ਰੇਤੇ ਵਾਲੀ ਭੈਣੀ ’ਚ ਮੁਫ਼ਤ ਸਿਲਾਈ ਕੇਂਦਰ ਖੋਲਿਆ

ਪੱਤਰ ਪ੍ਰੇਰਕ.ਪੰਜਾਬੀ ਜਾਗਰਣ, ਫਾਜ਼ਿਲਕਾ : ਟੀਮ ਪੂਜਾ ਲੂਥਰਾ ਵੱਲੋਂ ਪਿੰਡ ਰੇਤੇ ਵਾਲੀ ਭੈਣੀ ਵਿੱਚ ਇੱਕ ਮੁਫ਼ਤ ਸਿਲਾਈ ਕੇਂਦਰ ਖੋਲ੍ਹਿਆ ਗਿਆ। ਇਸ ਮੌਕੇ ਪੂਜਾ ਲੂਥਰਾ ਨੇ ਦੱਸਿਆ ਕਿ ਸਿਲਾਈ ਕੇਂਦਰ ਖੋਲ੍ਹਣ ਦਾ ਮੁੱਖ ਉਦੇਸ਼ ਹਲਕੇ ਦੀਆਂ ਔਰਤਾਂ ਅਤੇ ਕੁੜੀਆਂ ਨੂੰ ਸਿਲਾਈ ਅਤੇ ਕਢਾਈ ਵਿੱਚ ਮੁਫ਼ਤ ਸਿਖਲਾਈ ਦੇ ਕੇ ਸਸ਼ਕਤ ਬਣਾਉਣਾ ਸੀ। ਉਨ੍ਹਾਂ ਦੱਸਿਆ ਕਿ ਸੁਸਾਇਟੀ ਪਹਿਲਾਂ ਬਾਂਡੀਵਾਲਾ, ਸਾਬੂਆਣਾ ਤੇ ਹਲਕੇ ਦੇ ਵੱਖ-ਵੱਖ ਹੋਰ ਵਾਰਡਾਂ ਵਿੱਚ ਮੁਫ਼ਤ ਸਿਖਲਾਈ ਪ੍ਰਦਾਨ ਕਰ ਚੁੱਕੀ ਹੈ। ਸਿਖਲਾਈ ਪੂਰੀ ਹੋਣ ਤੋਂ ਬਾਅਦ, ਸੁਸਾਇਟੀ ਸਾਰੇ ਸਿਖਿਆਰਥੀਆਂ ਨੂੰ ਸਰਟੀਫਿਕੇਟ ਵੀ ਪ੍ਰਦਾਨ ਕਰੇਗੀ, ਜੋ ਭਵਿੱਖ ਵਿੱਚ ਰੁਜ਼ਗਾਰ ਲੱਭਣ ਜਾਂ ਆਪਣਾ ਕਾਰੋਬਾਰ ਸ਼ੁਰੂ ਕਰਨ ਵਿੱਚ ਉਨ੍ਹਾਂ ਦੀ ਮਦਦ ਕਰੇਗੀ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਸੁਸਾਇਟੀ ਸਿਖਲਾਈ ਅਧਿਆਪਕ ਦੀ ਤਨਖਾਹ ਅਤੇ ਕੇਂਦਰ ਨਾਲ ਜੁੜੇ ਹੋਰ ਸਾਰੇ ਖਰਚੇ ਸਹਿਣ ਕਰੇਗੀ। ਸੰਦੀਪ ਕੌਰ ਨੂੰ ਇਸ ਸਿਲਾਈ ਕੇਂਦਰ ਦਾ ਇੰਚਾਰਜ ਨਿਯੁਕਤ ਕੀਤਾ ਗਿਆ ਹੈ। ਸੁਸਾਇਟੀ ਦੇ ਸਕੱਤਰ ਸੁਭਾਸ਼ ਕੰਬੋਜ ਨੇ ਕਿਹਾ ਕਿ ਸੁਸਾਇਟੀ ਦਾ ਮੁੱਖ ਟੀਚਾ ਔਰਤਾਂ ਨੂੰ ਸਸ਼ਕਤ ਬਣਾਉਣਾ ਹੈ।