ਪੰਜਾਬ ਯੂਨੀਵਰਸਿਟੀ ਦੇ ਡੀਯੂਆਈ ਤੇ ਡਾਇਰੈਕਟਰ ਰਿਸਰਚ ਨੂੰ ਇੱਕ ਮਹੀਨੇ ਦਾ ਸੇਵਾ ਵਿਸਥਾਰ

ਸਟਾਫ ਰਿਪੋਰਟਰ, ਪੰਜਾਬੀ ਜਾਗਰਣ, ਚੰਡੀਗੜ੍ਹ: ਪੰਜਾਬ ਯੂਨੀਵਰਸਿਟੀ ਵਿੱਚ ਅਕਾਦਮਿਕ ਮਾਮਲਿਆਂ ਨਾਲ ਸੰਬੰਧਿਤ ਡੀਨ ਯੂਨੀਵਰਸਿਟੀ ਇੰਸਟਰਕਸ਼ਨ (ਡੀਯੂਆਈ) ਅਤੇ ਡਾਇਰੈਕਟਰ ਰਿਸਰਚ ਐਂਡ ਡਿਵੈਲਪਮੈਂਟ ਸੈੱਲ ਨੂੰ ਇੱਕ ਮਹੀਨੇ ਦਾ ਸੇਵਾ ਵਿਸਥਾਰ ਦਿੱਤਾ ਗਿਆ ਹੈ। ਜਾਣਕਾਰੀ ਅਨੁਸਾਰ ਡੀਯੂਆਈ ਪ੍ਰੋ. ਯੋਜਨਾ ਰਾਵਤ ਅਤੇ ਡਾਇਰੈਕਟਰ ਰਿਸਰਚ ਐਂਡ ਡਿਵੈਲਪਮੈਂਟ ਪ੍ਰੋ. ਮੀਨਾਕਸ਼ੀ ਗੋਯਲ ਹੁਣ 30 ਅਪ੍ਰੈਲ ਤੱਕ ਆਪਣੇ ਅਹੁਦਿਆਂ ’ਤੇ ਕਾਇਮ ਰਹਿਣਗੇ । ਇਸ ਸੰਬੰਧ ਵਿੱਚ ਯੂਨੀਵਰਸਿਟੀ ਦੇ ਕੁਲਪਤੀ ਵੱਲੋਂ ਮਨਜ਼ੂਰੀ ਦੇ ਦਿੱਤੀ ਗਈ ਹੈ। ਜ਼ਿਕਰਯੋਗ ਹੈ ਕਿ ਇਨ੍ਹਾਂ ਦੋਵੇਂ ਅਹੁਦਿਆਂ ’ਤੇ ਨਿਯੁਕਤੀ ਦਾ ਫ਼ੈਸਲਾ ਆਮ ਤੌਰ ’ਤੇ ਪੀਯੂ ਸਿੰਡਿਕੇਟ ਅਤੇ ਸੀਨੇਟ ਕਰਦੇ ਹਨ, ਪਰ ਇਸ ਵੇਲੇ ਇਹ ਸਾਰੀਆਂ ਸ਼ਕਤੀਆਂ ਕੁਲਪਤੀ ਪ੍ਰੋ. ਰੇਣੂ ਵਿਗ ਕੋਲ ਹਨ। ਡੀਯੂਆਈ ਯੂਨੀਵਰਸਿਟੀ ਦੇ ਅਕਾਦਮਿਕ ਮਾਮਲਿਆਂ ਦੀ ਦੇਖਭਾਲ ਕਰਦਾ ਹੈ, ਜਦਕਿ ਡਾਇਰੈਕਟਰ ਰਿਸਰਚ ਰਿਸਰਚ ਨਾਲ ਜੁੜੇ ਮਾਮਲਿਆਂ ਨੂੰ ਸੰਭਾਲਦਾ ਹੈ। ਡੀਯੂਆਈ ਪ੍ਰੋ. ਯੋਜਨਾ ਰਾਵਤ ਦਾ ਕਾਰਜਕਾਲ ਮਾਰਚ 2026 ਵਿੱਚ ਪੂਰਾ ਹੋ ਚੁੱਕਾ ਹੈ ਅਤੇ ਅਪ੍ਰੈਲ ਵਿੱਚ ਉਹ 60 ਸਾਲ ਦੀ ਉਮਰ ਪੂਰੀ ਕਰਕੇ ਰਿਟਾਇਰ ਹੋ ਰਹੀ ਹਨ। ਇਸ ਕਾਰਨ ਯੂਨੀਵਰਸਿਟੀ ਪ੍ਰਸ਼ਾਸਨ ਵੱਲੋਂ ਉਨ੍ਹਾਂ ਨੂੰ ਇੱਕ ਮਹੀਨੇ ਦਾ ਸੇਵਾ ਵਿਸਥਾਰ ਦਿੱਤਾ ਗਿਆ ਹੈ। ਦੂਜੇ ਪਾਸੇ ਡਾਇਰੈਕਟਰ ਰਿਸਰਚ ਐਂਡ ਡਿਵੈਲਪਮੈਂਟ ਸੈੱਲ ਦੀ ਪ੍ਰੋ. ਮੀਨਾਕਸ਼ੀ ਗੋਯਲ ਨੂੰ ਪਹਿਲਾਂ ਅਣਨਿਰਧਾਰਤ ਸਮੇਂ (ਟਿੱਲ ਆਰਡਰ) ਲਈ ਨਿਯੁਕਤੀ ਦਿੱਤੀ ਗਈ ਸੀ, ਪਰ ਹੁਣ ਉਨ੍ਹਾਂ ਨੂੰ ਵੀ 30 ਅਪ੍ਰੈਲ ਤੱਕ ਅਹੁਦੇ ’ਤੇ ਬਣੇ ਰਹਿਣ ਦੀ ਆਗਿਆ ਮਿਲ ਗਈ ਹੈ। ਸੂਤਰਾਂ ਅਨੁਸਾਰ ਪ੍ਰੋ. ਯੋਜਨਾ ਰਾਵਤ ਤੋਂ ਬਾਅਦ ਸੀਨੀਅਰ ਹੋਣ ਦੇ ਨਾਤੇ ਪ੍ਰੋ. ਮੀਨਾਕਸ਼ੀ ਗੋਯਲ ਦਾ ਡੀਯੂਆਈ ਬਣਨਾ ਲਗਭਗ ਤੈਅ ਮੰਨਿਆ ਜਾ ਰਿਹਾ ਹੈ। ਡੀਯੂਆਈ ਦੀ ਨਿਯੁਕਤੀ ਆਮ ਤੌਰ ’ਤੇ ਇੱਕ ਸਾਲ ਲਈ ਹੁੰਦੀ ਹੈ, ਜਿਸ ਨੂੰ ਸਿੰਡੀਕੇਟ ਤੇ ਸੀਨੇਟ ਦੀ ਮਨਜ਼ੂਰੀ ਤੋਂ ਬਾਅਦ ਵਧਾਇਆ ਜਾ ਸਕਦਾ ਹੈ ਪਰ ਰਿਟਾਇਰਮੈਂਟ ਤੋਂ ਬਾਅਦ ਕਿਸੇ ਪ੍ਰੋਫੈਸਰ ਨੂੰ ਇਹ ਅਹੁਦਾ ਨਹੀਂ ਦਿੱਤਾ ਜਾ ਸਕਦਾ। ਇਸ ਸਮੇਂ ਕੁਲਪਤੀ ਪ੍ਰੋ. ਰੇਣੂ ਵਿਗ ਵੀ 28 ਮਾਰਚ ਨੂੰ ਆਪਣਾ 3 ਸਾਲਾਂ ਦਾ ਕਾਰਜਕਾਲ ਪੂਰਾ ਕਰਨ ਤੋਂ ਬਾਅਦ 4 ਮਹੀਨੇ ਦੇ ਸੇਵਾ ਵਿਸਥਾਰ ’ਤੇ ਕੰਮ ਕਰ ਰਹੀ ਹਨ। ਇਸ ਦੇ ਨਾਲ ਹੀ ਨਵੇਂ ਕੁਲਪਤੀ ਦੀ ਨਿਯੁਕਤੀ ਲਈ ਪ੍ਰਕਿਰਿਆ ਵੀ ਸ਼ੁਰੂ ਹੋ ਚੁੱਕੀ ਹੈ। ਯੂਨੀਵਰਸਿਟੀ ਦੇ ਰਜਿਸਟਰਾਰ ਵੱਲੋਂ 5 ਮਈ ਤੱਕ ਯੋਗ ਉਮੀਦਵਾਰਾਂ ਤੋਂ ਅਰਜ਼ੀਆਂ ਮੰਗੀਆਂ ਗਈਆਂ ਹਨ। ਸੂਤਰਾਂ ਮੁਤਾਬਕ ਇਸ ਵਾਰ ਦੇਸ਼ ਭਰ ਤੋਂ 200 ਤੋਂ ਵੱਧ ਅਰਜ਼ੀਆਂ ਆਉਣ ਦੀ ਸੰਭਾਵਨਾ ਹੈ, ਜਿਨ੍ਹਾਂ ਵਿੱਚੋਂ 20 ਤੋਂ 25 ਪ੍ਰੋਫੈਸਰ ਪੰਜਾਬ ਯੂਨੀਵਰਸਿਟੀ ਨਾਲ ਹੀ ਸਬੰਧਤ ਹੋ ਸਕਦੇ ਹਨ। ਪਿਛਲੀ ਵਾਰ ਕਰੀਬ 135 ਉਮੀਦਵਾਰਾਂ ਨੇ ਅਰਜ਼ੀ ਦਿੱਤੀ ਸੀ ਪਰ ਬਿਨਾਂ ਇੰਟਰਵਿਊ ਦੇ ਹੀ ਪ੍ਰੋ. ਰੇਣੂ ਵਿਗ ਨੂੰ ਮਾਰਚ 2023 ’ਚ ਸਥਾਈ ਕੁਲਪਤੀ ਨਿਯੁਕਤ ਕਰ ਦਿੱਤਾ ਗਿਆ ਸੀ।