ਸੁਰਖ਼ਾਬ ਦੀ ਕਾਵਿ ਕਿਤਾਬ ‘ਵੈਤਰਨੀ’ ’ਤੇ ਹੋਈ ਵਿਚਾਰ ਚਰਚਾ

ਸਟਾਫ ਰਿਪੋਰਟਰ, ਪੰਜਾਬੀ ਜਾਗਰਣ, ਚੰਡੀਗੜ੍ਹ : ਸਵਪਨ ਫਾਊਂਡੇਸ਼ਨ ਪਟਿਆਲਾ ਅਤੇ ਪੰਜਾਬ ਕਲਾ ਪ੍ਰੀਸ਼ਦ ਚੰਡੀਗੜ੍ਹ ਵੱਲੋਂ ਸੈਕਟਰ-16 ਦੇ ਪੰਜਾਬ ਕਲਾ ਭਵਨ ਵਿਖੇ ‘ਇਕ ਸ਼ਾਮ’ ਤਹਿਤ ਨੌਜਵਾਨ ਸ਼ਾਇਰ ਸੁਰਖ਼ਾਬ ਦੀ ਕਾਵਿ-ਕਿਤਾਬ ‘ਵੈਤਰਨੀ’ ’ਤੇ ਵਿਚਾਰ ਚਰਚਾ ਕਰਵਾਈ ਗਈ। ਸਭ ਤੋਂ ਪਹਿਲਾਂ ਫਾਊਂਡੇਸ਼ਨ ਦੇ ਕਾਰਜਕਾਰਨੀ ਮੈਂਬਰ ਸੁਰਜੀਤ ਸੁਮਨ ਨੇ ਸਭ ਆਏ ਦੋਸਤਾਂ ਦਾ ਸਵਾਗਤ ਕਰਦੇ ਹੋਏ ਸੰਸਥਾ ਵੱਲੋਂ ਕੀਤੇ ਕਾਰਜਾਂ ’ਤੇ ਚਾਨਣਾ ਪਾਇਆ। ਇਸ ਉਪਰੰਤ ‘ਵੈਤਰਨੀ’ ਦੇ ਲੇਖਕ ਸੁਰਖ਼ਾਬ ਨੇ ਆਪਣੀਆਂ ਕਵਿਤਾਵਾਂ ਦਾ ਪਾਠ ਕੀਤਾ ਅਤੇ ਕਾਵਿ ਯਾਤਰਾ ਬਾਬਤ ਦੱਸਿਆ। ਇਸ ਤੋੱ ਬਾਅਦ ਸ਼ਾਇਰ ਧਰਮਿੰਦਰ ਸੇਖੋਂ ਨੇ ਕਿਹਾ ਕਿ ਸੁਰਖ਼ਾਬ ਦੀ ਕਵਿਤਾ ਆਚੰਭਿਤ ਕਰਦੀ ਹੈ ਅਤੇ ਲੱਗਦਾ ਹੈ ਕਿ ਕਵੀ ਵਿਚ ਇਕ ਰਿਸ਼ੀ ਬੈਠਾ ਹੈ। ਸਮਾਗਮ ਦੇ ਅਗਲੇ ਦੌਰ ਵਿਚ ਕਵਿਤਾ ਦੇ ਉੱਘੇ ਆਲੋਚਕ ਡਾ. ਯੋਗਰਾਜ ਅੰਗਰੀਸ਼ ਨੇ ਕਿਹਾ ਕਿ ਕਵੀ ਦੀ ਵੱਖਰੀ ਕਿਸਮ ਦੀ ਕਵਿਤਾ ਹੈ ਅਤੇ ਕਾਵਿ-ਉਡਾਣ ਬਹੁਤ ਵੱਡੀ ਹੈ। ਸੁਰਖ਼ਾਬ ਸ਼ਬਦਾਂ ਰਾਹੀਂ ਫੋਟੋਆਂ ਖਿੱਚ ਕੇ ਤੁਹਾਡੇ ਅੱਗੇ ਰੱਖ ਦਿੰਦਾ ਹੈ। ਉਨ੍ਹਾਂ ਕਿਹਾ ਕਿ ਕਵੀ ਨੇ ਦਰਸ਼ਨ ਤੇ ਬਹੁਤ ਕੁਝ ਸਿੱਖਣਾ ਹੈ ਜਿਹੜਾ ਉਸ ਨੇ ਉਮਰ ਦੇ ਹਿਸਾਬ ਨਾਲ ਆਉਣਾ ਹੈ, ਭਾਵੇਂ ਉਸ ਦੀ ਸ਼ੁਰੂਆਤ ਹੋ ਚੁੱਕੀ ਹੈ। ਪੰਜਾਬ ਯੂਨੀਵਰਸਿਟੀ ਤੋਂ ਉੱਘੇ ਆਲੋਚਕ ਡਾ. ਪ੍ਰਵੀਨ ਕੁਮਾਰ ਨੇ ਕਿਹਾ ਕਿ ਜੇਕਰ ਕਵੀ ਦੀ ਉਮਰ ਛੋਟੀ ਹੈ ਤਾਂ ਉਸ ਨੂੰ ਕਿਸੇ ਤੁਲਣਾ ਵਿਚ ਨਾ ਪਾਇਆ ਜਾਵੇ, ਇਸ ਨਾਲ ਉਸ ਦੀ ਕਵਿਤਾ ਨੂੰ ਛੋਟਾ ਕਰਨਾ ਹੈ। ਨੌਜਵਾਨ ਆਲੋਚਕਾ ਜਸ਼ਨਪ੍ਰੀਤ ਕੌਰ ਨੇ ਕਿਹਾ ਕਿ ਕਵੀ ਦੇ ਅੰਦਰ ਜਦੋਂ ਕਵਿਤਾ ਦਾ ਪਿਟਾਰਾ ਖੁੱਲ੍ਹਦਾ ਹੈ ਤਾਂ ਦੇਖਣਾ ਬਣਦਾ ਹੈ ਕਿ ਇਸ ਸਿਰਜਣਾਤਮਕਤਾ ਦੇ ਕੀ ਕਾਰਨ ਹਨ। ਸੋ ਸੁਰਖ਼ਾਬ ਨੂੰ ਘਰ ਦੇ ਮਾਹੌਲ ਨੇ ਕਵੀ ਬਣਾਇਆ ਹੈ। ਉਨ੍ਹਾਂ ਨੇ ਕਵੀ ਦੇ ਧੁਨੀ ਬਿੰਬ ਤੋਂ ਦ੍ਰਿਸ਼ ਬਿੰਬ ਦੀ ਵੀ ਗੱਲ ਕੀਤੀ। ਜਸਪਾਲ ਫਿਰਦੌਸੀ ਨੇ ਕਿਹਾ ਕਿ ਕਵੀ ਨੂੰ ਵਧੀਆ ਪੜ੍ਹਤ ਹੀ ਸਿਰਜਣਾਤਮਕ ਤੌਰ ’ਤੇ ਬਚਾਏਗੀ। ਡਾ. ਹਰਮੇਲ ਨੇ ਅਗਾਂਹ ਕਿਹਾ ਕਿ ਉਹ ਹਾਲੇ ਇਸ ਕਵਿਤਾ ’ਤੇ ਕੰਮ ਕਰ ਰਹੇ ਹਨ। ਨਿਰਲੇਪ ਸਿੰਘ ਨੇ ਕਿਹਾ ਕਿ ਕਵੀ ਨੂੰ ਕਈ ਇਸ ਤਰ੍ਹਾਂ ਦੀਆਂ ਰੁਕਾਵਟਾਂ ਤੋਂ ਬਚਾਉਣਾ ਪੈਣਾ ਹੈ, ਜਿਸ ਨਾਲ ਉਸ ਦੇ ਲੇਖਨ ਨੂੰ ਨੁਕਸਾਨ ਪਹੁੰਚੇ। ਸ਼ਾਇਰਾ ਰਮਾ ਰਤਨ ਨੇ ਕਿਹਾ ਕਿ ਉਨ੍ਹਾਂ ਨੂੰ ਸੁਰਖ਼ਾਬ ਦੇ ਉਮਰ ਦੇ ਹਿਸਾਬ ਨਾਲ ਅਹਿਸਾਸਾਂ ਦੇ ਧੁੰਦਲੇ ਪੈ ਜਾਣ ਦੀ ਫ਼ਿਕਰ ਹੈ। ਡਾ. ਤੇਜਿੰਦਰ ਨੇ ਕਿਹਾ ਕਿ ਕਵੀ ਦੀ ਕਾਵਿ ਉਡਾਣ ਵੱਡੀ ਹੈ ਇਸ ਦੇ ਅਤਿ ਸੂਖ਼ਮ ਅਹਿਸਾਸ ਹਨ ਅਤੇ ਉਸ ਨੂੰ ਆਪਣੀ ਸ਼ੋਹਰਤ ਨੂੰ ਮਾਨਣਾ ਚਾਹੀਦਾ ਹੈ। ਉੱਘੇ ਕਵੀ ਗੁਲ ਚੌਹਾਨ ਨੇ ਕਵੀ ਦੀ ਛੋਟੀ ਉਮਰ ਵਿਚ ਇੰਨੀ ਉਮਦਾ ਪੜ੍ਹਤ ਤੇ ਲਿਖਤ ਬਾਰੇ ਹੈਰਾਨੀ ਪ੍ਰਗਟ ਕੀਤੀ। ਪ੍ਰਧਾਨਗੀ ਭਾਸ਼ਨ ਦਿੰਦਿਆਂ ਉੱਘੇ ਲੇਖਕ ਤੇ ਅਨੁਵਾਦਕ ਜੰਗ ਬਹਾਦਰ ਗੋਇਲ ਨੇ ਅੱਜ ਦੀ ਵਿਚਾਰ ਚਰਚਾ ਨੂੰ ਸਾਰਥਕ ਦੱਸਿਆ। ਉਨ੍ਹਾਂ ਅਗਾਂਹ ਕਿਹਾ ਕਿ ਕਵੀ ਜ਼ਰੂਰ ਹੀ ਚੰਗਾ ਪੜ੍ਹੇਗਾ ਵੀ। ਸਾਰੇ ਸਮਾਗਮ ਦਾ ਸੰਚਾਲਨ ਸ਼ਾਇਰ ਤੇ ਫਾਊਂਡੇਸ਼ਨ ਦੇ ਜਨਰਲ ਸਕੱਤਰ ਜਗਦੀਪ ਸਿੱਧੂ ਨੇ ਕੀਤਾ। ਇਸ ਚਰਚਾ ਵਿਚ ਪਾਲ ਅਜਨਬੀ, ਸੁਖਵਿੰਦਰ ਸਿੱਧੂ, ਸ਼ਾਇਰ ਭੱਟੀ, ਵਰਿੰਦਰ ਸਿੰਘ, ਮਾਲਦੀਪ ਸਿੱਧੂ, ਬਲਜੀਤ ਕੌਰ, ਅਵਤਾਰ ਸਿੰਘ ਪਤੰਗ, ਚਰਨਜੀਤ ਬਾਠ, ਡਾ. ਸੰਦੀਪ ਸ਼ਰਮਾ, ਕੋਮਲ ਸ਼ਰਮਾ, ਸ਼ਮਸ਼ੇਰ ਸਾਹਿਲ, ਰਮਨ ਸੰਧੂ, ਸੁਰਿੰਦਰ ਸ਼ਰਮਾ ਅਦਿ ਨੇ ਸ਼ਮੂਲੀਅਤ ਕੀਤੀ।