ਐੱਮ.ਐੱਸ ਰੰਧਾਵਾ ਕਲਾ ਸਾਹਿਤ ਉਤਸਵ ਦਾ ਤੀਜਾ ਦਿਨ ਰਿਹਾ ਲਲਿਤ ਕਲਾਵਾਂ ਦੇ ਨਾਮ

ਤਰੁਣ ਭਜਨੀ, ਪੰਜਾਬੀ ਜਾਗਰਣ, ਚੰਡੀਗੜ੍ਹ : ਪੰਜਾਬ ਕਲਾ ਪਰਿਸ਼ਦ, ਚੰਡੀਗੜ੍ਹ ਵੱਲੋਂ, ਐੱਮਐੱਸ ਰੰਧਾਵਾ ਸਾਹਿਤ ਕਲਾ ਉਤਸਵ ਤਹਿਤ ਅੱਜ ਤੀਜੇ ਦਿਨ ਸਭ ਤੋਂ ਪਹਿਲਾਂ 'ਲਲਿਤ ਕਲਾ ਅਕਾਦਮੀ' ਵੱਲੋੱ 'ਖੁੱਲ੍ਹਾ ਕੈਲੀਗ੍ਰਾਫੀ ਮੁਕਾਬਲਾ-2026 ਕਰਵਾਇਆ ਗਿਆ। ਜਿਸ ਵਿਚ 'ਕੈਲੀਗ੍ਰਾਫੀ' ਵਿਚ ਪਹਿਲਾ ਸਥਾਨ ਜੇਪੀ ਸਿੰਘ, ਦੂਜਾ ਸਥਾਨ ਸੋਨਜੀਤ ਕੌਰ, ਤੀਜਾ ਸਥਾਨ ਪਰਮਵੀਰ ਸਿੰਘ ਨੂੰ ਪ੍ਰਾਪਤ ਹੋਇਆ। ਹੌਸਲਾ ਹਫ਼ਜਾਈ ਲਈ, ਪਹਿਲਾ ਸਥਾਨ ਕ੍ਰਿਸ਼ਨਪ੍ਰੀਤ ਸਿੰਘ, ਦੂਜਾ ਸਥਾਨ ਨਿਤਿਨ ਕੁਮਾਰ ਤੀਜਾ ਸਥਾਨ ਪੁਪਿਤ, ਚੌਥਾ ਸਥਾਨ ਗੁਰਮੀਤ ਕੌਰ, ਪੰਜਵਾਂ ਸਥਾਨ ਗਾਇਤ੍ਰੀ ਨੂੰ ਪ੍ਰਾਪਤ ਹੋਇਆ। ਇਸ ਉਪਰੰਤ ਫੋਟੋਗ੍ਰਾਫੀ ਪ੍ਰਦਰਸ਼ਨੀ, ਰਵਿੰਦਰ ਸਿੰਘ ਰਵੀ(ਲੁਧਿਆਣਾ) ਵੱਲੋਂ ਲਾਈ ਗਈ। ਜਿਸ ਦਾ ਦਰਸ਼ਕਾਂ ਵੱਲੋਂ ਭਰਪੂਰ ਹੁੰਗਾਰਾ ਮਿਲਿਆ।

ਇਸ ਤੋਂ ਬਾਅਦ ਡਾ. ਯੋਗਰਾਜ ਦੁਆਰਾ ਐੱਮਐੱਸ ਰੰਧਾਵਾ ਬਾਰੇ ਪਰਚਾ ਪੜ੍ਹਿਆ ਗਿਆ। ਉਹਨਾਂ ਰੰਧਾਵਾ ਨੂੰ ਬਹੁਪੱਖੀ ਸ਼ਖ਼ਸੀਅਤ ਆਖਿਆ ਅਤੇ ਕਿਹਾ ਕਿ ਇਹਨਾਂ ਦੀ ਸ਼ਖ਼ਸੀਅਤ ਨੂੰ ਇਕ ਪਹਿਲੂ ਵਿਚ ਨਹੀਂ ਵੰਡਿਆ ਜਾ ਸਕਦਾ ਪਰ ਮੈਂ ਕਲਾ ਪੱਖ ਤੋਂ ਉਹਨਾਂ ਬਾਰੇ ਗੱਲ ਕਰਾਂਗਾਂ। ਉਹਨਾਂ ਅਗਾਂਹ ਕਿਹਾ ਰਾਧਾਵਾ ਸਾਹਿਬ ਕਲਾ ਪਾਰਖੂ ਤੇ ਲੇਖਕ ਸਨ; ਉਹਨਾਂ ਨੇ 37 ਪੁਸਤਕਾਂ ਖੁਦ ਲਿਖੀਆਂ ਤੇ 70 ਕਿਤਾਬਾਂ ਉਹਨਾਂ ਨਾਲ ਸੰਬੰਧਿਤ ਹਨ। ਇਸ ਉਪਰੰਤ ਸ਼੍ਰੀ ਅਮਰਜੀਤ ਸਿਂਘ ਗਰੇਵਾਲ ਵੱਲੋਂ ਲਲਿਤ ਕਲਾ ਵਿਚ ਪੰਜਾਬ ਗੌਰਵ ਸਨਮਾਨ-2026 ਪ੍ਰਾਪਤ ਕਰਤਾ ਦੇਵ ਇੰਦਰ ਬਾਰੇ ਪਰਚਾ 'ਦੇਵ ਇੰਦਰ ਦਾ ਕਲਾ ਸੰਸਾਰ' ਪੜ੍ਹਿਆ ਗਿਆ। ਉਹਨਾਂ ਆਪਣੇ ਪਰਚੇ ਵਿਚ ਕਿਹਾ ਕਿ ਦੇਵ ਇੰਦਰ ਨੇ ਚੰਡੀਗੜ੍ਹ ਤੋਂ ਜਾ ਕੇ ਪੰਜਾਬ ਵਿਚ ਕਲਾ ਨੂੰ ਹੁਲਾਰਾ ਦਿੱਤਾ। ਉਹਨਾਂ ਨੇ ਦੇਵ ਇੰਦਰ ਦੀ ਫੋਟੋਗ੍ਰਾਫੀ ਦੇ ਕਈ ਕਲਾ ਰੂਪਾਂ ਦੀ ਸ਼ਲਾਘਾ ਕੀਤੀ।

ਇਸ ਤੋਂ ਬਾਅਦ ਕੈਲੀਗ੍ਰਾਫੀ ਜੇਤੂ ਕਲਾਕਾਰਾਂ ਦਾ ਇਨਾਮ ਵੰਡ ਸਮਾਰੋਹ ਹੋਇਆ। ਜਿਸ ਵਿਚ ਸਵਰਨਜੀਤ ਸਵੀ, ਚੇਅਰਮੈਨ ਕਲਾ ਪਰਿਸ਼ਦ, ਯੋਗਰਾਜ ਅੰਗਰੀਸ਼ ਉਪ-ਪ੍ਰਧਾਨ, ਗੁਰਮੀਤ ਧੀਮਾਨ ਪ੍ਰਧਾਨ ਲਲਿਤ ਕਲਾ ਅਕਾਦਮੀ ਤੇ ਅਸ਼ਵਨੀ ਚੈਟਲੇ ਪ੍ਰਧਾਨ ਸੰਗਹਤ ਨਾਟਕ ਅਕਾਦਮੀ ਸ਼ਾਮਿਲ ਸਨ।

ਸਮਾਰੋਹ ਦੇ ਅਗਲੇ ਭਾਗ ਵਿਚ ਉੱਘੇ ਕਲਾਕਾਰ ਮਦਨ ਲਾਲ ਦੁਆਰਾ ਇੰਟਰਐਕਟਿਵ ਸੈਸ਼ਨ ਸਲਾਈਡ ਸ਼ੋਅ ਅਤੇ ਪੇਂਟਿੰਗ ਸਲਾਈਡ ਸ਼ੋਅ ਦਿਖਾਇਆ ਗਿਆ। ਜਿਸ ਨੂੰ ਦਰਸ਼ਕਾਂ ਵੱਲੋਂ ਖੂਬ ਸਲਾਹਿਆ ਗਿਆ। ਆਖ਼ਰ ਵਿਚ ਦੇਵ ਇੰਦਰ ਨਾਲ ਸੰਵਾਦ, ਅਮਰਜੀਤ ਗਰੇਵਾਲ, ਮਦਨ ਲਾਲ, ਸੁਭਾਸ਼ ਪਰਿਹਾਰ ਵੱਲੋਂ ਰਚਾਇਆ ਗਿਆ। ਮੰਚ ਸੰਚਾਲਨ ਅਕਾਦਮੀ ਦੀ ਸਕੱਤਰ ਸੁਮਿਤ ਦੁਆ ਵੱਲੋਂ ਕੀਤਾ ਗਿਆ।