ਵਿਧਾਇਕ ਸਵਨਾ ਨੇ ਨਵੇਂ ਬੱਸ ਸਟੈਂਡ ਦਾ ਮੁੱਦਾ ਵਿਧਾਨ ਸਭਾ ’ਚ ਚੁੱਕਿਆ

ਰਿਤਿਸ਼ ਕੁੱਕੜ, ਪੰਜਾਬੀ ਜਾਗਰਣ,ਫਾਜ਼ਿਲਕਾ: ਸ਼ਹਿਰ ਦੇ ਨਵੇਂ ਬੱਸ ਸਟੈਂਡ ਦਾ ਮੁੱਦਾ ਵਿਧਾਨ ਸਭਾ ਵਿੱਚ ਉਸ ਸਮੇਂ ਫਿਰ ਉੱਭਰਿਆ ਜਦੋਂ ਸਥਾਨਕ ਵਿਧਾਇਕ ਨੇ ਮੰਤਰੀ ਤੋਂ ਇਸਦੀ ਅਧੂਰੀ ਉਸਾਰੀ ਬਾਰੇ ਜਵਾਬ ਮੰਗੇ। ਟਰਾਂਸਪੋਰਟ ਮੰਤਰੀ ਨੇ ਸਪੱਸ਼ਟ ਕੀਤਾ ਕਿ ਕਾਂਗਰਸ ਸਰਕਾਰ ਦੇ ਕਾਰਜਕਾਲ ਦੌਰਾਨ ਨਵੇਂ ਬੱਸ ਸਟੈਂਡ ਲਈ ਕੋਈ ਵਿਭਾਗੀ ਪ੍ਰਵਾਨਗੀ ਨਹੀਂ ਲਈ ਗਈ ਸੀ।

ਫਾਜ਼ਿਲਕਾ ਵਿੱਚ ਆਧੁਨਿਕ ਬੱਸ ਸਟੈਂਡ ਦੀ ਉਸਾਰੀ 2016 ’ਚ ਸ਼ੁਰੂ ਹੋਈ ਸੀ, ਪਰ ਅਦਾਲਤੀ ਵਿਵਾਦਾਂ ਅਤੇ ਕੋਵਿਡ-19 ਮਹਾਂਮਾਰੀ ਕਾਰਨ ਇਹ ਪ੍ਰੋਜੈਕਟ ਲਟਕਿਆ ਰਿਹਾ।ਵਿਧਾਇਕ ਨਰਿੰਦਰਪਾਲ ਸਾਵਣਾ ਨੇ ਵਿਧਾਨ ਸਭਾ ਵਿੱਚ ਬੱਸ ਸਟੈਂਡ ਦਾ ਮੁੱਦਾ ਉਠਾਉਂਦੇ ਹੋਏ ਕਿਹਾ ਇਹ ਨਿਰਮਾਣ 2021 ਵਿੱਚ ਲਗਭਗ ਪੰਜ ਕਰੋੜ ਰੁਪਏ ਦੀ ਲਾਗਤ ਨਾਲ ਪੂਰਾ ਹੋਇਆ ਸੀ ਅਤੇ ਉਨ੍ਹਾ ਕਿਹਾ ਕਿ ਇਸਦਾ ਉਦਘਾਟਨ ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਨੇ ਕੀਤਾ ਸੀ, ਪਰ ਉੱਥੋਂ ਇੱਕ ਵੀ ਬੱਸ ਨਹੀਂ ਚੱਲੀ।

ਟਰਾਂਸਪੋਰਟ ਮੰਤਰੀ ਨੇ ਕਿਹਾ ਕਿ ਬੱਸ ਸਟੈਂਡ ਬਿਨਾਂ ਪ੍ਰਵਾਨਗੀ ਦੇ ਬਣਾਇਆ ਗਿਆ ਸੀ, ਜਦੋਂ ਕਿ ਵਿਧਾਇਕ ਨੇ ਕਿਹਾ ਕਿ ਇਮਾਰਤ ਨੂੰ ਹੋਰ ਉਦੇਸ਼ਾਂ ਲਈ ਵਰਤਿਆ ਜਾਣਾ ਚਾਹੀਦਾ ਹੈ। ਨਵਾਂ ਬੱਸ ਸਟੈਂਡ ਉਸ ਜਗ੍ਹਾ ’ਤੇ ਬਣਾਇਆ ਗਿਆ ਹੈ ਜਿੱਥੇ ਪਹਿਲਾਂ ਚੌਧਰੀ ਕਾਸ਼ੀ ਰਾਮ ਪੈਲੇਸ ਸੀ। ਇਹ ਪੈਲੇਸ ਗਰੀਬ ਅਤੇ ਲੋੜਵੰਦ ਪਰਿਵਾਰਾਂ ਲਈ ਘੱਟ ਕੀਮਤ ਵਾਲੇ ਵਿਆਹ ਸਮਾਰੋਹ ਕਰਵਾਉਂਦਾ ਸੀ, ਪਰ ਪਿਛਲੀ ਸਰਕਾਰ ਨੇ ਇਸਨੂੰ ਢਾਹ ਕੇ ਬੱਸ ਸਟੈਂਡ ਬਣਾਇਆ, ਅਤੇ ਇਹ ਇਮਾਰਤ ਚਾਰ ਸਾਲਾਂ ਤੋਂ ਵਿਹਲੀ ਪਈ ਹੈ।

ਇਸ ਦਾ ਜਵਾਬ ਦਿੰਦੇ ਹੋਏ, ਟਰਾਂਸਪੋਰਟ ਮੰਤਰੀ ਲਾਲਜੀਤ ਸਿੰਘ ਭੁੱਲਰ ਨੇ ਕਿਹਾ ਕਿ ਬੱਸ ਸਟੈਂਡ ਟਰਾਂਸਪੋਰਟ ਵਿਭਾਗ ਦੀ ਪ੍ਰਵਾਨਗੀ ਤੋਂ ਬਿਨਾਂ ਬਣਾਇਆ ਗਿਆ ਸੀ। ਟਰਾਂਸਪੋਰਟ ਵਿਭਾਗ ਦੀ ਕਰੋੜਾਂ ਦੀ ਜਾਇਦਾਦ, ਜਿਸ ’ਚ ਇੱਕ ਵਰਕਸ਼ਾਪ, ਪੈਟਰੋਲ ਪੰਪ, ਕੈਸ਼ ਬ੍ਰਾਂਚ ਅਤੇ ਸਪੇਅਰ ਪਾਰਟਸ ਸਟੋਰ ਸ਼ਾਮਲ ਹਨ, ਪੁਰਾਣੇ ਬੱਸ ਸਟੈਂਡ 'ਤੇ ਸਥਿਤ ਹਨ। ਹਾਲਾਂਕਿ, ਨਵੇਂ ਬੱਸ ਸਟੈਂਡ ਵਿੱਚ ਵਰਕਸ਼ਾਪ, ਪੈਟਰੋਲ ਪੰਪ, ਕੈਸ਼ ਬ੍ਰਾਂਚ ਅਤੇ ਸਪੇਅਰ ਪਾਰਟਸ ਸਟੋਰ ਦੀ ਘਾਟ ਹੈ। ਜੇਕਰ ਬੱਸ ਸਟੈਂਡ ਨੂੰ ਨਵੀਂ ਜਗ੍ਹਾ 'ਤੇ ਸ਼ਿਫਟ ਕੀਤਾ ਜਾਂਦਾ ਹੈ, ਤਾਂ ਬੱਸਾਂ ਨੂੰ ਈਂਧਨ ਭਰਨ ਲਈ ਰੋਜ਼ਾਨਾ ਪੁਰਾਣੇ ਬੱਸ ਸਟੈਂਡ ਜਾਣਾ ਪਵੇਗਾ। ਵਰਤਮਾਨ ਵਿੱਚ, ਸਰਕਾਰੀ ਬੱਸਾਂ ਨੂੰ ਕੋਈ ਪਾਰਕਿੰਗ ਫੀਸ ਨਹੀਂ ਦੇਣੀ ਪੈਂਦੀ, ਪਰ ਨਵੇਂ ਬੱਸ ਸਟੈਂਡ ’ਤੇ ਜਾਣ ਨਾਲ ਵੀ ਫੀਸਾਂ ਲੱਗਣਗੀਆਂ, ਜਿਸਦੇ ਨਤੀਜੇ ਵਜੋਂ ਵਿਭਾਗ ਨੂੰ ਲੱਖਾਂ ਰੁਪਏ ਦਾ ਨੁਕਸਾਨ ਹੋਵੇਗਾ। ਵਿਧਾਇਕ ਸਵਨਾ ਨੇ ਪ੍ਰਵਾਨਗੀ ਦੀ ਉੱਚ ਪੱਧਰੀ ਜਾਂਚ ਦੀ ਮੰਗ ਕੀਤੀ।

ਉਨ੍ਹਾਂ ਇਹ ਵੀ ਸੁਝਾਅ ਦਿੱਤਾ ਕਿ ਜੇਕਰ ਬੱਸ ਸਟੈਂਡ ਕੰਮ ਨਹੀਂ ਕਰ ਸਕਦਾ, ਤਾਂ ਇਮਾਰਤ ਕਿਸੇ ਹੋਰ ਜਨਤਕ ਜਾਂ ਸਰਕਾਰੀ ਉਦੇਸ਼ ਲਈ ਵਰਤੀ ਜਾਣੀ ਚਾਹੀਦੀ ਹੈ ਤਾਂ ਜੋ ਜਨਤਕ ਪੈਸਾ ਬਰਬਾਦ ਨਾ ਹੋਵੇ, ਜਿਸ 'ਤੇ ਟਰਾਂਸਪੋਰਟ ਮੰਤਰੀ ਨੇ ਇਸ ’ਤੇ ਜਲਦੀ ਹੀ ਵਿਚਾਰ ਕਰਨ ਦਾ ਵਾਅਦਾ ਕੀਤਾ।

ਕੌਂਸਲ ਚੇਅਰਮੈਨ ਅਧਿਕਾਰੀਆਂ ਤੋਂ ਰਿਪੋਰਟ ਮੰਗਣਗੇ

ਸ਼ਹਿਰ ਕੌਂਸਲ ਦੇ ਚੇਅਰਮੈਨ ਐਡਵੋਕੇਟ ਸੁਰੇਂਦਰ ਸਚਦੇਵਾ ਨੇ ਕਿਹਾ ਕਿ ਨਵੇਂ ਬੱਸ ਸਟੈਂਡ ਦੀ ਉਸਾਰੀ ਸ਼ੁਰੂ ਕਰਨ ਦੀ ਪ੍ਰਕਿਰਿਆ ਉਨ੍ਹਾਂ ਦੇ ਅਹੁਦਾ ਸੰਭਾਲਣ ਤੋਂ ਪਹਿਲਾਂ ਹੀ ਸ਼ੁਰੂ ਹੋ ਗਈ ਸੀ। ਬੱਸ ਸਟੈਂਡ ਦੀ ਉਸਾਰੀ ਦੇ ਮੁਕੰਮਲ ਹੋਣ ਨਾਲ ਸਬੰਧਤ ਫੈਸਲਿਆਂ, ਤਰੀਕਾਂ ਅਤੇ ਪ੍ਰਕਿਰਿਆਵਾਂ ਬਾਰੇ ਵਿਸਤ੍ਰਿਤ ਜਾਣਕਾਰੀ ਰਿਕਾਰਡਾਂ ਦੀ ਸਮੀਖਿਆ ਕਰਨ ਤੋਂ ਬਾਅਦ ਹੀ ਉਪਲਬਧ ਹੋਵੇਗੀ। ਚੇਅਰਮੈਨ ਨੇ ਕਿਹਾ ਕਿ ਉਹ ਅਧਿਕਾਰੀਆਂ ਤੋਂ ਪੂਰੀ ਰਿਪੋਰਟ ਮੰਗਣ ਤੋਂ ਬਾਅਦ ਹੀ ਤੱਥਾਂ ਨੂੰ ਸਪੱਸ਼ਟ ਤੌਰ ’ਤੇ ਦੱਸ ਸਕਣਗੇ।