ਕੰਬਾਈਨ ਤੋਂ ਡਿੱਗਣ ਨਾਲ ਵਿਅਕਤੀ ਦੀ ਮੌਤ

ਰਿਤਿਸ਼ ਕੁੱਕੜ.ਪੰਜਾਬੀ ਜਾਗਰਣ ਫਾਜ਼ਿਲਕਾ : ਪਿੰਡ ਕਬੂਲਸ਼ਾਹ ਖੁੱਬਣ ਦੇ ਵਸਨੀਕ ਸਰਪੰਚ ਬਲਵੀਰ ਸਿੰਘ ਨੇ ਦੱਸਿਆ ਕਿ ਪਿੰਡ ਦਾ ਇੱਕ ਪਰਿਵਾਰ ਕੰਬਾਈਨ ਨਾਲ ਕਣਕ ਦੀ ਵਾਢੀ ਕਰ ਰਿਹਾ ਸੀ। ਜਦੋਂ ਕੰਬਾਈਨ ਡਰਾਈਵਰ ਨੇ ਦੂਜੇ ਖੇਤ ਵੱਲ ਜਾਣ ਦਾ ਰਸਤਾ ਪੁੱਛਿਆ ਤਾਂ ਖੇਤ ਮਾਲਕ ਨੇ ਗੁਰਮੇਜ ਸਿੰਘ ਜੋ ਕਿ ਉਸਦੇ ਖੇਤ ਵਿੱਚ ਕੰਮ ਕਰ ਰਿਹਾ ਸੀ ਉਸਨੂੰ ਕੰਬਾਈਨ ਤੇ ਆਪਣੇ ਨਾਲ ਬਿਠਾਇਆ। ਉਸਨੇ ਦੋਸ਼ ਲਗਾਇਆ ਕਿ ਜਦੋਂ ਉਹ ਦੂਜੇ ਖੇਤ ਵੱਲ ਜਾ ਰਹੇ ਸਨ, ਤਾਂ ਕੰਬਾਈਨ ਡਰਾਈਵਰ ਅਤੇ ਉਸਦੇ ਸਾਥੀ ਵਿਚਕਾਰ ਬਹਿਸ ਹੋ ਗਈ। ਦੋਵੇਂ ਆਦਮੀਆਂ ਵਿੱਚ ਲੜਾਈ ਸ਼ੁਰੂ ਹੋ ਗਈ ਅਤੇ ਜਦੋਂ ਗੁਰਮੇਜ ਨੇ ਉਨ੍ਹਾਂ ਨੂੰ ਵੱਖ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਨ੍ਹਾਂ ਆਦਮੀਆਂ ਨੇ ਉਸਨੂੰ ਚੱਲਦੀ ਕੰਬਾਈਨ ਤੋਂ ਧੱਕਾ ਦੇ ਦਿੱਤਾ। ਉਹ ਕੰਬਾਈਨ ਤੋਂ ਡਿੱਗ ਪਿਆ ਅਤੇ ਇਸਦੇ ਟਾਇਰਾਂ ਹੇਠ ਕੁਚਲਣ ਤੋਂ ਬਾਅਦ ਉਸਦੀ ਮੌਤ ਹੋ ਗਈ। ਕੰਬਾਈਨ ਡਰਾਈਵਰ ਅਤੇ ਉਸਦਾ ਸਾਥੀ ਘਟਨਾ ਤੋਂ ਬਾਅਦ ਮੌਕੇ ਤੋਂ ਭੱਜ ਗਏ। ਮ੍ਰਿਤਕ ਦੇ ਪੁੱਤਰ ਸੁਰਜੀਤ ਸਿੰਘ ਨੇ ਮੁਲਜ਼ਮ ਦੀ ਗ੍ਰਿਫ਼ਤਾਰੀ ਦੀ ਮੰਗ ਕੀਤੀ ਹੈ। ਪੁਲਿਸ ਨੇ ਕਿਹਾ ਕਿ ਪਰਿਵਾਰਕ ਮੈਂਬਰਾਂ ਦੇ ਬਿਆਨਾਂ ਦੇ ਆਧਾਰ ਤੇ ਮਾਮਲੇ ਦੀ ਜਾਂਚ ਤੋਂ ਬਾਅਦ ਢੁਕਵੀਂ ਕਾਰਵਾਈ ਕੀਤੀ ਜਾਵੇਗੀ।