ਪਲੇਟਫਾਰਮ ’ਤੇ ਸ਼ੈੱਡ ਬਣਾਉਣ ਲਈ ਲਿਆ ਜਾਵੇਗਾ 3 ਘੰਟੇ ਦਾ ਬਲਾਕ

ਪੰਜਾਬੀ ਜਾਗਰਣ ਪ੍ਰਤੀਨਿਧ, ਜਲੰਧਰ : ਜਲੰਧਰ ਸਿਟੀ ਰੇਲਵੇ ਸਟੇਸ਼ਨ ਦੇ ਇਕ ਨੰਬਰ ਪਲੇਟਫਾਰਮ ਦੇ ਅੱਧੇ ਹਿੱਸੇ ’ਤੇ ਸ਼ੈੱਡ ਬਣਾਉਣ ਲਈ ਸਥਾਨਕ ਰੇਲ ਪ੍ਰਸ਼ਾਸਨ ਨੂੰ 3 ਘੰਟੇ ਦਾ ਬਲਾਕ ਲੈਣਾ ਹੋਵੇਗਾ। ਇਸ ਸਬੰਧੀ ਸਾਰੀਆਂ ਤਿਆਰੀਆਂ ਕਰ ਲਈਆਂ ਗਈਆਂ ਹਨ। ਸ਼ੈੱਡ ਦਾ ਢਾਂਚਾ ਖੜ੍ਹਾ ਕਰਨ ਲਈ ਸਾਰੇ ਗਾਰਡਰ ਤਿਆਰ ਕਰ ਲਏ ਗਏ ਹਨ ਤੇ ਦਿੱਲੀ-ਅੰਮ੍ਰਿਤਸਰ ਰੇਲ ਮਾਰਗ ’ਤੇ ਬਲਾਕ ਲਿਆ ਜਾਏਗਾ ਜਿਸ ਕਾਰਨ ਉਕਤ ਮਾਰਗ ਤੋਂ ਓਵਰ ਹੈੱਡ ਕਰੰਟ (ਓਐੱਚਆਈ) ਵਾਲੀ ਤਾਰ ਦੀ ਸਪਲਾਈ ਕੱਟਣੀ ਹੋਵੇਗੀ। ਇਹ ਸ਼ੈੱਡ 162 ਸਾਲ ਬਾਅਦ ਬਣਾਇਆ ਜਾ ਰਿਹਾ ਹੈ। ਰੇਲ ਅਧਿਕਾਰੀ ਬਲਾਕ ਦਾ ਸਮਾਂ ਨਿਰਧਾਰਤ ਕਰ ਰਹੇ ਹਨ ਤਾਂ ਜੋ ਰੇਲ ਗੱਡੀਆਂ ਪ੍ਰਭਾਵਿਤ ਨਾ ਹੋਣ ਅਤੇ ਸਟੇਸ਼ਨ ਤੇ ਕੋਈ ਯਾਤਰੀ ਨਾ ਹੋਵੇ। ਇਸ ਲਈ ਇਹ ਸੰਭਾਵਨਾ ਹੈ ਕਿ ਛੱਤ ਦਾ ਕੰਮ ਅੱਧੀ ਰਾਤ 12 ਵਜੇ ਜਾਂ ਉਸ ਤੋਂ ਬਾਅਦ ਤਿੰਨ ਘੰਟੇ ਦਾ ਬਲਾਕ ਲੈ ਕੇ ਪੂਰਾ ਕੀਤਾ ਜਾਵੇਗਾ। ਦੂਜੇ ਪਾਸੇ ਬਲਾਕ ਦੌਰਾਨ ਅੰਮ੍ਰਿਤਸਰ ਤੋਂ ਦਿੱਲੀ ਜਾਣ ਵਾਲੀਆਂ ਰੇਲ ਗੱਡੀਆਂ ਪਲੇਟਫਾਰਮ ਨੰਬਰ ਦੋ ਅਤੇ ਤਿੰਨ ਤੇ ਚੱਲਦੀਆਂ ਰਹਿਣਗੀਆਂ। ਜੇ ਲੁਧਿਆਣਾ ਤੋਂ ਕੋਈ ਰੇਲ ਗੱਡੀ ਦੇਰੀ ਨਾਲ ਆਉਂਦੀ ਹੈ ਤਾਂ ਇਸ ਨੂੰ ਬਦਲ ਵਜੋਂ ਪਲੇਟਫਾਰਮ ਨੰਬਰ ਦੋ ਜਾਂ ਤਿੰਨ ਵੱਲ ਮੋੜਿਆ ਜਾ ਸਕਦਾ ਹੈ। ਇਹ ਸੰਭਾਵਨਾ ਹੈ ਕਿ ਇੱਕ ਜਾਂ ਦੋ ਦਿਨਾਂ ਦੇ ਅੰਦਰ ਸਾਰੀਆਂ ਜ਼ਰੂਰੀ ਪ੍ਰਕਿਰਿਆਵਾਂ ਪੂਰੀਆਂ ਹੋ ਜਾਣਗੀਆਂ ਅਤੇ ਛੱਤ ਦਾ ਕੰਮ ਪੂਰਾ ਹੋ ਜਾਵੇਗਾ, ਜਿਸ ਨਾਲ ਯਾਤਰੀਆਂ ਨੂੰ ਕਾਫ਼ੀ ਰਾਹਤ ਮਿਲੇਗੀ।