ਫਾਜ਼ਿਲਕਾ ਨਗਰ ਕੌਂਸਲ ਚੋਣਾਂ : ਰਾਖਵੇਂਕਰਨ ਨੇ ਬਦਲੇ ਸਮੀਕਰਨ, ਆਗੂਆਂ ਦੀਆਂ ਧੜਕਣਾਂ ਤੇਜ਼

- ਨਵੀਂ ਰਾਖਵਾਂਕਰਨ ਸੂਚੀ ਨੇ ਬਦਲੇ ਚੋਣ ਸਮੀਕਰਨ, ਮੌਜੂਦਾ ਕੌਂਸਲਰਾਂ ਅਤੇ ਉਮੀਦਵਾਰਾਂ ਦੀਆਂ ਰਣਨੀਤੀਆਂ ਹੋਈਆਂ ਨੇ ਪ੍ਰਭਾਵਿਤ

- ਰਾਜਨੀਤਿਕ ਪਾਰਟੀਆਂ ਆਪਣੇ ਉਮੀਦਵਾਰਾਂ ’ਤੇ ਮੁੜ ਵਿਚਾਰ ਕਰ ਰਹੀਆਂ

ਰਿਤਿਸ਼ ਕੁੱਕੜ, ਪੰਜਾਬੀ ਜਾਗਰਣ

ਫਾਜ਼ਿਲਕਾ : ਪੰਜਾਬ ਵਿੱਚ ਨਗਰ ਕੌਂਸਲ ਚੋਣਾਂ ਦਾ ਅਧਿਕਾਰਤ ਐਲਾਨ ਭਾਵੇਂ ਅਜੇ ਨਹੀਂ ਹੋਇਆ, ਪਰ ਫਾਜ਼ਿਲਕਾ ਵਿੱਚ ਚੋਣੀ ਸਰਗਰਮੀਆਂ ਹੁਣੇ ਤੋਂ ਹੀ ਚਰਮ ’ਤੇ ਪਹੁੰਚ ਗਈਆਂ ਹਨ। ਇਸ ਵਾਰ ਚੋਣ ਮਾਹੌਲ ਨੂੰ ਗਰਮਾਉਣ ਦਾ ਸਭ ਤੋਂ ਵੱਡਾ ਕਾਰਨ ਚੋਣ ਕਮਿਸ਼ਨ ਵੱਲੋਂ ਜਾਰੀ ਕੀਤੀ ਨਵੀਂ ਰਾਖਵੇਂਕਰਨ ਸੂਚੀ ਹੈ, ਜਿਸ ਨੇ ਸਿਆਸੀ ਸਮੀਕਰਨ ਪੂਰੀ ਤਰ੍ਹਾਂ ਬਦਲ ਕੇ ਰੱਖ ਦਿੱਤੇ ਹਨ। 25 ਵਾਰਡਾਂ ਵਾਲੀ ਫਾਜ਼ਿਲਕਾ ਨਗਰ ਕੌਂਸਲ ਵਿੱਚ ਇਸ ਵਾਰ ਕਈ ਵਾਰਡਾਂ ਦੀ ਰਾਖਵੇਂ ਸ਼੍ਰੇਣੀ ਬਦਲ ਦਿੱਤੀ ਗਈ ਹੈ। ਇਸ ਨਾਲ ਉਹ ਮੌਜੂਦਾ ਕੌਂਸਲਰ ਅਤੇ ਦਾਅਵੇਦਾਰ ਸਭ ਤੋਂ ਵੱਧ ਪ੍ਰਭਾਵਿਤ ਹੋਏ ਹਨ, ਜੋ ਪਿਛਲੇ ਇੱਕ ਸਾਲ ਤੋਂ ਆਪਣੇ-ਆਪਣੇ ਵਾਰਡਾਂ ਵਿੱਚ ਤਿਆਰੀ ਕਰ ਰਹੇ ਸਨ। ਹੁਣ ਨਵੀਂ ਸਥਿਤੀ ਵਿੱਚ ਕਈ ਆਗੂਆਂ ਨੂੰ ਆਪਣੀਆਂ ਯੋਜਨਾਵਾਂ ਬਦਲਣੀਆਂ ਪੈ ਰਹੀਆਂ ਹਨ। ਇਸ ਤੋਂ ਪਹਿਲਾਂ ਨਗਰ ਕੌਂਸਲ ਦੇ ਨਵੇਂ ਵਾਰਡ ਸੀਮਾਕਰਨ ਨੂੰ ਲੈ ਕੇ ਵੀ ਵਿਵਾਦ ਬਣਿਆ ਸੀ। ਉਸ ਵੇਲੇ ਕਾਂਗਰਸ ਬੋਰਡ ਨੇ ਇਸ ਦਾ ਵਿਰੋਧ ਕਰਦਿਆਂ ਮਤਾ ਪਾਸ ਕੀਤਾ ਸੀ ਅਤੇ ਮਾਮਲਾ ਹਾਈ ਕੋਰਟ ਤੱਕ ਪਹੁੰਚ ਗਿਆ ਸੀ। ਬਾਅਦ ਵਿੱਚ ਰਾਜ ਸਰਕਾਰ ਨੇ ਨੋਟੀਫਿਕੇਸ਼ਨ ਵਾਪਸ ਲੈ ਲਿਆ। ਹਾਲਾਂਕਿ ਹੱਦਬੰਦੀ ਲਾਗੂ ਨਹੀਂ ਹੋਈ, ਪਰ ਹੁਣ ਨਵੀਂ ਰਾਖਵੇਂਕਰਨ ਸੂਚੀ ਨੇ ਸਿਆਸੀ ਹਾਲਾਤ ਬਦਲ ਦਿੱਤੇ ਹਨ। ਨਵੀਂ ਰਾਖਵੇਂ ਸੂਚੀ ਕਾਰਨ ਕਈ ਮੌਜੂਦਾ ਕੌਂਸਲਰ ਆਪਣੇ ਪੁਰਾਣੇ ਵਾਰਡਾਂ ਤੋਂ ਚੋਣ ਨਹੀਂ ਲੜ ਸਕਣਗੇ। ਇਸ ਕਰਕੇ ਕਈ ਆਗੂ ਹੁਣ ਹੋਰ ਵਾਰਡਾਂ ਵਿੱਚ ਆਪਣਾ ਆਧਾਰ ਬਣਾਉਣ ਅਤੇ ਟਿਕਟ ਲਈ ਲਾਬੀ ਕਰਨ ਵਿੱਚ ਜੁਟੇ ਹੋਏ ਹਨ। ਉੱਥੇ ਹੀ ਵੋਟਰ ਸੂਚੀ ਸੋਧਾਂ ’ਤੇ ਇਤਰਾਜ਼ ਦਰਜ ਕਰਨ ਦੀ ਪ੍ਰਕਿਰਿਆ ਵੀ ਜਾਰੀ ਹੈ।

ਪਾਰਟੀਆਂ ’ਚ ਮੰਥਨ ਜਾਰੀ : ਕਾਂਗਰਸ, ਆਮ ਆਦਮੀ ਪਾਰਟੀ, ਭਾਜਪਾ ਅਤੇ ਅਕਾਲੀ ਦਲ ਸਾਰੇ ਆਪਣੇ-ਆਪਣੇ ਪੱਧਰ ’ਤੇ ਗਣਿਤ ਜੋੜਨ ਵਿੱਚ ਲੱਗੇ ਹੋਏ ਹਨ। ਹਰ ਪਾਰਟੀ ਇਸ ਗੱਲ ’ਤੇ ਵਿਚਾਰ ਕਰ ਰਹੀ ਹੈ ਕਿ ਕਿਸ ਵਾਰਡ ਵਿੱਚ ਕਿਹੜੇ ਉਮੀਦਵਾਰ ਨੂੰ ਮੈਦਾਨ ਵਿੱਚ ਉਤਾਰਿਆ ਜਾਵੇ। ਨਵੀਂ ਸੂਚੀ ਅਨੁਸਾਰ ਤਿੰਨ ਵਾਰਡ ਅਨੁਸੂਚਿਤ ਜਾਤੀਆਂ ਲਈ, ਚਾਰ ਅਨੁਸੂਚਿਤ ਜਾਤੀ ਮਹਿਲਾਵਾਂ ਲਈ, ਇੱਕ ਵਾਰਡ ਪਿੱਛੜੀਆਂ ਸ਼੍ਰੇਣੀਆਂ ਲਈ, ਅੱਠ ਵਾਰਡ ਜਨਰਲ ਔਰਤਾਂ ਲਈ ਅਤੇ ਨੌਂ ਵਾਰਡ ਜਨਰਲ ਸ਼੍ਰੇਣੀ ਲਈ ਰਾਖਵੇਂ ਰੱਖੇ ਗਏ ਹਨ।

ਦਿਲਚਸਪ ਹੋਵੇਗੀ ਇਸ ਵਾਰ ਦੀ ਟੱਕਰ : ਸਿਆਸੀ ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਵਾਰ ਨਗਰ ਕੌਂਸਲ ਚੋਣਾਂ ਪਹਿਲਾਂ ਨਾਲੋਂ ਕਾਫੀ ਜ਼ਿਆਦਾ ਦਿਲਚਸਪ ਅਤੇ ਗੁੰਝਲਦਾਰ ਰਹਿਣਗੀਆਂ। ਨਵੇਂ ਚਿਹਰੇ, ਨਵੀਆਂ ਰਣਨੀਤੀਆਂ ਅਤੇ ਬਦਲੇ ਹੋਏ ਸਮੀਕਰਨ ਚੋਣੀ ਮੁਕਾਬਲੇ ਨੂੰ ਰੋਮਾਂਚਕ ਬਣਾਉਣਗੇ।

-----

2021 ਵਿੱਚ ਵਾਰਡ ਦੀ ਸਥਿਤੀ

ਵਾਰਡ ਨੰ. 1 : ਜਨਰਲ ਔਰਤਾਂ

ਵਾਰਡ ਨੰ. 2 : ਜਨਰਲ

ਵਾਰਡ ਨੰ. 3 : ਜਨਰਲ ਔਰਤਾਂ

ਵਾਰਡ ਨੰ. 4 : ਜਨਰਲ

ਵਾਰਡ ਨੰ. 5 : ਜਨਰਲ ਔਰਤਾਂ

ਵਾਰਡ ਨੰ. 6 : ਜਨਰਲ

ਵਾਰਡ ਨੰ. 7 : ਐੱਸਸੀ ਔਰਤਾਂ

ਵਾਰਡ ਨੰ. 8 : ਐੱਸਸੀ

ਵਾਰਡ ਨੰ. 9 : ਜਨਰਲ ਔਰਤਾਂ

ਵਾਰਡ ਨੰ. 10 : ਜਨਰਲ

ਵਾਰਡ ਨੰ. 11 : ਐੱਸਸੀ ਔਰਤਾਂ

ਵਾਰਡ ਨੰ. 12 : ਜਨਰਲ

ਵਾਰਡ ਨੰ. 13 : ਬੀਸੀ

ਵਾਰਡ ਨੰ. 14 : ਐੱਸਸੀ

ਵਾਰਡ ਨੰ. 15 : ਜਨਰਲ ਔਰਤਾਂ

ਵਾਰਡ ਨੰ. 16 : ਐੱਸਸੀ

ਵਾਰਡ ਨੰ. 17 : ਜਨਰਲ ਔਰਤਾਂ

ਵਾਰਡ ਨੰ. 18 : ਐੱਸਸੀ

ਵਾਰਡ ਨੰ. 19 : ਐੱਸਸੀ ਔਰਤਾਂ

ਵਾਰਡ ਨੰ. 20 : ਜਨਰਲ

ਵਾਰਡ ਨੰ. 21 : ਜਨਰਲ ਔਰਤਾਂ

ਵਾਰਡ ਨੰ. 22 : ਜਨਰਲ

ਵਾਰਡ ਨੰ. 23 : ਜਨਰਲ ਔਰਤਾਂ

ਵਾਰਡ ਨੰ. 24 : ਜਨਰਲ

ਵਾਰਡ ਨੰ. 25 : ਜਨਰਲ ਔਰਤਾਂ

-----

- 2026 ਦੀ ਰਾਖਵੇਂ ਸਥਿਤੀ

ਐੱਸਸੀ ਲਈ ਵਾਰਡ : 1, 5, 9

ਐੱਸਸੀ ਮਹਿਲਾ ਲਈ ਵਾਰਡ : 12, 21, 23, 25

ਬੀਸੀ ਲਈ ਵਾਰਡ : 15

ਜਨਰਲ ਮਹਿਲਾ ਲਈ ਵਾਰਡ : 2, 4, 6, 8, 10, 14, 16, 18

ਜਨਰਲ ਲਈ ਵਾਰਡ : 3, 7, 11, 13, 17, 19, 20, 22, 24