ਫਾਰਮਰਜ ਪ੍ਰੋਡਿਉਸ ਪ੍ਰਮੋਸ਼ਨ ਸੋਸਾਇਟੀ ਵੱਲੋਂ ਘੁਗਿਆਲ ਦਾ ਦੌਰਾ

ਕਮਲ, ਪੰਜਾਬੀ ਜਾਗਰਣ, ਹਰਿਆਣਾ: ਪੰਜਾਬ ਰਾਜ ਖੁਰਾਕ ਕਮਿਸ਼ਨ, ਪੰਜਾਬ ਵਿਕਾਸ ਕਮਿਸ਼ਨ, ਅਤੇ ਅੰਤਰਰਾਸ਼ਟਰੀ ਸਰਕੂਲਰ ਇਕਾਨਮੀ ਕੌਂਸਲ, ਨਵੀਂ ਦਿੱਲੀ ਦੇ ਮਾਣਯੋਗ ਮੈਂਬਰਾਂ ਦੀ ਇੱਕ ਸਾਂਝੀ ਟੀਮ ਨੇ ਫਾਰਮਰਜ ਪ੍ਰੋਡਿਉਸ ਪ੍ਰਮੋਸ਼ਨ ਸੋਸਾਇਟੀ ਘੁਗਿਆਲ ਦਾ ਦੌਰਾ ਕੀਤਾ। ਟੀਮ ਵਿੱਚ ਬਾਲ ਮੁਕੁੰਦ ਸ਼ਰਮਾ (ਚੇਅਰਮੈਨ), ਜਸਵੀਰ ਸਿੰਘ ਸੇਖੋਂ ਅਤੇ ਚੇਤਨ ਪ੍ਰਕਾਸ਼ (ਆਨਰੇਰੀ ਮੈਂਬਰ, ਪੰਜਾਬ ਰਾਜ ਖੁਰਾਕ ਕਮਿਸ਼ਨ), ਵੈਭਵ ਮਹੇਸ਼ਵਰੀ (ਮੈਂਬਰ, ਪੰਜਾਬ ਵਿਕਾਸ ਕਮਿਸ਼ਨ), ਸ਼ਾਲਿਨੀ ਗੋਇਲ ਭੱਲਾ (ਸੰਸਥਾਪਕ ਅਤੇ ਪ੍ਰਬੰਧ ਨਿਰਦੇਸ਼ਕ, ਅੰਤਰਰਾਸ਼ਟਰੀ ਸਰਕੂਲਰ ਇਕਾਨਮੀ ਕੌਂਸਲ), ਉਮੇਸ਼ ਵਰਮਾ (ਸੰਯੁਕਤ ਰਜਿਸਟਰਾਰ, ਸਹਿਕਾਰੀ ਸਭਾਵਾਂ) ਤੇ ਗੀਤੂ ਠਾਕੁਰ (ਸਹਾਇਕ ਰਜਿਸਟਰਾਰ, ਸਹਿਕਾਰੀ ਸਭਾਵਾਂ) ਸ਼ਾਮਲ ਸਨ। ਸੁਸਾਇਟੀ ਦੇ ਅਹਾਤੇ ਵਿੱਚ ਪਹੁੰਚਣ ਤੇ, ਫੈਪਰੋ ਦੇ ਪ੍ਰਧਾਨ ਜੋਗ ਰਾਜ ਦੀ ਅਗਵਾਈ ਵਿੱਚ ਸਟਾਫ ਮੈਂਬਰਾਂ ਦੁਆਰਾ ਮਹਿਮਾਨਾਂ ਦਾ ਨਿੱਘਾ ਸਵਾਗਤ ਕੀਤਾ ਗਿਆ, ਉਨ੍ਹਾਂ ਨੂੰ ਗੁਲਦਸਤੇ ਭੇਟ ਕੀਤੇ ਗਏ। ਇਸ ਮੌਕੇ ਤੇ, ਘੁੱਗਿਆਲ ਸਥਿਤ ਫੈਪਰੋ ਸੋਸਾਇਟੀ ਦੀ ਉੱਚ-ਪੱਧਰੀ ਟੀਮ ਨੇ ਇਸ ਮਾਡਲ ਨੂੰ ਨੀਤੀ ਨਿਰਮਾਣ ਵਿੱਚ ਜੋੜਨ ਤੇ ਚਰਚਾ ਕੀਤੀ। ਇਸ ਮੌਕੇ ਪ੍ਰਧਾਨ ਜੋਗ ਰਾਜ ਅਤੇ ਮੈਨੇਜਰ ਸੁਖਜਿੰਦਰ ਸਿੰਘ ਪੰਨੂ ਨੇ ਫੈਪਰੋ ਦੀਆਂ ਗਤੀਵਿਧੀਆਂ ਬਾਰੇ ਵਿਸਥਾਰਪੂਰਵਕ ਜਾਣਕਾਰੀ ਪ੍ਰਦਾਨ ਕੀਤੀ। ਉਨ੍ਹਾਂ ਦੱਸਿਆ ਕਿ ਫੈਪਰੋ ਨਾਲ ਇਸ ਸਮੇਂ 300 ਤੋਂ ਵੱਧ ਕਿਸਾਨ ਜੁੜੇ ਹੋਏ ਹਨ ਤੇ ਫਸਲੀ ਵਿਭਿੰਨਤਾ ਦੇ ਹਿੱਸੇ ਵਜੋਂ, ਕਿਸਾਨਾਂ ਨੂੰ ਹਲਦੀ ਅਤੇ ਦਾਲਾਂ ਦੀ ਕਾਸ਼ਤ ਕਰਨ ਲਈ ਉਤਸ਼ਾਹਿਤ ਕੀਤਾ ਜਾ ਰਿਹਾ ਹੈ। ਇੱਕ ਦਾਲ ਪ੍ਰੋਸੈਸਿੰਗ ਯੂਨਿਟ ਸਥਾਪਤ ਕਰਕੇ, ਫੈਪਰੋ ਕਿਸਾਨਾਂ ਲਈ ਖੇਤੀਬਾੜੀ ਸੰਕਟ ਨੂੰ ਦੂਰ ਕਰਨ ਲਈ ਇੱਕ ਸ਼ਕਤੀਸ਼ਾਲੀ ਅਤੇ ਵਿਹਾਰਕ ਮਾਡਲ ਵਜੋਂ ਉਭਰਿਆ ਹੈ। ਇਸ ਤੋਂ ਇਲਾਵਾ, ਸੁਸਾਇਟੀ ਦੁਆਰਾ ਸਥਾਪਤ ਕੀਤਾ ਗਿਆ ਹਾਈਜੀਨਿਕ ਗੁੜ ਅਤੇ ਸ਼ਕਰ ਪਲਾਂਟ ਆਪਣੇ ਉਤਪਾਦਾਂ ਦੀ ਵਿਦੇਸ਼ਾਂ ਵਿੱਚ ਵੱਧ ਰਹੀ ਮੰਗ ਲਈ ਕਿਸਾਨਾਂ ਅਤੇ ਖਪਤਕਾਰਾਂ ਵੱਲੋਂ ਵਿਆਪਕ ਪ੍ਰਸ਼ੰਸਾ ਪ੍ਰਾਪਤ ਕਰ ਰਿਹਾ ਹੈ। ਰੋਜ਼ਾਨਾ ਵਰਤੋਂ ਦੀਆਂ ਵਸਤੂਆਂ ਜਿਵੇਂ ਕਿ ਹਲਦੀ, ਛੋਲੇ, ਦਾਲਾਂ, ਸ਼ਹਿਦ, ਗੁੜ ਅਤੇ ਜੂਸ ਨੂੰ 100 ਫੀਸਦੀ ਸ਼ੁੱਧ ਰੂਪ ਵਿੱਚ ਜਨਤਾ ਲਈ ਉਪਲਬਧ ਕਰਵਾਇਆ ਜਾ ਰਿਹਾ ਹੈ। ਇਸ ਮੌਕੇ ਤੇ ਬਾਲ ਮੁਕੁੰਦ ਸ਼ਰਮਾ ਨੇ ਫੈਪਰੋ ਵੱਲੋਂ ਚਲਾਏ ਜਾ ਰਹੇ ਵੱਖ-ਵੱਖ ਪ੍ਰੋਜੈਕਟਾਂ ਦੀ ਪ੍ਰਸ਼ੰਸਾ ਕੀਤੀ ਅਤੇ ਕਿਹਾ ਕਿ ਸੁਸਾਇਟੀ ਦੇ ਮਾਡਲ ਦਾ ਡੂੰਘਾਈ ਨਾਲ ਅਧਿਐਨ ਕੀਤਾ ਜਾ ਰਿਹਾ ਹੈ ਤਾਂ ਜੋ ਇਸ ਦੇ ਅਧਾਰ ਤੇ ਨੀਤੀਆਂ ਬਣਾਈਆਂ ਜਾ ਸਕਣ ਅਤੇ ਹੋਰ ਸਹਿਕਾਰੀ ਸੰਸਥਾਵਾਂ ਵਿੱਚ ਵੀ ਇਸੇ ਤਰ੍ਹਾਂ ਦੇ ਪ੍ਰੋਜੈਕਟ ਸ਼ੁਰੂ ਕੀਤੇ ਜਾ ਸਕਣ। ਇਸ ਮੌਕੇ ਪ੍ਰਧਾਨ ਜੋਗ ਰਾਜ, ਮੈਨੇਜਰ ਸੁਖਜਿੰਦਰ ਪੰਨੂ, ਕਰਿਸ਼ਮਾ, ਡਾਇਰੈਕਟਰ ਮਹੰਤ ਵਰਿੰਦਰ ਸਿੰਘ, ਅਵੀਨਿੰਦਰਾ ਸਿੰਘ, ਰੋਸ਼ਨ ਲਾਲ, ਸ਼ੰਭੂ ਦੱਤ ਅਤੇ ਹੋਰ ਪਤਵੰਤੇ ਵੀ ਮੌਜੂਦ ਸਨ।