ਸ੍ਰੀਮਦ ਭਾਗਵਤ ਕਥਾ ਦੇ ਚੌਥਾ ਦਿਨ ਉਮੜੇ ਸ਼ਰਧਾਲੂ

ਪਰਮਿੰਦਰ ਸਿੰਘ ਥਿੰਦ, ਪੰਜਾਬੀ ਜਾਗਰਣ ਫਿਰੋਜ਼ਪੁਰ : ਸਥਾਨਕ ਸ੍ਰੀ ਸਨਾਤਨ ਧਰਮ ਸਭਾ ਮਹਾਵੀਰ ਦਲ ਮੰਦਰ ਵਿਖੇ ਚੱਲ ਰਹੀ ਸ੍ਰੀਮਦ ਭਾਗਵਤ ਕਥਾ ਦੇ ਚੌਥੇ ਦਿਨ ਮਹਾਰਾਜ ਜੀ ਨੇ ਈਸ਼ਵਰ ਗਿਆਨ ਦੀ ਅੰਮ੍ਰਿਤ ਵਰਖਾ ਕਰਕੇ ਸਰੋਤਿਆਂ ਨੂੰ ਭਾਵ-ਵਿਭੋਰ ਕਰ ਦਿੱਤਾ। ਮਹਾਰਾਜ ਜੀ ਨੇ ਦੱਸਿਆ ਕਿ ਪ੍ਰਤੱਖ ਵਿਅਕਤੀ ਦੇ ਅੰਦਰ ਪਰਮਾਤਮਾ ਆਤਮਾ ਦੇ ਰੂਪ ਵਿਚ ਬੈਠਾ ਹੈ, ਪਰ ਆਮ ਦ੍ਰਿਸ਼ਟੀ ਨਾਲ ਨਜ਼ਰ ਨਹੀਂ ਆਉਂਦਾ। ਉਨ੍ਹਾਂ ਦੱਸਿਆ ਕਿ ਸ੍ਰੀਮਦ ਭਾਗਵਤ ਰੂਪੀ ਬ੍ਰਹਮ ਵਿੱਦਿਆ ਨੂੰ ਜੀਵਨ ਵਿਚ ਧਾਰਨ ਕਰਨ ਨਾਲ ਉਹ ਯੋਗਤਾ ਪ੍ਰਾਪਤ ਹੋ ਜਾਂਦੀ ਹੈ ਕਿ ਹਰ ਵਿਅਕਤੀ ਵਿਚ ਉਸ ਪਰਮਾਤਮਾ ਦੇ ਦਰਸ਼ਨ ਹੋਣ ਲੱਗਦੇ ਹਨ, ਕਿਉਂਕਿ ਮੂਲ ਰੂਪ ਵਿਚ ਅਸੀਂ ਸਾਰੇ ਉਸ ਪਰਮ ਪਿਤਾ ਪਰਮਾਤਮਾ ਦੇ ਹੀ ਅੰਸ਼-ਵੰਸ਼ ਹਾਂ। ਮਹਾਰਾਜ ਜੀ ਨੇ ਕਿਹਾ ਕਿ ਸਾਨੂੰ ਹਰ ਪੁਰਸ਼ ਵਿਚ ਭਗਵਾਨ ਰਾਮ ਅਤੇ ਹਰ ਮਾਤਾ-ਭੈਣ ਵਿਚ ਮਾਤਾ ਸੀਤਾ ਦੇ ਦਰਸ਼ਨ ਕਰਨੇ ਚਾਹੀਦੇ ਹਨ। ਉਨ੍ਹਾਂ ਨੇ ਕਰਦਮ ਰਿਸ਼ੀ ਅਤੇ ਮਾਤਾ ਦੇਵਹੂਤੀ ਦੀ ਕਥਾ ਸੁਣਾਈ ਅਤੇ ਕਪਿਲ ਮੁਨੀ ਦੇ ਜਨਮ ਦੀ ਕਥਾ ਦਾ ਸਰਵਣ ਕਰਵਾਇਆ। ਉਨ੍ਹਾਂ ਦੱਸਿਆ ਕਿ ਕਪਿਲ ਮੁਨੀ ਨੇ ਸਾਂਖਿਆ ਯੋਗ ਦਾ ਉਪਦੇਸ਼ ਕਰਦਮ ਅਤੇ ਦੇਵਹੂਤੀ ਨੂੰ ਪ੍ਰਦਾਨ ਕੀਤਾ। ਉਨ੍ਹਾਂ ਕਿਹਾ ਕਿ ਜੋ ਸਾਰੀਆਂ ਇੰਦਰੀਆਂ ਦਾ ਬਲਪੂਰਵਕ ਦਮਨ ਕਰਕੇ ਅਤੇ ਆਪਣੀਆਂ ਇੰਦਰੀਆਂ ’ਤੇ ਵਿਜੇ ਪ੍ਰਾਪਤ ਕਰਕੇ ਉਨ੍ਹਾਂ ਦਾ ਸਵਾਮੀ ਬਣ ਜਾਵੇ, ਉਹੀ ‘ਕਰਦਮ’ ਹੈ। ਮਹਾਰਾਜ ਜੀ ਨੇ ਦੱਸਿਆ ਕਿ ਜਦੋਂ ਅਸੀਂ ਸਾਰਿਆਂ ਦੇ ਅੰਦਰ ਤੱਤ ਰੂਪ ਵਿੱਚ ਪਰਮਾਤਮਾ ਦੇ ਦਰਸ਼ਨ ਕਰਾਂਗੇ, ਤਾਂ ਸਾਡੇ ਮਨ ਵਿਚ ਵਾਸਨਾ ਨਹੀਂ ਆਵੇਗੀ। ਉਨ੍ਹਾਂ ਅੱਗੇ ਦੱਸਿਆ ਕਿ ਨਿਸ਼ਕਾਮ ਭਗਤੀ ਨਾਲ ਲਕਸ਼ਮੀ ਦੀ ਪ੍ਰਾਪਤੀ ਹੁੰਦੀ ਹੈ। ਉਨ੍ਹਾਂ ਸੁਦਾਮਾ ਜੀ ਦੀ ਉਦਾਹਰਨ ਦਿੰਦੇ ਹੋਏ ਕਿਹਾ ਕਿ ਉਨ੍ਹਾਂ ਦੀ ਭਗਤੀ ਨਿਸ਼ਕਾਮ ਸੀ, ਇਸ ਲਈ ਲਕਸ਼ਮੀ ਪਤੀ (ਭਗਵਾਨ ਕ੍ਰਿਸ਼ਨ) ਨੇ ਖੁਦ ਉਨ੍ਹਾਂ ਦੇ ਚਰਨ ਧੋਤੇ। ਮਹਾਰਾਜ ਜੀ ਨੇ ਦੱਸਿਆ ਕਿ ਵੇਦਾਂ ਵਿਚ ਜੀਵਨ ਦੇ ਚਾਰ ਪੁਰਸ਼ਾਰਥ ਦੱਸੇ ਗਏ ਹਨ ਧਰਮ, ਅਰਥ, ਕਾਮ ਅਤੇ ਮੋਕਸ਼। ਇਨ੍ਹਾਂ ਵਿਚ ਸਭ ਤੋਂ ਪਹਿਲਾਂ ਧਰਮ ਦਾ ਨਾਮ ਆਉਂਦਾ ਹੈ ਕਿਉਂਕਿ ਧਰਮ ਦੇ ਬਿਨਾਂ ਜੀਵਨ ਅਧੂਰਾ ਹੈ। ਧਰਮ ਅਵਿਨਾਸ਼ੀ ਹੈ ਧਰਮ ਸਾਥ ਚੱਲਦਾ ਹੈ ਅਤੇ ਧਰਮ ਦੀ ਪਾਲਣਾ ਕਰਨ ਨਾਲ ਲੋਕ-ਪਰਲੋਕ ਦੋਵੇਂ ਹੀ ਸਵਰ ਜਾਂਦੇ ਹਨ। ਬਾਕੀ ਸਭ ਕੁਝ ਇੱਥੇ ਹੀ ਰਹਿ ਜਾਂਦਾ ਹੈ ਪਰ ਧਰਮ ਹਰ ਪ੍ਰਕਾਰ ਨਾਲ ਰੱਖਿਆ ਕਰਦਾ ਹੈ। ਕਥਾ ਦੌਰਾਨ ਭਗਤ ਧਰੁਵ ਦਾ ਪ੍ਰਸੰਗ ਸੁਣਾਉਂਦਿਆਂ ਉਨ੍ਹਾਂ ਕਿਹਾ ਕਿ ਨਾਰਦ ਜੀ ਨੇ ਧਰੁਵ ਨੂੰ ‘‘ਓਮ ਨਮੋ ਭਗਵਤੇ ਵਾਸੁਦੇਵਾਯ’’ ਦਾ ਮੰਤਰ ਦਿੱਤਾ ਅਤੇ ਦ੍ਰਿੜ ਵਿਸ਼ਵਾਸ ਤੇ ਸ਼ਰਧਾ ਨਾਲ ਜਪ-ਤਪ ਕਰਕੇ ਧਰੁਵ ਨੇ ਛੇ ਮਹੀਨਿਆਂ ਵਿਚ ਹੀ ਭਗਵਾਨ ਨੂੰ ਪ੍ਰਾਪਤ ਕਰ ਲਿਆ। ਨਾਰਦ ਜੀ ਨੇ ਧਰੁਵ ਦੀ ਪ੍ਰੀਖਿਆ ਵੀ ਲਈ, ਰਿਧੀਆਂ-ਸਿੱਧੀਆਂ ਵੀ ਆਈਆਂ, ਪਰ ਧਰੁਵ ਆਪਣੇ ਸੰਕਲਪ ਤੋਂ ਵਿਚਲਿਤ ਨਹੀਂ ਹੋਏ ਅਤੇ ਸਫਲਤਾ ਪ੍ਰਾਪਤ ਕੀਤੀ। ਅਖੀਰ ਵਿਚ ਮਹਾਰਾਜ ਜੀ ਨੇ ਸੱਚੀ ਭਗਤੀ ਅਤੇ ਦ੍ਰਿੜ ਸੰਕਲਪ ਲੈ ਕੇ ਪ੍ਰਮਾਤਮਾ ਦੀ ਪ੍ਰਾਪਤੀ ਦਾ ਮਾਰਗ ਦੱਸਿਆ ਅਤੇ ਉਸ ਮਾਰਗ ’ਤੇ ਚੱਲਣ ਦੀ ਪ੍ਰੇਰਨਾ ਦਿੱਤੀ। ਇਸ ਮੌਕੇ ਬ੍ਰਾਹਮਣ ਸਭਾ ਨੇ ਗੁਰਦੇਵ ਦਾ ਸਵਾਗਤ ਕੀਤਾ ਜਿਨ੍ਹਾਂ ਵਿਚ ਪ੍ਰਧਾਨ ਅਸ਼ਵਨੀ ਦੇਵਗਨ, ਹਰੀ ਰਾਮ, ਪ੍ਰੇਮ ਸ਼ਰਮਾ, ਚੇਅਰਮੈਨ ਅਰੁਣ ਮਸ਼ਰਾਲ ਅਤੇ ਸਭਾ ਦੇ ਹੋਰ ਅਹੁਦੇਦਾਰਾਂ ਨੇ ਹਰਿਦੁਆਰ ਤੋਂ ਆਏ ਹੋਏ ਸੰਤਾਂ ਦਾ ਸਵਾਗਤ ਕੀਤਾ।