ਸਰਕਾਰੀ ਕਾਲਜ ਹੁਸ਼ਿਆਰਪੁਰ ’ਚ ‘ਸਟਾਰਟ-ਅਪ ਕਾਰਨੀਵਲ’ ਦਾ ਆਯੋਜਨ

500 ਵਿਦਿਆਰਥੀਆਂ ਨੇ ਦਿਖਾਇਆ ਹੁਨਰ ਸੰਜੀਵ ਸੂਦ, ਪੰਜਾਬੀ ਜਾਗਰਣ, ਹੁਸ਼ਿਆਰਪੁਰ: ਸਰਕਾਰੀ ਕਾਲਜ ਹੁਸ਼ਿਆਰਪੁਰ ਵਿੱਚ ਐਂਟਰਪ੍ਰਿਨਿਊਰਸ਼ਿਪ ਸੈੱਲ ਵੱਲੋਂ ਵਿਦਿਆਰਥੀਆਂ ਵਿੱਚ ਉਦਯੋਗਸ਼ੀਲ ਸੋਚ ਅਤੇ ਨਵਚੇਤਨਾ ਨੂੰ ਉਤਸ਼ਾਹਿਤ ਕਰਨ ਲਈ ਕਾਲਜ ਕੈਂਪਸ ਵਿੱਚ “ਸਟਾਰਟ-ਅਪ ਕਾਰਨੀਵਲ” ਦਾ ਆਯੋਜਨ ਕੀਤਾ ਗਿਆ। ਸਮਾਗਮ ਦੌਰਾਨ ਰਚਨਾਤਮਕਤਾ ਅਤੇ ਉਤਸ਼ਾਹ ਨਾਲ ਭਰਪੂਰ ਮਾਹੌਲ ਵੇਖਣ ਨੂੰ ਮਿਲਿਆ। ਕਾਰਨੀਵਲ ਦਾ ਉਦਘਾਟਨ ਕਾਲਜ ਦੇ ਪ੍ਰਿੰਸੀਪਲ ਪ੍ਰੋ. ਡਾ. ਗਗਨਦੀਪ ਚੀਮਾ ਵੱਲੋਂ ਰਿਬਨ ਕੱਟ ਕੇ ਕੀਤਾ ਗਿਆ। ਇਸ ਕਾਰਨੀਵਲ ਵਿੱਚ ਕਾਲਜ ਦੇ ਲਗਭਗ 23 ਵਿਭਾਗਾਂ ਦੇ ਕਰੀਬ 500 ਵਿਦਿਆਰਥੀਆਂ ਨੇ ਹਿੱਸਾ ਲਿਆ ਅਤੇ 90 ਦੇ ਕਰੀਬ ਰਚਨਾਤਮਕ ਢੰਗ ਨਾਲ ਸਜਾਏ ਸਟਾਲ ਲਗਾਏ। ਇਸ ਨਾਲ ਕਾਲਜ ਕੈਂਪਸ ਵਿਦਿਆਰਥੀਆਂ ਵੱਲੋਂ ਚਲਾਏ ਜਾ ਰਹੇ ਛੋਟੇ ਕਾਰੋਬਾਰਾਂ ਦੇ ਰੌਣਕਭਰੇ ਬਜ਼ਾਰ ਵਿੱਚ ਤਬਦੀਲ ਹੋ ਗਿਆ। ਵਿਦਿਆਰਥੀਆਂ ਵੱਲੋਂ ਲਗਾਏ ਗਏ ਸਟਾਲਾਂ ਵਿੱਚ ਹੱਥ ਨਾਲ ਬਣੇ ਫੈਸ਼ਨ ਆਈਟਮ, ਸਜਾਵਟੀ ਵਸਤਾਂ, ਹੱਥ ਨਾਲ ਬਣੇ ਗਹਿਣੇ, ਪੇਂਟਿੰਗਾਂ, ਕਢਾਈ ਵਾਲੇ ਉਤਪਾਦ ਤੇ ਕਰੋਸ਼ੀਆ ਨਾਲ ਤਿਆਰ ਕੀਤੀਆਂ ਵਸਤਾਂ ਸ਼ਾਮਲ ਸਨ। ਖਾਣ-ਪੀਣ ਦੇ ਸਟਾਲ ਵੀ ਖਾਸ ਆਕਰਸ਼ਣ ਦਾ ਕੇਂਦਰ ਰਹੇ, ਜਿੱਥੇ ਰਵਾਇਤੀ ਸਨੈਕਸ, ਬੇਕਰੀ ਆਈਟਮ ਅਤੇ ਘਰੇਲੂ ਤਿਆਰ ਕੀਤੇ ਪਦਾਰਥਾਂ ਦੀ ਵਰਾਇਟੀ ਉਪਲਬਧ ਸੀ। ਇਸ ਤੋਂ ਇਲਾਵਾ ਖੇਡਾਂ ਅਤੇ ਮਨੋਰੰਜਨ ਗਤੀਵਿਧੀਆਂ ਵਾਲੇ ਸਟਾਲਾਂ ਨੇ ਵੀ ਦਰਸ਼ਕਾਂ ਦਾ ਧਿਆਨ ਖਿੱਚਿਆ ਅਤੇ ਸਮਾਗਮ ਦੇ ਮਾਹੌਲ ਨੂੰ ਹੋਰ ਜੀਵੰਤ ਬਣਾਇਆ। ਵਿਦਿਆਰਥੀਆਂ ਨੇ ਆਪਣੇ ਉਤਪਾਦਾਂ ਦੀ ਵਿਕਰੀ ਰਾਹੀਂ ਮੁਨਾਫ਼ਾ ਵੀ ਕਮਾਇਆ ਤੇ ਉਦਯੋਗਸ਼ੀਲਤਾ ਨਾਲ ਜੁੜੇ ਤਜਰਬੇ ਨੂੰ ਨਜ਼ਦੀਕ ਤੋਂ ਮਹਿਸੂਸ ਕੀਤਾ। ਇਸ ਮੌਕੇ ਪ੍ਰਿੰਸੀਪਲ ਪ੍ਰੋ. ਡਾ. ਗਗਨਦੀਪ ਚੀਮਾ ਨੇ ਵੱਖ-ਵੱਖ ਸਟਾਲਾਂ ਦਾ ਦੌਰਾ ਕਰਦਿਆਂ ਵਿਦਿਆਰਥੀਆਂ ਦੀ ਰਚਨਾਤਮਕਤਾ, ਮਿਹਨਤ ਅਤੇ ਸਮਰਪਣ ਦੀ ਸਰਾਹਨਾ ਕੀਤੀ। ਉਨ੍ਹਾਂ ਕਿਹਾ ਕਿ ਇਸ ਤਰ੍ਹਾਂ ਦੇ ਉਪਰਾਲੇ ਕਲਾਸਰੂਮ ਸਿੱਖਿਆ ਅਤੇ ਅਸਲੀ ਵਪਾਰਕ ਦੁਨੀਆ ਵਿਚਕਾਰ ਦੇ ਅੰਤਰ ਨੂੰ ਘਟਾਉਂਦੇ ਹਨ ਅਤੇ ਵਿਦਿਆਰਥੀਆਂ ਨੂੰ ਪ੍ਰਯੋਗਿਕ ਤਜਰਬਾ ਪ੍ਰਦਾਨ ਕਰਦੇ ਹਨ। ਕਾਰਨੀਵਲ ਵਿੱਚ ਕਾਲਜ ਦੇ ਲਗਭਗ 2000 ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਨੇ ਸ਼ਮੂਲੀਅਤ ਕੀਤੀ ਅਤੇ ਵੱਖ-ਵੱਖ ਸਟਾਲਾਂ ਦਾ ਦੌਰਾ ਕਰਦਿਆਂ ਵਿਦਿਆਰਥੀਆਂ ਵੱਲੋਂ ਤਿਆਰ ਕੀਤੇ ਖਾਣੇ ਅਤੇ ਹੱਥ ਨਾਲ ਬਣੇ ਉਤਪਾਦਾਂ ਦੀ ਖਰੀਦਦਾਰੀ ਕੀਤੀ। ਇਸ ਸਮਾਗਮ ਦੀ ਸੰਯੋਜਨਾ ਐਂਟਰਪ੍ਰਿਨਿਊਰਸ਼ਿਪ ਸੈੱਲ ਦੀ ਨੋਡਲ ਅਧਿਕਾਰੀ ਪ੍ਰੋਫੈਸਰ ਰੰਜਨਾ ਜੀੜ ਵੱਲੋਂ ਕੀਤੀ ਗਈ।