ਮੁੱਖ ਮੰਤਰੀ ਦੀ ਦਰਿਆਦਿਲੀ: ਰੈਲੀ ਲਈ ਲੰਗਰ ਤਿਆਰ ਕਰਨ ਵਾਲੀ ਮਾਤਾ ਦਾ ਕੀਤਾ ਧੰਨਵਾਦ, ਪਿੰਡ ਹਰੀਏਵਾਲਾ ਦੀ ਬਦਲੇਗੀ ਨੁਹਾਰ

ਜ਼ਿਕਰਯੋਗ ਹੈ ਕਿ ਪਿਛਲੇ ਹਫ਼ਤੇ ਆਮ ਆਦਮੀ ਪਾਰਟੀ ਦੀ ਫ਼ਤਹਿਗੜ੍ਹ ਸਾਹਿਬ ਵਿਖੇ ਰੈਲੀ ਸੀ। ਜਿਸ ਵਿੱਚ ਵਰਕਰਾਂ ਨੂੰ ਲਿਜਾਣ ਲਈ ਪਿੰਡ ਹਰੀਏਵਾਲਾ ਦੇ ਸਰਪੰਚ ਚਮਕੌਰ ਸਿੰਘ ਵੱਲੋਂ ਬੱਸ ਕੀਤੀ ਗਈ ਸੀ। ਪਰ ਸਵੇਰੇ ਜਲਦੀ ਜਾਣਾ ਸੀ ਅਤੇ ਸ਼ਾਮ ਨੂੰ ਆਉਣ ਵਿੱਚ ਦੇਰੀ ਹੋਣੀ ਸੀ, ਇਸ ਲਈ ਉਨ੍ਹਾਂ ਨੇ ਆਪਣੀ ਮਾਤਾ ਲਖਵੀਰ ਕੌਰ ਨਾਲ ਗੱਲ ਕੀਤੀ। ਜਿਸ 'ਤੇ ਲਖਵੀਰ ਕੌਰ ਨੇ ਕਿਹਾ ਕਿ ਉਸ ਨੂੰ ਚਿੰਤਾ ਕਰਨ ਦੀ ਲੋੜ ਨਹੀਂ, ਸਵੇਰੇ ਸਾਰਿਆਂ ਲਈ ਲੰਗਰ ਤਿਆਰ ਮਿਲੇਗਾ। ਸਰਪੰਚ ਚਮਕੌਰ ਸਿੰਘ ਅਨੁਸਾਰ ਸਵੇਰੇ ਜਦੋਂ ਉਹ ਸੋ ਕੇ ਉੱਠੇ ਤਾਂ ਉਨ੍ਹਾਂ ਦੀ ਮਾਤਾ ਲੰਗਰ ਤਿਆਰ ਕਰਵਾ ਚੁੱਕੀ ਸੀ। ਜਿਸ ਕਾਰਨ ਉਨ੍ਹਾਂ ਨੂੰ ਬਹੁਤ ਖ਼ੁਸ਼ੀ ਹੋਈ ਅਤੇ ਉਨ੍ਹਾਂ ਨੇ ਇਸ ਦੀ ਇੱਕ ਵੀਡੀਓ ਬਣਾਈ। ਰੈਲੀ ਵਿੱਚ ਜਾਂਦੇ ਸਮੇਂ ਜਦੋਂ ਉਨ੍ਹਾਂ ਨੇ ਇਹ ਵੀਡੀਓ ਆਪਣੇ ਦੋਸਤਾਂ ਨੂੰ ਦਿਖਾਈ ਤਾਂ ਕਿਸੇ ਨੇ ਇਸ ਨੂੰ ਸੋਸ਼ਲ ਮੀਡੀਆ 'ਤੇ ਅਪਲੋਡ ਕਰ ਦਿੱਤਾ। ਇਹ ਵੀਡੀਓ ਮੁੱਖ ਮੰਤਰੀ ਭਗਵੰਤ ਮਾਨ ਤੱਕ ਪਹੁੰਚ ਗਈ, ਜਿਸ ਤੋਂ ਬਾਅਦ ਮੁੱਖ ਮੰਤਰੀ ਨੇ ਫ਼ੋਨ ਕਰਕੇ ਮਾਤਾ ਲਖਵੀਰ ਕੌਰ ਦਾ ਧੰਨਵਾਦ ਕੀਤਾ ਅਤੇ ਅਸ਼ੀਰਵਾਦ ਲਿਆ।