‘ਆਪ ਦੇ ਆਪਣਿਆਂ’ ਨੇ ਡੀਸੀ ਦੇ ਦਫ਼ਤਰ ਬਾਹਰ ਲਾਇਆ ਧਰਨਾ

ਸਟਾਫ ਰਿਪੋਰਟਰ,ਪੰਜਾਬੀ ਜਾਗਰਣ, ਫਿਰੋਜ਼ਪੁਰ : ਸਥਾਨਕ ਜ਼ਿਲ੍ਹਾ ਪ੍ਰਬੰਧਕੀ ਕੰਪਲੈਕਸ ਵਿਚ ਸੋਮਵਾਰ ਦੁਪਹਿਰ ਸਮੇਂ ਉਸ ਵੇਲੇ ਹੰਗਾਮ ਹੋ ਗਿਆ ਜਦੋਂ ਆਮ ਆਦਮੀ ਪਾਰਟੀ ਦੇ ਸੂਬਾ ਸਕੱਤਰ ਅਤੇ ਡਾਇਰੈਕਟਰ ਐਗਰੀਕਲਚਰ ਸੁਖਰਾਜ ਸਿੰਘ ਗੋਰਾ ਨੇ ਸਥਾਨਕ ਡਿਪਟੀ ਕਮਿਸ਼ਨਰ ਦੀਪਸ਼ਿਖਾ ਸ਼ਰਮਾ ਦੇ ਦਫਤਰ ਦੇ ਬਾਹਰ ਧਰਨ ਲਗਾ ਦਿੱਤਾ। ਸੁਖਰਾਜ ਗੋਰਾ ਦਾ ਦੋਸ਼ ਸੀ ਕਿ ਆਪਣੇ ਹਲਕੇ ਦੇ ਵਰਕਰਾਂ ਦੇ ਕਿਸੇ ਕੰਮ ਲਈ ਜਦੋਂ ਉਹ ਵਧੀਕ ਡਿਪਟੀ ਕਮਿਸ਼ਨਰ ਡਾਕਟਰ ਨਿਧੀ ਕੁਮੰਦ ਬਾਂਬਾ ਦੇ ਦਫਤਰ ਗਏ ਤਾਂ ਉਨ੍ਹਾਂ ਨੂੰ ਜਲੀਲ ਕੀਤਾ ਗਿਆ। ਧਰਨੇ ’ਤੇ ਬੈਠੇ ਸੁਖਰਾਜ ਸਿੰਘ ਗੋਰਾ ਨੇ ਲਾਈਵ ਹੋ ਕੇ ਆਪਣੇ ਸਮਰਥਕਾਂ ਨੂੰ ਡਿਪਟੀ ਕਮਿਸ਼ਨਰ ਦਫਤਰ ਧਰਨੇ ’ਤੇ ਪਹੁੰਚਣ ਲਈ ਵੀ ਆਖਿਆ। ਉਨ੍ਹਾਂ ਦੋਸ਼ ਲਗਾਏ ਕਿ ਉਹ ਅਸਲਾ ਲਾਇਸੰਸਾਂ ਦੇ ਕੰਮ ਲਈ ਜਦੋਂ ਡਿਪਟੀ ਕਮਿਸ਼ਨਰ ਦਫਤਰ ਪਹੁੰਚੇ ਤਾਂ ਡਿਪਟੀ ਕਮਿਸ਼ਨਰ ਦੀਪਸ਼ਿਖਾ ਸ਼ਰਮਾ ਵੱਲੋਂ ਸੁਨੇਹਾ ਮਿਲਿਆ ਕਿ ਉਹ ਮਸਰੂਫ ਹਨ, ਤੁਸੀ ਏਡੀਸੀ ਡਾ. ਨਿਧੀ ਬਾਂਬਾ ਨੂੰ ਮਿਲ ਲਓ। ਗੋਰਾ ਨੇ ਦੋਸ਼ ਲਗਾਏ ਕਿ ਏਡੀਸੀ ਦਾ ਵਿਹਾਰ ਇਸ ਤਰਾਂ ਦਾ ਸੀ ਕੋਈ ਇਜੱਤ ਵਾਲਾ ਬੰਦਾ ਸੁਣ ਵੀ ਨਹੀਂ ਸਕਦਾ, ਇਸ ਲਈ ਮੈਂ ਉਠ ਕੇ ਆ ਗਿਆ, ਹੁਣ ਮੈਂ ਮੁੱਖ ਮੰਤਰੀ ਤੱਕ ਪਹੁੰਚ ਕਰੂੰਗਾ। ਗੋਰਾ ਨੇ ਦੱਸਿਆ ਕਿ ਜਦੋਂ ਉਨ੍ਹਾਂ ਹਲਕਾ ਵਿਧਾਇਕ ਰਜਨੀਸ਼ ਦਹੀਆ ਦੇ ਧਿਆਨ ਵਿਚ ਉਪਰੋਕਤ ਮਾਮਲਾ ਲਿਆਂਦਾ ਤਾਂ ਉਨ੍ਹਾਂ ਡੀਸੀ ਨੂੰ ਮਿਲਣ ਲਈ ਆਖਿਆ, ਪਰ ਉਨ੍ਹਾਂ ਮਿਲਣ ਤੋਂ ਇਨਕਾਰ ਕਰ ਦਿੱਤਾ। ਕਈ ਵਾਰ ਵਰਕਰ ਜਜ਼ਬਾਤੀ ਹੋ ਜਾਂਦੇ ਹਨ : ਵਿਧਾਇਕ ਦਹੀਆ ਇਸ ਸਬੰਧੀ ਫਿਰੋਜ਼ਪੁਰ ਦਿਹਾਤੀ ਦੇ ਵਿਧਾਇਕ ਐਡਵੋਕੇਟ ਰਜਨੀਸ਼ ਦਹੀਆ ਨੇ ਦੱਸਿਆ ਕਿ ਕਈ ਵਾਰ ਵਰਕਰ ਜਜ਼ਬਾਤੀ ਹੋ ਜਾਂਦੇ ਹਨ। ਅਧਿਕਾਰੀਆਂ ਨੂੰ ਕਈ ਵਾਰ ਕੰਮ ਕਰਨ ਲਈ ਮਜਬੂਰ ਕੀਤਾ ਜਾਂਦਾ ਹੈ। ਪ੍ਰਸ਼ਾਸਨ ਆਪਣਾ ਕੰਮ ਪੂਰੀ ਤਰ੍ਹਾਂ ਕਰ ਰਿਹਾ ਹੈ। ਇਹ ਇੱਕ ਚੋਣ ਸਾਲ ਹੈ ਅਤੇ ਅਧਿਕਾਰੀਆਂ ਨੂੰ ਅਕਸਰ ਬਹੁਤ ਸਾਰੀਆਂ ਵੀਡੀਓ ਕਾਨਫਰੰਸਾਂ ਵੀ ਕਰਨੀਆਂ ਹੁੰਦੀਆਂ ਹਨ। ਮੁੱਖ ਮੰਤਰੀ ਨੇ ਸਾਰਿਆਂ ਨੂੰ ਅਧਿਕਾਰੀਆਂ ਨਾਲ ਤਾਲਮੇਲ ਬਣਾਈ ਰੱਖਣ ਦੀ ਸਲਾਹ ਦਿੱਤੀ ਹੈ। ਸੁਖਰਾਜ ਗੌਰਾ ਜਨਤਾ ਦੇ ਪ੍ਰਤੀਨਿਧੀ, ਉਨ੍ਹਾਂ ਨਾਲ ਕੋਈ ਦੁਰਵਿਵਹਾਰ ਨਹੀਂ ਕੀਤਾ : ਏਡੀਸੀ ਦੂਜੇ ਪਾਸੇ ਏਡੀਸੀ ਡਾ. ਨਿਧੀ ਬਾਂਬਾ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਪਤਾ ਹੈ ਕਿ ਸੁਖਰਾਜ ਗੋਰਾ ਜਨਤਾ ਦੇ ਪ੍ਰਤੀਨਿਧੀ ਹਨ। ਉਨ੍ਹਾਂ ਨੇ ਗੋਰਾ ਨਾਲ ਕਿਸੇ ਤਰਾਂ ਦਾ ਦੁਰਵਿਹਾਰ ਨਹੀਂ ਕੀਤਾ ਹੈ। ਉਨ੍ਹਾਂ ਦੱਸਿਆ ਕਿ 15 ਦਿਨ ਪਹਿਲੋਂ ਵੀ ਉਹ ਅਸਲਾ ਲਾਈਸੰਸ ਲਈ ਉਨ੍ਹਾਂ ਦੇ ਦਫਤਰ ਆਏ ਸਨ। ਸੋਮਵਾਰ ਨੂੰ ਫਿਰ ਆਏ ਅਤੇ ਖੜੇ ਪੈਰ ਅਸਲਾ ਫਾਈਲ ਮੰਗਵਾ ਕੇ ਦਸਤਖਤ ਕਰਨ ਲਈ ਆਖਣ ਲੱਗੇ। ਇਸ ’ਤੇ ਜਦੋਂ ਉਨ੍ਹਾਂ ਅਸਲਾ ਲਾਇਸੰਸ ਦੀ ਪ੍ਰਕ੍ਰਿਰਿਆ ਸਮਝਾਈ ਤਾਂ ਸ਼ਾਇਦ ਉਨ੍ਹਾਂ ਨੂੰ ਸਮਝ ਨਹੀਂ ਲੱਗੀ। ਉਨ੍ਹਾਂ ਆਖਿਆ ਕਿ ਉਨ੍ਹਾਂ ਗੋਰਾ ਨੂੰ ਲੋਕਾਂ ਦੀ ਸਿਫਾਰਸ਼ ਕਰਨ ਤੋਂ ਮਨ੍ਹਾ ਕੀਤਾ ਸੀ।