪਣੇ ਘਰ ਦੀ ਛੱਤ ਤੇ ਕਲਾਕਾਰ ਦੇ ਪੋਸਟਰ ਵੀ ਪ੍ਰਦਰਸ਼ਿਤ ਕੀਤੇ ਹਨ।