ਗੈਸ ਦੀ ਕਮੀ ਕਾਰਨ ਲੋਕ ਬਿਜਲਈ ਚੁੱਲ੍ਹੇ ਖਰੀਦਣ ਲਈ ਮਜਬੂਰ

ਵਿਕਾਸ ਕੁਮਾਰ ਗਰਗ ਪੰਜਾਬੀ ਜਾਗਰਣ ਫ਼ਰੀਦਕੋਟ : ਐੱਲਪੀਜੀ ਗੈਸ ਦੀ ਘਾਟ ਅਤੇ ਇਸ ਦੀਆਂ ਵਧੀਆਂ ਕੀਮਤਾਂ ਗਰੀਬਾਂ ਨੂੰ ਬੁਰੀ ਤਰ੍ਹਾਂ ਪ੍ਰਭਾਵਿਤ ਕਰ ਰਹੀਆਂ ਹਨ। ਇਸ ਨਾਲ ਛੋਟੇ ਦੁਕਾਨਦਾਰਾਂ ਅਤੇ ਢਾਬਾ ਮਾਲਕਾਂ ਦੀ ਰੋਜ਼ੀ-ਰੋਟੀ ਨੂੰ ਖ਼ਤਰਾ ਪੈਦਾ ਹੋ ਰਿਹਾ ਹੈ। ਲੋਕ ਹੁਣ ਲੱਕੜਾਂ ਵਾਲੇ ਚੁੱਲੇ ਅਤੇ ਬਿਜਲੀ ਵਾਲੇ ਚੁੱਲੇ ਵੱਲ ਆਪਦਾ ਰੁੱਖ ਕਰ ਰਹੇ ਹਨ। ਗੈਸ ਦੀ ਕਮੀ ਕਾਰਨ ਲੋਕਾਂ ਨੂੰ ਬਿਜਲੀ ਨਾਲ ਚਲਣ ਵਾਲੇ ਚੁੱਲੇ ਖਰੀਦਣੇ ਪੈ ਰਹੇ ਹਨ ਜਿਸ ਦੇ ਨਾਲ ਉਹਨਾਂ ਦੀ ਜੇਬ ਤੇ ਵਾਧੂ ਦਾ ਭਾਰ ਪੈ ਰਿਹਾ ਹੈ ਗੈਸ ਦੀ ਕਮੀ ਕਾਰਨ ਵੱਡੇ ਨੁਕਸਾਨ ’ਚ ਰੋਜ਼ੀ-ਰੋਟੀ 'ਤੇ ਪ੍ਰਭਾਵ, ਸੜਕ ਕਿਨਾਰੇ ਚਾਹ ਦੀਆਂ ਦੁਕਾਨਾਂ ਅਤੇ ਛੋਟੇ ਢਾਬਾ ਮਾਲਕਾਂ ਦਾ ਰੁਜ਼ਗਾਰ ਠੱਪ ਹੋ ਗਿਆ ਹੈ। ਵਪਾਰਕ ਗੈਸ ਸਿਲੰਡਰਾਂ ਦੀ ਉਪਲਬਧਤਾ ਨਾ ਹੋਣ ਕਾਰਨ ਉਨ੍ਹਾਂ ਦਾ ਰੁਜ਼ਗਾਰ ਖਤਮ ਹੋਣ ਦੇ ਕੰਢੇ ਹੈ। ਇੱਕ ਚਾਹ ਦੀ ਦੁਕਾਨ ਦੇ ਮਾਲਕ, ਡੀਜੇ ਸਿੰਘ ਨੇ ਕਿਹਾ ਕਿ ਉਸਨੂੰ ਕਈ ਦਿਨਾਂ ਤੋਂ ਸਿਲੰਡਰ ਨਹੀਂ ਮਿਲਿਆ ਹੈ, ਜਿਸ ਕਾਰਨ ਉਸਦਾ ਕੰਮ ਰੁਕ ਗਿਆ ਹੈ ਅਤੇ ਘਰੇਲੂ ਖਰਚਿਆਂ ਨੂੰ ਪੂਰਾ ਕਰਨਾ ਮੁਸ਼ਕਲ ਹੋ ਗਿਆ ਹੈ। ਬਹੁਤ ਸਾਰੇ ਛੋਟੇ ਅਤੇ ਵੱਡੇ ਢਾਬੇ ਅਤੇ ਚਾਹ ਵਿਕਰੇਤਾਵਾਂ ਨੇ ਡੀਜਲ ਦੀ ਭੱਠੀ ਦਾ ਪ੍ਰਬੰਧ ਕੀਤਾ ਹੈ, ਪਰ ਇਹ ਮਹਿੰਗੇ ਸਾਬਤ ਹੋ ਰਹੇ ਹਨ। ਇਸ ਕਾਰਨ, ਉਹ ਆਪਣੇ ਉਤਪਾਦਾਂ ਦੀਆਂ ਕੀਮਤਾਂ ਵਧਾਉਣ ਲਈ ਮਜਬੂਰ ਹਨ। ਉੱਚੀਆਂ ਕੀਮਤਾਂ ਦੇ ਕਾਰਨ, ਗਾਹਕ ਉਨ੍ਹਾਂ ਨੂੰ ਖਰੀਦਣ ਤੋਂ ਝਿਜਕਦੇ ਹਨ। ਇੱਕ ਕੱਪ ਚਾਹ ਜੋ ਪਹਿਲਾਂ 10 ਰੁਪਏ ਦੀ ਹੁੰਦੀ ਸੀ ਹੁਣ 15 ਤੋਂ 20 ਰੁਪਏ ਵਿੱਚ ਵਿਕ ਰਹੀ ਹੈ। ਬਹੁਤ ਸਾਰੇ ਲੋਕ ਕਹਿੰਦੇ ਹਨ ਕਿ ਗੈਸ ਬੁਕਿੰਗ ਨਹੀਂ ਕੀਤੀ ਜਾ ਰਹੀ ਹੈ। ਗੈਸ ਬੁਕਿੰਗ ਲਈ ਵਰਤਿਆ ਜਾਣ ਵਾਲਾ ਨੰਬਰ ਹਮੇਸ਼ਾ ਡਿਸਕਨੈਕਟ ਹੁੰਦਾ ਹੈ। ਨਾ ਤਾਂ ਸਥਾਨਕ ਏਜੰਸੀ ਮਾਲਕ ਫ਼ੋਨ ਚੁੱਕ ਰਹੇ ਹਨ ਅਤੇ ਨਾ ਹੀ ਬੁਕਿੰਗ ਕਰ ਰਹੇ ਹਨ। ਇਸ ਨਾਲ ਐਲਪੀਜੀ ਖਪਤਕਾਰਾਂ ਨੂੰ ਭਾਰੀ ਪ੍ਰੇਸ਼ਾਨੀ ਹੋ ਰਹੀ ਹੈ। ਬਲਦੇਵ ਕੁਮਾਰ, ਮਹਿੰਦਰ ਕੁਮਾਰ, ਓਮ ਪ੍ਰਕਾਸ਼, ਬਲਦੇਵ ਸਿੰਘ, ਸੁਖਚੈਨ ਸਿੰਘ, ਅਤੇ ਹੋਰ ਕਹਿੰਦੇ ਹਨ ਕਿ ਉਹ ਵਾਰ-ਵਾਰ ਕੋਸ਼ਿਸ਼ ਕਰ ਰਹੇ ਹਨ, ਪਰ ਕੋਈ ਵੀ ਏਜੰਸੀ ਮਾਲਕ ਫ਼ੋਨ ਨਹੀਂ ਚੁੱਕ ਰਿਹਾ ਹੈ, ਨਾ ਹੀ ਔਨਲਾਈਨ ਬੁਕਿੰਗ ਨੰਬਰ 'ਤੇ ਸਿਲੰਡਰ ਬੁੱਕ ਕੀਤੇ ਜਾ ਰਹੇ ਹਨ। ਪ੍ਰਸ਼ਾਸਨ ਵੱਡੇ-ਵੱਡੇ ਦਾਅਵੇ ਕਰ ਰਿਹਾ ਹੈ ਕਿ ਗੈਸ ਦੀ ਕੋਈ ਕਮੀ ਨਹੀਂ ਹੈ ਅਤੇ ਸਪਲਾਈ ਸੁਚਾਰੂ ਢੰਗ ਨਾਲ ਚੱਲ ਰਹੀ ਹੈ। ਪ੍ਰੰਤੂ ਜਮੀਨੀ ਹਕੀਕਤ ਕੁਝ ਹੋਰ ਹੀ ਨਜ਼ਰ ਆ ਰਹੀ ਹੈ। ਗਰੀਬ ਪਰਿਵਾਰਾਂ ਲਈ, ਬਾਜ਼ਾਰ ਰਾਹੀਂ ਸਿਲੰਡਰ ਖਰੀਦਣਾ ਅਸੰਭਵ ਹੋ ਗਿਆ ਹੈ, ਜਿਸ ਕਾਰਨ ਉਹ ਭੁੱਖੇ ਰਹਿਣ ਲਈ ਮਜਬੂਰ ਹਨ।ਫੈਕਟਰੀਆਂ, ਭੱਠਿਆਂ ਅਤੇ ਉਦਯੋਗਾਂ ਵਿੱਚ ਕੰਮ ਕਰਨ ਵਾਲੇ ਬਹੁਤ ਸਾਰੇ ਗਰੀਬ ਪਰਿਵਾਰਾਂ ਕੋਲ 14 ਕਿਲੋਗ੍ਰਾਮ ਦੇ ਵੱਡੇ ਸਿਲੰਡਰ ਨਹੀਂ ਹਨ। ਉਨ੍ਹਾਂ ਕੋਲ 5 ਕਿਲੋਗ੍ਰਾਮ ਦੇ ਛੋਟੇ ਸਿਲੰਡਰ ਹਨ, ਜਿਨ੍ਹਾਂ 'ਵਿੱਚ ਉਹ ਆਪਣੇ ਗੁਜ਼ਾਰੇ ਲਈ ਦੋ ਚਾਰ ਕਿਲੋ ਗੈਸ ਪ੍ਰਵਾ ਲੈਂਦੇ ਸੀ। ਹਾਲਾਂਕਿ, ਹੁਣ ਗੈਸ ਦੀ ਘਾਟ ਕਾਰਨ ਉਨ੍ਹਾਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਰਾਮਕੁਮਾਰ ਸ਼ੇਰਪਾਲ, ਇੱਕ ਮਜ਼ਦੂਰ, ਨੇ ਕਿਹਾ ਕਿ ਉਹ ਇੱਕ ਭੱਠੇ 'ਤੇ ਕੰਮ ਕਰਦੇ ਹਨ ਅਤੇ ਉਸ ਕੋਲ 5 ਕਿਲੋਗ੍ਰਾਮ ਦਾ ਇੱਕ ਛੋਟਾ ਸਿਲੰਡਰ ਹੈ ਜਿਸ ਨਾਲ ਉਹ ਆਪਣਾ ਖਾਣਾ ਪਕਾਉਂਦੇ ਸੀ। ਪਰ ਹੁਣ ਗੈਸ ਨਾ ਮਿਲਣ ਕਰਕੇ ਉਨਾਂ ਨੂੰ ਚੁੱਲੇ ਤੇ ਕੰਮ ਕਰਨਾ ਪੈ ਰਿਹਾ ਜਦ ਕਿ ਲੱਕੜਾਂ ਵੀ ਮਹਿੰਗੀਆਂ ਹਨ ਜਿਸ ਨਾਲ ਖਰਚਾ ਚਲਣਾ ਮੁਸ਼ਕਿਲ ਹੋ ਜਾਵੇਗਾ।।

-----

ਬੁਕਿੰਗ ਦੀ ਸੁਵਿਧਾ ਸ਼ੁਰੂ ਕੀਤੀ ਜਾਵੇਗੀ : ਗੁਰਜੀਤ ਸਿੰਘ

ਇਸ ਸੰਬੰਧਿਤ ਜਦੋਂ ਫੂਡ ਸਪਲਾਈ ਵਿਭਾਗ ਅਧਿਕਾਰੀ ਗੁਰਜੀਤ ਸਿੰਘ ਨਾਲ ਗੱਲ ਕੀਤੀ ਗਈ ਤਾਂ ਉਹਨਾਂ ਕਿਹਾ ਕਿ ਇਹੋ ਜਿਹੀ ਕੋਈ ਗੱਲ ਨਹੀਂ ਹੈ। ਅਚਾਨਕ ਬੁਕਿੰਗ ਦੀ ਤਾਦਾਦ ਵਧਣ ਕਰਕੇ ਨੰਬਰ ਲੋੜ ਕਾਰਨ ਨਹੀਂ ਲੱਗ ਰਿਹਾ ਉਹਨਾਂ ਕਿਹਾ ਕੀ ਚੰਡੀਗੜ੍ਹ ਉੱਚ ਅਧਿਕਾਰੀਆਂ ਨਾਲ ਸੰਪਰਕ ਕੀਤਾ ਜਾ ਰਿਹਾ ਜਲਦ ਹੀ ਬੁਕਿੰਗ ਦੀ ਸੁਵਿਧਾ ਸ਼ੁਰੂ ਹੋ ਜਾਵੇਗੀ